TITUS
Denkard Book 5
Part No. 2
Previous part

Chapter: 2  
Paragraph: 1     zardušt andar ān ī abēzag rōšnīh hāwand ī amahraspandān az bun-dahišn ōrōn ham hangirdīg ham ōšmurdīg ud bowandag a-fragūd-azišīhā padīruftārīh ud rawēgēnīdārīh ī dēn andar gēhān rāy mēnōgīg tāšīd ud payrāst ēstād.

Paragraph: 2     ka ō gil-paymōgīh ud stī ī gētīgīg paydāgīh frēstīhist wuzurg xwarrah ud rōšnīh ōwōn abar dīdārīg būd ī ham čiyōn andar ǰam tōhmag az purušasp pid ō dugdaw ī-š mādar mad ud tā-z zād ud gyān dranāy az xwēš mān gyāg kū franaft burzīhā ud stabrīhā brāh ī ātaxš homānāg ō dūr zamīg rōšnīh ud bām ud payrōg dād.

Page of ed.: 26 
Paragraph: 3     ud ǰādūgān parīgān sāstārān kayakān karapān ud abārīg wattarān kē andar-iš zāyišn ud aburnāyīh ē pad murnǰēnišn-kāmīh awiš škarwist hēnd kē margīh kē agārīh ud tā-z kē dast hušk ud abārīg armēštīh wēnābdāg-hanǰaman paydāgīhā abar mad
Paragraph: 4     ud tā-z gurgān ud abārīg dadān kē-šān az ān ī purušasp xwēšāwandān ī +ǰādūg ud dēw-yazag +čārag-xwāhīh be pad-iz uzmāyišn frāz awišān abgand.

Paragraph: 5     ham gōnag paydāg wahman padiš mehmānīh rāy pad zāyišn be xandīd.

Paragraph: 6     mad ō hampursagīh ī ohrmazd ud padīrift dēn ahreman was dēwān ud druzān pad bīm-nimāyišnīh ud woig-dahišnīh ud pahikārišn xwāyišn ud hāzišn awiš +frēstād hēnd ud hamāgān a-parīrišnīhā ud zadagīhā ud stōwīhā aziš wašt hēnd pad ān ī ōy ī abēzag frāz gōwišnīh ī abestāg ēwāzīg ohrmazd kam pahlomīh ud wirāst-zēnīh ud paydāg-mizdīh ud nērōg ī xwadāyīh ud ēbgad zyān rāh-nimāyīh ud frazām yazdān pērōzīh ud čē-š im rāyēnišn.

Paragraph: 7     ud dēwān čiyōn pēš az ān andar gēhān āškārag dwārist nirfst hēnd ud kālbod-škast ō nihānīg<īh> ud zruftagīh ōwōn wašt hēnd ud wiyābānān frēftagān ud škaft-pahikārān padiš xwastūgīh būd.

Page of ed.: 28 
Paragraph: 8     ka pad bowandag padīrift dēn az ohrmazd ō rām šāh kay wištāsp ud gēhānīgān āhixtan mad was ēwēnag xwarrah-kārīh ud dēw ud druz wānišnīh nimūd ud menišn ī wištāsp šāh ud wasān was ān ī nihuftag xīr āškārag guft ud gyānōmand tan ī pad-iz bahr aziš abē-tan ham bahr ī tan gyānōmand abāz kard [ud] padīrag was ǰādūgān dēw-yazagān dēw ham-pursagān dēw wiyābānēnīdagān frēftārān ud škaft-pahikārān.

Paragraph: 9     ud ān dwāzdah star-gōwišn kē-šān nām az dwāzdah axtar ud hāmist frazānagān ī bābbelāyagān ēd kē az xwanērah sar-xwadāyān frašn pursišnīg mad hēnd pad pahikār boxt ud abāg ān ēwēnag mēnōgīg ud gētīg widimāsīg warz-kārīh ī frāz az ǰamšēd an-hangōšīdagīhā paydāgīhist ud gugāy abāgīh ī-š wahman ud ašawahišt ud ātaxš ud abārīg čand weh mēnōg dīdārīg.

Paragraph: 10     +pas-iz-iš hamāg gōwišn ī ohrmazd dēn pad handāzišn ud tarāzēnišn frāz ō wištāsp ud gēhānīgān čiyōn škaft-āmārēnīdīhātar dāšt. ud frāztar-iz [az] ham-pahikārān <ī> padīrag xwēš saxwan čiyōn hamēmālīhātar abāg [ham-pahikārān] ēstād.

Paragraph: 11     ka-z pad xwarrah-kārīh ud bōxt-pahikārīh ud har ēwēnag payāmbarān ud waxšwarān daxšag paydāgīh ud ān ōwōn abāg ēwarīg gugāy wābarīgānīhist pas-iz rām šāh kay wištāsp bīm ī dēn petyārag +xyōn-iz būd wihān kē rāy-iš dēn rawāgēnīdārīh ēg padīrift ka-š dīd wuzurg xwarrah ud rāz.

Page of ed.: 30 
Paragraph: 12     ud hāmist zarēr ud spandyād ud frašuštar ud ǰāmāsp ud čand kišwarīg meh-paydāg ud hu-kunišn ud wehān ud wāspuhragān [ud] mardōm ān ī ohrmazd ud amahraspandān kām ud abāyišnīgīh ī dāmān a-wizīrišnīg rawāg-dēnīh wēnābdāg be dīd.

Paragraph: 13     abdom az dēwān hāzišn ud +sārēnišn be dīd widard-az-ōšmār +dēw-yasn hambadīg-kōšišnīhā padīrag ēstād hēnd ud was ardīg ud ōzanišn būd ī abēzagīhā būd kū gumēzagīhā dēn andar gēhān be raft.

Paragraph: 14     u-š hēnd im dēn <ī> abēzag nōg āwurdārān spurr rāyēnīdārān ušēdar ušēdarmāh sōšāns pad bowandag rawāgīh ī ēn ohrmazd dēn bawēd harwisp weh dām a-petyāragīh ud hamāg-xwārīh.

Next part


This text is part of the TITUS edition of Denkard Book 5.

Copyright TITUS Project, Frankfurt a/M, 9.1.2021. No parts of this document may be republished in any form without prior permission by the copyright holder.