TITUS Texts: Avestan Corpus

TITUS
Avestan Corpus
Part No. 63

Previous part

Chapter: 62
zōt̰. u. rāspī::

Paragraph: 1
Verse: Q1Aa    yaϑā. ahū. vairiiō.   aϑā. ratuš. aṣ̌āt̰cīt̰. hacā. (du. bār .)::
Verse: Q1Ab    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Ac    xšaϑrəmcā. ahurāi.ā.   yim. drigubiiō. dadat̰. vāstārəm.::

Verse: Q1Ba    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Bb    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Bc    xšaϑrəmcā. ahurāi.ā.   yim. drigubiiō. dadat̰. vāstārəm.::

Verse: a    yasnəmca. vahməmca.
Verse: b       hubərətīmca.2 ušta.bərətīmca.3 vaṇta.bərətīmca.3
Verse: c       āfrīnāmi. tauua. ātarš. puϑra. ahurahe. mazdā^̊::
Verse: d    yesniiō.4 ahi.5
Verse: e    vahmiiō. yesniiō.4 buiiā^̊.6
Verse: f       vahmiiō. nmānāhu. maš́iiākanąm::7
Verse: g    ušta.8 buiiāt̰. ahmāi. naire.
Verse: h       yasə. ϑβā.9 bāδa. frāiiazāite.10
Verse: i          aēsmō.zastō. barəsmō.zastō.
Verse: j          gao.zastō.11 hāuuanō.zastō.

Paragraph: 2
Verse: a    dāitiiō.aēsmi. buiiā^̊.1
Verse: b    dāitiiō.baoiδi. buiiā^̊.2
Verse: c    dāitiiō.piϑβi. buiiā^̊.3
Verse: d    dāitiiō.upasaiieni. buiiā^̊.4
Verse: e    pərənāiiuš.harəϑri. buiiā^̊.5
Verse: f    dahmāiiuš.harəϑri. buiiā^̊.6
Verse: g       ātarš. puϑra. ahurahe. mazdā^̊.

Paragraph: 3
Verse: a       saoci.buiie.1 ahmiia. nmāne.
Verse: b       mat̰.saoci.buiie.2 ahmiia. nmāne.
Verse: c       raocahi.buiie.3 ahmiia. nmāne.
Verse: d       vaxṣ̌aϑi.buiie.4 ahmiia. nmāne.
Verse: e          darəγəmcit̰. aipi.5 zruuānəm.6
Verse: f          upa. sūrąm. fraṣ̌ō.kərətīm.7
Verse: g          haδa. sūraiiā^̊. vaŋhuiiā^̊. fraṣ̌ō.kərətōit̰.8

Paragraph: 4
Verse: a    dāiiā^̊. mē. ātarš. puϑra. ahurahe. mazdā^̊.
Verse: b       āsu. x^vāϑrəm.   āsu. ϑrāitīm.    āsu. jītīm.
Verse: c       pouru.1 x^vāϑrəm.   pouru. ϑrāitīm.2   pouru. jītīm.3
Verse: d       mastīm.4 spānō. xṣ̌uuiβrəm.5 hizuuąm.
Verse: e       urune. uṣ̌i.6
Verse: f       xratūm. pascaēta.7 masitəm.8
Verse: g          mazā^̊ṇtəm.9 apairi.āϑrəm.10

Paragraph: 5
Verse: a       nairiiąm. pascaēta. hąm.varəitīm.1
Verse: b          ərəδβō.zəṇgąm.2 ax^vaϑriiąm.3
Verse: c          āsitō.gātūm. jaγaurūm.4
Verse: d          tuϑruṣ̌ąm. āsnąm.5 frazaṇtīm.6
Verse: e          karṣ̌ō.rāząm. viiāxanąm.7
Verse: f          hąm.raoδąm.8 huuāpąm.
Verse: g          ązo.būjim.9 huuīrąm.
Verse: h          yā. mē. frāδaiiāt̰.10 nmānəmca.11 vīsəmca.
Verse: i             zaṇtūmca. dax́iiūmca. daiŋ́husastīmca.12

Paragraph: 6
Verse: a    dāiiā^̊. mē. ātarš. puϑra. ahurahe. mazdā^̊.
Verse: b          yā. mē. aŋhat̰. afrasā^̊ŋhā^̊.1
Verse: c             nūrəmca. yauuaēca.tāite.2
Verse: d       vahištəm. ahūm. aṣ̌aonąm.
Verse: e       raocaŋhəm. vīspō.x^vāϑrəm.
Verse: f       zazə.buiie.3 vaŋhāuca.4 mižde.5
Verse: g          vaŋhāuca.4 srauuahi.6
Verse: h       urunaēca. darəγe. hauuaŋhe.

Paragraph: 7
Verse: a    vīspaēibiiō. sastīm. baraiti.1
Verse: b       ātarš. mazdā^̊. ahurahe.
Verse: c          yaēibiiō. aēm. hąm.pacāite.2
Verse: d             xṣ̌āfnīmca.3 sūirīmca::4
Verse: e    vīspaēibiiō. haca. iziieite.5
Verse: f       hubərətīm.6 uštā.bərətīmca.7
Verse: g          vaṇtā.bərətīmca.8 spitama.

Paragraph: 8
Verse: a    vīspanąm. para.carəṇtąm.1
Verse: b       ātarš. zasta. ādiδaiia::2
Verse: c    cīm.3 haxa. haṣ̌ē.4 baraitī.5
Verse: d       fracarəϑβā^̊.6 armaēṣ̌āiδe.7

Paragraph: 9
Verse: a    āat̰. yezi. ṣ̌ē.1 aēm. baraiti.
Verse: b       aēsməm. vā. aṣ̌aiia. bərətəm.2
Verse: c       barəsma.3 vā. aṣ̌aiia. frastarətəm.
Verse: d       uruuarąm. vā. haδānaēpatąm.4
Verse: e    ā. hē.5 pascaēta. frīnaiti.6
Verse: f       ātarš. mazdā^̊. ahurahe.
Verse: g       xṣ̌nūtō. at̰bištō.7 haγδaŋhum::8

Paragraph: 10
Verse: a    upa. ϑβā.1 haxṣ̌ōit̰. gə̄uš. vąϑβa.
Verse: b       upa. vīranąm. pourutās.2
Verse: c    upa. ϑβā. vərəzuuat̰ca. manō.
Verse: d       vərəzuuatica.3 haxṣ̌ōit̰. aŋuha.4
Verse: e    uruuāxṣ̌aŋha.5 gaiia. jiγaēṣ̌a.
Verse: f       tā^̊. xṣ̌apanō. yā^̊.6 juuāhī::7
Verse: g    imat̰. āϑrō. āfriuuanəm.8
Verse: h       yō.9 ahmāi. aēsməm.10 baraiti.
Verse: i          hukūš. raocas.pairīštą.11
Verse: j          aṣ̌ahe. bərəja. yaoždātą.12

Paragraph: 11
Verse: Q1Aa    aṣ̌əm. vohū. vahištəm. astī::
Verse: Q1Ab    uštā. astī. uštā. ahmāi.
Verse: Q1Ac    hiiat̰. aṣ̌āi. vahištāi. aṣ̌əm.:: (si. bār.)

Verse: Q1Ba    aṣ̌əm. vohū. vahištəm. astī::
Verse: Q1Bb    uštā. astī. uštā. ahmāi.
Verse: Q1Bc    hiiat̰. aṣ̌āi. vahištāi. aṣ̌əm.

Verse: Q1Ca    aṣ̌əm. vohū. vahištəm. astī::
Verse: Q1Cb    uštā. astī. uštā. ahmāi.
Verse: Q1Cc    hiiat̰. aṣ̌āi. vahištāi. aṣ̌əm.

Verse: a    aiβi.gərəδmahi.2 apąm. vaŋuhīnąm.3
Verse: b       frāitīmca.4 paititīmca. aibijarətīmca.
Verse: c    āiiese. yešti.

Paragraph: 12 {= Y. 27,12}
Verse: a    1frauuarāne. mazdaiiasnō. zaraϑuštriš. vīdaēuuō. ahura.t̰kaēṣ̌ō::
Verse: b       hāuuanə̄e. aṣ̌aone. aṣ̌ahe. raϑβe.
Verse: c          yasnāica. vahmāica. xṣ̌naoϑrāica. frasastaiiaēca::
Verse: d       sāuuaŋhə̄e. vīsiiāica. aṣ̌aone. aṣ̌ahe. raϑβe.
Verse: e          yasnāica. vahmāica. xṣ̌naoϑrāica. frasastaiiaēca::
Verse: f       raϑβąm. aiiaranąmca. asniianąmca.
Verse: g          māhiianąmca. yāiriianąmca. sarəδanąmca.
Verse: h             yasnāica. vahmāica. xṣ̌naoϑrāica. (rāspī::) frasastaiiaēca.::

Paragraph: 13
Verse: Q1a    zōt̰:: yaϑā. ahū. vairiiō.
Verse: Q1b       zaotā. frā.mē. mrūtē::
Verse: Q1c    rāspī:: yaϑā. ahū. vairiiō.
Verse: Q1d       yō. zastā. frā.mē. mrūtē::
Verse: Q1e    zōt̰:: aϑā. ratuš. aṣ̌āt̰cīt̰. haca.
Verse: Q1f       frā. aṣ̌auua. vīδuuā^̊. mraotū.

Next part

This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.