TITUS
Dadestan-i denig
Part No. 16
Previous part

Chapter: 15  
Paragraph: 1     15-om pursišn ān ī pursīd kū ka-š sag ud way darrēnēnd ruwān dānēd u-š duš-xwārīh bawēd ayāb čiyōn bawēd?
Paragraph: 2     pāsox ēd kū tan ī mardōmān az brīnišn [ud] darrēnišn dard owōn mārēd kū ka ruwān ham-kadag ī tan <ī> u-š ruwān kē xwaš ud a-xwaš dānēd abāg gyān ī zīwēnāg ud bōy ī sōhēnāg ud abārīgān gyān abzārān az tan šawēd tan agār ud a-jumbāg ud a-mārišn ēč dard frazām-iz nē mārēd nē sōhēd ruwān abāg gyān az tan bērōn u-š darrēnišn awiš nē abyōxtag be pad ān ī mēnōgīg sōhišn wēnēd ud dānēd.
Paragraph: 3     ān ī druwand ka-šān wēnēd kū abd-passaxt tan ī-š paymōg *būd wišōbīhēd ud ān xōg ī-š dagr abāg būd ēd-iz rāy kū: čē-m andar tanōmandīh ud gētīg-rawišnīh wināh nē wizārd ud ahlāyīh nē Page of ed.: 66  hambārd ud pad-iz hangārišn ī abar ēd kū-m pad wēš būdan ī-m abāg ēn tan wināh wizārdan ud ruwān bōxtan šāyist hē. nūn az har(w) kas ud rāmišn ī gētīg ud meh ēmēd ī mēnōg judāg hēm ō škeft āmār ud garāntar bīm windād ēstēm ēg-iš abāz ō tanōmandīh ārzōgīhēd.
Paragraph: 4     u-š darrēnišn owōn garān bawēd ān tan rāy čiyōn abzār-xānag ī bēdom ud nihān ud wastarag ī andartom abāg *zay zēn-abzār *a-sāmānīhā agārīhēd ud wišōbīhēd.
Paragraph: 5     ōy-iz ī ahlaw abāg wuzurg urwāhman ī az ēwarz ī ō pāšom axwān *pas-iz xōg ī-š abāg tan būd ud wuzurg wuzurg-*frayādišnīg ahlāyīh ī-š hamē abāg tan hambārd rāy abar bu-tāšīd tan ī abd-passāxt ī sahmgēnīhā wišōbīhēd ud čimīgīhā ka-š abāyišn ī pad-iš bawēd.
Paragraph: 6     ud bōy ī mardōmān čiyōn 3 šab bērōn ī tan pad nazdīkīh ī tan nišīnēd ān ī rāstīhā bīm ud āhr be ō dēwān ud mizd ud drōd ud niwē be ō wehān mēnōgān ayādēnīdan ēmēdēnīdan ud abāyišn daxšag nimūdan rāy mēnōgīhā ēwāz gōwēd kū: čim darrēnēnd sag ud way ēn tan ī passāxt ka abdom-iz abāg hamīhēd tan ud gyān pad āxēzēnišn ī rist.
Paragraph: 7     ud *az ān ayādēnišn ī rist-āxēz ud *rawišn ī mēnōg ī tan abārīg weh mēnōgān urwāhmanīh ud ēmēd ud dēwān ud druzān bīm ud bēš rasēd.

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.