TITUS
Rg-Veda: Rg-Veda-Samhita
Part No. 327
Previous part

Hymn: 31_(327) 
Verse: 1 
Halfverse: a    káyā naś citrá ā́ bʰuvad ūtī́ sadā́vr̥dʰaḥ sákʰā /
   káyā naś citrá ā́ bʰuvad
   káyā naḥ citráḥ ā́ bʰuvat
   káyā naś citrá ā́ bʰuvad

Halfverse: b    ūtī́ sadā́vr̥dʰaḥ sákʰā /
   ūtī́ sadā́vr̥dʰaḥ sákʰā /
   ūtī́ sadā́vr̥dʰaḥ sákʰā /

Halfverse: c    káyā śáciṣṭʰayā vr̥tā́ //
   káyā śáciṣṭʰayā vr̥tā́ //
   káyā śáciṣṭʰayā vr̥tā́ //
   káyā śáciṣṭʰayā vr̥tā́ //


Verse: 2 
Halfverse: a    kás tvā satyó mádānām mám̐hiṣṭʰo matsad ándʰasaḥ /
   kás tvā satyó mádānām
   káḥ tvā satyáḥ mádānām
   kás tvā satyó mádānãam

Halfverse: b    mám̐hiṣṭʰo matsad ándʰasaḥ /
   máṃhiṣṭʰaḥ matsat ándʰasaḥ /
   máṃhiṣṭʰo matsad ándʰasaḥ /

Halfverse: c    dr̥ḷʰā́ cid ārúje vásu //
   dr̥ḷʰā́ cid ārúje vásu //
   dr̥ḷʰā́ cit ārúje vásu //
   dr̥ḷʰā́ cid ārúje vásu //


Verse: 3 
Halfverse: a    abʰī́ ṣú ṇaḥ sákʰīnām avitā́ jaritr̥̄ṇā́m /
   abʰī́ ṣú ṇaḥ sákʰīnām
   abʰí+ sú naḥ sákʰīnām
   abʰī́ ṣú ṇaḥ sákʰīnãam

Halfverse: b    avitā́ jaritr̥̄ṇā́m /
   avitā́ jaritr̥̄ṇā́m /
   avitā́ jaritr̥̄ṇâám /

Halfverse: c    śatám bʰavāsy ūtíbʰiḥ //
   śatám bʰavāsy ūtíbʰiḥ //
   śatám bʰavāsi ūtíbʰiḥ //
   śatám bʰavāsi ūtíbʰiḥ //


Verse: 4 
Halfverse: a    abʰī́ na ā́ vavr̥tsva cakráṃ ná vr̥ttám árvataḥ /
   abʰī́ na ā́ vavr̥tsva
   abʰí+ naḥ ā́ vavr̥tsva
   abʰī́ na ā́ vavr̥tsuva

Halfverse: b    cakráṃ ná vr̥ttám árvataḥ /
   cakrám ná vr̥ttám árvataḥ /
   cakráṃ ná vr̥ttám árvataḥ /

Halfverse: c    niyúdbʰiś carṣaṇīnā́m //
   niyúdbʰiś carṣaṇīnā́m //
   niyúdbʰiḥ carṣaṇīnā́m //
   niyúdbʰiś carṣaṇīnâám //


Verse: 5 
Halfverse: a    pravátā hí krátūnām ā́ hā padéva gácʰasi /
   pravátā hí krátūnām
   pravátā hí krátūnām
   pravátā hí krátūnãam

Halfverse: b    ā́ hā padéva gácʰasi /
   ā́ ha+ padā́ iva gácʰasi /
   ā́ hā padéva gácʰasi /

Halfverse: c    ábʰakṣi sū́rye sácā //
   ábʰakṣi sū́rye sácā //
   ábʰakṣi sū́rye sácā //
   ábʰakṣi sū́riye sácā //


Verse: 6 
Halfverse: a    sáṃ yát ta indra manyávaḥ sáṃ cakrā́ṇi dadʰanviré /
   sáṃ yát ta indra manyávaḥ
   sám yát te indra manyávaḥ
   sáṃ yát ta indra manyávaḥ

Halfverse: b    sáṃ cakrā́ṇi dadʰanviré /
   sám cakrā́ṇi dadʰanviré /
   sáṃ cakrā́ṇi dadʰanviré /

Halfverse: c    ádʰa tvé ádʰa sū́rye //
   ádʰa tvé ádʰa sū́rye //
   ádʰa tvé ádʰa sū́rye //
   ádʰa tvé ádʰa sū́riye //


Verse: 7 
Halfverse: a    utá smā hí tvā́m āhúr ín magʰávānaṃ śacīpate /
   utá smā hí tvā́m āhúr ín \!\
   utá sma+ hí tvā́m āhúḥ ít
   utá smā hí tvā́m āhúr ín

Halfverse: b    magʰávānaṃ śacīpate /
   magʰávānam śacīpate /
   magʰávānaṃ śacīpate /

Halfverse: c    dā́tāram ávidīdʰayum //
   dā́tāram ávidīdʰayum //
   dā́tāram ávidīdʰayum //
   dā́tāram ávidīdʰayum //


Verse: 8 
Halfverse: a    utá smā sadyá ít pári śaśamānā́ya sunvaté /
   utá smā sadyá ít pári
   utá sma+ sadyáḥ ít pári
   utá smā sadyá ít pári

Halfverse: b    śaśamānā́ya sunvaté /
   śaśamānā́ya sunvaté /
   śaśamānā́ya sunvaté /

Halfverse: c    purū́ cin mam̐hase vásu //
   purū́ cin mam̐hase vásu //
   purú+ cit maṃhase vásu //
   purū́ cin maṃhase vásu //


Verse: 9 
Halfverse: a    nahí ṣmā te śatáṃ caná rā́dʰo váranta āmúraḥ /
   nahí ṣmā te śatáṃ caná
   nahí sma+ te śatám caná
   nahí ṣmā te śatáṃ caná

Halfverse: b    rā́dʰo váranta āmúraḥ /
   rā́dʰaḥ várante āmúraḥ /
   rā́dʰo váranta āmúraḥ /

Halfverse: c    ná cyautnā́ni kariṣyatáḥ //
   ná cyautnā́ni kariṣyatáḥ //
   ná cyautnā́ni kariṣyatáḥ //
   ná cyautnā́ni kariṣyatáḥ //


Verse: 10 
Halfverse: a    asmā́m̐ avantu te śatám asmā́n sahásram ūtáyaḥ /
   asmā́m̐ avantu te śatám
   asmā́n avantu te śatám
   asmā́m̐ avantu te śatám

Halfverse: b    asmā́n sahásram ūtáyaḥ /
   asmā́n sahásram ūtáyaḥ /
   asmā́n sahásram ūtáyaḥ /

Halfverse: c    asmā́n víśvā abʰíṣṭayaḥ //
   asmā́n víśvā abʰíṣṭayaḥ //
   asmā́n víśvāḥ abʰíṣṭayaḥ //
   asmā́n víśvā abʰíṣṭayaḥ //


Verse: 11 
Halfverse: a    asmā́m̐ ihā́ vr̥ṇīṣva sakʰyā́ya svastáye /
   asmā́m̐ ihā́ vr̥ṇīṣva
   asmā́n ihá+ vr̥ṇīṣva
   asmā́m̐ ihā́ vr̥ṇīṣuva

Halfverse: b    sakʰyā́ya svastáye /
   sakʰyā́ya svastáye /
   sakʰiyā́ya suastáye /

Halfverse: c    mahó rāyé divítmate //
   mahó rāyé divítmate //
   maháḥ rāyé divítmate //
   mahó rāyé divítmate //


Verse: 12 
Halfverse: a    asmā́m̐ aviḍḍʰi viśváhéndra rāyā́ párīṇasā /
   asmā́m̐ aviḍḍʰi viśváhā_
   asmā́n aviḍḍʰi viśváhā
   asmā́m̐ aviḍḍʰi viśváhā

Halfverse: b    _índra rāyā́ párīṇasā /
   índra rāyā́ párīṇasā /
   índra rāyā́ párīṇasā /

Halfverse: c    asmā́n víśvābʰir ūtíbʰiḥ //
   asmā́n víśvābʰir ūtíbʰiḥ //
   asmā́n víśvābʰiḥ ūtíbʰiḥ //
   asmā́n víśvābʰir ūtíbʰiḥ //


Verse: 13 
Halfverse: a    asmábʰyaṃ tā́m̐ ápā vr̥dʰi vrajā́m̐ ásteva gómataḥ /
   asmábʰyaṃ tā́m̐ ápā vr̥dʰi
   asmábʰyam tā́n ápa+ vr̥dʰi
   asmábʰyaṃ tā́m̐ ápā vr̥dʰi

Halfverse: b    vrajā́m̐ ásteva gómataḥ /
   vrajā́n ástā iva gómataḥ /
   vrajā́m̐ ásteva gómataḥ /

Halfverse: c    návābʰir indrotíbʰiḥ //
   návābʰir indrotíbʰiḥ //
   návābʰiḥ indra ūtíbʰiḥ //
   návābʰir indra ūtíbʰiḥ //


Verse: 14 
Halfverse: a    asmā́kaṃ dʰr̥ṣṇuyā́ rátʰo dyumā́m̐ indrā́napacyutaḥ /
   asmā́kaṃ dʰr̥ṣṇuyā́ rátʰo
   asmā́kam dʰr̥ṣṇuyā́ rátʰaḥ
   asmā́kaṃ dʰr̥ṣṇuyā́ rátʰo

Halfverse: b    dyumā́m̐ indrā́napacyutaḥ /
   dyumā́n indra ánapacyutaḥ /
   dyumā́m̐ indrā́napacyutaḥ /

Halfverse: c    gavyúr aśvayúr īyate //
   gavyúr aśvayúr īyate //
   gavyúḥ aśvayúḥ īyate //
   gavyúr aśvayúr īyate //


Verse: 15 
Halfverse: a    asmā́kam uttamáṃ kr̥dʰi śrávo devéṣu sūrya /
   asmā́kam uttamáṃ kr̥dʰi
   asmā́kam uttamám kr̥dʰi
   asmā́kam uttamáṃ kr̥dʰi

Halfverse: b    śrávo devéṣu sūrya /
   śrávaḥ devéṣu sūrya /
   śrávo devéṣu sūriya /

Halfverse: c    várṣiṣṭʰaṃ dyā́m ivopári //
   várṣiṣṭʰaṃ dyā́m ivopári //
   várṣiṣṭʰam dyā́m iva upári //
   várṣiṣṭʰaṃ dyā́m ivopári //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.