TITUS
Middle Persian Corpus Jamasp-Asana
Part No. 24
Previous part

Text: Fraw.Hord.  
[māh ī frawardīn rōz ī hordād]


pad nām ī dādār ohrmazd




Sentence: 1     pursīd ahlaw zarduxšt az ohrmazd kū čē rāy mardōmān māh frawardīn rōz ī hordād az abārīg rōzīhā pad meh ud weh ud grāmīg-tar dārēnd.

Sentence: 2     ohrmazd passox dād kū spitāmān zarduxšt māh ī frawardīn rōz ī hordād gyān ī gēhānīgān dād hēm.

Sentence: 3     māh ī frawardīn rōz ī hordād ēr-iz anēr-iz bun paydāg būd.

Sentence: 4     māh frawardīn rōz ī hordād gayōmard andar gēhān ō paydāgīh āmad.

Sentence: 5     māh frawardīn rōz ī hordād gayōmard arzūr be ōzad

Sentence: 6     māh frawardīn rōz ī hordād mihrīh ud mihriyānīh az zamīg frāz rust.

Sentence: 7     māh frawardīn rōz ī hordād hōšang ī pēš-dād andar gēhān ō paydāgīh mad.

Sentence: 8     māh frawardīn rōz ī hordād tahmurip ahreman ī druwand pad bārag kard sīh sāl.

Sentence: 9     māh frawardīn rōz ī hordād jam gēhān abē-marg kard, abē-zarmān kard.

Sentence: 10     māh frawardīn rōz ī hordād jam paymānag az dušox bē {āwurd ud andar gēhān ō paydāgīh mad}.

Page: 322 
Sentence: 11     māh frawardīn rōz ī hordād jam astōdānīhā kand, ō mardōmān framūd kandan ka-šān framūdag ī jam dīd rōz pad nōg-rōz kard ud nōg-rōz nām nihād.

Sentence: 12     māh frawardīn rōz ī hordād frēdōn baxšišn ī gēhān kard.

Sentence: 13     hrōm ō salm dād ud turkestān ō tūz dād, ērān-šahr ō ēriz {ērez / ērej} dād.

Sentence: 14     ud sē duxtar bōxt-husraw tazīgān-šāh be xwāst ud pad zanīh bē pusarān dād.

Sentence: 15     salm ud tūz andar pidar a-burd-framān šud hēnd ud ēriz {ērez / ērej} ī brād ī xwēš rāy be ōzad hēnd.

Sentence: 16     māh frawardīn rōz ī hordād manūščihr abar kēn ī ēriz bērōn mad ud salm ud tūz rāy pad kēn ī ēriz be ōzad.

Sentence: 17     māh frawardīn rōz ī hordād sām ī nirīmānān {narīmānān} sanāwēzag dēw rāy be ōzad.

Sentence: 18     māh frawardīn rōz ī hordād sām ī nirīmānān azdahāg rāy be ōzad.

Sentence: 19     māh frawardīn rōz ī hordād gayōmart {gayōmard} arzūr ahreman hunušak be ōzad.

Sentence: 20     māh frawardīn rōz ī hordād kay-husraw siyāwaxšān frāsiyāg ī tūr pad kēn ī pid ī xwēš be ōzad.

Page: 323 
Sentence: 21     māh frawardīn rōz ī hordād kay-husraw siyāwaxšān pad škōh ō garōdmān šud.

Sentence: 22     māh frawardīn rōz ī hordād manūščihr ud ēreš šēbāg-tigr zamīg az frāsiyāg ī tūr abāz stad.

Sentence: 23     māh frawardīn rōz ī hordād kay-husraw siyāwaxšān padixšāyīh ō lurāsp abespurd, xwad pad pērōzgarīh ō garōdmān šud.

Sentence: 24     māh frawardīn rōz ī hordād zarduxšt ī spitāmān ō wēnišn ud ham-pursagīh ohrmazd ī xwadāy rasīd.

Sentence: 25     māh frawardīn rōz ī hordād zarduxšt ī spitāmān dēn ī māzdēsnān az ohrmazd ī xwadāy be padīrift.

Sentence: 26     māh frawardīn rōz ī hordād kay-wištāsp-šāh dēn az zarduxšt be padīrift.

Sentence: 27     māh frawardīn rōz ī hordād haštdah čiš pad haštdah sāl ō husraw ohrmazdān rasēd.

Sentence: 28     māh frawardīn rōz ī hordād wahrām ī warzāwand az hindūgān ō paydāgīh āyēd.

Sentence: 29     māh frawardīn rōz ī hordād pēšyōtan ī wištāspān az gang-diz {kang-diz} ō ērān-šahr āyēd ud dēn ī māzdēsnān rawāg kunēd.

Page: 324 
Sentence: 30     māh frawardīn rōz ī hordād hušēdar ī zarduxštān ō wēnišn ud ham-pursagīh ī ohrmazd xwadāy rasēd ud dēn ī māzdēsnān az ohrmazd xwadāy pad ēw-bār be čāšēd ud warm {!} be kunēd ud xwaršēd rāy pad mayān asmān abar nēm-rōz dah rōz šabān abāz gīrēd ud mardōmān rāy pad dēn ī māzdēsnān abē-gumān be kunēd ud hazārag ī hušēdarān bun bawēd ud ān ī zarduxštān pad sar bawēd.

Sentence: 31     māh frawardīn rōz ī hordād sām ī nirīmānān azdahāg rāy be ōzanēd ud xwad pad haft kišwar <pad> xwadāyīh be nišīnēd, čand kay-husraw pad dīdār āyēd ud sām pādixšāyīh ō kay-husraw abespārēd.

Sentence: 32     panjāh ud haft sāl kay-husraw haft kišwar xwadāy bawēd ud sōšāns mowbed ī mowbēdān bawēd.

Sentence: 33     ud pas ān ka wištāsp-šāh rāy kālbodōmand kunēd, kay-husraw padixšāyīh ō wištāsp-šāh abespārēd ud sōšans mowbedān mowbedīh ō zarduxšt pid ī xwēš abespārēd.

Sentence: 34     māh frawardīn rōz ī hordād ohrmazd ī xwadāy rist-āxēz ud tan pasēn kunēd, gēhān a-marg ud a-zarmān ud a-bēš ud a-petyārag be bawēd.

Page: 325 
Sentence: 35     ahreman abāg dēwān ud druzān ud hunušagān ud sāstārān ud karbān a-kār be bawēnd, āz dēw, dēwān ud druzān rāy hamāg be xwarēd ud srōš ahlaw āz dēw rāy a-kār be kunēd.

Sentence: 36     ohrmazd ī xwadāy ahreman rāy be zanēd ud stard ud a-kār be kunēd.

Sentence: 37     kē nē pas az ān gannāg mēnōg ud nē az ān ī ōy dām ud dahišn abar zamīg pādixšā nē bawēnd.

Sentence: 38     ahreman pad ān ham sūrāg ka andar dwārist ānōh nayēnd ud sar be brīnēnd ud dušox pad haft ayōxšust be hambārēnd.

Sentence: 39     ēn zamīg abāz ō star-pāyag šawēd ud garōdmān az ān gyāg ka ast abāz ō star-pāyag āyēd ud hamāg gyāg garōdmān be bawēd.

Sentence: 40     mardōm a-marg ud a-zarmān be bawēnd ka pas az ān xwarišn nē abāyēd.

Sentence: 41     ud ka gōšt xward ēstēd pad dād ī čehel sālag abar hangēzēnd ud ka gōšt nē xward ēstēd pad dād ī pānzdah sālag ul hangēzēnd.

Sentence: 42     u-šān az ān gyāg ul hangēzēnd kū-šān gyān {!} az tan be šud.

Page: 326 
Sentence: 43     har mard kē zan nēst spandarmad zan dahēd ud har zan kē šōy nēst ohrmazd šōy dahēd.

Sentence: 44     andar panjāh <ud> {!} haft sālag awēšān rāy frazand zāyišnīh bawēd.

Sentence: 45     ān mard rāy kē hagriz zan nē kard ud ān zan rāy kē hagriz šōy nē kard pas az ān wēš hagriz frazand zāyišnīh nē bawēd.

Sentence: 46     mard ud zan ēk abāg did āsāyēnd bē-šān frazand zāyišnīh nē bawēd.

Sentence: 47     ud pad hamāg gāh sagr ud padēx be bawēnd ud čiš-iz xwarišn ārzōg nē bawēd ud gēhān abēzag be bawēd ud mardōm a-petyārag tā hamāg ud hamāg rawišnīh ahōš be bawēnd.

Sentence: _     frazaft pad drōd ud šādīh ud rāmišn, šād ud ahlaw ud farrox ud dagr-zīwišn ud pērōzgar ud kāmag-rawāg ud kāmag-hanjām bawād kē nibišt ud kē xwēš ud kē xwānād ud kē kār framāyēd. ēdōn bawād. ēdōn-tar bawād .





Page: 327 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.