TITUS
Dadestan-i denig
Part No. 17
Previous part

Chapter: 16  
Paragraph: 1     16-om pursišn ān ī pursīd kū nasā be ō murwān dād wihān čē ast?
Paragraph: 2     pāsox ēd kū passāzišn ī widardagān tan owōn škeft kū ō ham mad ēstēd dō hambadīgīh. ēk dagr pattāyēnīdan ēk tēz wardēnīdan u-š ēwēnag ēn: ō yazdān pādan [ud] dēwān wardēnišn.
Page of ed.: 68 
Paragraph: 3     pas az *ānayišn ī gyān tā ka kirb wehīh pad gyāg dēwān xrad-stardān az tan tarsēnd čiyōn mēš [ī] gurgān *xast ka az gurg frāz tarsēd.
Paragraph: 4     mēnōg ī tan ī xōg ī dagr <rāy> andar tan būd rāy a-wišōbišn owōn kāmag ī pad-iš mānist ka-z-iš hilēnd az māništ. pad im rāh ān ī widardān tan čand a-wināhīhātar šāyēd drust[ī]hā pāyišn.
Paragraph: 5     ham-passazag andar-iz dēn stāyīd ēstēd awēšān frawahrān kē abar nigāh dārēnd ān kirb ī sāmān kersāsp ud anī-z spāhyān az gyān ud tan be ān čim rāy.
Paragraph: 6     ka hamīhēd ēbgatīg ud wināhišn ō widardān tan padwišagōmand nasuš duwārēd pad-iš ud az ān stahmagīh ka čēr bawēd abar gyān ī ān ī ahlaw mardōm u-š stōwēnēd az ān ī hū-kardīhā gāh ī tan xwad andar tan gāh gīrēd ēg ān tan pad ān čim xwānīhēd nasā.
Paragraph: 7     ēd hambadīgīh ī tēz wardēnēd ēwēnag ud grāyīh ī im nasuš rāy ka-z pad wišōbišn ī ān tan šāyēd pas-iz ānāftan ud wardēnīd[an] bēšazdārīhā.
Paragraph: 8     az ān čiyōn mardōmān tan passāxtag ī az ast ī saxt ud pid ī sust ān *judīhēd rāyēnišn ī ast az ān ī pid.
Paragraph: 9     čē ast pad-iš saxtīh ka-š pid *ī tarr nē abāg u-š nē bawēd tarr dāštār xwad čihrīgīhā huškīhēd ud a-čarbišn ud dagr-pattāyišn bawēd. pad huškīh az nasāyīh be ō *hixrīh xwarīhēd.
Paragraph: 10     pid ī pēr[ā]mōn ast kē pad āsnīdārīh ī zīwēnāg gyān tarr [ud] waxšišnīg būd <ud> pas az gyān-šawišnīh tarrīh a-dōstīh rāy ō pūdagīh ud gandagīh rasēd u-š xrafstarān andar hambōšēnd.
Page of ed.: 70 
Paragraph: 11     saxt-iz ast pūdag wišōftag agār kardan payrāst ēstēd.
Paragraph: 12     *čē abāz ēstādan ī ān ī wināhkārān nazdīk-rāh-tar čār ān - be az mardōmān āstār - pid az ast jud stirdag gugārd bawēd.
Paragraph: 13     čiyōn pad judīh [ī] pid ō gugārišn az nasāyīh be *hixrīh ud ast be ō *xwēšēnišn [ud] kālbod ō *tāšišn (?) abērtar rasēd. čiyōn ān ī pid mardōmān xward rāh nēst čē-šān garāntom rēmanīh ud padwišag awiš abyōxtīhēd. āstārdgarān purrīhā az-iš āstārē[n]ēnd .Ă brēhēnīd [ud] dād ēstēd dād nē sazāg čē-š ālūdagīh ī ān *yōjdahrān gōspandān [ud] padwišagīg abāz paywandišnīh ī ō mardōmān rāy *garān an-ēwēn bawēd. pad rōšnān ātaxšān be-sōxtan nē sazāg čē āzārišn ī ān ī purr pākīh ī ātaxš az-iš bawēd. čiyōn xwad be ō [ātaxš] sōxt madan nē šāyēd *ēg ān ī sūxtār pad garāntom āstār az-iš *drōšīhēd. be ō jōyišn ī xrafstarān handāxtan nē sazāg čē mēnōg ī tan - ka ī-t mēnōgīh <ī> andar tan - <ī> wināhišn ī xrafstarān abar weh-kirbān nigerēd wišōbēd agārēnēd *ēg škeftīh bēšīhēd. pas owōn čārīgtar rāh bawēd ka čiyōn andar dēn framūd ēstēd ān ī nasušōmand tan pad rōšn kōf waxš būm nihīhēd. nē burdan ī ō āb ud urwar [ud] mardōmān māništ rāy ēwēnīhā bandīhēd tā kirb-xwārān sagān ud kirb-xwārān wayān kē nē dast-hammōg ī mardōmān hēnd nē-z pad xwarišn mehmān hēnd u-šān nē-z mardōm be ō nasā-xwarišnīh barēnd xwad tazān [ud] wāzān šawēnd ān ī pid xwarēnd. pad gyānīg ātaxš andar zīndag tan ī ohrmazd dāmān gugārīhēd. az pid-kirbīh ud nasāyīh be ō gil-kirbīh ud *hixrīh wihīrīhēd aw-iz xāk<īh> gumēzīhēd payrāstag bawēd.
Paragraph: 14     ōh-iz ān sagān ud wayān murwān xwad-čihrag yazdān kirb-xwārān dād ēstēd. ud stard-xradīh rāy pad-iz ān wināh an-āstārīd hēnd. az ān pid ī ō tan [ī] zīndag [ī] ohrmazd dāmān gumēzīhēd ēg ān-iz dēwān snāh <i> čiyōn nimūd andar ān dar ī abar čim ī sag ī Page of ed.: 72  ō murdag nimūdan kū widardagān tan ka be-āstārīhā ō ohrmazd dām zīndagān tan gumēzīhēd bahrīg rist-āxēzišnīh daxšag nimāyēd u-š pad-iš dēwān andar dārēnd ud andar dardīhēnd pad yazdān kām.

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.