TITUS
Rg-Veda: Rg-Veda-Samhita
Part No. 321
Previous part

Hymn: 25_(321) 
Verse: 1 
Halfverse: a    kó adyá náryo devákāma uśánn índrasya sakʰyáṃ jujoṣa /
   kó adyá náryo devákāma
   káḥ adyá náryaḥ devákāmaḥ
   kó adyá ? náriyo devákāma

Halfverse: b    uśánn índrasya sakʰyáṃ jujoṣa /
   uśán índrasya sakʰyám jujoṣa /
   uśánn índrasya sakʰiyáṃ jujoṣa /

Halfverse: c    kó vā mahé 'vase pā́ryāya sámiddʰe agnaú sutásoma īṭṭe //
   kó vā mahé 'vase pā́ryāya
   káḥ vā mahé ávase pā́ryāya
   kó vā mahé ávase pā́riyāya

Halfverse: d    sámiddʰe agnaú sutásoma īṭṭe //
   sámiddʰe agnaú sutásomaḥ īṭṭe //
   sámiddʰe agnaú sutásoma īṭṭe //


Verse: 2 
Halfverse: a    kó nānāma vácasā somyā́ya manāyúr vā bʰavati vásta usrā́ḥ /
   kó nānāma vácasā somyā́ya
   káḥ nānāma vácasā somyā́ya
   kó nānāma vácasā somiyā́ya

Halfverse: b    manāyúr vā bʰavati vásta usrā́ḥ /
   manāyúḥ vā bʰavati vásto ! usrā́ḥ /
   manāyúr vā bʰavati vásta usrā́ḥ /

Halfverse: c    ká índrasya yújyaṃ káḥ sakʰitváṃ kó bʰrātráṃ vaṣṭi kaváye ká ūtī́ //
   ká índrasya yújyaṃ káḥ sakʰitváṃ
   káḥ índrasya yújyam káḥ sakʰitvám
   ká índrasya yújiyaṃ káḥ sakʰitváṃ

Halfverse: d    kó bʰrātráṃ vaṣṭi kaváye ká ūtī́ //
   káḥ bʰrātrám vaṣṭi kaváye káḥ ūtī́ //
   kó bʰrātráṃ vaṣṭi kaváye ká ūtī́ //


Verse: 3 
Halfverse: a    kó devā́nām ávo adyā́ vr̥ṇīte ká ādityā́m̐ áditiṃ jyótir īṭṭe /
   kó devā́nām ávo adyā́ vr̥ṇīte
   káḥ devā́nām ávaḥ adyá+ vr̥ṇīte
   kó devā́nām ávo adyā́ vr̥ṇīte

Halfverse: b    ká ādityā́m̐ áditiṃ jyótir īṭṭe /
   káḥ ādityā́n áditim jyótiḥ īṭṭe /
   ká ādityā́m̐ áditiṃ jyótir īṭṭe /

Halfverse: c    kásyāśvínāv índro agníḥ sutásyām̐śóḥ pibanti mánasā́vivenam //
   kásyāśvínāv índro agníḥ sutásya_
   kásya aśvínau índraḥ agníḥ sutásya
   kásyāśvínāv índro agníḥ sutásya

Halfverse: d    _am̐śóḥ pibanti mánasā́vivenam //
   aṃśóḥ pibanti mánasā ávivenam //
   aṃśóḥ pibanti mánasā́vivenam //


Verse: 4 
Halfverse: a    tásmā agnír bʰā́rataḥ śárma yam̐saj jyók paśyāt sū́ryam uccárantam /
   tásmā agnír bʰā́rataḥ śárma yam̐saj
   tásmai agníḥ bʰā́rataḥ śárma yaṃsat
   tásmā agnír bʰā́rataḥ śárma yaṃsaj

Halfverse: b    jyók paśyāt sū́ryam uccárantam /
   jyók paśyāt sū́ryam uccárantam /
   jiyók paśyāt sū́riyam uccárantam /

Halfverse: c    yá índrāya sunávāméty ā́ha náre náryāya nŕ̥tamāya nr̥ṇā́m //
   yá índrāya sunávāméty ā́ha
   yáḥ índrāya sunávāma íti ā́ha
   yá índrāya sunávāméti ā́ha

Halfverse: d    náre náryāya nŕ̥tamāya nr̥ṇā́m //
   náre náryāya nŕ̥tamāya nr̥ṇā́m //
   náre náryāya nŕ̥tamāya nr̥̄ṇā́m //


Verse: 5 
Halfverse: a    ná táṃ jinanti bahávo ná dabʰrā́ urv àsmā áditiḥ śárma yam̐sat /
   ná táṃ jinanti bahávo ná dabʰrā́
   ná tám jinanti bahávaḥ ná dabʰrā́ḥ
   ná táṃ jinanti bahávo ná dabʰrā́

Halfverse: b    urv àsmā áditiḥ śárma yam̐sat /
   urú asmai áditiḥ śárma yaṃsat /
   urú asmā áditiḥ śárma yaṃsat /

Halfverse: c    priyáḥ sukŕ̥t priyá índre manāyúḥ priyáḥ suprāvī́ḥ priyó asya somī́ //
   priyáḥ sukŕ̥t priyá índre manāyúḥ
   priyáḥ sukŕ̥t priyáḥ índre manāyúḥ
   priyáḥ sukŕ̥t priyá índre manāyúḥ

Halfverse: d    priyáḥ suprāvī́ḥ priyó asya somī́ //
   priyáḥ suprāvī́ḥ priyáḥ asya somī́ //
   priyáḥ suprāvī́ḥ priyó asya somī́ //


Verse: 6 
Halfverse: a    suprāvyàḥ prāśuṣā́ḷ eṣá vīráḥ súṣveḥ paktíṃ kr̥ṇute kévaléndraḥ /
   suprāvyàḥ prāśuṣā́ḷ eṣá vīráḥ
   suprāvyàḥ prāśuṣā́ṭ eṣá vīráḥ
   suprāvíyaḥ prāśuṣā́ḷ eṣá vīráḥ

Halfverse: b    súṣveḥ paktíṃ kr̥ṇute kévaléndraḥ /
   súṣveḥ paktím kr̥ṇute kévalā índraḥ /
   súṣveḥ paktíṃ kr̥ṇute kévaléndraḥ /

Halfverse: c    nā́suṣver āpír ná sákʰā ná jāmír duṣprāvyò 'vahantéd ávācaḥ //
   nā́suṣver āpír ná sákʰā ná jāmír
   ná ásuṣveḥ āpíḥ ná sákʰā ná jāmíḥ
   nā́suṣver āpír ná sákʰā ná jāmír

Halfverse: d    duṣprāvyò 'vahantéd ávācaḥ //
   duṣprāvyáḥ avahantā́ ít ávācaḥ //
   duṣprāvíyo avahantéd ávācaḥ //


Verse: 7 
Halfverse: a    ná revátā paṇínā sakʰyám índró 'sunvatā sutapā́ḥ sáṃ gr̥ṇīte /
   ná revátā paṇínā sakʰyám índró
   ná revátā paṇínā sakʰyám índraḥ
   ná revátā paṇínā sakʰyám índro

Halfverse: b    'sunvatā sutapā́ḥ sáṃ gr̥ṇīte /
   ásunvatā sutapā́ḥ sám gr̥ṇīte /
   ásunvatā sutapā́ḥ sáṃ gr̥ṇīte /

Halfverse: c    ā́sya védaḥ kʰidáti hánti nagnáṃ ví súṣvaye paktáye kévalo bʰūt //
   ā́sya védaḥ kʰidáti hánti nagnáṃ
   ā́ asya védaḥ kʰidáti hánti nagnám
   ā́sya védaḥ kʰidáti hánti nagnáṃ

Halfverse: d    ví súṣvaye paktáye kévalo bʰūt //
   ví súṣvaye paktáye kévalaḥ bʰūt //
   ví súṣvaye paktáye kévalo bʰūt //


Verse: 8 
Halfverse: a    índram páré 'vare madʰyamā́sa índraṃ yā́ntó 'vasitāsa índram /
   índram páré 'vare madʰyamā́sa
   índram páre ávare madʰyamā́saḥ
   índram páre ávare madʰyamā́sa

Halfverse: b    índraṃ yā́ntó 'vasitāsa índram /
   índram yā́ntaḥ ávasitāsaḥ índram /
   índraṃ yā́nto ávasitāsa índram /

Halfverse: c    índraṃ kṣiyánta utá yúdʰyamānā índraṃ náro vājayánto havante //
   índraṃ kṣiyánta utá yúdʰyamānā
   índram kṣiyántaḥ utá yúdʰyamānāḥ
   índraṃ kṣiyánta utá yúdʰyamānā

Halfverse: d    índraṃ náro vājayánto havante //
   índram náraḥ vājayántaḥ havante //
   índraṃ náro vājayánto havante //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.