TITUS
Avestan Corpus
Part No. 74
Previous part

Book: Yt 
Chapter: 1 
Yašt



On the basis of the edition Geldner 1889.

Line arrangement in Yt. 10 according to the edition Gershevitch 1967.



Hōrmezd Yašt


Paragraph: 0 
Verse: Ca    pa. nąm. i. yazdą::
Verse: Cb    hōrmezd. i. xvadāe. i. aβazūnī. gurz. xvarahe. aβazāiiāt̰::
Verse: Cc    dādār. hōrmezd. i. raemaṇd. i. xvarahemaṇd. mainiuuą. mainiiō. i. bə̄tum. bə̄. rasāt̰::
Verse: Cd    əž. hamā. gunāh.1 patit. pašə̄mąnōm::
Verse: Ce    əž. haravistīn. dušmat. dužūxt. dužvarəšt. mən. pa. gəϑī. minīt̰. vaem. guft.
Verse: Cf       vaem. kard.
Verse: Cg       vaem. jast.
Verse: Ch       vaem. bun. būt̰. əstət̰.
Verse: Ci          əž. ą. gunāhihā.1 manišnī. gaβəšnī. kunišnī.
Verse: Cj             tanī. ruuąnī. gəϑī. mainiiąnī.
Verse: Ck             ōxš. aβāxš. pašə̄mą.
Verse: Cl             pa. sə. gaβəšnī. pa. patit. hōm.::

Verse: a       2xṣ̌naoϑra. ahurahe. mazdā̊.
Verse: b       tarōidīti.3 aŋrahe. mainiiə̄uš.
Verse: c    haiϑiiāuuarštąm.
Verse: d       hiiat̰. vasnā. fəraṣ̌ōtəməm.:

{= Y. 11,17 = Y. 0,4}
Verse: Q1a    fərastuiiē.4 humatōibiiascā. hūxtōibiiascā. huuarštōibiiascā.
Verse: Q1b       mąϑβōibiiascā. vaxəδβōibiiascā. varštuuōibiiascā::
Verse: Q1c    aibigairiiā. daiϑē. vīspā. humatācā. hūxtācā. huuarštācā::
Verse: Q1d    paitiriciiā. daiϑē. vīspā. dušmatācā. dužūxtācā. dužuuarštācā.::

{= Y. 11,18 = Y. 0,5}
Verse: Q2a    fərā. və̄. rāhī. aməṣ̌ā. spəṇtā. yasnəmcā. vahməmcā.
Verse: Q2b       fərā. manaŋhā.
Verse: Q2c       fərā. vacaŋhā.
Verse: Q2d       fərā. š́iiaoϑanā.
Verse: Q2e       fərā. aŋhuiiā.
Verse: Q2f       fərā. tanuuascīt̰. xvax́iiā̊. uštanəm.::

{= Y. 11,19}
Verse: e    staomī. aṣ̌əm::

Verse: Q3Aa    aṣ̌əm. vohū. vahištəm. astī::
Verse: Q3Ab    uštā. astī. uštā. ahmāi.
Verse: Q3Ac    hiiat̰. aṣ̌āi. vahištāi. aṣ̌əm. (si. bār.)::

Verse: Q3Ba    aṣ̌əm. vohū. vahištəm. astī::
Verse: Q3Bb    uštā. astī. uštā. ahmāi.
Verse: Q3Bc    hiiat̰. aṣ̌āi. vahištāi. aṣ̌əm.::

Verse: Q3Ca    aṣ̌əm. vohū. vahištəm. astī::
Verse: Q3Cb    uštā. astī. uštā. ahmāi.
Verse: Q3Cc    hiiat̰. aṣ̌āi. vahištāi. aṣ̌əm.::


{= Y. 27,12}
Verse: Q4a    frauuarāne. mazdaiiasnō. zaraϑuštriš. vīdaēuuō. ahura.t̰kaēṣ̌ō. (gāh. či. bə̄t̰.)
Verse: Q4b       hāuuanə̄e.5 aṣ̌aone. aṣ̌ahe. raϑβe.
Verse: Q4c          yasnāica. vahmāica. xṣ̌naoϑrāica. frasastaiiaēca::
Verse: Q4e       sāuuaŋhə̄e. vīsiiāica.4 aṣ̌aone. aṣ̌ahe. raϑβe.
Verse: Q4f          yasnāica. vahmāica. xṣ̌naoϑrāica. frasastaiiaēca::
Verse: Q4g       raϑβąm. aiiaranąmca. asniianąmca. māhiianąmca. yāiriianąmca. sarəδanąmca.
Verse: Q4h          yasnāica. vahmāica. xṣ̌naoϑrāica. frasastaiiaēca.::::

Verse: f       (rōz.) ahurahe. mazdā̊. raēuuatō. xvarənaŋuhatō.6
Verse: g          yasnāica. vahmāica. xṣ̌naoϑrāica. frasastaiiaēca::

Verse: Q5a    yaϑā. ahū. vairiiō.
Verse: Q5b       zaotā. frā. mē. mrūtē::
Verse: Q5c    aϑā. ratuš. aṣ̌āt̰cīt̰. haca.
Verse: Q5d       frā. aṣ̌auua. vīδuuā̊. mraotū.::


Paragraph: 1 
Verse: a    pərəsat̰. zaraϑuštrō. ahurəm. mazdąm:
Verse: b       ahura. mazda. mainiiō.1
Verse: c       spə̄ništa. dātarə. gaēϑanąm.
Verse: d       astuuaitinąm. aṣ̌āum.2
Verse: e    kat̰. asti. mąϑrahe. spəṇtahe. amauuastəməm.
Verse: f       kat̰. vərəϑrauuastəməm.
Verse: g       kat̰. xvarənaŋuhastəməm.3
Verse: h       kat̰. yāskərəstəməm.

Paragraph: 2 
Verse: a       kat̰. vārəϑraγniiōtəməm.
Verse: b       kat̰. baēṣ̌aziiōtəməm.
Verse: c       kat̰. t̰baēṣ̌ō.tauruuaiiąstəməm.
Verse: d          daēuuanąm. maš́iiānąmca.
Verse: e       kat̰. vīspahe. aŋhə̄uš. astuuatō.
Verse: f          mana. asti.1 vījaγmištəm.
Verse: g       kat̰. vīspahe. aŋhə̄uš. astuuatō.
Verse: h          aŋhuuąm.2 asti. vīmarəzištəm.

Paragraph: 3 
Verse: a    āat̰. mraot̰. ahurō. mazdā̊:
Verse: b    ahmākəm. nąma.
Verse: c          spitama. zaraϑuštra.
Verse: d       yat̰. aməṣ̌anąm. spəṇtanąm:
Verse: e    tat̰. asti. mąϑrahe. spəṇtahe. amauuastəməm.
Verse: f       tat̰. vərəϑrauuastəməm.
Verse: g       tat̰. xvarənaŋuhastəməm.
Verse: h       tat̰. yāskərəstəməm.

Paragraph: 4 
Verse: a       tat̰. vārəϑraγniiōtəməm.
Verse: b       tat̰. baēṣ̌aziiōtəməm.
Verse: c       tat̰. t̰baēṣ̌ō.tauruuaiiąstəməm.
Verse: d          daēuuanąm. maš́iiānąmca.
Verse: e       tat̰. vīspahe. aŋhə̄uš. astuuatō.
Verse: f          mana. asti. vījaγmištəm.
Verse: g       tat̰. vīspahe. aŋhə̄uš. astuuatō.
Verse: h          aŋhuuąm.1 asti. vīmarəzištəm.

Paragraph: 5 
Verse: a    āat̰. aoxta. zaraϑuštrō:
Verse: b    frōit̰. mē. tat̰. nąma. framrūiδi.1
Verse: c          aṣ̌āum. ahura. mazda.
Verse: d       yat̰. tē. asti.
Verse: e          mazištəmca. vahištəmca. sraēštəmca.
Verse: f          yāskərəstəməmca. vārəϑraγniiōtəməmca.
Verse: g          baēṣ̌aziiōtəməmca. t̰baēṣ̌ō.tauruaiiąstəməmca.
Verse: h             daēuuanąm. maš́iiānąmca:

Paragraph: 6 
Verse: a       yaϑa. azəm. tauruuaiieni.
Verse: b          vīspe.1 daēuua.2 maš́iiąsca.
Verse: c       yaϑa. azəm. tauruuaiieni.
Verse: d          vīspe. yātauuō.3 pairikā̊sca.
Verse: e       yat̰. mąm. naēciš. tauruuaiiāt̰.
Verse: f          nōit̰. daēuuō. naēδa. maš́iiō.
Verse: g          nōit̰. yātauuō.3 naēδa.4 pairikā̊.

Paragraph: 7 
Verse: a    āat̰. mraot̰. ahurō. mazdā̊:
Verse: b    fraxštiia.1 nąma. ahmi.
Verse: c             aṣ̌āum. zaraϑuštra.
Verse: d       bitiiō. vąϑβiiō.
Verse: e       ϑritiiō. auua.tanuiiō.2
Verse: f       tūiriia. aṣ̌a. vahišta.
Verse: g       puxδa. vīspa. vohu.3 mazdaδāta. aṣ̌aciϑra.
Verse: h       xštuuō. yat̰. ahmi. xratuš.
Verse: i       haptaϑō. xratumā̊.
Verse: j       aštəmō. yat̰. ahmi. cistiš.
Verse: k       nāumō. cistiuuā̊:4

Paragraph: 8 
Verse: a       dasəmō. yat̰. ahmi. spānō.
Verse: b       aēuuaṇdasō. spanaŋuhā̊.1
Verse: c       duuadasō. ahurō.
Verse: d       ϑridasō. səuuištō.
Verse: e       caϑrudasō. imat̰. vīduuaēštuuō.2
Verse: f       paṇcadasa. auuanəmna.
Verse: g       xṣ̌uuaš.dasa. hāta.marəniš.3
Verse: h       haptadasa. vīspa.hiṣ̌as.4
Verse: i       aštadasa. baēṣ̌aziia.
Verse: j       nauuadasa. yat̰. ahmi. dātō.
Verse: k       vīsąstəmō.5 ahmi.
Verse: l           6yat̰. ahmi.6 mazdā̊. nąma.7

Paragraph: 9 
Verse: a    yazaēṣ̌a. mąm. zaraϑuštra.
Verse: b       paiti. asni.1 paiti. xṣ̌afne.
Verse: c       yasō.bərətābiiō. zaoϑrābiiō:
Verse: d    jasāni.tē.2 auuaŋhaēca. rafnaŋhaēca.
Verse: e       azəm. yō. ahurō. mazdā̊.
Verse: f    jasāiti.tē. auuaŋhaēca. rafnaŋhaēca.
Verse: g       yō. vaŋhuš. sraoṣ̌ō. aṣ̌iiō.
Verse: h    jasā̊ṇti.tē. auuaŋhaēca. rafnaŋhaēca.
Verse: i       yā̊. āpō. yā̊sca. uruuarā̊.
Verse: j       yā̊sca. aṣ̌āunąm.3 frauuaṣ̌aiiō.

Paragraph: 10 
Verse: a       yezi. vaṣ̌i. zaraϑuštra.
Verse: b    auuā̊. t̰baēṣ̌ā̊. tauruuaiiō.1
Verse: c          daēuuanąm. maš́iiānąmca.
Verse: d          yāϑβąm. pairikanąmca.
Verse: e          sāϑrąm. kaoiiąm. karafnąmca.
Verse: f          mairiianąmca. bizaṇgranąm.2
Verse: g          aṣ̌əmaoγanąmca. bizaṇgranąm.2
Verse: h          vəhrkanąmca. caϑβarə.zaṇgranąm.3

Paragraph: 11 
Verse: a          haēnaiiā̊sca. pərəϑuuairikaiiā̊.1
Verse: b          pərəϑu.drafṣ̌aiiā̊. ərəδβō.drafṣ̌aiiā̊.2 uzəgərəptō.drafṣ̌aiiā̊.3
Verse: c          xrūrəm. drafṣ̌əm. barəṇtaiiā̊.
Verse: d    aϑa.4 imā̊. nāmə̄nīš.5 drəṇjaiiō. framrauua.
Verse: e       vīspāiš. aiiąnca.6 xṣ̌afnasca:

Paragraph: 12 
Verse: a    pāiiušca.1 ahmi.
Verse: b       dātāca. ϑrātāca. ahmi.
Verse: c       žnātāca. mainiiušca. ahmi.
Verse: d    spəṇtōtəmō. baēṣ̌aziia.2 nąma. ahmi.
Verse: e       baēṣ̌aziiōtəma. nąma. ahmi.
Verse: f       āϑrauua.3 nąma. ahmi.
Verse: g       āϑrauuatəma.4 nąma. ahmi.
Verse: h       ahura. nąma. ahmi.
Verse: i       mazdā̊. nąma. ahmi.
Verse: j       aṣ̌auua. nąma. ahmi.
Verse: k       aṣ̌auuastəma. nąma. ahmi.
Verse: l       xvarənaŋha. nąma. ahmi.
Verse: m       xvarənaŋuhastəma.5 nąma. ahmi.
Verse: n       pouru.daršta. nąma. ahmi.
Verse: o       pouru.darštəma. nąma. ahmi.
Verse: p       dūraēdaršta. nąma. ahmi.
Verse: q       dūraēdarštəma. nąma. ahmi.

Paragraph: 13 
Verse: a       spašta.1 nąma. ahmi.
Verse: b       vīta.2 nąma. ahmi.
Verse: c       dāta.2 nąma. ahmi.
Verse: d       pāta.2 nąma. ahmi.
Verse: e       ϑrāta.2 nąma. ahmi.
Verse: f       žnāta.3 nąma. ahmi.
Verse: g       žnōišta.4 nąma. ahmi.
Verse: h       fṣ̌umā̊. nąma. ahmi.
Verse: i       fṣ̌ūṣ̌e.mąϑra.5 nąma. ahmi.
Verse: j       isə.xṣ̌aϑra.6 nąma. ahmi.
Verse: k       isə.xṣ̌aϑriiōtəmō.7 nąma. ahmi.
Verse: l       nąmō.xṣ̌aϑrō. nąma. ahmi.
Verse: m       nąmō.xṣ̌aϑriiōtəmō.8 nąma. ahmi.

Paragraph: 14 
Verse: a       aδauuiš.1 nąma. ahmi.
Verse: b       vīδauuiš.2 nąma. ahmi.
Verse: c       paiti.pāiiuš.3 nąma. ahmi.
Verse: d       t̰baēṣ̌ō.tauruuā̊. nąma. ahmi.
Verse: e       haϑrauuane.4 nąma. ahmi.
Verse: f       vīspauuane.5 nąma. ahmi.
Verse: g       vīspatašə.6 nąma. ahmi.
Verse: h       vīspa.xvāϑra.7 nąma. ahmi.8
Verse: i       pouru.xvāϑra.9 nąma. ahmi.
Verse: j       10xvāϑrauuā̊. nąma. ahmi.

Paragraph: 15 
Verse: a       vərəzi.saoka.1 nąma. ahmi.
Verse: b       vərəzi.sauuā̊.1 nąma. ahmi.
Verse: c       səuuī.2 nąma. ahmi.
Verse: d       sūrā̊. nąma. ahmi.
Verse: e       səuuišta.3 nąma. ahmi.
Verse: f       aṣ̌a.4 nąma. ahmi.
Verse: g       bərəza.5 nąma. ahmi.
Verse: h       xṣ̌aϑriia. nąma. ahmi.
Verse: i       xṣ̌aϑriiōtəma.6 nąma. ahmi.
Verse: j       hudānuš.7 nąma. ahmi.
Verse: k       hudānuštəmō.8 nąma. ahmi.
Verse: l       dūraē.sūka. nąma. ahmi:
Verse: m       tā̊sca. imā̊. nāmə̄nīš.9

Paragraph: 16 
Verse: a    yasca.mē. aētahmi. aŋhuuō.1
Verse: b          yat̰. astuuaiṇti.
Verse: c             spitama. zaraϑuštra.
Verse: d       imā̊. nāmə̄nīš. drəṇjaiiō. framrauua.2
Verse: e          paiti. vā. asni.3
Verse: f          paiti. vā. xṣ̌afne.4

Paragraph: 17 
Verse: a    framrauua.
Verse: b       us.vā. hištō. nī.vā. paiδiiamnō.
Verse: c       nī.vā. paiδiiamnō. us.vā. hištō.
Verse: d       aiβiiā̊ŋhanəm.1 vā. aiβiiā̊ŋhaiiamnō.2
Verse: e       aiβiiā̊ŋhanəm.1 vā. būjaiiamnō.3
Verse: f       frā.vā. ṣ̌ūsa.4 haca. gātaot̰.5
Verse: g       6frā.vā. ṣ̌ūsa.4 haca. zaṇtaot̰.6
Verse: h       frā.vā. ṣ̌ūsa. haca. daiŋ́haot̰.7
Verse: i          auua.jasa. dax́iiūm.ā.8

Paragraph: 18 
Verse: a    nōit̰. dim. nara.1
Verse: b          aiŋ́he.2 aiiąn.3
Verse: c          nōit̰. aiŋ́hā̊.4 xṣ̌apō.
Verse: d       aēṣ̌mō.drūtahe.5 druxšmanaŋhō.6 auuasiiāt̰.
Verse: e          nōit̰. akauuō. nōit̰. cakauuō.
Verse: f          nōit̰. iṣ̌auuō.7 nōit̰. karəta.8 nōit̰. vazra.
Verse: g     nōit̰. vīsəṇte.9 asānō.10 auuasiiāt̰.

Paragraph: 19 
Verse: a    vīsąstaca.1 imā̊. nāmə̄nīš.
Verse: b       2parštasca. pairiuuārasca.3 vīsəṇte.4
Verse: c          pairi. mainiiaoiiāt̰.5 drujat̰.6
Verse: d          varəniiaiiāat̰ca.7 druuąiϑiiāt̰.8
Verse: e          zīzi.yūṣ̌at̰ca.9 kaiiaδāt̰.
Verse: f          vīspō.mahrkāat̰ca.10 pairi. druuatat̰.1
Verse: g             yat̰. aŋrāt̰. mainiiaot̰.12
Verse: h    +mąnaiiən. ahe.
Verse: i       yaϑa. hazaŋrəm. narąm.
Verse: j          ōiium.13 narəm. aiβiiāxṣ̌aiiōit̰.


Paragraph: 20  {~ Y. 44,16b-d}
Verse: a    1kə̄. vərəϑrəm.2 jā.   ϑβā.3 pōi. sə̄ṇghā.4 yōi. həṇtī.
Verse: b    ciϑrā. mōi. dąm.   ahūm.biš. ratūm. cīždī.
Verse: c    at̰. hōi. vohū.   səraoṣ̌ō.5 jaṇtū. manaŋhā.
Verse: d    mazdā. ahmāi.   yahmāi. vaṣ̌ī.6 kahmāicīt̰.


Paragraph: 21 
Verse: a    nəməm. kauuaēm. xvarənō.
Verse: b    nəmō. airiiene.1 vaējahi.2
Verse: c    nəmō. saoke. mazdaδāite.3
Verse: d    nəmō. ape.4 dāitiiaiiā̊.5
Verse: e    nəmō. arəduiiā̊.6 āpō. anāhitaiiā̊.
Verse: f    nəməm. vīspaiiā̊. aṣ̌aonō. stōiš.:


Verse: Q1Aa    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Ab    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Ac    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::(dah. bār.)

Verse: Q1Ba    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Bb    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Bc    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::

Verse: Q1Ca    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Cb    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Cc    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::

Verse: Q1Da    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Db    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Dc    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::

Verse: Q1Ea    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Eb    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Ec    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::

Verse: Q1Fa    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Fb    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Fc    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::

Verse: Q1Ga    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Gb    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Gc    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::

Verse: Q1Ha    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Hb    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Hc    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::

Verse: Q1Ia    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Ib    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Ic    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::

Verse: Q1Ja    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1J4    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Jc    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::



Verse: Q2Aa    aṣ̌əm. vohū.7 vahištəm. astī::
Verse: Q2Ab    uštā. astī. uštā. ahmāi.
Verse: Q2Ac    hiiat̰. aṣ̌āi. vahištāi. aṣ̌əm. (dah. bār.)::

Verse: Q2Ba    aṣ̌əm. vohū. vahištəm. astī::
Verse: Q2Bb    uštā. astī. uštā. ahmāi.
Verse: Q2Bc    hiiat̰. aṣ̌āi. vahištāi. aṣ̌əm.::

Verse: Q2Ca    aṣ̌əm. vohū. vahištəm. astī::
Verse: Q2Cb    uštā. astī. uštā. ahmāi.
Verse: Q2Cc    hiiat̰. aṣ̌āi. vahištāi. aṣ̌əm.::

Verse: Q2Da    aṣ̌əm. vohū. vahištəm. astī::
Verse: Q2Db    uštā. astī. uštā. ahmāi.
Verse: Q2Dc    hiiat̰. aṣ̌āi. vahištāi. aṣ̌əm.::

Verse: Q2Ea    aṣ̌əm. vohū. vahištəm. astī::
Verse: Q2Eb    uštā. astī. uštā. ahmāi.
Verse: Q2Ec    hiiat̰. aṣ̌āi. vahištāi. aṣ̌əm.::

Verse: Q2Fa    aṣ̌əm. vohū. vahištəm. astī::
Verse: Q2Fb    uštā. astī. uštā. ahmāi.
Verse: Q2Fc    hiiat̰. aṣ̌āi. vahištāi. aṣ̌əm.::

Verse: Q2Ga    aṣ̌əm. vohū. vahištəm. astī::
Verse: Q2Gb    uštā. astī. uštā. ahmāi.
Verse: Q2Gc    hiiat̰. aṣ̌āi. vahištāi. aṣ̌əm.::

Verse: Q2Ha    aṣ̌əm. vohū. vahištəm. astī::
Verse: Q2Hb    uštā. astī. uštā. ahmāi.
Verse: Q2Hc    hiiat̰. aṣ̌āi. vahištāi. aṣ̌əm.::

Verse: Q2Ia    aṣ̌əm. vohū. vahištəm. astī::
Verse: Q2Ib    uštā. astī. uštā. ahmāi.
Verse: Q2Ic    hiiat̰. aṣ̌āi. vahištāi. aṣ̌əm.::

Verse: Q2Ja    aṣ̌əm. vohū. vahištəm. astī::
Verse: Q2Jb    uštā. astī. uštā. ahmāi.
Verse: Q2Jc    hiiat̰. aṣ̌āi. vahištāi. aṣ̌əm.::


Paragraph: 22 
Verse: a    ahurəm. vairīm. yazamaide:
Verse: b    aṣ̌əm. vahištəm. sraēštəm. aməṣ̌əm. spəṇtəm. yazamaide:
Verse: c    aməmca. ϑrəməmca.1
Verse: d       aojasca. vərəϑrəmca.
Verse: e       xvarənasca. zauuarəca. yazamaide:
Verse: f    ahurəm. mazdąm. raēuuaṇtəm. xvarənaŋuhaṇtəm.2 yazamaide:


Paragraph: 26 
Verse: Q1a    yeŋ́hē. hātąm.3    āat̰. yesnē. paitī. vaŋhō.
Verse: Q1b    mazdā̊. ahurō. vaēϑā.   aṣ̌āt̰. hacā. yā̊ŋhąmcā.
Verse: Q1c    tąscā. tā̊scā. yazamaide.::::


{~ Ny. 1,16}
Verse: Ca    (vāž.::)
Verse: Cb    hōrməzd. i. aβazūnī. mardum.
Verse: Cc       mardum. sardagą. ham. bā. yašt. i. vahą.
Verse: Cd       vaēm. vahə. dīn. i. mazdaiiasną. āgāhī. āstuuąnī. nə̄kī. rasąnāt̰.
Verse: Cd       ə̄duṇ. bāt̰.::



Paragraph: 23 
Verse: Q1Aa    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Ab    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Ac    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::(dah. bār.)

Verse: Q1Ba    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Bb    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Bc    xṣ̌aϑrəmcā. ahurāi. ā.   yim. drigubiiō. dadat̰. vāstārəm.::

Verse: a    yasnəmca. vahməmca. aojasca. zauuarəca. āfrīnāmi.
Verse: b       ahurahe. mazdā̊. raēuuatō. xvarənaŋuhatō.2

Verse: Q2Aa    aṣ̌əm. vohū.3 vahištəm. astī::
Verse: Q2Ab    uštā. astī. uštā. ahmāi.
Verse: Q2Ac    hiiat̰. aṣ̌āi. vahištāi. aṣ̌əm.


Paragraph: 24 
Verse: a    1nipāiiōiš. maṣ̌īm. uruuaϑəm.2 yauuaētāite.
Verse: b          zaraϑuštra.
Verse: c       auruuaϑāt̰.3 parō. dušmainiiaot̰:4
Verse: d    +mā.təm.5 uruuaϑəm.2 frāiiauuaiiōiš.6 snaϑāi.7
Verse: e       mā. dužbərətə̄e.8 ziiānąm. apaiiatə̄e.9
Verse: f    mā.10 yasōiš.11 aom.12 narəm. dāitīm.13
Verse: g       yō.nā.14 mazištəm. yasnəm.15 yazāite.16
Verse: h       kasištəm. yasniiāt̰.17 frāiiatāt̰.18 vahmiią.19
Verse: i          aməṣ̌ə̄. spəṇtə̄.

Paragraph: 25 
Verse: a    iδa.1 asti. vohu.2 manō.
Verse: b       mana. dąmi.3
Verse: c          zaraϑuštra.
Verse: d    iδa.4 aṣ̌əm. yat̰.5 vahištəm.
Verse: e       mana. dąmi.6
Verse: f          zaraϑuštra.
Verse: g    iδa.4 xṣ̌aϑrəm. vairīm.
Verse: h       mana. dąmi.7
Verse: i          zaraϑuštra.
Verse: j    iδa.4 spəṇta. ārmaitiš.
Verse: k       mana. dąmi.7
Verse: l          zaraϑuštra.
Verse: m    iδa.4 hauruuata. amərətāta.8
Verse: n       yōi. stō.9 miždəm.10 aṣ̌aonąm.11
Verse: o          parō.asti. jasəṇtąm.
Verse: p       mana. dąmi.12
Verse: q          zaraϑuštra.

Paragraph: 26 
Verse: a    vaēϑāca.1
Verse: b       tat̰ca.2 kaēϑica.3
Verse: c          āi. aṣ̌āum. zaraϑuštra.
Verse: d       mana. xraϑβāca.4 cistica:5
Verse: e          6yāiš. ā. aŋhuš. pouruiiō.7 bauuat̰.8
Verse: f          yaϑāca.9 aŋhat̰. apə̄məm. aŋhuš.10

Paragraph: 27 
Verse: a    hazaŋrəm. baēṣ̌azanąm.
Verse: b    baēuuarə. baēṣ̌azanąm.1 (si. bār.)::

Verse: Q1Aa       hazaŋrəm. baēṣ̌azanąm.
Verse: Q1Ab       baēuuarə. baēṣ̌azanąm.::

Verse: Q1Ba       hazaŋrəm. baēṣ̌azanąm.
Verse: Q1Bb       baēuuarə. baēṣ̌azanąm.::

Verse: c          spəṇtaheca. ārmatōiš:
Verse: d    ārmaitica.2 spəṇtaiia. aēṣ̌ąm.3 t̰baēṣ̌ō. sciṇdaiiaδβəm.4
Verse: e       pairi. uṣ̌i.5 vāraiiaδβəm.
Verse: f       hąm.6 gauua.7 nidarəzaiiaδβəm.8
Verse: g       hąm.6 zanuua.9 zəmbaiiaδβəm.10
Verse: h       aipi.11 dərəzuuanəm.12 dərəzaiiaδβəm.13

Paragraph: 28 
Verse: a    kat̰. aṣ̌auua. mazda. vanat̰. druuaṇtəm:
Verse: b    aṣ̌auua. vanat̰.1 drujim.2
Verse: c    aṣ̌auua. vanat̰.1 druuaṇtəm.:
Verse: d    +3uṣ̌i. ahurahe. mazdā̊. yazamaide.
Verse: e       darəϑrāi. mąϑrahe. spəṇtahe:
Verse: f    xratūm. ahurahe. mazdā̊. yazamaide.
Verse: g       marəϑrāi.4 mąϑrahe. spəṇtahe:
Verse: h    hizuuąm. ahurahe. mazdā̊. yazamaide.
Verse: i       frauuākāi. mąϑrahe. spəṇtahe:
Verse: j    aom.5 gairīm. yazamaide.
Verse: k       yim. uṣ̌i.dąm.6 uṣ̌i.darənəm.7
Verse: l          paiti. asni.8 paiti. xṣ̌afne.
Verse: m             yasō.bərətābiiō. zaoϑrābiiō.3

Paragraph: 29 
Verse: a    āat̰. aoxta. zaraϑuštrō:
Verse: b       upa. ϑβā.1 azəm. maine.2 anu.daδaiiat̰.3
Verse: c    spəṇtaiiā̊. ārmatōiš. dōiϑrābiia.4
Verse: d       auuāstriiata.5 mairiiō.6

Paragraph: 30 
Verse: a    +1hazaŋrəm. baēṣ̌azanąm.
Verse: b    baēuuarə. baēṣ̌azanąm:2
Verse: c    ahe. narš. aṣ̌aonō. frauuaṣ̌īm. yazamaide.
Verse: d       yō. asmō.xvanuuā̊.3 nąma:
Verse: e    aδāt̰.4 aniiaēṣ̌ąm. aṣ̌aonąm.
Verse: f       fraxšti.5 yazāi. frauuarəta:1+
Verse: g          6gaokərənahe. sūrahe. mazdaδātahe.
Verse: h    gaokərənəm. sūrəm. mazdaδātəm. yazamaide.6

Paragraph: 31 
Verse: a    1uṣ̌i. ahurahe. mazdā̊. yazamaide.
Verse: b       darəϑrāi. mąϑrahe. spəṇtahe:
Verse: c    xratūm. ahurahe. mazdā̊. yazamaide.
Verse: d       marəϑrāi. mąϑrahe. spəṇtahe:
Verse: e    hizuuąm. ahurahe. mazdā̊. yazamaide.
Verse: f       frauuākāi. mąϑrahe. spəṇtahe:
Verse: g    aom.2 gairīm. yazamaide.
Verse: h       yim. uṣ̌i.dąm.3 uṣ̌i.darənəm.
Verse: i          paiti. asni.4 paiti. xṣ̌afne.
Verse: j             yasō.bərətābiiō. zaoϑrābiiō.:

Verse: Q1Aa    aṣ̌əm. vohū. vahištəm. astī::
Verse: Q1Ab    uštā. astī. uštā. ahmāi.
Verse: Q1Ac    hiiat̰. aṣ̌āi. vahištāi. aṣ̌əm.

Verse: Q2Aa    +ahe. narš. aṣ̌aonō. frauuaṣ̌īm. yazamaide.
Verse: Q2Aa       yō. asmō.xvanuuā̊. nąma:
Verse: Q2Ad    aδāt̰. aniiaēṣ̌ąm. aṣ̌aonąm.
Verse: Q2Ad       fraxšti. yazāi. frauuarəta:
Verse: Q2Ad          gaokərənahe. sūrahe. mazdaδātahe.
Verse: Q2Ad    gaokərənəm. sūrəm. mazdaδātəm. yazamaide.
Verse: Q2Aa    uṣ̌i. ahurahe. mazdā̊. yazamaide.
Verse: Q2Ab       darəϑrāi. mąϑrahe. spəṇtahe:
Verse: Q2Ab    xratūm. ahurahe. mazdā̊. yazamaide.
Verse: Q2Ab       marəϑrāi. mąϑrahe. spəṇtahe:
Verse: Q2Ab    hizuuąm. ahurahe. mazdā̊. yazamaide.
Verse: Q2Ab       frauuākāi. mąϑrahe. spəṇtahe:
Verse: Q2Ab    aom. gairīm. yazamaide.
Verse: Q2Ag       yim. uṣ̌i.dąm. uṣ̌i.darənəm.
Verse: Q2Ag          paiti. asni. paiti. xṣ̌afne.
Verse: Q2Ag             yasō.bərətābiiō. zaoϑrābiiō.:5 (si. bār.)

Verse: Q2Ba    ahe. narš. aṣ̌aonō. frauuaṣ̌īm. yazamaide.
Verse: Q2Ba       yō. asmō.xvanuuā̊. nąma:
Verse: Q2Bd    aδāt̰. aniiaēṣ̌ąm. aṣ̌aonąm.
Verse: Q2Bd       fraxšti. yazāi. frauuarəta:
Verse: Q2Bd          gaokərənahe. sūrahe. mazdaδātahe.
Verse: Q2Bd    gaokərənəm. sūrəm. mazdaδātəm. yazamaide.
Verse: Q2Ba    uṣ̌i. ahurahe. mazdā̊. yazamaide.
Verse: Q2Bb       darəϑrāi. mąϑrahe. spəṇtahe:
Verse: Q2Bb    xratūm. ahurahe. mazdā̊. yazamaide.
Verse: Q2Bb       marəϑrāi. mąϑrahe. spəṇtahe:
Verse: Q2Bb    hizuuąm. ahurahe. mazdā̊. yazamaide.
Verse: Q2Bb       frauuākāi. mąϑrahe. spəṇtahe:
Verse: Q2Bb    aom. gairīm. yazamaide.
Verse: Q2Bg       yim. uṣ̌i.dąm. uṣ̌i.darənəm.
Verse: Q2Bg          paiti. asni. paiti. xṣ̌afne.
Verse: Q2Bg             yasō.bərətābiiō. zaoϑrābiiō.:

Verse: Q2Ca    ahe. narš. aṣ̌aonō. frauuaṣ̌īm. yazamaide.
Verse: Q2Ca       yō. asmō.xvanuuā̊. nąma:
Verse: Q2Cd    aδāt̰. aniiaēṣ̌ąm. aṣ̌aonąm.
Verse: Q2Cd       fraxšti. yazāi. frauuarəta:
Verse: Q2Cd          gaokərənahe. sūrahe. mazdaδātahe.
Verse: Q2Cd    gaokərənəm. sūrəm. mazdaδātəm. yazamaide.
Verse: Q2Ca    uṣ̌i. ahurahe. mazdā̊. yazamaide.
Verse: Q2Cb       darəϑrāi. mąϑrahe. spəṇtahe:
Verse: Q2Cb    xratūm. ahurahe. mazdā̊. yazamaide.
Verse: Q2Cb       marəϑrāi. mąϑrahe. spəṇtahe:
Verse: Q2Cb    hizuuąm. ahurahe. mazdā̊. yazamaide.
Verse: Q2Cb       frauuākāi. mąϑrahe. spəṇtahe:
Verse: Q2Cb    aom. gairīm. yazamaide.
Verse: Q2Cg       yim. uṣ̌i.dąm. uṣ̌i.darənəm.
Verse: Q2Cg          paiti. asni. paiti. xṣ̌afne.
Verse: Q2Cg             yasō.bərətābiiō. zaoϑrābiiō.:


Verse: Q1Aa    aṣ̌əm. vohū. vahištəm. astī::
Verse: Q1Ab    uštā. astī. uštā. ahmāi.
Verse: Q1Ac    hiiat̰. aṣ̌āi. vahištāi. aṣ̌əm.


Paragraph: 32 
Verse: a    1dāmīm. yazamaide.
Verse: b          yąm. ārmaitīm. spəṇtąm.
Verse: c       yehe.2 dāϑre.3
Verse: d          aṣ̌aheca. aṣ̌aonąmca.4
Verse: e             aṣ̌a.paoiriianąm.5 dāmanąm:

{~ Y. 27,1-2}
Verse: Q1d    aētat̰. dim. vīspanąm. mazištəm.6 dazdiiāi.
Verse: Q1b       ahūmca. ratūmca. yim. ahurəm. mazdąm.
Verse: Q1c          snaϑāi. aŋrahe. mainiiə̄uš. druuatō.
Verse: Q1d          snaϑāi. aēṣ̌mahe. xruuīm.draoš.
Verse: Q1e          snaϑāi. māzainiianąm. daēuuanąm.
Verse: Q1f          snaϑāi. vīspanąm. daēuuanąm.
Verse: Q1g             varəniianąmca. druuatąm.
Verse: Q1a          fradaϑāi. ahurahe. mazdāi. raēuuatō. xvarənaŋuhatō.
Verse: Q1b          fradaϑāi. aməṣ̌anąm. spəṇtanąm.
Verse: Q1c          fradaϑāi. tištriiehe. stārō. raēuuatō. xvarənaŋuhatō.
Verse: Q1d          fradaϑāi. narš. aṣ̌aonō.
Verse: Q1e          fradaϑāi. vīspanam. spəṇtahe. mainiiə̄uš. dāmanąm. aṣ̌aonąm.


Paragraph: 33  {~ Ny. 1,18; Y. 72,9 / 68,11 / SrB 5}
Verse: Q1a    aṣ̌əm. vohū. vahištəm. astī::
Verse: Q1b    uštā. astī. uštā. ahmāi.
Verse: Q1c    hiiat̰. aṣ̌āi. vahištāi. aṣ̌əm.

Verse: Q2a    ahmāi. raēšca.1 xvarənasca.
Verse: Q2b       ahmāi. tanuuō. druuatātəm.
Verse: Q2c       ahmāi. tanuuō. vazduuarə.
Verse: Q2d       ahmāi. tanuuō. vərəϑrəm.
Verse: Q2e       ahmāi. īštīm. pouruš.xvāϑrąm.
Verse: Q2f       ahmāi. āsnąmcit̰. frazaṇtīm.
Verse: Q2g       ahmāi. darəγąm. darəγō.jītīm.
Verse: Q2h       ahmāi. vahištəm. ahūm. aṣ̌aonąm. raocaŋhəm. vīspō.xvāϑrəm:

Verse: a    aϑa. jamiiāt̰. yaϑa. āfrīnāmi.:

Verse: Q3a    aṣ̌əm. vohū. vahištəm. astī::
Verse: Q3b    uštā. astī. uštā. ahmāi.
Verse: Q3c    hiiat̰. aṣ̌āi. vahištāi. aṣ̌əm.

Verse: Q4Aa       hazaŋrəm.1 baēṣ̌azanąm.
Verse: Q4Ab       baēuuarə. baēṣ̌azanąm.::
Verse: Q4Ba       hazaŋrəm. baēṣ̌azanąm.
Verse: Q4Bb       baēuuarə. baēṣ̌azanąm.::
Verse: Q4Ca       hazaŋrəm. baēṣ̌azanąm.
Verse: Q4Cb       baēuuarə. baēṣ̌azanąm.::

Verse: Q5a    aṣ̌əm. vohū. vahištəm. astī::
Verse: Q5b    uštā. astī. uštā. ahmāi.
Verse: Q5c    hiiat̰. aṣ̌āi. vahištāi. aṣ̌əm.

Verse: Q6a    jasa. mē. auuaŋhe.1 mazda.
Verse: Q6b    jasa. mē. auuaŋhe. mazda.
Verse: Q6c    jasa. mē. auuaŋhe. mazda.

Verse: Q7b       amahe. hutāštahe. huraoδahe.
Verse: Q7c       vərəϑraγnahe. ahuraδātahe.
Verse: Q7d       vanaiṇtiiā̊sca. uparatātō.::

Verse: Q8a       rāmanasca. xvāstrahe.
Verse: Q8b       vaiiaoš. uparō.kairiiehe.
Verse: Q8c       taraδātō. aniiāiš. dāmąn::
Verse: Q8d    aētat̰. tē. vaiiō.
Verse: Q8e       yat̰. tē. asti. spəṇtō.mainiiaom::
Verse: Q8f          ϑβāṣ̌ahe. xvaδātahe.
Verse: Q8g          zruuānahe. akaranahe.
Verse: Q8h          zruuānahe. darəγō.xvaδātahe.:

Verse: Q9a    aṣ̌əm. vohū. vahištəm. astī::
Verse: Q9b    uštā. astī. uštā. ahmāi.
Verse: Q9c    hiiat̰. aṣ̌āi. vahištāi. aṣ̌əm.

Verse: Ca    kərba. mažd. gunāh. guzārašni. rā. kunōm. ašahī. ruuą.
Verse: Cb       dušārm. rā. ham. kərbaī. i. hamā. vahą. i. haft. buṇdahihā. bə̄. rasāt̰::
Verse: Cc    ašō. bə̄t̰. də̄r. zī.::

Verse: Q10a    aϑa. jamiiāt̰. yaϑa. āfrīnāmi.:

Verse: Q11a    aṣ̌əm. vohū. vahištəm. astī::
Verse: Q11b    uštā. astī. uštā. ahmāi.
Verse: Q11c    hiiat̰. aṣ̌āi. vahištāi. aṣ̌əm.




Haft Aməšāspend Yašt


Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.