TITUS
Rg-Veda: Rg-Veda-Samhita
Part No. 328
Previous part

Hymn: 32_(328) 
Verse: 1 
Halfverse: a    ā́ tū́ na indra vr̥trahann asmā́kam ardʰám ā́ gahi /
   ā́ tū́ na indra vr̥trahann
   ā́ tú+ naḥ indra vr̥trahan
   ā́ tū́ na indra vr̥trahann

Halfverse: b    asmā́kam ardʰám ā́ gahi /
   asmā́kam ardʰám ā́ gahi /
   asmā́kam ardʰám ā́ gahi /

Halfverse: c    mahā́n mahī́bʰir ūtíbʰiḥ //
   mahā́n mahī́bʰir ūtíbʰiḥ //
   mahā́n mahī́bʰiḥ ūtíbʰiḥ //
   mahā́n mahī́bʰir ūtíbʰiḥ //


Verse: 2 
Halfverse: a    bʰŕ̥miś cid gʰāsi tū́tujir ā́ citra citríṇīṣv ā́ /
   bʰŕ̥miś cid gʰāsi tū́tujir
   bʰŕ̥miḥ cit gʰa asi tū́tujiḥ
   bʰŕ̥miś cid gʰāsi tū́tujir

Halfverse: b    ā́ citra citríṇīṣv ā́ /
   ā́ citra citríṇīṣu ā́ /
   ā́ citra citríṇīṣu ā́ /

Halfverse: c    citráṃ kr̥ṇoṣy ūtáye //
   citráṃ kr̥ṇoṣy ūtáye //
   citrám kr̥ṇoṣi ūtáye //
   citráṃ kr̥ṇoṣi ūtáye //


Verse: 3 
Halfverse: a    dabʰrébʰiś cic cʰáśīyām̐saṃ hám̐si vrā́dʰantam ójasā /
   dabʰrébʰiś cic cʰáśīyām̐saṃ
   dabʰrébʰiḥ cit śáśīyāṃsam
   dabʰrébʰiś cic cʰáśīyāṃsaṃ

Halfverse: b    hám̐si vrā́dʰantam ójasā /
   háṃsi vrā́dʰantam ójasā /
   háṃsi vrā́dʰantam ójasā /

Halfverse: c    sákʰibʰir yé tvé sácā //
   sákʰibʰir yé tvé sácā //
   sákʰibʰiḥ yé tvé sácā //
   sákʰibʰir yé tuvé sácā //


Verse: 4 
Halfverse: a    vayám indra tvé sácā vayáṃ tvābʰí nonumaḥ /
   vayám indra tvé sácā
   vayám indra tvé sácā
   vayám indra tuvé sácā

Halfverse: b    vayáṃ tvābʰí nonumaḥ /
   vayám tvā abʰí nonumaḥ /
   vayáṃ tuvābʰí nonumaḥ /

Halfverse: c    asmā́m̐-asmām̐ íd úd ava //
   asmā́m̐-asmām̐ \!\ íd úd ava //
   asmā́n-asmān ít út ava //
   asmā́m̐-asmām̐ íd úd ava //


Verse: 5 
Halfverse: a    sá naś citrā́bʰir adrivo 'navadyā́bʰir ūtíbʰiḥ /
   sá naś citrā́bʰir adrivo
   sá naḥ citrā́bʰiḥ adrivaḥ
   sá naś citrā́bʰir adrivo

Halfverse: b    'navadyā́bʰir ūtíbʰiḥ /
   anavadyā́bʰiḥ ūtíbʰiḥ /
   anavadyā́bʰir ūtíbʰiḥ /

Halfverse: c    ánādʰr̥ṣṭābʰir ā́ gahi //
   ánādʰr̥ṣṭābʰir ā́ gahi //
   ánādʰr̥ṣṭābʰiḥ ā́ gahi //
   ánādʰr̥ṣṭābʰir ā́ gahi //


Verse: 6 
Halfverse: a    bʰūyā́mo ṣú tvā́vataḥ sákʰāya indra gómataḥ /
   bʰūyā́mo ṣú tvā́vataḥ
   bʰūyā́ma u sú tvā́vataḥ
   bʰūyā́mo ṣú tuvā́vataḥ

Halfverse: b    sákʰāya indra gómataḥ /
   sákʰāyaḥ indra gómataḥ /
   sákʰāya indra gómataḥ /

Halfverse: c    yújo vā́jāya gʰŕ̥ṣvaye //
   yújo vā́jāya gʰŕ̥ṣvaye //
   yújaḥ vā́jāya gʰŕ̥ṣvaye //
   yújo vā́jāya gʰŕ̥ṣvaye //


Verse: 7 
Halfverse: a    tváṃ hy éka ī́śiṣa índra vā́jasya gómataḥ /
   tváṃ hy éka ī́śiṣa
   tvám hí ékaḥ ī́śiṣe
   tuváṃ hí éka ī́śiṣa

Halfverse: b    índra vā́jasya gómataḥ /
   índra vā́jasya gómataḥ /
   índra vā́jasya gómataḥ /

Halfverse: c    sá no yandʰi mahī́m íṣam //
   sá no yandʰi mahī́m íṣam //
   sá naḥ yandʰi mahī́m íṣam //
   sá no yandʰi mahī́m íṣam //


Verse: 8 
Halfverse: a    ná tvā varante anyátʰā yád dítsasi stutó magʰám /
   ná tvā varante anyátʰā
   ná tvā varante anyátʰā
   ná tvā varante anyátʰā

Halfverse: b    yád dítsasi stutó magʰám /
   yát dítsasi stutáḥ magʰám /
   yád dítsasi stutó magʰám /

Halfverse: c    stotŕ̥bʰya indra girvaṇaḥ //
   stotŕ̥bʰya indra girvaṇaḥ //
   stotŕ̥bʰyaḥ indra girvaṇaḥ //
   stotŕ̥bʰya indra girvaṇaḥ //


Verse: 9 
Halfverse: a    abʰí tvā gótamā girā́nūṣata prá dāváne /
   abʰí tvā gótamā girā́_
   abʰí tvā gótamāḥ girā́
   abʰí tvā gótamā girā́

Halfverse: b    _ánūṣata \!\ prá dāváne /
   ánūṣata prá dāváne /
   ánūvṣata prá dāváne /

Halfverse: c    índra vā́jāya gʰŕ̥ṣvaye //
   índra vā́jāya gʰŕ̥ṣvaye //
   índra vā́jāya gʰŕ̥ṣvaye //
   índra vā́jāya gʰŕ̥ṣvaye //


Verse: 10 
Halfverse: a    prá te vocāma vīryā̀ yā́ mandasāná ā́rujaḥ /
   prá te vocāma vīryā̀
   prá te vocāma vīryā̀
   prá te vocāma vīríyā

Halfverse: b    yā́ mandasāná ā́rujaḥ /
   yā́ḥ mandasānáḥ ā́ árujaḥ /
   yā́ mandasāná ā́rujaḥ /

Halfverse: c    púro dā́sīr abʰī́tya //
   púro dā́sīr abʰī́tya //
   púraḥ dā́sīḥ abʰī́tya //
   púro dā́sīr abʰī́tiya //


Verse: 11 
Halfverse: a    tā́ te gr̥ṇanti vedʰáso yā́ni cakártʰa paúm̐syā /
   tā́ te gr̥ṇanti vedʰáso
   tā́ te gr̥ṇanti vedʰásaḥ
   tā́ te gr̥ṇanti vedʰáso

Halfverse: b    yā́ni cakártʰa paúm̐syā /
   yā́ni cakártʰa paúṃsyā /
   yā́ni cakártʰa paúṃsiyā /

Halfverse: c    sutéṣv indra girvaṇaḥ //
   sutéṣv indra girvaṇaḥ //
   sutéṣu indra girvaṇaḥ //
   sutéṣu indra girvaṇaḥ //


Verse: 12 
Halfverse: a    ávīvr̥dʰanta gótamā índra tvé stómavāhasaḥ /
   ávīvr̥dʰanta gótamā
   ávīvr̥dʰanta gótamāḥ
   ávīvr̥dʰanta gótamā

Halfverse: b    índra tvé stómavāhasaḥ /
   índra tvé stómavāhasaḥ /
   índra tvé stómavāhasaḥ /

Halfverse: c    aíṣu dʰā vīrávad yáśaḥ //
   aíṣu dʰā vīrávad yáśaḥ //
   ā́ eṣu dʰāḥ vīrávat yáśaḥ //
   aíṣu dʰā vīrávad yáśaḥ //


Verse: 13 
Halfverse: a    yác cid dʰí śáśvatām ásī́ndra sā́dʰāraṇas tvám /
   yác cid dʰí śáśvatām ási_
   yát cit hí śáśvatām ási
   yác cid dʰí śáśvatām ási

Halfverse: b    _índra sā́dʰāraṇas tvám /
   índra sā́dʰāraṇaḥ tvám /
   índra sā́dʰāraṇas tuvám /

Halfverse: c    táṃ tvā vayáṃ havāmahe //
   táṃ tvā vayáṃ havāmahe //
   tám tvā vayám havāmahe //
   táṃ tvā vayáṃ havāmahe //


Verse: 14 
Halfverse: a    arvācīnó vaso bʰavāsmé sú matsvā́ndʰasaḥ /
   arvācīnó vaso bʰava_
   arvācīnáḥ vaso bʰava
   arvācīnó vaso bʰava

Halfverse: b    _asmé sú matsvā́ndʰasaḥ /
   asmé sú matsva ándʰasaḥ /
   asmé sú matsuvā́ndʰasaḥ /

Halfverse: c    sómānām indra somapāḥ //
   sómānām indra somapāḥ //
   sómānām indra somapāḥ //
   sómānām indra somapāḥ //


Verse: 15 
Halfverse: a    asmā́kaṃ tvā matīnā́m ā́ stóma indra yacʰatu /
   asmā́kaṃ tvā matīnā́m
   asmā́kam tvā matīnā́m
   asmā́kaṃ tvā matīnâám

Halfverse: b    ā́ stóma indra yacʰatu /
   ā́ stómaḥ indra yacʰatu /
   ā́ stóma indra yacʰatu /

Halfverse: c    arvā́g ā́ vartayā hárī //
   arvā́g ā́ vartayā hárī //
   arvā́k ā́ vartaya+ hárī //
   arvā́g ā́ vartayā hárī //


Verse: 16 
Halfverse: a    puroḷā́śaṃ ca no gʰáso joṣáyāse gíraś ca naḥ /
   puroḷā́śaṃ ca no gʰáso
   puroḷā́śam ca naḥ gʰásaḥ
   puroḷā́śaṃ ca no gʰáso

Halfverse: b    joṣáyāse gíraś ca naḥ /
   joṣáyāse gíraḥ ca naḥ /
   joṣáyāse gíraś ca naḥ /

Halfverse: c    vadʰūyúr iva yóṣaṇām //
   vadʰūyúr iva yóṣaṇām //
   vadʰūyúḥ iva yóṣaṇām //
   vadʰūyúr iva yóṣaṇām //


Verse: 17 
Halfverse: a    sahásraṃ vyátīnāṃ yuktā́nām índram īmahe /
   sahásraṃ vyátīnāṃ
   sahásram vyátīnām
   sahásraṃ viyátīnãaṃ

Halfverse: b    yuktā́nām índram īmahe /
   yuktā́nām índram īmahe /
   yuktā́nām índram īmahe /

Halfverse: c    śatáṃ sómasya kʰāryàḥ //
   śatáṃ sómasya kʰāryàḥ //
   śatám sómasya kʰāryàḥ //
   śatáṃ sómasya kʰāríyaḥ //


Verse: 18 
Halfverse: a    sahásrā te śatā́ vayáṃ gávām ā́ cyāvayāmasi /
   sahásrā te śatā́ vayáṃ
   sahásrā te śatā́ vayám
   sahásrā te śatā́ vayáṃ

Halfverse: b    gávām ā́ cyāvayāmasi /
   gávām ā́ cyāvayāmasi /
   gávām ā́ cyāvayāmasi /

Halfverse: c    asmatrā́ rā́dʰa etu te //
   asmatrā́ rā́dʰa etu te //
   asmatrā́ rā́dʰaḥ etu te //
   asmatrā́ rā́dʰa etu te //


Verse: 19 
Halfverse: a    dáśa te kaláśānāṃ híraṇyānām adʰīmahi /
   dáśa te kaláśānāṃ
   dáśa te kaláśānām
   dáśa te kaláśānãaṃ

Halfverse: b    híraṇyānām adʰīmahi /
   híraṇyānām adʰīmahi /
   híraṇyānām adʰīmahi /

Halfverse: c    bʰūridā́ asi vr̥trahan //
   bʰūridā́ asi vr̥trahan //
   bʰūridā́ḥ asi vr̥trahan //
   bʰūridā́ asi vr̥trahan //


Verse: 20 
Halfverse: a    bʰū́ridā bʰū́ri dehi no mā́ dabʰrám bʰū́ry ā́ bʰara /
   bʰū́ridā bʰū́ri dehi no
   bʰū́ridāḥ bʰū́ri dehi naḥ
   bʰū́ridā bʰū́ri dehi no

Halfverse: b    mā́ dabʰrám bʰū́ry ā́ bʰara /
   mā́ dabʰrám bʰū́ri ā́ bʰara /
   mā́ dabʰrám bʰū́ri ā́ bʰara /

Halfverse: c    bʰū́ri gʰéd indra ditsasi //
   bʰū́ri gʰéd indra ditsasi //
   bʰū́ri gʰa ít indra ditsasi //
   bʰū́ri gʰéd indra ditsasi //


Verse: 21 
Halfverse: a    bʰūridā́ hy ási śrutáḥ purutrā́ śūra vr̥trahan /
   bʰūridā́ hy ási śrutáḥ
   bʰūridā́ḥ hí ási śrutáḥ
   bʰūridā́ hí ási śrutáḥ

Halfverse: b    purutrā́ śūra vr̥trahan /
   purutrā́ śūra vr̥trahan /
   purutrā́ śūra vr̥trahan /

Halfverse: c    ā́ no bʰajasva rā́dʰasi //
   ā́ no bʰajasva rā́dʰasi //
   ā́ naḥ bʰajasva rā́dʰasi //
   ā́ no bʰajasva rā́dʰasi //


Verse: 22 
Halfverse: a    prá te babʰrū́ vicakṣaṇa śám̐sāmi goṣaṇo napāt /
   prá te babʰrū́ vicakṣaṇa
   prá te babʰrū́ vicakṣaṇa
   prá te babʰrū́ vicakṣaṇa

Halfverse: b    śám̐sāmi goṣaṇo napāt /
   śáṃsāmi goṣaṇaḥ napāt /
   śáṃsāmi goṣaṇo napāt /

Halfverse: c    mā́bʰyāṃ gā́ ánu śiśratʰaḥ //
   mā́bʰyāṃ gā́ ánu śiśratʰaḥ //
   mā́ ābʰyām gā́ḥ ánu śiśratʰaḥ //
   mā́bʰyāṃ gā́ ánu śiśratʰaḥ //


Verse: 23 
Halfverse: a    kanīnakéva vidradʰé náve drupadé arbʰaké /
   kanīnakéva vidradʰé
   kanīnakā́ iva vidradʰé
   kanīnakéva vidradʰé

Halfverse: b    náve drupadé arbʰaké /
   náve drupadé arbʰaké /
   náve drupadé arbʰaké /

Halfverse: c    babʰrū́ yā́meṣu śobʰete //
   babʰrū́ yā́meṣu śobʰete //
   babʰrū́ yā́meṣu śobʰete //
   babʰrū́ yā́meṣu śobʰete //


Verse: 24 
Halfverse: a    áram ma usráyāmṇé 'ram ánusrayāmṇe /
   áram ma usráyāmṇé
   áram me usráyāmṇe
   áram ma usráyāmaṇe

Halfverse: b    'ram ánusrayāmṇe /
   áram ánusrayāmṇe /
   áram ánusrayāmaṇe /

Halfverse: c    babʰrū́ yā́meṣv asrídʰā //
   babʰrū́ yā́meṣv asrídʰā //
   babʰrū́ yā́meṣu asrídʰā //
   babʰrū́ yā́meṣu asrídʰā //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.