TITUS
Middle Persian Corpus Jamasp-Asana
Part No. 23
Previous part

Text: Ay.Wuz.Mihr  
[ayādgār ī wuzurg-mihr]


pad nām ī yazdān




Sentence: _     jadag ī nēk bawād ān ī weh pad tan ruwān ud xwāstag. ēdōn bawād.

Sentence: 1     man wuzurg-mihr ī bōxtagān, dēwān-bed šabestān šahr ī ōstīgān husrawag, darīg-bed, ēn ayādgār pad ayārīh <ud> nērōg ī yazdān ud abārīg har mēnōg, weh āmōg<īh> {hammōg<īh>}, {ī} az framān-dād husrawag {husraw} šāhān šāh, frahang weh būdan šāyistan awēšān kē pad padīriftārīh ī az abargarān hu-brēhēnišnīhā ud arzānīgīhā abar brēhēnīd ēstād rāy kard ud pad ganj ī šāhīgān nihād.

Sentence: 2     čiyōn xīr ī gētīg hamāg sazišnīgīh ud wišōbišnīgīh ud wardišnīgīh ōy-iz kē yazdān pāyēd, u-š dahišn padiš dahēd tuxšišn-iz {ī} a-ranjīhā awiš frayādēd, stabr xīr handōzēd ud ō mahist kār ud pādixšāyīh rasēd abardomīhā gīrēd ud wuzurgdom nām xwāhēd ud nāmīgīhādom kār abrōzišnīh mān ud mēhan kunēd, u-š drāz zīndagīh <ud> abzāyišn ī frazand ud paywand, Page: 300  {ī} wizurd-ummēdīh {!} <ud> nēk-jahišnīhā pad kār ud pad dādestān ud sūd ī mardōmān ud pāyišn ī nām, {ī} ud kār pādixšāyīh ud abārīg-iz hamāg farroxīh andar gētīg ēk ō did gugāy ud ham-dādestān.

Sentence: 3     pad ōstīgānīh ān ī and čiš dūr menīdārdom ud ka dagrdom, andar drahnāy ī sad sāl tan ō {ī} frazām ud pādixšāyīh ō nēstīh ud andar drahnāy čahār-sad sāl dūdag ō wišōbišn, nām ō frāmōšīh ud an-ayādīh ud mān ud mēhan ō awērānīh ud ālūdagīh ud nāf <ud> paywand ō frōd-tarīh ud a-bāšīh ud tuxšišn ō abē-barīh ud ranj ud bahr ō tuhīgīh ud padixšāyīh ō āwām xwadāyān, xīr ō ōy mānēd kē zamān-farroxīh andar ān ēd brēhēnīd ēstēd ud čiš frašgirdīh pattāyēd ud nē wišōbēd ēwāz ahlāyīh <ī> nām frašgirdīg ud kunišn ī frārōn pad ēč kas appurdan nē tuwān.

Sentence: 4     nūn man čiyōn-am kāmag tuxšišn ī pad ahlāyīh {!} warzīdan ud pahrēz az wināh kardan, ēdōn bē ān andar jast ēstēd az kunišn framāyišn ī āwām xwadāyān ud duš-pādixšāyīh padiš a-čārag hēm enyā {!} az wināh Page: 301  nakkīrišnīg pad kām čand-am dānišn pahrēxt ēstēd, pad hastīh <ī> yazdān ud nēstīh ī dēwān ud dēn ud ruwān ud wahišt ud dušox ud āmār ī stōš ud rist-āxēz ud tan ī pasēn abē-gumān hēm, u-m ahlāyīh ud xwārīh az tan ud gyān ruwān {!} ud har nēkīh ī gētīg ud mēnōg kāmag-tar, u-m nām-iz gētīg rāy wāzag-ē čand abar ēn ayādgār nibišt kū:

Sentence: 5     mardōm kadār farrox-tar.

Sentence: 6     ān ī a-wināh-tar.

Sentence: 7     kē a-wināh-tar.

Sentence: 8     ān kē pad dād ī yazdān rāst-tar ēstēd ud az dād ī dēwān wēš pahrēzēd.

Sentence: 9     kadār dād ī yazdān ud kadār dād ī dēwān.

Sentence: 10     dād ī yazdān wehīh ud dād ī dēwān wattarīh.

Sentence: 11     čē wehīh ud čē wattarīh.

Sentence: 12     wehīh humat ud hūxt ud huwaršt ud wattarīh dušmat ud duš-hūxt ud dušxwaršt.

Sentence: 13     čē humat ud hūxt ud huwaršt {!} ud čē dušmat ud duš-hūxt ud dušxwaršt.

Page: 302 
Sentence: 14     humat paymān menišnīh ud hūxt rāstīh <ud> huwaršt rādīh

Sentence: 15     dušmat, freh-būd menišnīh ud duš-hūxt drōzanīh ud dušxwaršt penīh

Sentence: 16     čē paymān menišnīh, čē rādīh ud čē rāstīh, čē freh-būd menišnīh, čē penīh, čē drōzanīh.

Sentence: 17     paymān menišnīh ēd kē frasāwandīh ī xīr ī gētīg wēnēd, kāmag abar ān čiš barēd kē rāy tan ō puhl ud ruwān ō dušox nē rasēd.

Sentence: 18     rādīh ēd kē bahr <ī> tan az tan, bahr ī ruwān az ruwān abāz nē gīrēd.

Sentence: 19     rāstīh ēd kē ō ruwān ī xwēš rāst ud a-frēftāragīhā rawēd.

Sentence: 20     freh-būd menišnīh ēd kē gētīg pad mehmānīh ud mēnōg pad must-gar dārēd ud kāmag abar ān čiš barēd kē frazām wišōbišn ī tan, puhl ud pādifrāh ī ruwān aziš bēd.

Sentence: 21     penīh ēd kē-š bahr ī tan az tan <ud> bahr ī ruwān az ruwān abāz dārēd.

Sentence: 22     drōzanīh ēd kē tan pad kāmag, ruwān pad frēb dārēd.

Page: 303 
Sentence: 23     pad wehīh kē bōwandag-tar.

Sentence: 24     ān ī dānāg-tar.

Sentence: 25     ud kē dānāg-tar.

Sentence: 26     ān kē frazām ī tan dānēd, hamēmal ruwān šnāsēd, xwēš-tan az hamēmāl ī ruwān pādan ud abē-bīm dāštan abēr-tar dānēd.

Sentence: 27     čē frazām ī tan, kadām ān hamēmāl dānāgān padiš abēr-tar tuwān šnāxtan.

Sentence: 28     frazām ī tan, wišōbišn kirb, ud hamēmāl ī ruwān, ēn and druz ī gannāg mēnōg pad frēftan <ud> wiyābān kandan ī mardōmān rāy pad hamēstārīh ī pad mardōmān frāz dād.

Sentence: 29     kadār ud čand ān druz.

Sentence: 30     āz ud niyāz ud xēšm ud arešk ud nang ud waran ud kēn ud būšāsp ud druz ahlomōgīh ud spazgīh.

Sentence: 31     az ēn and druz kadār stahmag-tar.

Sentence: 32     āz a-hunsand-tar <ud> a-čārag-tar.

Sentence: 33     niyāz bēšēnīdār-tar ud bēšōmand-tar.

Sentence: 34     ud xēšm duš-pādixšā-tar ud an-espās-tar.

Sentence: 35     arešk anāg-kāmag-tar ud wad-ummēd-tar.

Sentence: 36     ud nang kōxšīdār-tar.

Sentence: 37     ud waran xwad-dōšag-tar ud wišuftār-tar.

Page: 304 
Sentence: 38     ud kēn sahmgēn-tar ud anabaxšāyišnīg-tar.

Sentence: 39     būšāsp ajgahān-tar ud frāmōšēn-tar.

Sentence: 40     ud druz ī ahlomōγīh nihuftār-tar ud frēftār-tar.

Sentence: 41     ud spazg an-espās-tar.

Sentence: 42     ēn-iz paydāg kū gannāg mēnōg pad dāmān ī ohrmazd čiš-ē-iz ēn garān-tar kard ka-š kirbag mizd ud wināh pādifrāh pad menišn ī mardōmān pad frazām kār be nihuft.

Sentence: 43     dādār ohrmazd pad abāz dāštan ī ān and druz ayārīh ī mardōm rāy čand čiš ī nīgāhdār ī mēnōg dād: āsnxrad ud gōšōsrūd xrad ud xēm ud ummēd ud hunsandīh ud dēn ud ham-pursagīh dānāg.

Sentence: 44     xwēš-kārīh ī ēn ēk ēk mēnōg čē.

Sentence: 45     xwēš-kārīh ī āsnxrad tan az bīm kunišnīh wināh nigerišnīg ud ranj abē-barīh pādan ud frasāwandīh ī xīr gētīg, frazām tan pad daxšag dāštan ud az xīr fraš-girdīgīh ī xwēš nē kāstan ud pad ān wadgarīh ī xwēš nē abzūdan.

Sentence: 46     xwēš-kārīh ī gōšōsrūd xrad pand ud ristag ī frārōn be šnāxtan ud padiš ēstādan, čiš ī pēš be widerīd be Page: 305  nigērīdan ud ān ī pas aziš āgāh būdan, čiš ī būdan nē šāyēd nē wurrōyistan ud kār ī frazāmēnīdan nē šāyēd andar nē griftan.

Sentence: 47     xwēš-kārīh ī xēm, tan az xōg ī wad ud ārzōg <ud> waran pādan ud padiš kardan, xēm ud xōg ī nēk wirāstan ud pad daxšag dāštan.

Sentence: 48     xwēš-kārīh ī ummēd bahr ī kunišn ō tan paywastan, tan ō ranj ud kār ī frārōn rāyēnīdan.

Sentence: 49     xwēš-kārīh ī hunsandīh tan az freh-būd xwāhišnīh pādan ud ranj az a-hunsandīh ud bīm az freh-būdīh pad daxšag dāštan ud ān čiš ī rāy abdom abestān awiš bawēd pad čiš-iz čiš rāy nē dādan, čiš ī uzīd ēstēd rāy ud ak ī ān ī juttar kardan nē šāyēd rāy ranj ud bēš nē burdan.

Sentence: 50     xwēš-kārīh ī dēn, tan az wināh puhl ud kirbag mizd āgāhēnīdan ud pand ud ristag ī yazdān az ān ī dewān judāg dāštan.

Sentence: 51     xwēš-kārīh ī ham-pursagīh ī dānāg, tan az waran ud xwad-dōšagīh pādan, ēdōn rāyēnīdan kū pad anāgīh ī šāyēd madan kunišn ī xwēš āhōg nē bawēd.

Sentence: 52     az ēn and mēnōg pad tan ī mardōmān, kē ōzōmand-tar.

Page: 306 
Sentence: 53     xrad wēnāg-tar ud menišn ayābag-tar ud ōš dāštār-tar.

Sentence: 54     ud xēm hu-škōh-tar ud xōg wirāstār-tar.

Sentence: 55     ud hunsandīh awestwār-tar.

Sentence: 56     ud ummēd bārestān-tar, axw abēzag-tar ud bōy āgāh-tar ud frawahr ranjwar-tar.

Sentence: 57     pad mardōmān hunar čē weh.

Sentence: 58     dānāgīh ud xrad.

Sentence: 59     ēd kadār weh.

Sentence: 60     ān kē tan abē-bīmīhā-tar ud a-wināh-tar ud a-ranjagīhā-tar dānēd rāyēnīdan.

Sentence: 61     pad mardōmān xrad weh ayāb jahišn.

Sentence: 62     xrad šnāxtārīh ī kār ud jahišn passandišn ī kār.

Sentence: 63     gōhr kadār weh.

Sentence: 64     ēr-menišnīh ud čarb-ēwāzīh.

Sentence: 65     xōg čē weh.

Sentence: 66     weh-axwīh ud āštīh-xwāhīh.

Sentence: 67     dād čē weh.

Sentence: 68     wehīh.

Sentence: 69     kāmag kadār frārōn-tar.

Sentence: 70     a-wināhīh.

Sentence: 71     kirbag kadār weh.

Page: 307 
Sentence: 72     hunsand xīrīh.

Sentence: 73     kardār čē weh.

Sentence: 74     dēn-ōšmārišnīh.

Sentence: 75     frahang kadār weh.

Sentence: 76     ān kē āwām padiš rāyēnīdan ud ruwān padiš bōxtan abēr-tar dānēd.

Sentence: 77     āzarm kadār <weh>.

Sentence: 78     weh-dōstīh ud hu-škōhīh.

Sentence: 79     nām čē meh.

Sentence: 80     xwēš-kārīh.

Sentence: 81     hamēmāl kadām stambag-tar.

Sentence: 82     kunišn wad.

Sentence: 83     pad mardōmān frahang weh ayāb gōhr xrad.

Sentence: 84     abzāyišn ī tan az frahang ud xēm mehmānīh pad gōhr xrad winārišn ī tan ud xēm pānag ī tan ud gyān.

Sentence: 85     xēm ud xōg ud xrad ud abārig-iz hamāg hunar andar tan ī mardōmān čiyōn kam-petyārag-tar ud abē-zyān-tar.

Page: 308 
Sentence: 86     xrad ka-š <tar->menīdārīh nēst.

Sentence: 87     ud hunar ka-š tar-menišnīh nēst.

Sentence: 88     wīrōmandīh ka-š ahlomōγīh nēst.

Sentence: 89     weh-dōstīh ka-š kēnwarīh nēst.

Sentence: 90     hunsandīh ka-š xwurdag nigerišnīh nēst.

Sentence: 91     weh-xēmīh ka-š penīh nēst.

Sentence: 92     nēk husāzagīh ka-š wišōftārīh nēst.

Sentence: 93     rāstīh ka-š duš-barišnīh nēst.

Sentence: 94     ummēd ka-š ajgahānīh nēst.

Sentence: 95     rādīh ka-š wanīgārīh nēst.

Sentence: 96     hu-škōhīh ka-š a-hunsandīh nēst.

Sentence: 97     tan-pānagīh ka-š bēšōmandīh nēst.

Sentence: 98     ēr-menišnīh ka-š frēftārīh nēst.

Sentence: 99     tarsāgāhīh ka-š wastārīh nēst.

Sentence: 100     weh-dōstīh ka-š jahīg-kārīh nēst.

Sentence: 101     ēkānagīh ka-š abāzīh nēst.

Sentence: 102     xwēš-kārīh ka-š sustīh nēst.

Sentence: 103     tuxšāgīh ka-š areškēnīh nēst.

Page: 309 
Sentence: 104     dānāgīh ka-š pačībāyīh nēst.

Sentence: 105     čiš ī ō mardōmān rasēd pad baxt bawēd ayāb pad kunišn.

Sentence: 106     baxt ud kunišn āgenēn ōwōn homānāg hēnd čiyōn tan ud gyān.

Sentence: 107     čē tan jud az gyān kālbōd ast ī a-kār ud gyān jud az tan wād-ē ast ī agriftār ud ka āgenēn gumēxt ēstēd ōzōmand ud wuzurg sūdōmand.

Sentence: 108     čē baxt ud čē kunišn.

Sentence: 109     baxt-iz čim, <ud> kunišn wihānag čiš ī ō mardōmān rasēd.

Sentence: 110     xīr ī gētīg ō čē homānāg.

Sentence: 111     ō čiš ī pad būšāsp wēnēnd ka nēk ka-iz wad ud ka az būšāsp be bawēnd čiš-iz čiš ānōh nēst.

Sentence: 112     andar gētīg kē burzišnīg-tar.

Sentence: 113     dahibed ī amāwand ud pērōzgar ī kirbag-kām.

Sentence: 114     ud kē mustōmand-tar.

Sentence: 115     škōh ī duš-padēx ī druwand.

Page: 310 
Sentence: 116     kē duš-farrag-tar

Sentence: 117     dēn-āgāh ī druwand.

Sentence: 118     kē abē-niyāz-tar.

Sentence: 119     ān ī hunsand-tar.

Sentence: 120     kē hunsand-xīr-tar.

Sentence: 121     ān ī hu-škōh-tar.

Sentence: 122     kē hu-škōh-tar.

Sentence: 123     ān kē awēnišn ī mardōmān wattar sahēd kū niyāzōmandīh.

Sentence: 124     kē ummēdwār-tar.

Sentence: 125     tuxšāg-mard ī jahišn-ayār.

Sentence: 126     čē tuxšāgīh ud čē jahišn-ayārīh.

Sentence: 127     tuxšāgīh ān kē pēšag ī frārōnīh kunēd ud kār-iz ī pāymār bawēd a-winahīhā ud a-ranjagīhā padiš tuxšēd.

Sentence: 128     jahišn-ayārīh nām ī nēk <ud> hu-frazāmīh kār.

Sentence: 129     kē pādixšāy-tar.

Sentence: 130     spihr ī gēhān-baxtār.

Sentence: 131     kē rāst-tar.

Sentence: 132     zamān ī brīn.

Sentence: 133     kē abd-tar.

Sentence: 134     ān kē<-š> zamān abēr-tar mad ēstēd.

Sentence: 135     kē wizīdār-tar.

Page: 311 
Sentence: 136     dānāg ī was uzmāyišn.

Sentence: 137     kē pad rāmišn-tar.

Sentence: 138     ān kē az bīm ud astānag garān bōxtēd.

Sentence: 139     kē passandišnīg-tar.

Sentence: 140     ān kē waran azēr ī nang ud xēšm azēr burd<-ār>-īh ud arešk azēr husrawīh ud āz azēr hunsandīh ud zanišn azēr dādestān abēr-tar darēd.

Sentence: 141     kē husraw-tar.

Sentence: 142     ān kē nēkīh pad mardōmān kardan pad dād-tar dārēd.

Sentence: 143     kē nāmīg-tar.

Sentence: 144     ān ī šāyendag-tar ud abarwēz-tar.

Sentence: 145     kē abarwēz-tar.

Sentence: 146     ān kē<-š> jahišn pad kār ud dādestān nēk-tar.

Sentence: 147     kē šnāyēnīdār-tar.

Sentence: 148     frazand ī šāyendag ud nārīg ī šōy-kām.

Sentence: 149     kē bārestān-tar.

Sentence: 150     niyāzōmand ī a-čārag ud anāz kē an-espāsān rāy tuxšišn pad sūdōmandīhā <kunēd>, kē ummēd ī Page: 312  wuzurg rāy tuxšēd

Sentence: 151     kē a-hunsand-tar.

Sentence: 152     kēnwar ī āzārdag ī tuwānīg.

Sentence: 153     kē bēštār -tar.

Sentence: 154     šōy sahmgēn ī duš-barišn, frazand rōz-ward

Sentence: 155     kē sahmgēn -tar.

Sentence: 156     pādixšāy ī nāzuk ī zadār.

Sentence: 157     kē bēšōmand-tar.

Sentence: 158     šāyendag ka ō a-šāyendagīh rasēd ud pādyāwand ka ō a-pādyāwandīh rasēd, ummēdwār ka ō an-ummēdīh rasēd ud xwad-dōšag ka ō frazām ī kār mad bawēd.

Sentence: 159     kē dardōmand-tar.

Sentence: 160     tuwānīg ī nēst-frazand ud dānāg šāyendag kē <-š> frazand ī a-šāyendag rōz-ward bawēd.

Sentence: 161     kē xastōmand-tar.

Sentence: 162     šāyendag ka-š a-šāyendag padiš abarwēz, dānāg ka-š duš-āgāh padiš abar framādār, weh ka-š wad padiš Page: 313  padixšāy.

Sentence: 163     kē abaxšāyišnīg-tar.

Sentence: 164     awištāftag ī an-ummēd ī a-wināh.

Sentence: 165     ke pašēmān-tar.

Sentence: 166     xwad-dōšag ka ō frazām ī kār mad, ruwān-šnās ī druwand waranīg ī afsārd ud anāz-kē {?} an-espāsān rāy tuxšišn ī pad sūdomandīhā kunēd.

Sentence: 167     kē āwēnišnīg-tar.

Sentence: 168     ān kē andar ōy kē nēkīh aziš windēd an-espās bawēd.

Sentence: 169     kē dusraw-tar.

Sentence: 170     ān kē anāgīh pad mardōmān kardan pad dād-tar dārēd.

Sentence: 171     mardōmān andar gētīg čē abāyišnīg-tar sahēd.

Sentence: 172     ōy kē tan-drust kāmag-hanjāmīh, ud ka tan wēmār bawēd drustīh ī tan ud ka tan an-ummēdīh bawēd bōxtagīh ī ruwān.

Sentence: 173     mardōmān ō čē kāmag-tar hēnd.

Sentence: 174     ō kāmag-xwāhīh ud abē-niyāzīh.

Sentence: 175     čē kāmag-xwāhīh ud abē-niyāzīh.

Sentence: 176     kāmag-xwāhīh har čē ārzōg abar bawēd ayāftan, ud abē-niyāzīh ān ī andar abāyēd <dāštan>.

Page: 314 
Sentence: 177     mardōm ō čē tišnag-tar hēnd.


[ATTENTION! Paragraphs 178 to 189 repeated twice; pp. 314 and 315 identical.]


Page: 315 
Sentence: 178     ōy kē ummēd ī nēk awiš dārēnd.

Sentence: 179     mardōmān andar gētīg az čē wēš abāyēd handēšīdan.

Sentence: 180     az āwām ī wad ud kunišn ī abārōn ud dōst ī frēftār ud pādixšā <ī> druwand an-āmurzīd.

Sentence: 181     ud pad čē wistāx-tar abāyēd būdan.

Sentence: 182     pad āwām ī nēk ud kunišn ī frārōn ud dōst ī a-frēftār ud ham-dēn <ud> sālār ī abaxšāyišnīg ud dādestānīh.

Sentence: 183     āwām kadār weh.

Sentence: 184     ān kē čērīh ud pādixšāyīh ī wattarān kam awiš mad ēstēd.

Sentence: 185     dēn kadār weh.

Sentence: 186     ān kē yazdīh ī yazdān, dēwīh ī dēwān, kirbag mizd, wināh puhl aziš paydāg-tar ud rāh ud ristag {ī} frārōn-tar, kirbag pad dād-tar jast ēstēd.

Sentence: 187     xwadāy ud sālār kadām weh.

Sentence: 188     ān ī mardōm dōst-tar ud āwām wizīdār-tar, u-šān nēkīh pad mardōmān kardan pad dād-tar.

Sentence: 189     ud dōst kadām weh.

Page: 316 
Sentence: 190     ān ī mad-frayād-tar <ud> andar škaftīh ayār-tar.

Sentence: 191     dōst kē wēš.

Sentence: 192     ōy ī ēr-menišn-tar ud bārestān-tar ud čarb-āwāz-tar.

Sentence: 193     dušmen kē wēš.

Sentence: 194     abar-menišnān ud abar-tanān ud xwurdag-nigerišnān ud društ-āwāzān.

Sentence: 195     dōst ī frašgirdīg kadār.

Sentence: 196     kunišn ī frārōn.

Sentence: 197     dušmēn frašgirdīg kadār.

Sentence: 198     kunišn ī wad.

Sentence: 199     čē ān ī frašgirdīg pattāyēd ud nē wišōbēd.

Sentence: 200     hambār ī kirbag.

Sentence: 201     čē nēk-tar.

Sentence: 202     hamīh ī abāg wehān.

Sentence: 203     čē sūdōmand-tar.

Sentence: 204     nišastan abāg dānāgan.

Sentence: 205     čē ōstīgān-tar.

Sentence: 206     uzwān ī rāst-gōwišnān.

Sentence: 207     čē xwaš-tar.

Sentence: 208     abē-bīmīh.

Page: 317 
Sentence: 209     ud čē abē-bīmīhā-tar.

Sentence: 210     āwām ī nēk ud xwēškārīh.

Sentence: 211     čē farruxīhā-tar.

Sentence: 212     abē-wināhīh ud hu-frazāmīh.

Sentence: 213     ud čē āsānīhā-tar.

Sentence: 214     abē-wināhīh <ud> hunsand-xīrīh.

Sentence: 215     čē arzōmand-tar.

Sentence: 216     dōšāram abāg dānāg<ān> ud wehān.

Sentence: 217     čē rōšn-tar.

Sentence: 218     kunišn ī dānāgān.

Sentence: 219     ud čē frāx-tar.

Sentence: 220     dast ī rādān.

Sentence: 221     ud čē tang-tar.

Sentence: 222     dast ī penān.

Sentence: 223     ud čē wābarīgān-tar.

Sentence: 224     ēwēn ī yazdān

Sentence: 225     ud čē čimīgīhā-tar.

Sentence: 226     pādāšn ī kirbakkarān

Sentence: 227     ud čē abē-čimīhā-tar.

Page: 318 
Sentence: 228     pādāšn ī bazakkarān

Sentence: 229     ud čē paymānīgīhā-tar.

Sentence: 230     kāmag hunsand-xīrān.

Sentence: 231     čē hu-bōy-tar.

Sentence: 232     husrawīh.

Sentence: 233     ud čē garāmīg-tar.

Sentence: 234     padīrišn ī az xwadāyān ud sālārān ud nāzišn ī az hamahlān ud dōstān.

Sentence: 235     čē wattar.

Sentence: 236     čašm ī āzwarān.

Sentence: 237     ud čē abē-bar-tar.

Sentence: 238     dahišn ī ō an-espāsān ud paywandišn ī abāg wattarān.

Sentence: 239     čē tuhīg-tar.

Sentence: 240     dast ī penān.

Sentence: 241     čē ranjagīhā-tar.

Sentence: 242     paristišn ī pādixšāyān duš-wīr.

Sentence: 243     ud čē tēz-tar.

Sentence: 244     menišn ī waranīgān.

Sentence: 245     čē duš-xwār-tar.

Sentence: 246     būdan ī abāg wattarān.

Sentence: 247     čē nāzuk-tar.

Sentence: 248     menišn pādixšāyān.

Page: 319 
Sentence: 249     čē bīmgēn-tar.

Sentence: 250     āzārišn ī pādixšāyān an-āmurzīd.

Sentence: 251     čē škaft-tar

Sentence: 252     dānāg ī wad jahišn.

Sentence: 253     čē abd-tar.

Sentence: 254     duš-āgāh ī hu-jahišn.

Sentence: 255     čē garān-tar.

Sentence: 256     menišn ī mihr-drōzan.

Sentence: 257     čē astānagōmand-tar.

Sentence: 258     hamīh abāg wattarān ud duš-āgāhān. čiš ī pad mardōmān frārōn.

Sentence: 259     čē wattar.

Sentence: 260     an-āstawānīh ud wiyābān-menišnīh.

Sentence: 261     čē čarb-tar.

Sentence: 262     rādīh ī wehān

Sentence: 263     čē ān ī azabar har čiš.

Sentence: 264     wizīr ī yazdān. Page: 320  anōšag ruwān bawād wuzurg-mihr ī bōxtagān ud awēšān kayān ud yalān ud wīrān kē gyān abespārīh ī dēn ī māzdēsnān kard hēnd. gāh pad a-sar rōšn bawād. ēdōn bawād. ēdōn-tar bawād.


frazaft pad drōd.





Page: 321 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.