TITUS
Middle Persian Corpus Jamasp-Asana
Part No. 9
Previous part

Text: Cid.Hand.Por.  
[čīdag handarz ī pōryōtkēšān]


pad nām ī yazdān




Sentence: 1     pōryōtkēšān ī frodom-dānišnān pad paydāgīh ī az dēn, bē guft ēstēd kū har mardōm ka ō dād ī pānzdah sālag rasēd ēg-iš ēn and čiš bē dānistan abāyēd kū: kē hēm ud kē xwēš hēm ud az kū mad hēm ud abāz ō kū šawēm ud az kadām paywand ud tōhm hēm ud u-m čē xwēškārīh ī gētīg ud čē mizd ī mēnōg ud az mēnōg mad hēm ayāb pad gētīg būd hēm, ohrmazd xwēš hēm ayāb ahreman, yazdān xwēš hēm ayāb dēwān, wehān xwēš hēm ayāb wattarān, mardōm hēm ayāb dēw, rāh čand, u-m dēn kadām, u-m čē sud u-m čē ziyān, u-m kē dōst, u-m kē dušmen, buništag ēk ayāb dō, ud az kē nēkīh ud az kē wadīh ud az kē rōšnīh ud az kē tārīkīh ud az kē hu-bōyīh ud az kē gandagīh ud az kē dādestānīh ud az kē adādestānīh ud az kē apōxšāyišn ud az kē an-āmurzišn.

Page: 252 
Sentence: 2     nūn, wizīdār ī čim, dast abar nihād ī ham-ēdōn wurrōyišn mayānjīgīhā pad rāh ī xrad, bē abē-gumānīhā sazēd dānistan kū az mēnōg mad hēm nē pad gētīg būd hēm, āfrīdag hēm nē būdag, ohrmazd {!} xwēš hēm nē ahreman, yazdān xwēš hēm nē dēwan, wehān xwēš hēm nē wattarān, mardōm hēm nē dēw, ohrmazd dām hēm nē ahreman dām, u-m paywand ud tōhm az gayōmard, u-m mād spadarmad u-m pid ohrmazd u-m mardōmīh az mihrē, mihryānē kē fradom paywand ud tōhm az gayōmard būd hēnd.

Sentence: 3     u-m warzišn ī xwēškārīh ud frēzbānīh ēn kū ohrmazd pad astīh {!}, hamāg būdīh, hamāg bawēdīh ud anōšag-xwadāyīh ud a-kanāragīh ud abēzagīh, ahreman pad nēstīh ud menīdan wanē-būdīh ud xwēš-tan pad xwēšīh ī ohrmazd ud amahraspandān dāštan ud az ahreman ud dēwān ud dēw-ēsnīh judāg būdan.

Sentence: 4     pad gētīg fradom pad dēn āstwān būdan, padiš warzīdār ud yaštār ud az-iš a-wardāg būdan, wurrōyišn menišnīhā pad weh dēn ī māzdēsnān dāštan, sūd az ziyān ud winah az kirbag, wehīh az wattarīh ud rōšnīh Page: 253  az tārīkīh ud māzdēsnīh az dēw-ēsnīh bē wizīdan.

Sentence: 5     dudīgar {!}, zan kardan ud paywand ī gētīg rāyēnīdan padiš tuxšāg, aziš a-wardāg būdan.

Sentence: 6     sidīgar zamīg kišwzār kardan, warzīdan.

Sentence: 7     čahārom gōspand dādīha warzīdan.

Sentence: 8     panjom sē ēk ī rōz ud sē ēk ī šab ō hērbedestān šudan ud xrad ī ahlawān pursīdan, sē ēk ī rōz ud sē ēk ī šab warz ud ābādānīh kardan ud sē ēk rōz ud sē ēk ī šab xwardan ud rāmišn ud āsāyišn kardan.

Sentence: 9     ud pad ēn abē-gumān būdan kū: az kirbag sūd ud az wināh ziyān, u-m dōst ohrmazd ud dušmen ahreman ud rāh ī dēn ēk.

Sentence: 10     ēk rāh ī humat ud hūxt ud huwaršt, rōšnīh ud abēzagīh ud a-kanārag<īh> ī dādār ohrmazd ī hamāg būd ud hamāg bawēd.

Sentence: 11     ēk rāh ī dušmat ud duš-hūxt ud dušxwaršt, tārīkīh ud kanāragōmandīh ud harwispanāgīh ud margīh ud wattarīh ī ōy ī druwand gannāg-mēnōg, ī bawēd ī ka Page: 254  nē bawēd andar ēn dām, bawēd ka nē bawēd andar dām ī ohrmazd, ud pad frazām bē abēsīhēd.

Sentence: 12     ud pad-iz ēn abē-gumān būdan kū: buništag dō, ēk dādār ud ēk murnjēnīdār

Sentence: 13     ōy ī dādār, ohrmazd, kē harwisp nēkīh, harwisp rōšnīh.

Sentence: 14     u-š ān ī murnjēnīdār, druwand gannāg-mēnōg ī harwisp wattarīh ud purr-margīh ī druz ī frēftār.

Sentence: 15     ud pad ēn and abē-gumān būdan kū pad jud az sōšans ud ān haft kay, harwīn kas ōšōmand.

Sentence: 16     ud pad kunišn ī gyān, wišuftan ī tan ud āmār ī pad stōš ud būdan ī rist-āxēz ud tan pasēn, widārdan ī čīnwad puhl ud madan sōšāns, kardan ī rist-āxēz ud tan ī pasēn abē-gumān būdan.

Sentence: 17     ud dād ī ērīh ud dēn ī pōryōtkēšīh ud menišn ī frārōnīh<-ā> ud uzwān rāstīhā ud dast hu-warzīhā dāštan.

Sentence: 18     abāg hamāg wehān pad dād <ud> ērīh ēstādan.

Sentence: 19     āštīh ud hamīh pad hamāg kār ud kirbag <dāštan>.

Page: 255 
Sentence: 20     abāg hamāg wehān pad dād xūb dēnigīh ēstādan.

Sentence: 21     ē-z kē būd hēnd ud ē-z kē bawēnd ud ē-z kē hēnd, hamāg ham-kirbag ud ham-dādestān būdan.

Sentence: 22     kirbag ī pad dād rāy kard abērtar abar āyēd kū ān ī xwad warzēnd, padiš ahlawtar bawēnd.

Sentence: 23     ud guft kū "weh-dēn ī māzdēsnān padīrift, padiš abē-gumān hēm, nē tan ud nē gyān dōšāram rāy ud nē weh-zīwišnīh ud nē wēš-zīwišnīh ud nē az tan band bē wardišnīh rāy az weh-dēn ī māzdēsnān abāz nē ēstēm, padiš abē-gumān hēm, jud-kēšān nē stāyēm ud nē burzēm, u-šān padiš nē wurrōyēm.

Sentence: 24     čē paydāg kū az menišnān ud gōwišnān ud kunišnān, kunišn āmār.

Sentence: 25     čē ān saxwan an-ast, menišn a-griftār ud kunišn griftārōmand.

Sentence: 26     čē mardōmān pad kunišn gīrēnd, ēn-iz sē rāh andar tan ī mardōmān nihād ēstēd.

Sentence: 27     pad ēn sē rāh sē mēnōg gāh ud sē druz rāh dārēd, pad menišn wahman gāh <ud> xēšm rāh dārēd, pad gōwišn xrad gāh <ud> waran rāh dārēd ud pad kunišn spenāg mēnōg gāh <ud> gannāg mēnōg rāh dārēd {!}.

Sentence: 28     mardōmān pad ēn sē rāh saxt estišn xīr ud xwāstag ud Page: 256  ārzōg ī gētīg rāy, mizd ī mēnōg bē nē hilišn.

Sentence: 29     čē mardōm kē-š ēn sē pās ī-m guft abar tan ī xwēš bē pāyēd, menišn az dus-mat ud gōwišn az duš-hūxt ud kunišn az dušwaršt,

Sentence: 30     ēg spāsdār, būdan pad pāsdarīh ēn kū tuwān kardan kū ruwān ō dušox nē rasēd

Sentence: 31     čē mardōm patačaṇbiiō ka az pušt ī pidar ō aškamb ī mādar šawēd, ēg-iš astwihād mēnōgīhā band-ē andar ō grīw abganēd tā zīndag drahnāy ān band nē pad mēnōg ī weh ud nē pad mēnōg ī wattar az grīw bē kardan nē tuwan

Sentence: 32     bē, pad ān ī xwēš hu-kunišnīh, ān ī ahlaw pas az bē widerišnīh {!} ān band az grīw bē ōftēd ud ān ī druwand pad ān ī ham-band ō dušox nayēd.

Sentence: 33     čē har kē andar gētīg and čand yašt-ē bē kardan, wināh ī andar dast ud pāy bē dānistan abāyēd, bē, kē karr ayāb gung ēnyā <ī> pādixšā bē, ka kunīhēd ? ēn-iz hērdestān bē kardan ud zand bē dānistan.

Sentence: 34     pid ud mād frazand ī xwēš rāy ēn and kār <ud> kirbag pēš az pānzdah sāl bē hammōxtan abāyēd ud ka-š ēn and bē hammōxt, har kār ud kirbag ī frazand kunēd Page: 257  pid ud mād ōh bawēd ud ka-š nē hammōxt, frazand pad masādarīh wināh kunēd, pid ud mād ō bun bawēd.

Sentence: 35     pad kirbag ham-dādestān ud pad wināh jud-dādestān ud pad nēkīh spāsdār ud pad petyārag hunsand ud pad astānag bārestān, pad frēzbānīg kārān tuxšāg bawēd.

Sentence: 36     ud az hamāg wināh pad petīt bawēd ud <az hamāg> wināh ō puhl šawēd, andar hāsar bē ma hilēd.

Sentence: 37     ud waran ud ārzōg ī abārōn pad xrad bē zanēd.

Sentence: 38     āz pad hunsandīh ud xēšm pad srōš ud arešk pad hu-čašmīh ud niyāz pad widwarīh ud anāštīh pad āštīh ud druzīh pad rāstīh bē zanēd.

Sentence: 39     bē dānēd kū gyāg-ē wahišt weh, ud šahr-ē mēnōg huram-tar, ud deh-ē asmān rōšn-tar, <ud> mān rōšn-ē garōdmān <rōšntar> ud warz ī kirbag meh ummēd ī tan ī pasēn kē<-š> widīrišn nēst.

Sentence: 40     wattarān pad tuwān <ud> pādixšāyīh ma burzēd, čē az burzišn ī abārōn, wattarīh ō tan šawēd ud wehīh bē spōzēd.

Sentence: 41     pad frahang xwāstārīh tuxšāg bawēd, čē frahang tōhm ī dānišn, u-š bar xrad ud xrad har-dō-axwānīg rāyēnišn.

Sentence: 42     padīš guft ēstēd kū frahang andar frāxīh payrāyag ud Page: 258  andar škeftīh pānag ud andar astāng dast-gast-gīr ud andar tangīh pēšag.

Sentence: 43     pad kas-iz kas-afsōs mā kunēd čē afsōs-gar mardafsōs-bar zad-xwarrah, nifrīdag bawēnd u-šān frazand i šāyendag ī arteštār kam bēd.

Sentence: 44     har rōz ham-pursagīh rāy frāz ō hanjaman ī wehān šawēd čē ōy hanjaman ī wehān wēš šawēd kirbag ud ahlāyīh wēš baxšēnd.

Sentence: 45     ud har rōz sē bār andar mān ī ātaxšān šawēd ud ātaxš niyāyišn kunēd čē ōy kē andar mān ī ātaxšān wēš šawēd ud ātaxš niyāyišn wēš kunēd ēg-iš xwāstag ud ahlāyīh wēš baxšēnd.

Sentence: 46     az āzārišn ī pid ud mād ud sālār, saxt pahrēzēd kū-tān tandusraw ud ruwān druwand nē bawād.

Sentence: 47     bē dānēd kū az a-mar petyārag <ī> gannāg mēnōg ī druwand kirrēnīd sē ēn garān-tar: bastišn <ī> wēnišn ī čašm ud nē āšnawišn ī gōš ud sidīgar druz ī anāštīh.

Sentence: 48     čē paydāy kū xwaršēd im-čim rāy har rōz sē bār ō mardōm ī gētīg framān dahēd.

Sentence: 49     bāmdād ēn gōwēd kū ohrmazd ō ašmā kē mardōm hēd hamāg gōwēd kū pad kār ud kirbag kardan tuxšāg Page: 259  bawēd tā-tān man ziwišn ī gētīg pad mayān kunēm.

Sentence: 50     nēm-rōz ēn gōwēd kū pad zan xwāstan ud frazand warzīdan ud abārīg xwēškārīh tuxšāg bawēd čē tā tan ī pasēn gannāg mēnōg ud wišūdagān az ēn dām judāg nē bēd.

Sentence: 51     ēbārag-gāh ēn gōwēd kū az wināh ī-tān kard ēstēd pad petīt bēd tā-tān man bē āmurzēm, čē paydāg kū ēdōn čiyōn rōšnīh ī xwaršēd ō zamīg rasēd, u-š gōwišn ō zamīg āyēd.

Sentence: 52     andar axw ī astōmand pad menišn ud gōwišn ud kunišn mihōxt nē menēd ud nē gōwēd ud nē kunēd.

Sentence: 53     pad nērōg ī yazdān ud rāh ī xrad <ud> āfrāh ī dēn zēnāwandīhā abar tuxšēd ud bē nigerēd kū pas-iz ka arz ī kirbag ōwōn wuzurg ud a-kanārag, gannāg mēnōg pad nihuftārīh anāgīh handāxtār ud ohrmazd pad āškārāgēnīdārīh ōwōn kōxšišnīg, ān kadār-iz-ē kē az dēn āgāh ēg pad kār ud kirbag kardan tuxšāg az-iš a-wardāg-tar bawēd.

Page: 260 
Sentence: 54     ān ī ēn hazārag sarkē dēn wattarīh a-mar ud māzdēsnīh ōzār, ud dēn a-dādīh frahist, dād ud dēn, uskārišn ī wehān ud frārōn-kunišnān, xwēškārān šudag, ud kardag ī ahreman ud dēwān āškārāg, čiyōn-šān ēn daxšag abāz wirāyišnīh <ī> zamān, besīhēnišn mihrōdrujān ud dēwān-iz bahrān, dēn hamēstārān, rāstārīh ud ummēd weh dahišnān az azdahāgān čand paywastārīh ī kišwarān ī ohrmazd dādestān. ēg har kas pad wahman āštīh mehēnišn, ud pad dēn āfrāh ī xrad pursišn, pad xrad rāh ī ahlāyīh wizōhišn, ud pad rāh ī rādīh ruwān urwāzēnišn, ud pad hu-čašmīh gāh burzišn, ud pad hunar nām xwāhišn, ud pad ēr-menišnīh dōst handōzišn, ud pad bārestānīh ummēd passandišn, pad xēm wehīh handōzišn, ud pad ahlāyīh rāh ī rōšn garōdmān wirāyišn. ānōh az xwēš hu-kunišnīh warzīgīh bar xwarīhēd.

Sentence: 55     tan ī ōšōmand! ruwānwēnud kirbag kun čē ruwān hast nē tan, mēnōg hast nē gētīg.

Sentence: 56     tan rāy āzarm ī ruwān bē ma hilēd ud ma framōšēd.

Page: 261 
Sentence: 57     pad āzarm ī kas, frasāwandīg ī xīr ī gētīg, kāmag abar ān čiš ma barēd kē-tān tan ō puhl ud ruwān ō pādifrāh rasēd, bē ō ān čiš barēd, kē-š bar rāmišn ī hamēīg rāmišnīg bawēh.

Sentence: 58     ud hu-kunišnīh, nēk- kunišnīh warzīh, az tuxšišn zāyēd, az dahišn-iz dahišn, az xwāhišn xwāhišn, az ōš ōšīh, az menōg dānišn. dānišn ī ān abzār kē ast, būd ud bēd.

Sentence: 59     padiš dānīhēd nōg-dādārīh, rāyišn ud hammōxtārīh ī čišān, wirāstār<īh> har sazēd kardan, sūd xwāstār<īh> wispān pad har dō axwān rāyēnišnān.


frazaft pad drōd ud šādīh ud rāmišn.





Page: 262 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.