TITUS
Middle Persian Corpus Jamasp-Asana
Part No. 10
Previous part

Text: Hand.Dan.Mazd.  
[handarz ī dānāgān ō māzdēsnān]


pad nām ī yazdān




Sentence: 1     gōš andar dārēd pahlomīhā, mardōmān kē hēd māzdēsn ī kišwar, ašnawēd ān ī dānāg gōwišn, ī frārōn handarz ī ohrmazd ud amahraspandān.

Sentence: 2     pad ušahin gāh abar ēstēd ōšōmandān mardōmān dādīhā, dast ud rōy pad gōmēz ī gōspandān šōyēd ud pad āb pāk šōyēd ud dādīhā wistarag ī pāk pōšēd ud pad nērang dēn ī māzdēsnān ēbyānghan bandēd pad menišn ud gōwišn ud kunišn ī frārōn menišnīgīhā ruwān rāy kār ud kirbag kunēd ud ahlāyīh pursīdār bawēd.

Sentence: 3     im rōz ka gētīgān hišt ēstēd <ud> ohrmazd ī xwadāy zīwišn ī gētīg<ī> pad mayān hilēd, pēš az ān ka astwihād abar rasēd ud wāy ī wattar abar ō kirb nišīnēd, ud wišōbišn ī kālbod {!}, ōš ud wīr ud bōy ud gyān ud tan az kālbod judāg kunēd, kālbod ī man rēman ud a-kār kunēd, tā sōšāns ud tan ī pasēn, ōš ud wīr ud bōy ud gyān ud tan ud kālbod ī mardōmān ēk ō Page: 263  dīd nē gumēzēd.

Sentence: 4     pas kālbod ī mardōmān ōwōn homānāg čiyōn draxt-ē ka kārēnd ud rōyēd ud abzāyēd ud waxšēd, škenēnd ud brīnēnd ud wēzēnd ud abar ō ātaxš nihēnd ud ātaxš sōzēd ud gugārēd ud wād ī ardā {!} andar ō gēhān parganēd, pas be ō ōy kē kārēd ayāb dīd ēg-iz nē dānēd kū xwad būd ayāb nē.

Sentence: 5     pas, az mardōmān andar gētīg ōy burzišnīg-tar kē har frādahišnīh, xwāstag be ō kār kirbag handōzēd.

Sentence: 6     abāg xwēš-āwandān, dōstān, jud-dēnān mardōmān mihr ma drōzēd, nāf ud paywand ī xwēs rāy, ān ī abārōn mihrōdrōz ma kārēd pad duš-mat ud duš-hūxt ud dušxwaršt.

Sentence: 7     "yezi. humatəm. *mainiiāt̰. hūxtəm. vāčəm. *mruiiāt̰. huuarštəm. vərəziiāt̰. š́iiaoϑanəm" {= Gj. 163}

Sentence: 8     čē agar humat menēd pad menišn ud hūxt gōwēd pad gōwišn ud huwaršt warzēd pad warzišn, be abespārēd ān ī xwēš ruwān pad pahlom axwān pad humat ud hūxt ud huwaršt.

Page: 264 
Sentence: 9     čē spenāg-mēnōg ast menišn humat, gōwišn hūxt ud warzišn huwaršt, dēn gāhānīg abēzag weh dēn ī māzdēsnān, pēšag hu-xēmīh ud rastag ahlāyīh.

Sentence: 10     "yezi. dušmatəm. *mainiiāt̰. dužūxtəm. *vāčəm. *mruiiāt̰. dužuuarštəm. vərəziiāt̰. š́iiaoϑanəm" {= Gj. 164}

Sentence: 11     čē agar dušmat menēd pad menišn, duš-hūxt gōwēd pad gōwišn, dušxwaršt warzēd pad warzišn, be abespārēd ān ī xwēš ruwān pad ān wattom axwān pad dušmat ud duš-hūxt ud dušxwaršt.

Sentence: 12     čē gannāg mēnōg ast mēnišn dušmat, ud gōwišn duš-hūxt, <ud> warzišn dušxwaršt, dēn ī jādūgīh ud pēšag ahlomōγīh ud ristag frēftārīh.

Sentence: 13     wuzurg ummēd ī kirbag rāy wināh ma kunēd.

Sentence: 14     pad juwānīh wistāx ma bawēd, ōšōmandān mardōmān, čē was kasān ī pad aburnāyīh az gētīg be widard hēnd, wany {!} ud apaydāg būd hēnd <kē> tā dagr zamān pattāyist, bē pas-iz frazām widaštan, wany {!} ud apaydāg būdan abāyēd.

Sentence: 15     bē nūn ēn gīrēm <ī> čiš ī frašgirdīg abāyēd <ī> dagr zamān pattāyēd ud nē wišōbēd.

Sentence: 16     tan! hangār kū-m widerēd kār ī gētīg, ān ī grāmīg nāzuk kālbod barēnd pad gyāg frāmōšān, ānōh an-ayād bē Page: 265  nihēnd, rōz pad rōz frāmōš-tar ud an-ayād-tar bawēd, būdān abar pahikārēnd ud drōn nē yazēnd ud man kē ruwān hēm stāyišn-ōmand az tō tan, mustōmand ud garzišnīg bawēm.

Sentence: 17     dārēm handarz-ē az dānāgān, az guft ī pēšēnīgān, ō ašmā be wizārēm pad rāstīh andar gēhān; agar padīrēd bawēd sūd ī dō gēhān.

Sentence: 18     pad gētīg wistāx ma bēd, was ārzōg andar gēhān, čē gētīg pad kas be nē hišt hēnd nē kōšk ud xān ud mān ud šādīhā pad dil čē xandēd ud čē wāzēd gētīgān.

Sentence: 19     čand mardōmān dīd hēm was andar gēhān, čand xwadāyān, spāhbedān dīd hēm, meh sālār abar mardōmān; ud awēšān meh <ud> wēš menīdār be raft hēnd andar gēhān, kū amā meh-tar hēm andar gēhān awēšān abē-rāh šud hēnd ud abāg dard be raft hēnd asāmān.

Sentence: 20     har kē čiyōn ēn dīd, čē rāy ka wastār andar gēhān, ka nē dārēd gētīg pad spinj, ud tan pad āsān, ud kirbag pad kardan dārēd ka fradāg ānōh abāyēd šudan bē dādwar rāst. Page: 266  šād ud dagr zīwišn ud farrox ud ahlaw ud pērōz-gar ud kāmag-hanjām.


frazaft pad drōd ud šādīh ud rāmišn.





Page: 267 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.