TITUS
Middle Persian Corpus Jamasp-Asana
Part No. 12
Previous part

Text: Hand.Adurb.Marasp.  
handarz ī anōšag ruwan ādurbād māraspandān.


pad nām ī yazdān




Sentence: 1     ēn paydāg {!} kū ādurbād rāy frazand tanīg-zād nē būd ud az ān pas abestān ō yazdān kard, dagr nē mad kū ādurbād rāy frazand-ē būd ēg drust xēmīh ī zardušt ī spitāmān rāy zardušt nām nihād ud guft kū āxēz pus ī man! tā frahang abar hammōzēm.

Sentence: 2     pus ī man! kirbag handēš bāš nē wināh handēš, čē mardōm tā jāwēdān zamān nē zīndag, čē čiš ān ī mēnōg abāyišnīg-tar.

Sentence: 3     ān uzīdag frāmōš kun ud ān nē mad ēstēd rāy tēmār bēš ma bar.

Sentence: 4     pad xwadāy ud sālār mard wastār ud wistāx ma bāš.

Sentence: 5     har čē pad tō nē nēk, tō-iz pad any {!} kas ma kun.

Sentence: 6     andar xwadāyān ud dōstān ēkānag bāš.

Sentence: 7     xwēš-tan pad bowandagīh ō kas ma abespār.

Sentence: 8     har kē abāg tō pad xēšm ud kēn rawēd ēg-iš {!} aziš dūr bāš.

Page: 271 
Sentence: 9     bāstān ud har gāh ummēd ō yazdān dār ud dōst ān gīr ī pad tō sūd-ōmand-tar hād.

Sentence: 10     pad čiš <ī> yazdān ud amahraspandān tuxšāg ud gyān-abespār bāš.

Sentence: 11     rāz ō zanān ma bar

Sentence: 12     har čē āšnawīh niyōš, halag ma gōw.

Sentence: 13     zan ud frazand ī xwēš-tan jud az frahang be ma hil kū-t tēmār ud bēš ī garān abar nē rasād, tā nē bawēh {!} pašēmān.

Sentence: 14     abē-gāh ma xand

Sentence: 15     spaxr ud wiyufsišn pad paymān gīr.

Sentence: 16     pad ēč kas afsōs ma kun.

Sentence: 17     abāg duš-āgāh mard ham-rāz ma bāš

Sentence: 18     abāg xēšmēn mard ham-rāh ma bāš.

Sentence: 19     abāg halag mard ham-uskārišn ma bāš.

Sentence: 20     abāg was xwāstag mard ham-xwarišn ma bāš.

Sentence: 21     abāg mastōg mard ham-xwarišn ma bāš.

Sentence: 22     az wad-gōhr mard ud wad-tōhm mard abām ma stān ud ma dah čē waxš garān abāyēd dādan ud har gāh pad dar <ī> tō ēstēd ud hamēšag paygāmbar pad dar ī tō Page: 272  dārēd {!} u-t {!} ziyān aziš bawēd.

Sentence: 23     duš-čašm mard pad ayārīh ma gīr.

Sentence: 24     bē areškēn {!} mard xwāstag ma nimāy.

Sentence: 25     andar pādixšāyān wizīr ī pad drō ma āwāš.

Sentence: 26     az spazg ud druz mard saxwan ma āšnaw.

Sentence: 27     pad pādifrāh ō mardōmān kardan waranīg ma bāš.

Sentence: 28     andar xwaran paykār ma kun.

Sentence: 29     mardōm ma zan.

Sentence: 30     gāh rāy ma kōxš.

Sentence: 31     abāg āzād-čihrag kār-āgāh ud zirak, hu-xēm mard hampursagīh kun ud dōst bāš.

Sentence: 32     pad nibard abēr tars <tā> bār ī garān abar tō nē bawēd.

Sentence: 33     az kēnwar mard ī pādixšā dūr bāš.

Sentence: 34     abāg dibīr mard hamēmāl ma bāš.

Sentence: 35     abāg mard <ī> halag gōwišn rāz ī xwad ma kun.

Sentence: 36     pēš-gāh mard dānāg grāmīg dār, aziš {!} saxwan purs, aziš āšnaw.

Sentence: 37     kas-iz rāy drō ma gōw.

Sentence: 38     kē rāy šarm nēst, aziš xwāstag ma gīr.

Page: 273 
Sentence: 39     čašmāgāh pad čiš-iz čiš graw ma nih.

Sentence: 40     nē pad rāst ud nē pad drō sōgand ma xwar

Sentence: 41     ka kadag kāmīh kardan nazdist uzēnag pad mayān kun.

Sentence: 42     xwēš-tan rāy zan xwad xwāh.

Sentence: 43     agar xwāstag bawēd naxust āb ud raz ud zamīg wēš xrīn, čē agar bar nē dahēd ēg-iš bun pad mayān bawēd.

Sentence: 44     čand tuwān hād mardōmān pad saxwan ma āzār.

Sentence: 45     ma raw abar kēn ud ziyān ī mardōmān.

Sentence: 46     pad xwāstag čand tuwān hād rādīh kun.

Sentence: 47     abar ēč kas frēftārīh ma kun kē tō-iz abēr dard-ōmand nē bawēh {!}.

Sentence: 48     pēšōbāy mard gramīg u-š meh dār ud saxwan aziš padīr.

Sentence: 49     bē jud az xwēšāwandān ud dōstān čiš-iz abām ma gīr.

Sentence: 50     šarmgēn zan dōst bāš ud pad zanīh ō zīrak ud dānāg mard dah, čē zīrak ud dānāg mard ōwōn homānāg čiyōn zamīg ī nēk kē tōhm andar abgand ēstēd xwār-bār ī gōnag gōnag aziš āyēd.

Sentence: 51     āškārag gōwišn bāš.

Page: 274 
Sentence: 52     pad jud az handēšišn saxwan be ma gōw.

Sentence: 53     bē pad ēwēn enyā {!} abām ma dah.

Sentence: 54     zan ī frazānag ud šarmgēn dōst bāš u-š pad zanīh xwāh

Sentence: 55     hu-xēm ud drust ud kārāgāh mard agar kūč škōh hād pas-iz pad dāmādīh gīr, ēg-iš xwāstag az yazdān rasēd.

Sentence: 56     pad masātōr mard afsōs ma kun, čē to-iz abēr masātōr bawēh {!}.

Sentence: 57     anāmurzīd mard abarmān pad zēndān ma kun, wizīdag<ud> wuzurg mardōm ud ošyār mard abar band<-īgān> zēndābān kun.

Sentence: 58     agar pus-ē hād pad aburnāyīh ō dibīrestān dah, čē čašm rōšn dibīrīh ast.

Sentence: 59     saxwan tēz pad nigerišn gōw, čē saxwan ast guftan weh ud ast pādan ud ān padān weh az ān ī guftan.

Sentence: 60     rāst gōwišn mard paygāmbar kun.

Sentence: 61     zadag mard ma dār abar awestwār, ud wābarīgān mard {!} čiyōn-it {!} ēwēn hād uzēnag padiš kun.

Sentence: 62     saxwan čarb gōw.

Sentence: 63     gōwišn čarb dār.

Sentence: 64     mēnišn frāraōn dār.

Page: 275 
Sentence: 65     xwēš-tan ma stāy tā frārōn kunišn bawēh {!}.

Sentence: 66     andar xwadāyān ud pādixšāyān an-āmurzīd nē bāš.

Sentence: 67     az dād meh ud weh mard saxwan purs.

Sentence: 68     az duzd mard čiš-iz ma stān, ud ma dah ud awēšān stō kun.

Sentence: 69     bīm ī dušox rāy pādifrāh pad nigērišn kun.

Sentence: 70     pad har kas har čiš wastār ud wistāx ma bāš.

Sentence: 71     hu-framān bāš kū hu-bahr bawēh {!}.

Sentence: 72     abē-wināh bāš kū abē-bīm bawēh {!}.

Sentence: 73     spāsdār bāš kū pad nēkīh arzānīg bawēh {!}.

Sentence: 74     ēkānag bāš kū wābarīgān bawēh {!}.

Sentence: 75     rāst gōwišn bāš kū awestwār bawēh {!}.

Sentence: 76     ēr-tan bāš kū was dōst bawēh {!}.

Sentence: 77     was dōst bāš kū husraw bawēh {!}.

Sentence: 78     husraw bāš kū hū-zīwišn bawēh {!}.

Sentence: 79     hu-bahr <ud> dēn dōst bāš kū ahlaw bawēh {!}.

Sentence: 80     ruwān pursīdār bāš kū wahištīg bawēh {!}.

Sentence: 81     dādār bāš kū garōdmānīg bawēh {!}.

Sentence: 82     zan ī kasān ma frēb čē pad ruwān wināh garān bawēd.

Sentence: 83     xwurdag ud abē-šnōhr mardōm ma dār čē-t spās nē dārēd {!}.

Page: 276 
Sentence: 84     xēšm ud kēn rāy ruwān xwēš tabāh ma kun.

Sentence: 85     ka-t pad kardan ud guftan niyāz čarbīhā namāz bar, čē az namāz burdan pušt be nē škenēd ud az čarb pursīdan dahān gandag nē šawēd.

Sentence: 86     fradom saxwan pad duščihr ma gōw.

Sentence: 87     ka pad hanjaman nišīnīh nazdīk ī mardōm ī dušāgāh ma nišīn kū dušāgāh paydāg nē bawēh {!}.

Sentence: 88     pad hanjaman sūr har gyāg kū nišīnēh {!} pad gyāg ī azabar ma nišēh {!} kū-t az ān gyāg nē āhanjēnd ō gyāg ī frōd-tar nišānēnd.

Sentence: 89     pad xwāstag ud xīr ī gētīg wistāx ma bāš čē xwāstag ud xīr ī gētīg ōwōn homānāg čiyōn murw-ē kē az ēn draxt ō ān draxt nišīnēd ud pad ēč draxt nē pāyēd.

Sentence: 90     andar pid ud mād ī xwēš tarsāgāh ud niyōxšīdār ud framān burdār bāš čē mard tā pid ud mād zīndag ōwōn {!} homānāg čiyōn šagr {!?} ka andar wēšag az kas-iz kas nē tarsēd ud ōy kē pid ud mād nēst ōwōn homānāg čiyōn zan ī wēwag kē čiš-iz u-š be stānēnd u-š čiš kardan nē tuwān ud har kas pad xwār dārēd.

Sentence: 91     duxt ī xwēš ō zīrak ud dānāg mard dah čē zīrak ud Page: 277  dānāg mard ōwōn homānāg čiyōn zamīg ī nēk kē tōhm padiš abganēnd u-š was jōrdā andar āyēd.

Sentence: 92     agar xwāhēh {!} kū az kas dušnām nē ašnawēh {!} ō kas dušnām ma dah.

Sentence: 93     tund <ud> halag gōwišn ma bāš čē tund ud halag gōwišn mardōm ōwōn homānāg čiyōn ātaxš ka andar wēšagestān ōftēd ud ham murw, māhīg sōzēd ud ham xrafstar sōzēd.

Sentence: 94     abāg ān mard kē-š pid ud mād aziš āzurd, ud nē hušnūd ham kār ma bāš kū-t dād pad dawāl nē dārād, u-t abāg kas dōstīh ud dōšāram nē bawēd.

Sentence: 95     šarm ud nang ī wad rāy ruwān ī xwēš ō dušox ma abespār.

Sentence: 96     saxwan ī dō ēwēnag ma gōw.

Sentence: 97     pad hanjaman gyāg kū nišīnēh {!} nazdīk ī drōzan ma nišīn čē tō-iz abēr dard-ōmand nē bawēh {!}.

Sentence: 98     asān-pāy bāš kū rōšn čašm bawēh {!}.

Sentence: 99     šab āxēz bāš kū kār rawāg bawēh {!}.

Sentence: 100     dušmen ī kahwan dōst ī nōg ma gīr čē dušmen ī kahwan ōwōn homānāg čiyōn mār syā {!} kē sad sālag kēn Page: 278  nē frāmōšēd.

Sentence: 101     dōst kahwan dōst ī nōg gīr čē dōst kahwan ōwōn homānāg čiyōn may kahwan ka har čand kahwan-tar pad xwarišn ī šahryārān wēš weh ud sazāg-tar šāyēd.

Sentence: 102     yazdān āfrīn kun ud dil pad rāmišn dār kū-t az yazdān abzāyišn ī pad nēkīh windēh {!}.

Sentence: 103     dahibed mard rāy nifrīn ma kun, čē pad šahr pāsbān hēnd ud nēkīh ō gēhānīgān handāzēnd.

Sentence: 104     ud tō rāy gōwēm pus ī man kē jahišnayār pad mardōmān čiš ī xrad weh čē agar pargast xwāstag be šawēd ayāb čahārpāy be mīrēd, xrad be mānēd.

Sentence: 105     pad āstawānīh ī dēn abar tuxš čē hunsandīh mahist dānāgīh ud čē wuzurg-tom ummēd ī mēnōg.

Sentence: 106     har gāh ruwān ī xwēš andar ayād dār.

Sentence: 107     nām ī xwēš rāy xwēškārīh ī xwēš be ma hil.

Sentence: 108     dast az duzdīh ud pāy az a-xwēškārīh raftan ud menišn az waran abārōn abaz dār čē kē kirbag kunēd pādāšn windēd ud kē wināh kunēd pādifrāh barēd.

Sentence: 109     har kē hamēmālān rāy čāh kanēd xwad andar ōfted.

Page: 279 
Sentence: 110     nēk mard āsāyēd ud wad mard bēš <ud> andōh ī garān barēd.

Sentence: 111     zan juwān pad zanīh gīr.

Sentence: 112     may paymān xwar, čē kē may a-paymān xwarēd was ēwēnag wināh aziš rawēd.

Sentence: 113     ka was afsōn mār tō weh dānēh {!}, dast zūd zūd ō mār ma nih kū tō be nē gazād ud abar gyāg mīrēh {!}.

Sentence: 114     agar was āšnāg āb tō weh dānēh {!} zūd zūd ō āb ī stahmag ma šaw kū āb tō bē nē barād ud pad gyāg mīrēh {!}.

Sentence: 115     pad ēč ēwēnag mihr-drōzīh ma kun kū-t xwarrah pasēn awiš nē rasād.

Sentence: 116     xwāstag kasān ma appar ud ma dār ud pad ān ī xwēš ma āmēz če ān ī xwēš wany {!} ud a-paydāg bawēd čē kē xwāstag ī nē xwēš āfrīd dārēd ud pad ān ī xwēš....

Sentence: 117     ... šād nē bawēd čē mardōm ōwōn homānāg {!} čiyōn xīk ī purr az wād ka wād aziš be šawēd čiš-iz ānōh be nē mānēd.

Sentence: 118     mardōm ōwōn homānāg čiyōn šīr xwārag kē xōg andar Page: 280  gīrēd padiš abar ēstēd.

Sentence: 119     ohrmazd rōz may xwar ud huram bāš.

Sentence: 120     wahman rōz wistarag jāmag ī nōg paymōz.

Sentence: 121     ardwahišt rōz ō mān ī ātaxšān šaw.

Sentence: 122     šahrēwar rōz šād bāš.

Sentence: 123     spandarmad rōz warz ī zamīg kun.

Sentence: 124     hordād rōz jōy kan.

Sentence: 125     amurdād roz dār ud draxt nišān.

Sentence: 126     day pad ādur rōz sar šōy ud mōy ud nāxun wirāy.

Sentence: 127     ādur rōz pad rāh šaw ud nān ma paz čē wināh ī garān bawēd.

Sentence: 128     ābān rōz az āb pāhrēz kun ud āb ma āzār.

Sentence: 129     xōr rōz kōdak ō dibīrēstān kun tā dibīr ud frazānag bawēd.

Sentence: 130     māh rōz may xwar ud abāg dōstān wiyufsišn kun ud az māh ī xwadāy āyaft xwāh.

Sentence: 131     tīr rōz kōdak ō tigr wistan ud nibard ud aswārīh hammōxtan frēst.

Page: 281 
Sentence: 132     gōš rōz parwarišn gōš-urwan kun ud gāw ō warz hammōz.

Sentence: 133     day pad mihr rōz sar šōy ud mōy ud nāxun wirāy ud angūr az razān abaz ō karxōš abgan tā weh be bawēd.

Sentence: 134     mihr rōz agar-it {!} az kas must-ē abar mad ēstēd, pēš mihr ēst az mihr dādwarīh xwāh ud garzišn kun.

Sentence: 135     srōš rōz bōxtārīh ī ruwān ī xwēš rāy az srōšahlāy āyaft xwāh.

Sentence: 136     rašn rōz rōzgār sabuk ud har kār ī kāmī kardan andar frārōnīh kun.

Sentence: 137     frawardīn rōz sōgand ma xwar ud ān rōz yazišn frawahr <ī> ahlawān kun tā hušnūd-tar be bawēnd.

Sentence: 138     wahrām rōz bun ī xān ud mān abgan tā zūd pad frazām rasēd ud ō razm ud kārezār šaw tā pad pērōzīh abāz āyēh {!}.

Sentence: 139     rām rōz zan xwāh ud kār ud rāmišn kun ud pēš dādwarān šaw tā pad pērōzīh ud bōxtagīh āyēh {!}.

Sentence: 140     wād rōz drang kun ud kār nōg ma paywand.

Sentence: 141     day pad dēn rōz har kār kāmīh kardan kun, ud zan ō xānag āwar ud mōy ud nāxun wirāy ud jāmag pōš.

Page: 282 
Sentence: 142     dēn rōz xrafstar ōzan.

Sentence: 143     ard rōz har čiš ī nōg xrīn ud andar xānag bar.

Sentence: 144     aštād rōz asp, gāw <ud> stōr ō gušn hil tā pad drustīh abāz āyēd.

Sentence: 145     asmān rōz pad rāh dūr šaw kū pad drastīh āyēh {!}.

Sentence: 146     zāmyād rōz dārūg ma xwar.

Sentence: 147     māraspand rōz jāmag abzāy ud dōz ud pōš ud zan pad zanīh gīr kū frazand ī tēz-niger ī nēk zāyēd.

Sentence: 148     anērān rōz mōy <ud> nāxun wirāy ud zan pad zanīh gīr kū frazand ī nāmčištīg zāyēd.

Sentence: 149     čē nēkīh rasēd ma abēr šād bāš ka anāgīh rasēd ma abēr pad bēš bāš čē kē nēkīh ī zamān anāgīh ud anāgīh ī zaman nekīh ud ēč abrāz nēst kē šēb nē az pēš ud ēč šēb nēst kē abrāz nē az pas.

Sentence: 150     pad xwarišn xwardan waranīg ma bāš {!}.

Sentence: 151     ud az har xwarišn be ma xwar ud zūd zūd ō sūr ud xwaran ī wuzurgān ma šaw kū-t stō nē bawēh {!}.

Sentence: 152     čē čahār čiš pad tan ī mardōmān ēn wattar dušāgāh abāg xwēštan kunēd, ēk pādyāwandīh nimūdan, ēk škōh ī abar-menišn kē abāg hangad mard nibard barēd, ēk Page: 283  masātōr ī rahīg xēm kē zan ī aburnāy pad zanīh gīrēd, ēk juwān mard kē zan ī pīr pad zanīh gīrēd.

Sentence: 153     mardōm dōstīh az bōwandag menišnīh ud hu-xēmīh az xūb ēwāzīh be šāyēd dānistan.

Sentence: 154     ud tō rāy gōwēm pus ī man kē jahišn-ayār<īh> pad mardōmān čiš ī xrad weh. anōšag ruwān bawād ādurbād ī māraspandān kē-š ēn handarz kard, u-š ēn framān dād. ēdōn bawād.



Page: 284 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.