TITUS
Middle Persian Corpus Jamasp-Asana
Part No. 34
Previous part

Text: Stayen.Afr.  
[abar stāyēnīdārīh ī sūr āfrīn]


pad nām ī dādār





Sentence: 1     āzādīh az yazdān ud wehān andar har gāh <ud> zamān guftan ud hangārdan sazāgwār, pad nāmčišt andar rōzgār-ē pad ēn ēwēnag.

Sentence: 2     gōš andar dārēd ašmā wēhān ēdar mad ēstēd tā abar-stāyēnīdārīh ī ēn sūr āfrīn az yazdān ud spās-dārīh ī ēn mēzdbān rāy saxwan gōwēm.

Sentence: 3     hamāg zōhr bawēd ohrmazd ī xwadāy kē pad mēnōgān ud gētīgān mahist, kē hamāg ēn dām ud dahišn dād, padiš pānag dāštār būd ēstēd.

Sentence: 4     hamāg zōhr, ēn haft amahraspand ī pad garōdmān hēnd, ohrmazd, wahman ud urdwahišt ud šahrewar ud spandarmad ud hordād ud amurdād.

Sentence: 5     hamāg zōhr ēn haft wahišt kē pad wīrōg bālāy : ēk pad mīharg-pāyag, dō pad star-pāyag, sē pad māh-payag, čahār pad xwaršēd-pāyag, panj pad harburz-pāyag, šaš.... haftum pad rōšn garōdmān ī was rōšnīh ī hu-čihr, Page: 379  brāzagtom ī purr-xwarrah ī purr-nēkīh kē pēš-gāh ī ohrmazd ī xwadāy, xwad pad mēnōgān xwadāyīh kē ēn haft amahraspand arzah, sawah ud fradadafš ud wīdadfš, wōrūbarišt, wōrūjarišt kē pad mayān xwanīrah ī bāmīg <ī> was-hambār ī purr-mardōm ī purr-nēkīh.

Sentence: 6     hamāg zōhr ādur<ī> farrōbāg {farrōbay} ud ādur<ī> gušnasp ud ādur ī burzēnmihr ud abārīg ādurān, ātaxšan ī pad dād-gāh nišāst ēstēnd, čand ahē-tar hamēšag-sōz, hamēšag-yazišn ud hamēšag-zōhr bawēnd.

Sentence: 7     hamāg zōhr mihr ī frāx-gōyōd ud srōš ī tagīg ud rašn ī rāst wahrām ī amāwand ud wāy ī weh ud wēh dēn ī māzdēsnān ud aštād ī frāz-dādār gēhān ud frawahr 1 ahlawān.

Sentence: 8     hamāg zōhr hamāg mēnōg ī meh ud weh kē pad sīh rōzag gāh paydāgēnīd ēstēd.

Sentence: 9     hamāg zōhr šāhān šāh ī mardān pahlom.

Page: 380 
Sentence: 10     hamāg zōhr pus, ī wāspuhr ī šāhān farroxtom, ī dāmān pahlomtom andar gēhān abāyišnīgtom.

Sentence: 11     hamāg zōhr wuzurg framādār kē pad wuzurgīh wuzurg ud pad pādixšāyīh pādixšāy ud pad-iz dahišnān meh ud weh.

Sentence: 12     hamāg zōhr xwarāsān spāhbed, hamāg zōhr xwarwarān spāhbed, hamag zōhr nēm-rōz spāhbēd.

Sentence: 13     hamāg zōhr dādwar ī dādwarān.

Sentence: 14     hamāg zōhr moγān handarzbed ud hamāg zōhr hazārbed, hamāg zōhr drōn-yaz.

Sentence: 15     hamāg zōhr meh ud weh kē yazdān pad ēn mēzd arzānīg kard, dahād zūd pad xwadāyīh ērān-šahr ud abrang pad mayan bawād čiyōn pad xwadāyīh ī jam ī šēd ī hu-ramag, rōzgār <ī> farrox wehān xwašīhā rāyēnēd, yazdān ēk-hazār padīrād ud āfrīn pad ham mērag ī mēzdbān kunād.

Sentence: 16     pad nāmčištīg āfrīn kunād kū abāg mardōmān ī xwad tan-drust ud dīr-zīwišn ud xwāstag pad abzōn ēdōn bawād čiyōn az abēstāg paydāg.

Page: 381 
Sentence: 17     ka-mān nēk stāyēnd, hāmōyēn gētīg xwaštar ud hamwār āfrīn pad ēn mān kunād kū was bawād pad ēn mān was asp ī raγ ud xwarrah mard ī gušn <ī> šāyendag ī hanjamanīg guftār abāg wihan ayād, was zarr abāg asēm, was jaw abāg gandum, was hambār purr-nēkīh ud huram ud huniyāg, bawēd nēk zamān ud nēk sāl ud nēk māh ud nēk rōz ud nēkīh az ēn mēzdbān rāy was nēktar.

Sentence: 18     spās ī ohrmazd, spās ī amahraspandan ud spās āsrōnān ud spās artēštārān ud spās wāstaryōšān ud spās hu-tuxšān ud spāsātaxšān ī pad gēhān, spās xwangarān ud spās huniyāgarān ud spās {!} darbānān ī pad dar, spās ēn mēzdbān kē ēn rōzgār handāxt ud sāxt, kard ud rāyēnīd nēk-man pih ud stabr-mān sūr ud pahlom-imān ham-rasišnīh ud stāyīšnīg ud menišnīg, gōwišnīg ud kunišnīg spāsdār ī azabar spāsdārīh, anē čiš nēst.

Sentence: 19     bē man saxwan wēš abāyēd guftan pēš ī ašmā wehān kū sagr hēm az xwarišn ud purr hēm az may ud huram hēm az rāmišn. bē ašmā wehān stāyišn ī yazdān ud āfrīn Page: 382  ī wehān bowandag guftan nē šāyēd, ašmā wehān ēdar mad ēstēd har čē wehtar dānēd guft, gōwēd.

Sentence: 20     čē man har čē farroxīhātar {farroxīhtar} čē man ārd ud ...(?) ud may azabar xward ēstēd. xwaš xufsēd ud yazdān pad xwamn wēnēd ud drust āxēzēd ud pad kār ud kirbag kardan tuxšāg bawēd, čē az bun-dahišn tā frazām kārīh, ōy farroxīhtar kē yazdān ōy pad frārōnīh, tuxšāgīh, arzānīg dārēd.

Sentence: 21     āfrīn čiyōn-am guft bē rasād, zamīg pahnāy ud rōd dranāy ud xwaršēd bālāy bē rasād. ēdōn bawād. ēdōntar bawād. frazaft pad drōd, šādīh ud rāmišn har wehān <ud> frārōn kunišnān.






Page: 383 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.