TITUS
Rg-Veda: Rg-Veda-Samhita
Part No. 326
Previous part

Hymn: 30_(326) 
Verse: 1 
Halfverse: a    nákir indra tvád úttaro ná jyā́yām̐ asti vr̥trahan /
   nákir indra tvád úttaro
   nákiḥ indra tvát úttaraḥ
   nákir indra tvád úttaro

Halfverse: b    ná jyā́yām̐ asti vr̥trahan /
   ná jyā́yān asti vr̥trahan /
   ná jyā́yām̐ asti vr̥trahan /

Halfverse: c    nákir evā́ yátʰā tvám //
   nákir evā́ yátʰā tvám //
   nákiḥ evá+ yátʰā tvám //
   nákir evā́ yátʰā tuvám //


Verse: 2 
Halfverse: a    satrā́ te ánu kr̥ṣṭáyo víśvā cakréva vāvr̥tuḥ /
   satrā́ te ánu kr̥ṣṭáyo
   satrā́ te ánu kr̥ṣṭáyaḥ
   satrā́ te ánu kr̥ṣṭáyo

Halfverse: b    víśvā cakréva vāvr̥tuḥ /
   víśvā cakrā́ iva vāvr̥tuḥ /
   víśvā cakréva vāvr̥tuḥ /

Halfverse: c    satrā́ mahā́m̐ asi śrutáḥ //
   satrā́ mahā́m̐ asi śrutáḥ //
   satrā́ mahā́n asi śrutáḥ //
   satrā́ mahā́m̐ asi śrutáḥ //


Verse: 3 
Halfverse: a    víśve canéd anā́ tvā devā́sa indra yuyudʰuḥ /
   víśve canéd anā́ tvā
   víśve caná ít anā́ tvā
   víśve canéd anā́ tuvā

Halfverse: b    devā́sa indra yuyudʰuḥ /
   devā́saḥ indra yuyudʰuḥ /
   devā́sa indra yuyudʰuḥ /

Halfverse: c    yád áhā náktam ā́tiraḥ //
   yád áhā náktam ā́tiraḥ //
   yát áhā náktam ā́ átiraḥ //
   yád áhā náktam ā́tiraḥ //


Verse: 4 
Halfverse: a    yátrotá bādʰitébʰyaś cakráṃ kútsāya yúdʰyate /
   yátrotá bādʰitébʰyaś
   yátra utá bādʰitébʰyaḥ
   yátrotá bādʰitébʰiyaś

Halfverse: b    cakráṃ kútsāya yúdʰyate /
   cakrám kútsāya yúdʰyate /
   cakráṃ kútsāya yúdʰyate /

Halfverse: c    muṣāyá indra sū́ryam //
   muṣāyá indra sū́ryam //
   muṣāyáḥ indra sū́ryam //
   muṣāyá indra sū́riyam //


Verse: 5 
Halfverse: a    yátra devā́m̐ r̥gʰāyató víśvām̐ áyudʰya éka ít /
   yátra devā́m̐ r̥gʰāyató
   yátra devā́n r̥gʰāyatáḥ
   yátra devā́m̐ r̥gʰāyató

Halfverse: b    víśvām̐ áyudʰya éka ít /
   víśvān áyudʰyaḥ ékaḥ ít /
   víśvām̐ áyudʰya éka ít /

Halfverse: c    tvám indra vanū́m̐r áhan //
   tvám indra vanū́m̐r áhan //
   tvám indra vanū́n áhan //
   tuvám indra vanū́m̐r áhan //


Verse: 6 
Halfverse: a    yátrotá mártyāya kám áriṇā indra sū́ryam /
   yátrotá mártyāya kám
   yátra utá mártyāya kám
   yátrotá mártiyāya kám

Halfverse: b    áriṇā indra sū́ryam /
   áriṇāḥ indra sū́ryam /
   áriṇā indra sū́riyam /

Halfverse: c    prā́vaḥ śácībʰir étaśam //
   prā́vaḥ śácībʰir étaśam //
   prá āvaḥ śácībʰiḥ étaśam //
   prā́vaḥ śácībʰir étaśam //


Verse: 7 
Halfverse: a    kím ā́d utā́si vr̥trahan mágʰavan manyumáttamaḥ /
   kím ā́d utā́si vr̥trahan
   kím ā́t utá asi vr̥trahan
   kím ā́d utā́si vr̥trahan

Halfverse: b    mágʰavan manyumáttamaḥ /
   mágʰavan manyumáttamaḥ /
   mágʰavan manyumáttamaḥ /

Halfverse: c    átrā́ha dā́num ā́tiraḥ //
   átrā́ha dā́num ā́tiraḥ //
   átra áha dā́num ā́ atiraḥ //
   átrā́ha dā́num ā́tiraḥ //


Verse: 8 
Halfverse: a    etád gʰéd utá vīryàm índra cakártʰa paúm̐syam /
   etád gʰéd utá vīryàm
   etát gʰa ít utá vīryàm
   etád gʰéd utá vīríyam

Halfverse: b    índra cakártʰa paúm̐syam /
   índra cakártʰa paúṃsyam /
   índra cakártʰa paúṃsiyam /

Halfverse: c    stríyaṃ yád durhaṇāyúvaṃ vádʰīr duhitáraṃ diváḥ //
   stríyaṃ yád durhaṇāyúvaṃ
   stríyam yát durhaṇāyúvam
   stríyaṃ yád durhaṇāyúvaṃ

Halfverse: d    vádʰīr duhitáraṃ diváḥ //
   vádʰīḥ duhitáram diváḥ //
   vádʰīr duhitáraṃ diváḥ //


Verse: 9 
Halfverse: a    diváś cid gʰā duhitáram mahā́n mahīyámānām /
   diváś cid gʰā duhitáram
   diváḥ cit gʰa+ duhitáram
   diváś cid gʰā duhitáram

Halfverse: b    mahā́n mahīyámānām /
   mahā́n mahīyámānām /
   mahā́n mahīyámānãam /

Halfverse: c    uṣā́sam indra sám piṇak //
   uṣā́sam indra sám piṇak //
   uṣā́sam indra sám piṇak //
   uṣā́sam indra sám piṇak //


Verse: 10 
Halfverse: a    ápoṣā́ ánasaḥ sarat sámpiṣṭād áha bibʰyúṣī /
   ápoṣā́ ánasaḥ sarat
   ápa uṣā́ḥ ánasaḥ sarat
   ápoṣā́ ánasaḥ sarat

Halfverse: b    sámpiṣṭād áha bibʰyúṣī /
   sámpiṣṭāt áha bibʰyúṣī /
   sámpiṣṭād áha bibʰyúṣī /

Halfverse: c    ní yát sīṃ śiśnátʰad vŕ̥ṣā //
   ní yát sīṃ śiśnátʰad vŕ̥ṣā //
   ní yát sīm śiśnátʰat vŕ̥ṣā //
   ní yát sīṃ śiśnátʰad vŕ̥ṣā //


Verse: 11 
Halfverse: a    etád asyā ánaḥ śaye súsampiṣṭaṃ vípāśy ā́ /
   etád asyā ánaḥ śaye
   etát asyāḥ ánaḥ śaye
   etád asyā ánaḥ śaye

Halfverse: b    súsampiṣṭaṃ vípāśy ā́ /
   súsampiṣṭam vípāśi ā́ /
   súsampiṣṭaṃ vípāśi ā́ /

Halfverse: c    sasā́ra sīm parāvátaḥ //
   sasā́ra sīm parāvátaḥ //
   sasā́ra sīm parāvátaḥ //
   sasā́ra sīm parāvátaḥ //


Verse: 12 
Halfverse: a    utá síndʰuṃ vibālyàṃ vitastʰānā́m ádʰi kṣámi /
   utá síndʰuṃ vibālyàṃ
   utá síndʰum vibālyàm
   utá síndʰuṃ vibālíyaṃ

Halfverse: b    vitastʰānā́m ádʰi kṣámi /
   vitastʰānā́m ádʰi kṣámi /
   vitastʰānā́m ádʰi kṣámi /

Halfverse: c    pári ṣṭʰā indra māyáyā //
   pári ṣṭʰā indra māyáyā //
   pári stʰāḥ indra māyáyā //
   pári ṣṭʰā indra māyáyā //


Verse: 13 
Halfverse: a    utá śúṣṇasya dʰr̥ṣṇuyā́ prá mr̥kṣo abʰí védanam /
   utá śúṣṇasya dʰr̥ṣṇuyā́
   utá śúṣṇasya dʰr̥ṣṇuyā́
   utá śúṣṇasya dʰr̥ṣṇuyā́

Halfverse: b    prá mr̥kṣo abʰí védanam /
   prá mr̥kṣaḥ abʰí védanam /
   prá mr̥kṣo abʰí védanam /

Halfverse: c    púro yád asya sampiṇák //
   púro yád asya sampiṇák //
   púraḥ yát asya sampiṇák //
   púro yád asya sampiṇák //


Verse: 14 
Halfverse: a    utá dāsáṃ kaulitarám br̥hatáḥ párvatād ádʰi /
   utá dāsáṃ kaulitarám
   utá dāsám kaulitarám
   utá dāsáṃ kaulitarám

Halfverse: b    br̥hatáḥ párvatād ádʰi /
   br̥hatáḥ párvatāt ádʰi /
   br̥hatáḥ párvatād ádʰi /

Halfverse: c    ávāhann indra śámbaram //
   ávāhann indra śámbaram //
   áva ahan indra śámbaram //
   ávāhann indra śámbaram //


Verse: 15 
Halfverse: a    utá dāsásya varcínaḥ sahásrāṇi śatā́vadʰīḥ /
   utá dāsásya varcínaḥ
   utá dāsásya varcínaḥ
   utá dāsásya varcínaḥ

Halfverse: b    sahásrāṇi śatā́vadʰīḥ /
   sahásrāṇi śatā́ avadʰīḥ /
   sahásrāṇi śatā́vadʰīḥ /

Halfverse: c    ádʰi páñca pradʰī́m̐r iva //
   ádʰi páñca pradʰī́m̐r iva //
   ádʰi páñca pradʰī́n iva //
   ádʰi páñca pradʰī́m̐r iva //


Verse: 16 
Halfverse: a    utá tyám putrám agrúvaḥ párāvr̥ktaṃ śatákratuḥ /
   utá tyám putrám agrúvaḥ
   utá tyám putrám agrúvaḥ
   utá tyám putrám agrúvaḥ

Halfverse: b    párāvr̥ktaṃ śatákratuḥ /
   párāvr̥ktam śatákratuḥ /
   párāvr̥ktaṃ śatákratuḥ /

Halfverse: c    uktʰéṣv índra ā́bʰajat //
   uktʰéṣv índra ā́bʰajat //
   uktʰéṣu índraḥ ā́ abʰajat //
   uktʰéṣu índra ā́bʰajat //


Verse: 17 
Halfverse: a    utá tyā́ turváśāyádū asnātā́rā śácīpátiḥ /
   utá tyā́ turváśāyádū
   utá tyā́ turváśāyádū
   utá tyā́ turváśāyádū

Halfverse: b    asnātā́rā śácīpátiḥ /
   asnātā́rā śácīpátiḥ /
   asnātā́rā śácīpátiḥ /

Halfverse: c    índro vidvā́m̐ apārayat //
   índro vidvā́m̐ apārayat //
   índraḥ vidvā́n apārayat //
   índro vidvā́m̐ apārayat //


Verse: 18 
Halfverse: a    utá tyā́ sadyá ā́ryā saráyor indra pārátaḥ /
   utá tyā́ sadyá ā́ryā
   utá tyā́ sadyáḥ ā́ryā
   utá tyā́ sadyá ā́riyā

Halfverse: b    saráyor indra pārátaḥ /
   saráyoḥ indra pārátaḥ /
   saráyor indra pārátaḥ /

Halfverse: c    árṇācitráratʰāvadʰīḥ //
   árṇācitráratʰāvadʰīḥ //
   árṇācitráratʰā avadʰīḥ //
   árṇācitráratʰāvadʰīḥ //


Verse: 19 
Halfverse: a    ánu dvā́ jahitā́ nayo 'ndʰáṃ śroṇáṃ ca vr̥trahan /
   ánu dvā́ jahitā́ nayo
   ánu dvā́ jahitā́ nayaḥ
   ánu dvā́ jahitā́ nayo

Halfverse: b    'ndʰáṃ śroṇáṃ ca vr̥trahan /
   andʰám śroṇám ca vr̥trahan /
   andʰáṃ śroṇáṃ ca vr̥trahan /

Halfverse: c    ná tát te sumnám áṣṭave //
   ná tát te sumnám áṣṭave //
   ná tát te sumnám áṣṭave //
   ná tát te sumnám áṣṭave //


Verse: 20 
Halfverse: a    śatám aśmanmáyīnām purā́m índro vy ā̀syat /
   śatám aśmanmáyīnām
   śatám aśmanmáyīnām
   śatám aśmanmáyīnãam

Halfverse: b    purā́m índro vy ā̀syat /
   purā́m índraḥ ví āsyat /
   purā́m índro ví āsiyat /

Halfverse: c    dívodāsāya dāśúṣe //
   dívodāsāya dāśúṣe //
   dívodāsāya dāśúṣe //
   dívodāsāya dāśúṣe //


Verse: 21 
Halfverse: a    ásvāpayad dabʰī́taye sahásrā trim̐śátaṃ hátʰaiḥ /
   ásvāpayad dabʰī́taye
   ásvāpayat dabʰī́taye
   ásvāpayad dabʰī́taye

Halfverse: b    sahásrā trim̐śátaṃ hátʰaiḥ /
   sahásrā triṃśátam hátʰaiḥ /
   sahásrā triṃśátaṃ hátʰaiḥ /

Halfverse: c    dāsā́nām índro māyáyā //
   dāsā́nām índro māyáyā //
   dāsā́nām índraḥ māyáyā //
   dāsā́nām índro māyáyā //


Verse: 22 
Halfverse: a    sá gʰéd utā́si vr̥trahan samāná indra gópatiḥ /
   sá gʰéd utā́si vr̥trahan
   sá gʰa ít utá asi vr̥trahan
   sá gʰéd utā́si vr̥trahan

Halfverse: b    samāná indra gópatiḥ /
   samānáḥ indra gópatiḥ /
   samāná indra gópatiḥ /

Halfverse: c    yás tā́ víśvāni cicyuṣé //
   yás tā́ víśvāni cicyuṣé //
   yáḥ tā́ víśvāni cicyuṣé //
   yás tā́ víśvāni cicyuṣé //


Verse: 23 
Halfverse: a    utá nūnáṃ yád indriyáṃ kariṣyā́ indra paúm̐syam /
   utá nūnáṃ yád indriyáṃ
   utá nūnám yát indriyám
   utá nūnáṃ yád indriyáṃ

Halfverse: b    kariṣyā́ indra paúm̐syam /
   kariṣyā́ḥ indra paúṃsyam /
   kariṣyā́ indra paúṃsiyam /

Halfverse: c    adyā́ nákiṣ ṭád ā́ minat //
   adyā́ nákiṣ ṭád ā́ minat //
   adyá+ nákiḥ tát ā́ minat //
   adyā́ nákiṣ ṭád ā́ minat //


Verse: 24 
Halfverse: a    vāmáṃ-vāmaṃ ta ādure devó dadātv aryamā́ /
   vāmáṃ-vāmaṃ ta ādure
   vāmáṃ-vāmam te ādure
   vāmáṃ-vāmaṃ ta ādure

Halfverse: b    devó dadātv aryamā́ /
   deváḥ dadātu aryamā́ /
   devó dadātu aryamā́ /

Halfverse: c    vāmám pūṣā́ vāmám bʰágo vāmáṃ deváḥ kárūḷatī //
   vāmám pūṣā́ vāmám bʰágo
   vāmám pūṣā́ vāmám bʰágaḥ
   vāmám pūṣā́ vāmám bʰágo

Halfverse: d    vāmáṃ deváḥ kárūḷatī //
   vāmám deváḥ kárūḷatī //
   vāmáṃ deváḥ kárūḷatī //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.