TITUS
Middle Persian Corpus Jamasp-Asana
Part No. 27
Previous part

Text: Hand.Dastw.  
[handarz ī dastwarān ō weh-dēnān]


pad nām ī yazdān




Sentence: 1     weh-dēn mardōm rāy paydāg kū dastwarān guft ēstēd kū mardōmān har rōz pad ōšbām sē druz pēš āyēd čiyōn nasrušt ud ajahānīh <ud> an-āstawānīh.

Sentence: 2     pad dēn guft ēstēd ka pēš az ān kē xwaršēd ul āyēd dast pad gōmēz gāwān šōyēd pad āb šōyēd, aziš druz ī nasrušt zad bawēd ud pad ruwān ōwōn sūdōmand čiyōn ka-š pad baršnūm šust hē.

Sentence: 3     ud ka ō mān ātaxšān šawēd ud ātaxš niyāyišn kunēd aziš druz ī ajgahānīh zad bawēd.

Sentence: 4     ud ka niyāyišn ī xwaršēd pad nērōg ī yazdān kard aziš druz ī an-āstwānīh ī dēn zadag bawēd.

Sentence: 5     dastwarān guft ēstēd kē sē hēnd andar gētīg kē awēšān rāy rōzīg nē baxt ēstēd, pad stambagīh az gētīg hamāg stānēnd ud xwarēnd, u-šān pad tan ī pasēn āmār ī saxt awiš bawēd.

Sentence: 6     ēk ān drāyān-jōyišn mardōm ud dudīgar ān ī ajgahān ud sidīgar ān duš-čašm.

Sentence: 7     drāyān-jōyišn<īh> ōwōn škeft kū ka ān ī drāyān-jōyišn Page: 344  mardōm hamē xwarēd ud hamē drāyēd hazār dēw pad nērōg ōy ābustan bawēd, bēwar dēw pad nērōg ī ōy be zāyēd ud damišn ī az zafr ud gandagīh ī ōy be ō garōdmān ō pēš ī ohrmazd šawēd ud mizag ī čāšnīg ī ān xwarišn be ō ahreman ud dēwān rasēd {!} ud hordād ud amurdād abar tan ī ōy nifrīn kunēnd kū: tō az hordād ud amurdād wēš drāyān ma jōyīh.

Sentence: 8     dudīgar dastwarān guft ēstēd kū marg-arzān mardōm pad zīndagān xwarišn ēwēn dādan ud ajgahān nē ēwēn dādan.

Sentence: 9     sidīgar duš-čašm mardōm ōwōn škeft kū xwaršēd ud māh rōšnīh kam ud āb tazišn kam ud urwarān waxšišn kam.

Sentence: 10     duš-čašm ān bawēd kē az nēkīh ī kasān dušxwārīh bawēd.

Sentence: 11     sōrag-čašmān rāy ōwōn paydāg kū pad har kas ōh bawēd, weh pad tan ud čiš ī xwēš, wattar pad ān ī kasān.

Sentence: 12     pursīd kū andar xrafstarān gyān kē kard?

Sentence: 13     guft hād ohrmazd, u-š ēd rāy kard čē ahreman tan ī Page: 345  xrafstar dēsīd, hašt-dah paymān ō ohrmazd drāyīd kū gyān andar awēšān kun ayāb enyā pašt nē āwāšēm.

Sentence: 14     ud ohrmazd meh-dādestānīh šāyist kardan ī tan ī pasēn rāy, xrafstar gyān andar kard.

Sentence: 15     hamē ka xrafstar zanēnd guftan abāyēd kū zanēm, ōzanēm wināh wizārišn ud kirbag ī ruwān dōšāram rāy.

Sentence: 16     ka pad ān ēwēnag gōwēd čand <ī> zanišn ud arz ī ān xrafstar wināh ī ān mardōm kard ēstēd az bun be šawēd, čand <ī> zanišn ī ān xrafstar kirbag ō bun bawēd.

Sentence: 17     ud pad čē har kār ud kirbag ī kunēnd ēn guftan abāyēd kū wināh wizārišn ud kirbag ruwān dōšāram rāy hamē kunēm tā kirbag dō ēwēnag bawēd.

Sentence: 18     pursīd kū abar sar <ī> xwarišn freh sar ō zamīg abāyēd mālīdan ayāb nē?

Sentence: 19     guft hād abāyēd, ēd rāy čē mēzd ī wehān pad nērōg yazdān kunēnd tā mardōmān pēš az freh-būd xwarišnīh abar sar <ī> xwaγrišn {? dandān} freh dārēnd ahreman ud dēwān wišūdagān pad garānōmandīh <ō> anāgīh ēstēnd ud ka abar sar <ī> xwaγrišn {? dandān} freh sar ō zamīg nē mālēnd ō Page: 346  zēn-abzār ī ahreman ud dēwān rasēd, ast <kū> dēwān pad ān nērōg drōst tuwān kardan.

Sentence: 20     pursīd kū pad dušox az ān ī ohrmazd kas gumārd ēstēd kē ruwān ī druwandān pādifrāh nimāyēd ayāb nē?

Sentence: 21     guft hād az ān ī ohrmazd andarōn ī dušox kas nē gumārd ēstēd bē wēnišn ī yazdān, tištar ud stōš, wanand ud haftōring.

Sentence: 22     ēn-iz gōwēm kū awēšān wēnišn ōwōn tēz kū ān ī arγand-tom dušox ōwōn wēnēnd čiyōn mard<ān>-ē kē <abāg> čašm abēr wēnāg andar ēwēnag nigerēnd tan ī xwēš wēnēnd, awēšān-iz weh abēr-tar wēnēnd.

Sentence: 23     ud ka nē pānāgīh awēšān rāy hē, ahreman ud wišūdagān hāmōyēn ruwān ī druwandān andar dušox be murnjēn<ī>d hēd.

Sentence: 24     ēn-iz paydāg kū druwand<ān> rāy pad har wināh, puhl ud pādifrāh čand abāyēd burd<(an)>.

Sentence: 25     ud ka niyābag ī ān, puhl ud pādifrāh barēnd agar pad jud az ān, aštar-ē ō ruwān ī awēšān zanēnd ēd pad Page: 347  ham-gyāg rist-āxēz ud tan ī pasēn bawēd.

Sentence: 26     har rōz sē wāng az wahišt ud saxwan ī amahraspandān āšnawēnd kū ma tarsēd čē-tān rist abāz wirāyēm u-šān čand bār pad gētīg saxwan ī ruwān dōstīhā wehān ō ašmā guft ud rāh ī rāst ō ašmā nimūd {!} ud nē padīrift hēd.

Sentence: 27     u-š har rōz sē bār hōm ō gōš gōwēd kū rāmišnīg kunēd ud ma tarsēd čē-tān ōš az ruwān abāz dārēm u-tān ruwān nē ōšōmand čiyōn tan ōšōmand.

Sentence: 28     pursīd kū pad ēn kirbag ud wināh wizārišn xwad xwābarīg kadām?

Sentence: 29     guft hād xrafstar ōzadan ud ātaxš dādīhā pahrēxtan, čē xrafstar hamāg az tan ī ahreman u-š ahreman bēšīd bawēd.

Sentence: 30     ahlaw-dād ka ō wehān dahēnd kirbag kam nē, bē dō ēwēnag kirbag bawēd, ēk bun ī kār, dudīgar ahlaw-dād dahišn, čē ahlaw-dād ō ganj <ī> dādār ohrmazd rasēd.

Sentence: 31     pursīd kū gōšt murdār čē rāy ka nē xwarēnd?

Page: 348 
Sentence: 32     guft hād ēd rāy čē dēwān padiš petyāragēnēnd pad zyān ī mardōmān yārēd būdan

Sentence: 33     ka mardōmān be xwarēnd ē petyārag ō tan ī mardōmān rasēd, andar tan ud ruwān ud amahraspandān an-espās ud mihrōdruj ud wināh-kār bawēnd.

Sentence: 34     pursīd kū pad xānag <ī> mardōm ka widērān bawēd andar sē šabag gōšt tāzag čē rāy ka nē xwarēnd ud ka xwarēnd čē juttarīh bawēd?

Sentence: 35     guft hād ēd rāy čē nasrušt ī petyārag {ī} andar {!} ān xānag ka abar ān widaštag ristag rasīd bawēd, har kē az ān xwarišn be xwarēd ān druz ī nasrušt ī petyārag ī ān ī widaštag ō tan ī ōy bē rasēd az ān jādag {!} rāy ōš pēš tar ud margīh saxt-tar tēz-tar andar rasēd ud gyān dādan ōy rāy dušxwār-tar bawēd ud andar gyān kandan anāgīh wēš andar āyēd abar ōy.


frazaft pad drōd ud šādīh ud rāmišn.





Page: 349 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.