TITUS
Middle Persian Corpus Jamasp-Asana
Part No. 30
Previous part

Text: Nam.nibes.  
[abar ēwēnag nāmag nibēsišnīh]


pad nām ī yazdān




Sentence: 1     nūn nibēsīhēd, pad sazīd nibišt, nāmag-ē ō kas kas xwadāyān, ō pādixšāyān ud mehān ud abarmānīgān hamē pērōzgar, ō kardārān hamāg farroxtar, ō awēšān kē pad har āfrīn arzānīg hēnd: yazdān pānag ud šahr-ayār, ō aziš-kehān anōš-ayād hazār anōš, ō bandagān ud aziš-kehān hazār anōš-ayād, az anōšag-ayād andak frāz dāšt ēstēd. āzarmīg tom, garāmīg-tom, ō pidar ayāb brādarān ayāb frazandān ayāb ō awēšān kē hāwand ī pid ud brād ud frazand hēnd.

Sentence: 2     kē-tān az abzōnīg ganj ī yazdān, dagr-zīwišnīh {ī} drust tanīhā, ābādīh {ī} hangad burzišnīgīhā, farroxīh jāwēdān paywandišnīgīhā ud drōdōmandīh {ī} pattāyišnīgīhā ud rāmišn {ī} a-widērišnīgīhā ud a-kanārag afrīn tēz rasišnīgīhā ud wuzurg nām {ī} dūr brāzišnīgīhā ud pahlom ahlāyīh ruwān bōxtišnīgīhā, abardom {!} burzišn {ī} xwēš Page: 354  abē-gumānīhā, pad ēd farrox tan ud anōšag gyān bowandagīhā bawād. frazaft pad drōd.

Sentence: 3     yazdān ašmā hamwār andar abzōn <ī> wisp burzišn, rāy ud xwarrah ī wisp abrang ud a-sāg ud urwāhm ī wisp frārōnīh, bowandag xrad <ud> kāmag-hanjām dārānd.

Sentence: 4     kē-tān rasād az abargarān burzišn {ī} xwēš-kāmagīhā ud rāy ud nām {ī} nām abrangīhā ud bālistīg zōr {ud} pād yāwandīhā ud čihr ud brēh {ī} bayān hōmānāgīhā ud abrangīg stāyišn {ī} āzād-gōhrīhā, abēzag kardag uspurr-bahragīhā ud wuzurg kardārīh {ī} wehān windišnīhā pad ēd a-winast tan bowandagīhā pad kāmag bawād.

Sentence: 5     wuzurg-ummēd, abaxšāyišngar, wasān kas frayādišnīg, az har juttarīh abēzārēnīdār, dūr ud pad pahrēz dārānd, hamē pērōzgar wahmān ī wahmānān.

Sentence: 6     wuzurg kardār, kišwar rāyēnīdār, frārōnīh warzīdār ud Page: 355  driyōšān ayārīh dādār ud hammis dāmān, ummēdēnīdār, wahmān ī wahmānān.

Sentence: 7     gēhān payrāyag, kišwar abrang ud awestām magind, wahmān ī wahmānān.

Sentence: 8     yazdān zēn ud hunarāwandān zōr ud ērān pušt ud mazdēsnān pānag, wahmān ī wahmānān.

Sentence: 9     hamāg andar abrāz ī har farroxīh abzōn ud wisp burzišnīg ud urwāhm ī har dō axwān kāmag hanjam dārānd.

Sentence: 10     āzādag pad tōhmag ud āfrīn pad hunar ud abēzag pad kunišn ud bowandag pad xrad ud nāmīg pad har wehīh, wahmān ī wahmānān.

Sentence: 11     frāz-tom pad dānāgīh ud stūdag pad čihr ud brāh brāzišnīg andar āwām ud frayādišnīg andar har dō axwān, wahmān ī wahmānān.

Sentence: 12     drust pad gōhr <ud> wirāstag pad xēm, abaxšāyišngar andar pādixšāyīh ud xūb warz andar frārōnīh ud ayār ō har wehān, wahmān ī wahmānān.

Sentence: 13     kē-tān az abargarān, abar baxšāyišnīh, wisp rāy ud xwarrah ud har farroxīh ud burzišn padiš mehmān <ud> Page: 356  pattāyišnīg bād.

Sentence: 14     kē-tān dārānd dagr-pattāyīhā drust tan ud burzāwandīhā ābād xīr ud hangad burzišnīgīhā purr xwarrah ud jawēdān <ud> paywandišnīgīhā ahlayih abzōn, az har juttarīh abēzār bōxtag dārānd.

Sentence: 15     hamāg burzišn abzōnīg, ahlāyīh ud rawāg-kāmag ud mihr-ābād ud frašgirdīg paywand bawēd.

Sentence: 16     hamāg burzišn {ud} abzōnīg, ahlāyīh ud rawāg-kāmag, pad wisp mēnōgīg ud gētīgīg burzišn ud farroxīh ud spurr bahrīhā ud kāmag-hanjāmīh ud az har juttarīh abēzār dārānd.

Sentence: 17     kē-tān abēzag wehīh {ud} frārōnīh abzāyēnīdārīhā passazag andar har dō axwān wisp burzišn ud frāx ābādīh ud hangad ahlāyīh dārānd.

Sentence: 18     nāmag pad bēš-pursišnīh <ud> hunsandīh dādan ī ō mehān ud āzarmīgān.

Sentence: 19     hamē pērōzgar wahmān ī wahmānān, hamē spōzād bēš ud gugānād zarīg <ud> dūr bawād har petyārag, Page: 357  burzišnīg bawēd pad wisp mēnōgīg ud gētīgīg farroxīh.

Sentence: 20     ka-mān āgāhīh ī anōšag ruwān wahmān ī <wahmānān> awiš mad, garān pīm az marg ayāft, bē az ān, amā čār ī gētīgān pad bōxtan ī az marg ud widarag ī xwarišn xwardārān mardōm, nē pad dast ī purr-xwarrahān ud nē pad hunar ī hunarāwandān ud nē <pad> dānāgān ud frazānagān ud nē-iz <pad> stahmagān ud wināh-kārān ud nē-iz <pad> wuzurg-kunišnān ud kirbag-warzīdārān, har kas rasišn ī marg ud rōz ī āmār, widardan ī čīnwad puhl awiš madan payrāst ēstēd.

Sentence: 21     ōy-iz anōšag ruwān hū-kunišn ud wuzurg-nām ud wuzurg-sūd būd ud wahišt-bahr ud garōdmān pādāšn bād.

Sentence: 22     ašmā dagr zīwēd ud drust zīwēd, padīrēd hunsandīh ud wīdwarēnēd menišn ud waxšēnēd xwēš ruwān ud škast ud gugān ud wānīd kunēd gannāg-mēnōg ud dēwān pad padīrišn hunsandīh, šnāyēnēd ruwān ī ōy anōšag ruwān arzānīg passazagīhā pad yazišn<ud> azbāyišn, ayādišn āfrīngān dahmān.

Page: 358 
Sentence: 23     u-tān dagr zamānīhā pāyēnd az har ēbgat ud abzāyēnēnd abardom rāmišn ud nēkīh ud hū-abzāyišnīg bawād ēd farrox-tan tā frašgird zamān.

Sentence: 24     u-tān hamē pad abēzārīh ī az har juttarīh ....(?) abardom farruxīh.

Sentence: 25     abāg a-sāg drōd, yazdān abestānīgīhā, wahmān ī wahmānān nibišt.

Sentence: 26     az wahmān bē wahmān drōd ī was.

Sentence: 27     pad waxrān abar bawēd, čē nāmag pad awištāb.

Sentence: 28     namāz ō zardušt ī spītāmān ī ahlaw-frawahr.

Sentence: 29     ō tan āfrīdag, pad zāyišn burzišnīg, pad dahišn abēzag, pad guhr padīriftag, andar yazdān wābarīgān, andar xwadāyān wixšayišn, did andar āwām abāyišnīg, pad čihr brāh ud xwarrah bōwandag, pad menišn rāst <ud> bōxtag, pad gōwišn wuzurg-nām <ud> pērōzgar, ud pad framān xwābar ud pad hū-pādixšāyīh dānāg ud pad rāyēnīdārīh {ud} hū-abaxšāyēndag <ud> a-nang ud pad mardōm dōstīh kišwar ummēd, wihān payrāyag, Page: 359  hamē pērōzgar xwadāyīgān wahmān ī wahmānān.

Sentence: 30     yazdān ašmā hamwār pad hamāg drōd abar baxšišnīh, dagr-zīwišn ud pad farroxīh drust ēstišn ud pad harwisp āfrīn payrāyišnīg, kāmag-hanjām dārānd. dagr-zīwišnīh gyān, drustīh ī tan ud ābādīh ī xīr abāg ramišn ī menišn <ud> kadār-iz-ē nēkīh, burzišn abāg ahlāyīh ī ruwān, hamē pad ašmā pāyišn hamāg abzāyišnīg ēdōn bawād čiyōn farroxīhādom amā xwāstan ī āgāhīh, ārzōgōmand ayārīh ud tan-drustīh ī ašmā ēn nāmag abērtar kard.

Sentence: 31     nūn nibēsēm kū tā rōz ī wahmān ud māh wahmān ka-mān ēn nāmag nibišt, drust. ud drōdōmand ud purr ārzōg būd hēm ud nāmag ī ašmā mad ud dīd, čē nibišt wizīdār dānist ud az drustīh ī ašmā, rāmišnīg ud andar yazdān spāsdār būd hēm.

Sentence: 32     pad nēkīh ud xūbīh āgāh framāyēd būdan ka ēdar nēk <ud> xūb āwām ud zamānag {ī} nēk ast, wehān rāy weh ēstād, wehān rāy nēk pad kāmag ast.

Sentence: 33     kē-tān hamāg tan-drust ud gyān anōšag ud nām burzišnīg, jahišn abrangīg ud xwarrah waxšišnīg, xīr pattāyišnīg ud dēn frašgirdīg, paywand pattāyišnīg ud ruwān garōdmānīg dārānd.

Page: 360 
Sentence: 34     ō kē āzād-tom pad gōhr, burzišnīg-tom pad nām ud ōstīgāntom pad frārōnīh ud āšnāg-tom pad wehīh, purr brāzāg-tom pad mihr, nāmīg-tom pad rādīh, kardār-tom pad šnāyēnišn ī yazdān, burd-ranj-tom pad dēn ī māzdēsnān, ayārēnīdār-tom pad kadār-iz-ē xīr ān ī āwāmān ud čiyōnīh ī āfrīn, hamāg bārēstānīg ud xwarrah {ī} wahmān wahmānān.

Sentence: 35     hamēgīh andar tan-drustīh ud tan purr-pāsbānīh ī az bēšīdārān bēš, ast purr-hambārīhā husrawīh padiš arzānīg dārānd.

Sentence: 36     kē-tān az ........(?) ganj ī hamēšag waxš <ud> xūb, {ud} purr bahr ud kāmag-rasišn ud az wisp juttarīh abēzār <ud> bōxtag dārānd.

Sentence: 37     andar bun ī nāmag: u-tān yazdān pad ān ī abrangīg-tom gāh, astišnīg, winārīšnīg ud pattāyišnīg dārānd.

Sentence: 38     hamē pērōzgar, burzišnīgtar pahlōmīhā, wahmān ī wahmānān.

Sentence: 39     yazdān ašmā dagr-zīwišn ud drust ud farroxīhā ud abē-bīm ud pērōzgar ud rawāg framān dārānd.

Sentence: 40     andar bun ī nāmag: u-tān hamēšag farroxīh ud pērōzīh abzāyād, wahmān ī wahmānān, drōd.

Sentence: 41     yazdān hērbed xwadāy pad raēšča. xvarənasča. pad ēstišn Page: 361  ī tanuuō. druuatātəm. andar har dō axwān astišnīg ud pattāyišnīg ud winārišnīg dārānd.

Sentence: 42     andar bun ī nāmag: u-tān yazdān nōg nōg pad bōxtār bawēnd, rāy ud xwarrah ud xwēškārīh, tan-drustīh ud dagr-zīwišnīh ud pad wisp nēkīh windād-kāmag dārānd.

Sentence: 43     hamāg pērōzgar wahmān ī wahmānān, yazdān ašmā hamāgīhā baxšēnd ān ī mih bōzišn, abar-dom burzišn ud a-kanārag rāmišn ud hamē āzād, ahlaw ud pērōzgar dārānd.

Sentence: 44     andar bun nāmag: u-tān hamē drōd ud rāmišn ud ahlāyīh abzāyād, wahmān ī wahmānān frēstīd.


frazaft pad drōd, bun ī dēn dānišn ud wurrōyišn ud mayān, xrad <ud> mihr, ud sar, bowandag menišnīh ud hū-čašmīh, pad drōd šādīh, rāmišn.





Page: 362 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.