TITUS
Rg-Veda: Rg-Veda-Samhita
Part No. 329
Previous part

Hymn: 33_(329) 
Verse: 1 
Halfverse: a    prá r̥bʰúbʰyo dūtám iva vā́cam iṣya upastíre śvaítarīṃ dʰenúm īḷe /
   prá r̥bʰúbʰyo dūtám iva vā́cam iṣya
   prá r̥bʰúbʰyaḥ dūtám iva vā́cam iṣye
   prá rbʰúbʰyo dūtám iva vā́cam iṣya

Halfverse: b    upastíre śvaítarīṃ dʰenúm īḷe /
   upastíre śvaítarīm dʰenúm īḷe /
   upastíre śvaítarīṃ dʰenúm īḷe /

Halfverse: c    yé vā́tajūtās taráṇibʰir évaiḥ pári dyā́ṃ sadyó apáso babʰūvúḥ //
   yé vā́tajūtās taráṇibʰir évaiḥ
   yé vā́tajūtāḥ taráṇibʰiḥ évaiḥ
   yé vā́tajūtās taráṇibʰir évaiḥ

Halfverse: d    pári dyā́ṃ sadyó apáso babʰūvúḥ //
   pári dyā́m sadyáḥ apásaḥ babʰūvúḥ //
   pári dyā́ṃ sadyó apáso babʰūvúḥ //


Verse: 2 
Halfverse: a    yadā́ram ákrann r̥bʰávaḥ pitŕ̥bʰyām páriviṣṭī veṣáṇā dam̐sánābʰiḥ /
   yadā́ram ákrann r̥bʰávaḥ pitŕ̥bʰyām
   yadā́ áram ákran r̥bʰávaḥ pitŕ̥bʰyām
   yadā́ram ákrann r̥bʰávaḥ pitŕ̥bʰyām

Halfverse: b    páriviṣṭī veṣáṇā dam̐sánābʰiḥ /
   páriviṣṭī veṣáṇā daṃsánābʰiḥ /
   páriviṣṭī veṣáṇā daṃsánābʰiḥ /

Halfverse: c    ā́d íd devā́nām úpa sakʰyám āyan dʰī́rāsaḥ puṣṭím avahan manā́yai //
   ā́d íd devā́nām úpa sakʰyám āyan
   ā́t ít devā́nām úpa sakʰyám āyan
   ā́d íd devā́nām úpa sakʰyám āyan

Halfverse: d    dʰī́rāsaḥ puṣṭím avahan manā́yai //
   dʰī́rāsaḥ puṣṭím avahan manā́yai //
   dʰī́rāsaḥ puṣṭím avahan manā́yai //


Verse: 3 
Halfverse: a    púnar yé cakrúḥ pitárā yúvānā sánā yū́peva jaraṇā́ śáyānā /
   púnar yé cakrúḥ pitárā yúvānā
   púnar yé cakrúḥ pitárā yúvānā
   púnar yé cakrúḥ pitárā yúvānā

Halfverse: b    sánā yū́peva jaraṇā́ śáyānā /
   sánā yū́pā iva jaraṇā́ śáyānā /
   sánā yū́peva jaraṇā́ śáyānā /

Halfverse: c    té vā́jo víbʰvām̐ r̥bʰúr índravanto mádʰupsaraso no 'vantu yajñám //
   té vā́jo víbʰvām̐ r̥bʰúr índravanto
   té vā́jaḥ víbʰvān ! r̥bʰúḥ índravantaḥ
   té vā́jo víbʰvām̐ r̥bʰúr índravanto

Halfverse: d    mádʰupsaraso no 'vantu yajñám //
   mádʰupsarasaḥ naḥ avantu yajñám //
   mádʰupsaraso no avantu yajñám //


Verse: 4 
Halfverse: a    yát saṃvátsam r̥bʰávo gā́m árakṣan yát saṃvátsam r̥bʰávo mā́ ápim̐śan /
   yát saṃvátsam r̥bʰávo gā́m árakṣan
   yát saṃvátsam r̥bʰávaḥ gā́m árakṣan
   yát saṃvátsam r̥bʰávo gā́m árakṣan

Halfverse: b    yát saṃvátsam r̥bʰávo mā́ ápim̐śan /
   yát saṃvátsam r̥bʰávaḥ mā́ḥ ápiṃśan /
   yát saṃvátsam r̥bʰávo mā́ ápiṃśan /

Halfverse: c    yát saṃvátsam ábʰaran bʰā́so asyās tā́bʰiḥ śámībʰir amr̥tatvám āśuḥ //
   yát saṃvátsam ábʰaran bʰā́so asyās
   yát saṃvátsam ábʰaran bʰā́saḥ asyāḥ
   yát saṃvátsam ábʰaran bʰā́so asyās

Halfverse: d    tā́bʰiḥ śámībʰir amr̥tatvám āśuḥ //
   tā́bʰiḥ śámībʰiḥ amr̥tatvám āśuḥ //
   tā́bʰiḥ śámībʰir amr̥tatvám āśuḥ //


Verse: 5 
Halfverse: a    jyeṣṭʰá āha camasā́ dvā́ karéti kánīyān trī́n kr̥ṇavāméty āha /
   jyeṣṭʰá āha camasā́ dvā́ karéti
   jyeṣṭʰáḥ āha camasā́ dvā́ karā ! íti
   jyeṣṭʰá āha camasā́ dvā́ karéti

Halfverse: b    kánīyān trī́n kr̥ṇavāméty āha /
   kánīyān trī́n kr̥ṇavāma íti āha /
   kánīyān trī́n kr̥ṇavāméti āha /

Halfverse: c    kaniṣṭʰá āha catúras karéti tváṣṭa r̥bʰavas tát panayad váco vaḥ //
   kaniṣṭʰá āha catúras karéti
   kaniṣṭʰáḥ āha catúraḥ karā ! íti
   kaniṣṭʰá āha catúras karéti

Halfverse: d    tváṣṭa r̥bʰavas tát panayad váco vaḥ //
   tváṣṭā r̥bʰavaḥ tát panayat vácaḥ vaḥ //
   tváṣṭa rbʰavas tát panayad váco vaḥ //


Verse: 6 
Halfverse: a    satyám ūcur nára evā́ hí cakrúr ánu svadʰā́m r̥bʰávo jagmur etā́m /
   satyám ūcur nára evā́ hí cakrúr
   satyám ūcuḥ náraḥ evá+ hí cakrúḥ
   satyám ūcur nára evā́ hí cakrúr

Halfverse: b    ánu svadʰā́m r̥bʰávo jagmur etā́m /
   ánu svadʰā́m r̥bʰávaḥ jagmuḥ etā́m /
   ánu svadʰā́m r̥bʰávo jagmur etā́m /

Halfverse: c    vibʰrā́jamānām̐ś camasā́m̐ áhevā́venat tváṣṭā catúro dadr̥śvā́n //
   vibʰrā́jamānām̐ś camasā́m̐ áheva_
   vibʰrā́jamānān camasā́n áhā iva
   vibʰrā́jamānāṃś camasā́m̐ áheva

Halfverse: d    _ávenat tváṣṭā catúro dadr̥śvā́n //
   ávenat tváṣṭā catúraḥ dadr̥śvā́n //
   ávenat tváṣṭā catúro dadr̥śvā́n //


Verse: 7 
Halfverse: a    dvā́daśa dyū́n yád ágohyasyātitʰyé ráṇann r̥bʰávaḥ sasántaḥ /
   dvā́daśa dyū́n yád ágohyasya_
   dvā́daśa dyū́n yát ágohyasya
   duvā́daśa dyū́n yád ágohiyasya

Halfverse: b    _ātitʰyé ráṇann r̥bʰávaḥ sasántaḥ /
   ātitʰyé ráṇan r̥bʰávaḥ sasántaḥ /
   atitʰyé ráṇann r̥bʰávaḥ sasántaḥ /

Halfverse: c    sukṣétrākr̥ṇvann ánayanta síndʰūn dʰánvā́tiṣṭʰann óṣadʰīr nimnám ā́paḥ //
   sukṣétrākr̥ṇvann ánayanta síndʰūn
   sukṣétrā akr̥ṇvan ánayanta síndʰūn
   sukṣétrākr̥ṇvann ánayanta síndʰūn

Halfverse: d    dʰánvā́tiṣṭʰann óṣadʰīr nimnám ā́paḥ //
   dʰánva ā́ atiṣṭʰan óṣadʰīḥ nimnám ā́paḥ //
   dʰánvā́tiṣṭʰann óṣadʰīr nimnám ā́paḥ //


Verse: 8 
Halfverse: a    rátʰaṃ yé cakrúḥ suvŕ̥taṃ nareṣṭʰā́ṃ yé dʰenúṃ viśvajúvaṃ viśvárūpām /
   rátʰaṃ yé cakrúḥ suvŕ̥taṃ nareṣṭʰā́ṃ
   rátʰam yé cakrúḥ suvŕ̥tam nareṣṭʰā́m
   rátʰaṃ yé cakrúḥ suvŕ̥taṃ nareṣṭʰā́ṃ

Halfverse: b    yé dʰenúṃ viśvajúvaṃ viśvárūpām /
   yé dʰenúm viśvajúvam viśvárūpām /
   yé dʰenúṃ viśvajúvaṃ viśvárūpām /

Halfverse: c    tá ā́ takṣantv r̥bʰávo rayíṃ naḥ svávasaḥ svápasaḥ suhástāḥ //
   tá ā́ takṣantv r̥bʰávo rayíṃ naḥ
   té ā́ takṣantu r̥bʰávaḥ rayím naḥ
   tá ā́ takṣantu r̥bʰávo rayíṃ naḥ

Halfverse: d    svávasaḥ svápasaḥ suhástāḥ //
   svávasaḥ svápasaḥ suhástāḥ //
   suávasaḥ suápasaḥ suhástāḥ //


Verse: 9 
Halfverse: a    ápo hy èṣām ájuṣanta devā́ abʰí krátvā mánasā dī́dʰyānāḥ /
   ápo hy èṣām ájuṣanta devā́
   ápaḥ hí eṣām ájuṣanta devā́ḥ
   ápo hí eṣām ájuṣanta devā́

Halfverse: b    abʰí krátvā mánasā dī́dʰyānāḥ /
   abʰí krátvā mánasā dī́dʰyānāḥ /
   abʰí krátvā mánasā dī́dʰiyānāḥ /

Halfverse: c    vā́jo devā́nām abʰavat sukárméndrasya r̥bʰukṣā́ váruṇasya víbʰvā //
   vā́jo devā́nām abʰavat sukármā_
   vā́jaḥ devā́nām abʰavat sukármā
   vā́jo devā́nām abʰavat sukármā

Halfverse: d    _índrasya r̥bʰukṣā́ váruṇasya víbʰvā //
   índrasya r̥bʰukṣā́ḥ váruṇasya víbʰvā //
   índrasya rbʰukṣā́ váruṇasya víbʰvā //


Verse: 10 
Halfverse: a    yé hárī medʰáyoktʰā́ mádanta índrāya cakrúḥ suyújā yé áśvā /
   yé hárī medʰáyoktʰā́ mádanta
   yé hárī medʰáyā uktʰā́ mádantaḥ
   yé hárī medʰáyā uktʰā́ mádanta

Halfverse: b    índrāya cakrúḥ suyújā yé áśvā /
   índrāya cakrúḥ suyújā yé áśvā /
   índrāya cakrúḥ suyújā yé áśvā /

Halfverse: c    té rāyás póṣaṃ dráviṇāny asmé dʰattá r̥bʰavaḥ kṣemayánto ná mitrám //
   té rāyás póṣaṃ dráviṇāny asmé
   té rāyáḥ póṣam dráviṇāni asmé
   té rāyás póṣaṃ dráviṇāni asmé

Halfverse: d    dʰattá r̥bʰavaḥ kṣemayánto ná mitrám //
   dʰattá r̥bʰavaḥ kṣemayántaḥ ná mitrám //
   dʰattá rbʰavaḥ kṣemayánto ná mitrám //


Verse: 11 
Halfverse: a    idā́hnaḥ pītím utá vo mádaṃ dʰur ná r̥té śrāntásya sakʰyā́ya devā́ḥ /
   idā́hnaḥ pītím utá vo mádaṃ dʰur
   idā́ áhnaḥ pītím utá vaḥ mádam dʰuḥ
   idā́hnaḥ pītím utá vo mádaṃ dʰur

Halfverse: b    ná r̥té śrāntásya sakʰyā́ya devā́ḥ /
   ná r̥té śrāntásya sakʰyā́ya devā́ḥ /
   ná rté śrāntásya sakʰiyā́ya devā́ḥ /

Halfverse: c    té nūnám asmé r̥bʰavo vásūni tr̥tī́ye asmín sávane dadʰāta //
   té nūnám asmé r̥bʰavo vásūni
   té nūnám asmé r̥bʰavaḥ vásūni
   té nūnám asmé r̥bʰavo vásūni

Halfverse: d    tr̥tī́ye asmín sávane dadʰāta //
   tr̥tī́ye asmín sávane dadʰāta //
   tr̥tī́ye asmín sávane dadʰāta //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.