TITUS
Middle Persian Corpus Jamasp-Asana
Part No. 26
Previous part

Text: Wiz.Catr.  
[wizārišn ī čatrang ud nihišn ī nēw-ardaxšīr]


pad nām ī yazdān




Sentence: 1     ēdōn gōwēnd kū andar xwadāyīh ī husrawag {husraw} anōšag ruwān az sačidarm ī wuzurg, šahryār ī hindūgān-šā, abar uzmūdan ī xrad ud dānāgīh ī ērānšahrīgān ud sūd-iz ī xwēš nigerīdan rāy, čatrang ēd juxt, šāzdah tāg az uzumburd ud šāzdah tāg az yākand ī suxr kard frēstīd.

Sentence: 2     abāg ān čatrang hazār ud dō-sad uštar bār zarr ud asēm ud gōhr ud morwārīd ud jāmag ud nawad pīl u-š čiš ī mādagīg kard abāg frēstīd ud tatragatwas čiyōn andar hindūgān pad wizēn būd abāg frēstīd.

Sentence: 3     pad frawardag ōwōn nibišt ēstād kū: abāyēd čiyōn ašmā nām pad šāhān-šāhīh pad amā hamāg šāhān-šāh hēd, abāyēd kū dānāgān <ī> ašmā<-iz> az ān ī amā dānāg-tar bawēnd; agar čim ī ēn čatrang wizārēd, ēnyā sāk <ud> bāj frēstēd.

Sentence: 4     šāhān-šāh sē rōz zamān xwāst ud ēč kas nē būd az dānāgān ī ērān-šahr kē čim ī ān čatrang wizārdan šāyēst.

Sentence: 5     sidīgar rōz wuzurg-mihr ī bōxtagān abar ō pāy ēstād.

Sentence: 6     u-š guft kū: anōšag bawēd, man čim ī ēn čatrang tā Page: 337  imrōz az ān čim rāy bē nē wizārd tā ašmā ud har kē pad ērān-šahr hēd bē dānēd kū andar ērān-šahr man mard ī dānag-tar hēm.

Sentence: 7     man čim ī ēn čatrang xwārīhā wizārēm ud sāk <ud> bāj az sačidarm stānēm ud anē-z čiš-ē kunēm ō sačidarm frēstēm ī-š wizārdan nē tuwān, aziš dō bārag sāk man gīrēm ud pad ēn abē-gumān hēd kū ašmā pad šāhān-šāhīh arzānīg hēd ud dānāgān ī amā az ān ī sačidarm dānāg-tar hēnd.

Sentence: 8     šāhān-šāh sē bār guft kū zīwīh wuzurg-mihr, tatragatwas ī amā! u-š dawāzdah-hazār drahm ō wuzurg-mihr framūd dādan.

Sentence: 9     rōz ī dudīgar wuzurg-mihr tatragatwas ō pēš xwāst ud guft kū: sačidarm ēn čatrang pad čim <ī> kārezār homānāg kard.

Sentence: 10     u-š homānāg dō sar-xwadāy kard, šāh ō mādayān, raxw ō hōyag ud dašnag homānāg, frazēn ō artēštārān-sālār homānāg, pīl ō puštībānān-sālār homānāg, ud asb {asp} ō Page: 338  aswārān-sālār homānāg, payādag ō ān ham payādag homānāg pēš-razm.

Sentence: 11     u-š pas tatragatwas čatrang nihād, abāg wuzurg-mihr wāzīd, ud wuzurg-mihr sē dast az tatragatwas burd ud padiš wuzurg rāmišn ō hamāg kišwar mad.

Sentence: 12     pas tatragatwas abar ō pāy ēstād.

Sentence: 13     u-š guft kū: anōšag bawēd, yazd ēn warz ud xwarrah ud amāwandīh ud pērōzgarīh ō ašmā dād, ērān ud anērān xwadāy hēd.

Sentence: 14     čand tā dānāgān ī hindūgān ēn čatrang ēd juxt nihād pad was harg <ud> ranj, <ud> ō ēd gyāg āwurd, ēč kas wizārdan nē tuwān būd.

Sentence: 15     wuzurg-mihr <ī> ašmā az āsnxrad ī xwēš ēdōn xwārīhā ud sabukīhā bē wizārd.

Sentence: 16     u-š ān and xwāstag ō ganj ī šāhān-šāh wisē kard.

Sentence: 17     šāhān-šāh dudīgar rōz wuzurg-mihr ō pēš xwāst.

Sentence: 18     u-š ō wuzurg-mihr guft kū: wuzurg-mihr ī amā, čē ast ān čiš ī-t guft kū kunēm ō sačidarm frēstēm?

Sentence: 19     wuzurg-mihr guft kū: az dahibedān andar ēn hazārag ardaxšīr kardār-tar ud danāg-tar būd ud nēw-ardaxšīr Page: 339  ēd juxt pad nām ī ardaxšīr nihēm.

Sentence: 20     taxtag ī nēw-ardaxšīr ō spandarmad zamīg homānāg kunēm.

Sentence: 21     ud sīh muhrag ō sīh rōz ud šabān homānāg kunēm, pānzdah ī spēd ō rōz homānāg kunēm ud pānzdah <ī> syā ō šab homānāg kunēm.

Sentence: 22     gardānāg ēd juxt ō wardišn ī axtarān ud gardišn ī spihr homānāg kunēm.

Sentence: 23     ēk abar gardānāg-ē ōwōn homānāg kunēm kū ohrmazd ēk ast <ud> har nēkīh ōy dād.

Sentence: 24     dō ēdōn homānāg kunēm čiyōn mēnōg ud gētīg.

Sentence: 25     sē ōwōn homānāg kunēm čiyōn humat ud hūxt ud huwaršt ud menišn ud gōwišn ud kunišn.

Sentence: 26     čahār ōwōn homānāg kunēm čiyōn čahār āmēzišn kē mardōm aziš, aziš čahār sōg gētīg: xwarāsān ud xwarwarān, nēm-rōz ud abāxtar.

Sentence: 27     panj ōwōn homānāg kunēm čiyōn panj rōšnīh čiyōn xwaršēd ud māh ud stārag <ud> ātaxš ud warzag <ī> az asmān āyēd.

Page: 340 
Sentence: 28     šaš ōwōn homānāg kunēm čiyōn dādan ī dām pad šaš gāhānbār.

Sentence: 29     nihādag ī nēw-ardaxšīr abar taxtag ēdōn homānāg kunēm čiyōn ohrmazd xwadāy ka-š dām ō gētīg dād.

Sentence: 30     wardišn ud gardišn ī muhrag pad gardānāg-ē ōwōn homānāg čiyōn mardōmān ī andar gētīg band ō mēnōgān paywast ēstēd, pad haft ud dwāzdah hamāg wardēnd <ud> wihēzēnd; ud ka ast ēk ō did zanēnd, ud abar čīnēnd čiyōn mardōmān andar gētīg ēk ō did zanēnd.

Sentence: 31     ud ka pad gardānāg-ē ēd gardišn hamāg abar čīnēnd hangōšīdag ī mardōm kē hamāg az gētīg widarišn bawēnd ud ka did-iz bē nihēnd hangōšīdag {ī} ī mardōmān kē pad rist-āxēz hamāg zīndag abāz bawēnd.

Sentence: 32     šāhān-šāh ka-š ān saxwan āšnūd rāmišnīg būd ud framūd dwāzdah hazār asb <ī> tāzīg az ham mōy, padisār pad zarr <ud> morwārīd ud dwāzdah hazar mard <ī> gušn kē pad wizēn ī az ērān-šahr; dwāzdah hazar zrēh ī haft-kard ud dwāzdah hazar šamšēr pōlāwadēn ī wirāst hindūg, dwāzdah hazār kamar ī haft Page: 341  čašmag ud abārīg har čē andar dwāzdah hazār mard <ud> asb abāyist, har čē aburnāyīhā-tar payrāyēnīdan.

Sentence: 33     wuzurg-mihr <ī> bōxtagān abar awēšān sālār kard ud rōzgār-ē wizīdag pad nēk jahišn ud yazdān ayārīh ō hindūgān frēstīd.

Sentence: 34     sačidarm ī wuzurg šahryār ī hindūgān-šāh ka-šān pad ān ēwēnag dīd az wuzurg-mihr ī bōxtagān čehel rōz zamān xwast.

Sentence: 35     ēč kas nē būd az dānāgān ī hindūgān kē čim <ī> ān nēw-ardaxšīr dānist.

Sentence: 36     wuzurg-mihr did-iz ham-čand ān sāk ud bāj az sačidarm stānd ud pad nēk jahišn <ud> wuzurg abrang abāz ō ērān-šahr āmad.

Sentence: 37     wizārišn <ī> čim ī čatrang ēn kū čē pad nērang, az ān čiyōn dānagān-iz guft ēstēd kū:perōz <ān kē> pad xrad barēd, az ān azdēnēnd xradīg mādagwarīh dānistan.

Sentence: 38     wāzīdan <ī> čatrang ēn kū: nigerišn ud tuxšišn ī pad nigāh dāštan ī abzār ī xwad wēš <az> tuxšišn čiyōn ō burdan šāyistan ī abzār ī ōy did ud pad ummēd ī abzār Page: 342  ī ōy ī dīd burdan šāyistan rāy dast ī wad nē wāzišn ud hamwār abzār ēk-ē pad kār ud abārīg pad pahrēz dārišn ud nigerišn bowandag-menišnīhā ud abārīg ōwōn čiyōn andar ēwēn-nāmag nibišt ēstād.


frazaft pad drōd ud šādīh.





Page: 343 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.