TITUS
Avestan Corpus
Part No. 66
Previous part

Chapter: 65 
Paragraph: 1 
Verse: a    yazāi. āpəm. arəduuīm.1 sūrąm. anāhitąm.
Verse: b       pərəϑū.frākąm.2 baēṣ̌aziiąm.
Verse: c       vīdaēuuąm. ahurō.t̰kaēṣ̌ąm.
Verse: d       yesniiąm.3 aŋuhe.4 astuuaite.5
Verse: e       vahmiiąm. aŋuhe.4 astuuaite.5
Verse: f       āδū.frāδanąm.6 aṣ̌aonīm.
Verse: g       vąϑβō.frāδanąm. aṣ̌aonīm.
Verse: h       gaēϑō.frāδanąm.7 aṣ̌aonīm.
Verse: i       ṣ̌aētō.frāδanąm.8 aṣ̌aonīm.
Verse: j       daiŋ́hu.frāδanam.9 aṣ̌aonīm::

Paragraph: 2 
Verse: a       yā. vīspanąm. arṣ̌nąm. xṣ̌udrā̊.1 yaoždaδāiti.2
Verse: b       yā. vīspanąm. hāiriṣ̌inąm.3 ząϑāi.4 garəβą.5 yaoždaδāiti.
Verse: c       yā. vīspā̊. hāiriṣ̌īš. ^huzāmitō.6 daδāiti.
Verse: d       yā. vīspanąm. hāiriṣ̌inąm. dāitīm. raϑβīm.7 paēma. auua.baraiti::8

Paragraph: 3 
Verse: a       masitąm. dūrāt̰. frasrūtąm.
Verse: b       yā. asti. auuauuaiti.1 masō.2
Verse: c          yaϑa. vīspā̊. imā̊. āpō.
Verse: d             yā̊.3 zəmā. paiti. frataciṇti.4
Verse: e       yā. amauuaiti. fratacaiti.5
Verse: f          hukairiiāt̰. haca. barəzaŋhat̰.6
Verse: g          aoi.7 zraiiō.8 vouru.kaṣ̌əm.

Paragraph: 4 
Verse: a    yaozəṇti.1 vīspe. karanō.
Verse: b       zraiiā.2 vouru.kaṣ̌aiia.3
Verse: c    ā. vīspō. maiδiiō. yaozaiti.4
Verse: d       yat̰. hīš. aoi.5 fratacaiti.
Verse: e       yat̰. hīš. aoi.5 fražgaraiti.
Verse: f          arəduuī.6 sūra. anāhita::
Verse: g          yeŋ́he. hazaŋrəm. vairiianąm.
Verse: h             hazaŋrəm. apaγžāranąm::
Verse: i    kascit̰ca. aēṣ̌ąm. vairiianąm.
Verse: j    kascit̰ca. aēṣ̌ąm. apaγžāranąm.
Verse: k       caϑβarə.satəm.7 aiiarə.baranąm.8
Verse: l          huuaspāi. naire.9 barəmnāi.

Paragraph: 5 
Verse: a    aiŋ́hā̊sca.1 mē. aēuuaŋhā̊.2 āpō.
Verse: b       apaγžārō. vījasāiti.3
Verse: c          vīspāiš. aoi.4 karṣ̌uuąn. yāiš. hapta::
Verse: d    aiŋ́hā̊sca.5 mē. aēuuaŋhā̊.2 āpō.
Verse: e       hamaϑa. auua.baraiti.6
Verse: f          hąminəmca.7 zaiianəmca::8
Verse: g    hā. mē.9 āpō. yaoždaδāiti.
Verse: h       hā. arṣ̌nąm. xṣ̌udrā̊.10
Verse: i       hā. xṣ̌aϑrinąm.11 garəβą.12
Verse: j       hā. xṣ̌aϑrinąm.11 paēma.

Paragraph: 6 
Verse: a    ā. hātąmca.1 aŋhuṣ̌ąmca.
Verse: b       zātanąmca. azātanąmca.
Verse: c       aṣ̌aonąm.2 iδa. jasəṇtu.3 frauuaṣ̌aiiō.
Verse: d          yōi.4 hīš. baβrarə.5 paitiiāpəm.6
Verse: e             nazdištaiiāt̰. apat̰. haca.

Paragraph: 7 
Verse: a    mā. nō.1 āpō. dušmanaŋhe.2
Verse: b    mā. nō. āpō. dužuuacaŋhe.3
Verse: c    mā. nō. āpō. duš.š́iiaoϑanāi.4
Verse: d    mā. duždaēnāi. mā. haṣ̌i.t̰biṣ̌e.5
Verse: e    mā. moγu.t̰biṣ̌e.6 mā. varəzānō.t̰biṣ̌e.7 mā. nāfiiō.t̰biṣ̌e::8
Verse: f    māδa. nō.9 ahmi. frāδāiti.10
Verse: g          āpō. vaŋuhīš.11 vahištā̊. mazdaδātā̊. aṣ̌aonīš.
Verse: h       yō. nō.12 airīricinąm.13
Verse: i          irīrixṣ̌āite.14 gaēϑanąm::
Verse: j    māδa.nō. ahmi. frāδāiti.15
Verse: k          āpō. vaŋuhīš. vahištā̊.16 mazdaδātā̊. aṣ̌aonīš.
Verse: l       yō. nō. airīricinąm.17
Verse: m          irīrixṣ̌āite.18 tanunąm.

Paragraph: 8 
Verse: a    yō. tāiiuš.1   yō. hazaŋha.
Verse: b    yō. gaδō.   yō. aṣ̌auuaja.
Verse: c    yō. yātumā̊.   yō. nasuspā̊.
Verse: d    yō. spərəzuuā̊.2   yō. arāitiuuā̊.3
Verse: e    yō. aṣ̌əmaoγō. anaṣ̌auua.
Verse: f    yō. maš́iiō.4 druuā̊. sāsta.
Verse: g       təm. aoi.5 t̰baēṣ̌ā̊. paitiiaṇtu.6
Verse: h          iϑiiejā̊.7 īṣ̌a.8 yō.9 ī. daδa.10
Verse: i          iϑiiejā̊.7 yaṇtu. yō. dī. daδa.11

Paragraph: 9 
Verse: a    āpō. gātauua.1 rāmōiδβəm.
Verse: b       yauuata. zaota. yazāite::2
Verse: c    kaϑa. zaota. xsāta.3 vaca.
Verse: d       āpō. vaŋuhīš.4 yazāite.5
Verse: e    kuϑra. bauuāt̰. hitō.hizuuā̊.6
Verse: f       yezi. anarəϑe.7 yazāite.5
Verse: g    kuϑra. vācō. aoi.būta.8
Verse: h       yą.9 hē. caxse.10 aēϑra.paitiš.
Verse: i    kuϑra. tā̊. friiō.11 bauuąn.
Verse: j    12kuϑra. tā̊. iṣ̌udō. bauuąn.12
Verse: k    kuϑra. tā̊. rātaiiō. bauuąn.
Verse: l       yą.13 ahurō. mazdā̊. zaraϑuštrāi.
Verse: m          frāuuauuaca.14 frā. zaraϑuštrō.
Verse: n             gaēϑābiiō. astuuaitibiiō::

Paragraph: 10 
Verse: a    auua.jastīm.1 pauruuąm.2
Verse: b       āpō. jaiδiiōiš.3 zaraϑuštra::
Verse: c    pascaēta. aiβiiō. zaoϑrā̊. frabarōiš.
Verse: d       yaoždātā̊. dahmō.pairīštā̊.4
Verse: e       imą.5 vacō. framrū::6

Paragraph: 11 
Verse: a    1āpō. yānəm. vō.2 yāsāmi.
Verse: b       mazā̊ṇtəm.3 təm. mē. dāiiata.4
Verse: c          yeŋ́he. dāiti.5 paiti. vaŋhō.6
Verse: d             nisrīta.7 anaiβi.druxti::8
Verse: e    āpō.9 īštīm. vō. jaiδiiāmi.
Verse: f       pouru.sarəδąm.10 amauuaitīm.
Verse: g       frazaṇtīmca.11 xvāparąm.
Verse: h          yeŋ́hā̊. pourūšca.12 bərəjaiiąn.13
Verse: i          naēcišca.14 aiŋ́hā̊.15 yāsāiti.16 ziiānāi.
Verse: j             nōit̰. snaϑāi.
Verse: k             nōit̰. mahrkāi.
Verse: l             nōit̰. aēnaŋhe.17
Verse: m             nōit̰. apaiiatə̄e.18

Paragraph: 12  zōt̰. u. rāspī::
Verse: a    imat̰. vō. āpō. jaiδiiemi.
Verse: b       imat̰. zəmō.
Verse: c       imat̰. uruuarā̊.
Verse: d       imat̰. aməṣ̌ā̊.1 spəṇta.2
Verse: e          huxṣ̌aϑra.3 huδā̊ŋhō.
Verse: f          vaŋhauuasca.4 vaŋuhīšca.5
Verse: g          vohunąm.6 dātārō.
Verse: h       imat̰. aṣ̌āunąm.7 vaŋuhīš.8 frauuaṣ̌aiiō. uγrā̊. aiβiϑūrā̊.9
Verse: i       imat̰. miϑra. vouru.gaoiiaoite.10
Verse: j       imat̰. sraoṣ̌a. aṣ̌iia.11 huraoδa.
Verse: k       imat̰. raṣ̌nuuō. razišta.
Verse: l       imat̰. ātarə.12 ahurahe. mazdā̊. puϑra.
Verse: m       imat̰. bərəza. ahura. xṣ̌aϑriia. apąm. napō. auruuat̰.aspa.
Verse: n       imat̰. vīspe. yazatā̊ŋhō.
Verse: o          yōi. vaŋhazdā̊.13 aṣ̌auuanō.

Paragraph: 13  {= Y. 65,12}
Verse: a    imat̰. mē. āpō. dāiiata.1
Verse: b       imat̰. zəmō.
Verse: c       imat̰. uruuarā̊.
Verse: d       imat̰. aməṣ̌ā̊. spəṇta.
Verse: e          huxṣ̌aϑra. huδā̊ŋhō.
Verse: f          vaŋhauuasca. vaŋuhīšca.
Verse: g          vohunąm. dātārō.
Verse: h       imat̰. aṣ̌āunąm. vaŋuhīš. frauuaṣ̌aiiō. uγrā̊. aiβiϑūrā̊.
Verse: i       imat̰. miϑra. vouru.gaoiiaoite.
Verse: j       imat̰. sraoṣ̌a. aṣ̌iia. huraoδa.
Verse: k       imat̰. raṣ̌nuuō. razišta.
Verse: l       imat̰. ātarə. ahurahe. mazdā̊. puϑra.
Verse: m       imat̰. bərəza. ahura. xṣ̌aϑriia. apąm. napō. auruuat̰.aspa.
Verse: n       imat̰. vīspe. yazatā̊ŋhō.
Verse: o          yōi. vaŋhazdā̊. aṣ̌auuanō. (du. bār.)::
Paragraph: 13_R1 
Verse: a    imat̰. mē. āpō. dāiiata.
Verse: b       imat̰. zəmō.
Verse: c       imat̰. uruuarā̊.
Verse: d       imat̰. aməṣ̌ā̊. spəṇta.
Verse: e          huxṣ̌aϑra. huδā̊ŋhō.
Verse: f          vaŋhauuasca. vaŋuhīšca.
Verse: g          vohunąm. dātārō.
Verse: h       imat̰. aṣ̌āunąm. vaŋuhīš. frauuaṣ̌aiiō. uγrā̊. aiβiϑūrā̊.
Verse: i       imat̰. miϑra. vouru.gaoiiaoite.
Verse: j       imat̰. sraoṣ̌a. aṣ̌iia. huraoδa.
Verse: k       imat̰. raṣ̌nuuō. razišta.
Verse: l       imat̰. ātarə. ahurahe. mazdā̊. puϑra.
Verse: m       imat̰. bərəza. ahura. xṣ̌aϑriia. apąm. napō. auruuat̰.aspa.
Verse: n       imat̰. vīspe. yazatā̊ŋhō.
Verse: o          yōi. vaŋhazdā̊. aṣ̌auuanō.::

Paragraph: 14  zōt̰::
Verse: a    yat̰ca. ahmāt̰. asti. maziiō.
Verse: b    yat̰ca. ahmāt̰. asti. vaŋhō.1
Verse: c    yat̰ca. ahmāt̰. asti. sraiiō.
Verse: d    yat̰ca. ahmāt̰. asti. parō.arəjastarəm.
Verse: e       tat̰. nō. dāiiata. yūžəm. yazata.
Verse: f          aṣ̌auuanō. xṣ̌aiiamna.2 isāna.
Verse: g          moṣ̌uca.3 āsuiiāca.4
Verse: h             haϑra. ana. gāϑβiia. vaca::
Verse: i    haiϑiiāuuarəštąm.5
Verse: j       hiiat̰.6 vasnā. fəraṣ̌ōtəməm.7


Paragraph: 15  {= Y. 51,7}
Verse: a    1dāidī. mōi. yə̄. gąm. taṣ̌ō.   apascā. uruuarā̊scā.
Verse: b    amərətātā. hauruuātā.   spə̄ništā. mainiiū. mazdā.
Verse: c    təuuīṣ̌ī. utaiiūitī.   manaŋhā.2 vohū. sə̄ṇghē.3


Paragraph: 16  {= Y. 15,2}
Verse: a    1yeŋ́hē. mē. aṣ̌āt̰. hacā.
Verse: b       vahištəm. yesnē. paitī.
Verse: c       vaēdā. mazdā̊. ahurō.
Verse: d    yōi. ā̊ŋharəcā. həṇticā.
Verse: e       tą.2 yazāi. xvāiš. nāmə̄nīš.
Verse: f       pairicā. jasāi. vaṇtā.::
Verse: g    vohū. xṣ̌aϑrəm. vairīm.
Verse: h       bāgəm. aibī.bairištəm.

Paragraph: 17  {= Y. 56,3}
Verse: a    səraoṣ̌ō.1 iδā. astū.
Verse: b       apąm. vaŋuhīnąm.2 yasnāi. vaŋhuš.3 vaŋuhīnąm.4
Verse: c          aməṣ̌anąmcā.5 spəṇtanąm.
Verse: d          huxṣ̌aϑranąm.6 huδąŋhąm. vohunąmcā.7
Verse: e       vaŋhuiiā̊scā.7 aṣ̌ōiš. yasnāi.
Verse: f          yā.nə̄.8 āraēcā.9 ərənauuataēcā.10 aṣ̌aŋhāxš::
Verse: g    səraoṣ̌ascā.11 iδā. astū.
Verse: h       apąm. vaŋuhīnąm.2 yasnāi. vaŋhuš. aṣ̌iuuā̊.12
Verse: i             hiiat̰. paouruuīm.
Verse: j             tat̰. ustəməmcīt̰.13

Paragraph: 18  {= Y. 56,4}
Verse: a    auuaϑāt̰. iδā. səraoṣ̌ō.1 astū.
Verse: b       apąm. vaŋuhīnąm.2 yasnāi. vaŋhuš. vaŋuhīnąm.3
Verse: c       aməṣ̌anąmcā. spəṇtanąm.
Verse: d       huxṣ̌aϑranąm. huδā̊ŋhąm. vohunąmcā.
Verse: e       vaŋhuiiā̊scā. aṣ̌ōiš. yasnāi.
Verse: f          yā. nə̄. āraēcā. ərənauuataēcā. aṣ̌aŋhāxš::
Verse: g    səraoṣ̌ascā. iδā. astū.
Verse: h       apąm. vaŋuhīnąm. yasnāi. vaŋhuš. aṣ̌iuuā̊.4::

Paragraph: 19 
Verse: Q1a    rāspī:: 1yaϑā. ahū. vairiiō.
Verse: Q1b       yō.2 zaotā. frā.mē. mrūtē:: ..
Verse: Q1c    zōt̰:: aϑā. ratuš. aṣ̌āt̰cīt̰. haca.
Verse: Q1d       frā. aṣ̌auua. vīδuuā̊. mraotū.



Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.