TITUS
Rg-Veda: Rg-Veda-Samhita
Part No. 318
Previous part

Hymn: 22_(318) 
Verse: 1 
Halfverse: a    yán na índro jujuṣé yác ca váṣṭi tán no mahā́n karati śuṣmy ā́ cit /
   yán na índro jujuṣé yác ca váṣṭi
   yát naḥ índraḥ jujuṣé yát ca váṣṭi
   yán na índro jujuṣé yác ca váṣṭi

Halfverse: b    tán no mahā́n karati śuṣmy ā́ cit /
   tát naḥ mahā́n karati śuṣmī́ ā́ cit /
   tán no mahā́n karati śuṣmī́ ā́ cit /

Halfverse: c    bráhma stómam magʰávā sómam uktʰā́ yó áśmānaṃ śávasā bíbʰrad éti //
   bráhma stómam magʰávā sómam uktʰā́
   bráhma stómam magʰávā sómam uktʰā́
   bráhma stómam magʰávā sómam uktʰā́

Halfverse: d    yó áśmānaṃ śávasā bíbʰrad éti //
   yáḥ áśmānam śávasā bíbʰrat éti //
   yó áśmānaṃ śávasā bíbʰrad éti //


Verse: 2 
Halfverse: a    vŕ̥ṣā vŕ̥ṣandʰiṃ cáturaśrim ásyann ugró bāhúbʰyāṃ nŕ̥tamaḥ śácīvān /
   vŕ̥ṣā vŕ̥ṣandʰiṃ cáturaśrim ásyann
   vŕ̥ṣā vŕ̥ṣandʰim cáturaśrim ásyan
   vŕ̥ṣā vŕ̥ṣandʰiṃ cáturaśrim ásyann

Halfverse: b    ugró bāhúbʰyāṃ nŕ̥tamaḥ śácīvān /
   ugráḥ bāhúbʰyām nŕ̥tamaḥ śácīvān /
   ugró bāhúbʰyāṃ nŕ̥tamaḥ śácīvān /

Halfverse: c    śriyé páruṣṇīm uṣámāṇa ū́rṇāṃ yásyāḥ párvāṇi sakʰyā́ya vivyé //
   śriyé páruṣṇīm uṣámāṇa ū́rṇāṃ
   śriyé páruṣṇīm uṣámāṇaḥ ū́rṇām
   śriyé páruṣṇīm uṣámāṇa ū́rṇāṃ

Halfverse: d    yásyāḥ párvāṇi sakʰyā́ya vivyé //
   yásyāḥ párvāṇi sakʰyā́ya vivyé //
   yásyāḥ párvāṇi sakʰiyā́ya vivyé //


Verse: 3 
Halfverse: a    yó devó devátamo jā́yamāno mahó vā́jebʰir mahádbʰiś ca śúṣmaiḥ /
   yó devó devátamo jā́yamāno
   yáḥ deváḥ devátamaḥ jā́yamānaḥ
   yó devó devátamo jā́yamāno

Halfverse: b    mahó vā́jebʰir mahádbʰiś ca śúṣmaiḥ /
   maháḥ vā́jebʰiḥ mahádbʰiḥ ca śúṣmaiḥ /
   mahó vā́jebʰir mahádbʰiś ca śúṣmaiḥ /

Halfverse: c    dádʰāno vájram bāhvór uśántaṃ dyā́m ámena rejayat prá bʰū́ma //
   dádʰāno vájram bāhvór uśántaṃ
   dádʰānaḥ vájram bāhvóḥ uśántam
   dádʰāno vájram bāhuvór uśántaṃ

Halfverse: d    dyā́m ámena rejayat prá bʰū́ma //
   dyā́m ámena rejayat prá bʰū́ma //
   diyā́m ámena rejayat prá bʰū́ma //


Verse: 4 
Halfverse: a    víśvā ródʰām̐si pravátaś ca pūrvī́r dyaúr r̥ṣvā́j jániman rejata kṣā́ḥ /
   víśvā ródʰām̐si pravátaś ca pūrvī́r
   víśvā ródʰāṃsi pravátaḥ ca pūrvī́ḥ
   víśvā ródʰāṃsi pravátaś ca pūrvī́r

Halfverse: b    dyaúr r̥ṣvā́j jániman rejata kṣā́ḥ /
   dyaúḥ r̥ṣvā́t jániman rejata kṣā́ḥ /
   diyaúr r̥ṣvā́j jániman rejata kṣā́ḥ /

Halfverse: c    ā́ mātárā bʰárati śuṣmy ā́ gór nr̥vát párijman nonuvanta vā́tāḥ //
   ā́ mātárā bʰárati śuṣmy ā́ gór
   ā́ mātárā bʰárati śuṣmī́ ā́ góḥ
   ā́ mātárā bʰárati śuṣmī́ ā́ gór

Halfverse: d    nr̥vát párijman nonuvanta vā́tāḥ //
   nr̥vát párijman nonuvanta vā́tāḥ //
   nr̥vát párijman nonuvanta vā́tāḥ //


Verse: 5 
Halfverse: a    tā́ tū́ ta indra maható mahā́ni víśveṣv ít sávaneṣu pravā́cyā /
   tā́ tū́ ta indra maható mahā́ni
   tā́ tú+ te indra mahatáḥ mahā́ni
   tā́ tū́ ta indra maható mahā́ni

Halfverse: b    víśveṣv ít sávaneṣu pravā́cyā /
   víśveṣu ít sávaneṣu pravā́cyā /
   víśveṣu ít sávaneṣu pravā́cyā /

Halfverse: c    yác cʰūra dʰr̥ṣṇo dʰr̥ṣatā́ dadʰr̥ṣvā́n áhiṃ vájreṇa śávasā́viveṣīḥ //
   yác cʰūra dʰr̥ṣṇo dʰr̥ṣatā́ dadʰr̥ṣvā́n
   yát śūra dʰr̥ṣṇo dʰr̥ṣatā́ dadʰr̥ṣvā́n
   yác cʰūra dʰr̥ṣṇo dʰr̥ṣatā́ dadʰr̥ṣvā́n

Halfverse: d    áhiṃ vájreṇa śávasā́viveṣīḥ //
   áhim vájreṇa śávasā áviveṣīḥ //
   áhiṃ vájreṇa śávasā́viveṣīḥ //


Verse: 6 
Halfverse: a    tā́ tū́ te satyā́ tuvinr̥mṇa víśvā prá dʰenávaḥ sisrate vŕ̥ṣṇa ū́dʰnaḥ /
   tā́ tū́ te satyā́ tuvinr̥mṇa víśvā
   tā́ tú+ te satyā́ tuvinr̥mṇa víśvā
   tā́ tū́ te satyā́ tuvinr̥mṇa víśvā

Halfverse: b    prá dʰenávaḥ sisrate vŕ̥ṣṇa ū́dʰnaḥ /
   prá dʰenávaḥ sisrate vŕ̥ṣṇaḥ ū́dʰnaḥ /
   prá dʰenávaḥ sisrate vŕ̥ṣṇa ū́dʰnaḥ /

Halfverse: c    ádʰā ha tvád vr̥ṣamaṇo bʰiyānā́ḥ prá síndʰavo jávasā cakramanta //
   ádʰā ha tvád vr̥ṣamaṇo bʰiyānā́ḥ
   ádʰa+ ha tvát vr̥ṣamaṇaḥ bʰiyānā́ḥ
   ádʰā ha tvád vr̥ṣamaṇo bʰiyānā́ḥ

Halfverse: d    prá síndʰavo jávasā cakramanta //
   prá síndʰavaḥ jávasā cakramanta //
   prá síndʰavo jávasā cakramanta //


Verse: 7 
Halfverse: a    átrā́ha te harivas tā́ u devī́r ávobʰir indra stavanta svásāraḥ /
   átrā́ha te harivas tā́ u devī́r
   átra áha te harivaḥ tā́ḥ u devī́ḥ
   átrā́ha te harivas tā́ u devī́r

Halfverse: b    ávobʰir indra stavanta svásāraḥ /
   ávobʰiḥ indra stavanta svásāraḥ /
   ávobʰir indra stavanta svásāraḥ /

Halfverse: c    yát sīm ánu prá mucó badbadʰānā́ dīrgʰā́m ánu prásitiṃ syandayádʰyai //
   yát sīm ánu prá mucó badbadʰānā́
   yát sīm ánu prá mucáḥ badbadʰānā́ḥ
   yát sīm ánu prá mucó badbadʰānā́

Halfverse: d    dīrgʰā́m ánu prásitiṃ syandayádʰyai //
   dīrgʰā́m ánu prásitim syandayádʰyai //
   dīrgʰā́m ánu prásitiṃ syandayádʰyai //


Verse: 8 
Halfverse: a    pipīḷé am̐śúr mádyo ná síndʰur ā́ tvā śámī śaśamānásya śaktíḥ /
   pipīḷé am̐śúr mádyo ná síndʰur
   pipīḷé aṃśúḥ mádyaḥ ná síndʰuḥ
   pipīḷé aṃśúr mádiyo ná síndʰur

Halfverse: b    ā́ tvā śámī śaśamānásya śaktíḥ /
   ā́ tvā śámī śaśamānásya śaktíḥ /
   ā́ tvā śámī śaśamānásya śaktíḥ /

Halfverse: c    asmadryàk cʰuśucānásya yamyā āśúr ná raśmíṃ tuvyójasaṃ góḥ //
   asmadryàk cʰuśucānásya yamyā
   asmadryàk śuśucānásya yamyāḥ
   asmadríak cʰuśucānásya yamyā

Halfverse: d    āśúr ná raśmíṃ tuvyójasaṃ góḥ //
   āśúḥ ná raśmím tuvyójasam góḥ //
   āśúr ná raśmíṃ tuviójasaṃ góḥ //


Verse: 9 
Halfverse: a    asmé várṣiṣṭʰā kr̥ṇuhi jyéṣṭʰā nr̥mṇā́ni satrā́ sahure sáhām̐si /
   asmé várṣiṣṭʰā kr̥ṇuhi jyéṣṭʰā
   asmé várṣiṣṭʰā kr̥ṇuhi jyéṣṭʰā
   asmé várṣiṣṭʰā kr̥ṇuhi jyáyiṣṭʰā

Halfverse: b    nr̥mṇā́ni satrā́ sahure sáhām̐si /
   nr̥mṇā́ni satrā́ sahure sáhāṃsi /
   nr̥mṇā́ni satrā́ sahure sáhāṃsi /

Halfverse: c    asmábʰyaṃ vr̥trā́ suhánāni randʰi jahí vádʰar vanúṣo mártyasya //
   asmábʰyaṃ vr̥trā́ suhánāni randʰi
   asmábʰyam vr̥trā́ suhánāni randʰi
   asmábʰyaṃ vr̥trā́ suhánāni randʰi

Halfverse: d    jahí vádʰar vanúṣo mártyasya //
   jahí vádʰar vanúṣaḥ mártyasya //
   jahí vádʰar vanúṣo mártiyasya //


Verse: 10 
Halfverse: a    asmā́kam ít sú śr̥ṇuhi tvám indrāsmábʰyaṃ citrā́m̐ úpa māhi vā́jān /
   asmā́kam ít sú śr̥ṇuhi tvám indra_
   asmā́kam ít sú śr̥ṇuhi tvám indra
   asmā́kam ít sú śr̥ṇuhi tvám indra

Halfverse: b    _asmábʰyaṃ citrā́m̐ úpa māhi vā́jān /
   asmábʰyam citrā́n úpa māhi vā́jān /
   asmábʰyaṃ citrā́m̐ úpa māhi vā́jān /

Halfverse: c    asmábʰyaṃ víśvā iṣaṇaḥ púraṃdʰīr asmā́kaṃ sú magʰavan bodʰi godā́ḥ //
   asmábʰyaṃ víśvā iṣaṇaḥ púraṃdʰīr
   asmábʰyam víśvāḥ iṣaṇaḥ púraṃdʰīḥ
   asmábʰyaṃ víśvā iṣaṇaḥ púraṃdʰīr

Halfverse: d    asmā́kaṃ sú magʰavan bodʰi godā́ḥ //
   asmā́kam sú magʰavan bodʰi godā́ḥ //
   asmā́kaṃ sú magʰavan bodʰi godā́ḥ //


Verse: 11 
Halfverse: a    nū́ ṣṭutá indra nū́ gr̥ṇāná íṣaṃ jaritré nadyò ná pīpeḥ /
   nū́ ṣṭutá indra nū́ gr̥ṇāná
   nú+ stutáḥ indra nú+ gr̥ṇānáḥ
   nûú ṣṭutá indara nū́ gr̥ṇāná

Halfverse: b    íṣaṃ jaritré nadyò ná pīpeḥ /
   íṣam jaritré nadyàḥ ná pīpeḥ /
   íṣaṃ jaritré nadíyo ná pīpeḥ /

Halfverse: c    ákāri te harivo bráhma návyaṃ dʰiyā́ syāma ratʰyàḥ sadāsā́ḥ //
   ákāri te harivo bráhma návyaṃ
   ákāri te harivaḥ bráhma návyam
   ákāri te harivo bráhma návyaṃ

Halfverse: d    dʰiyā́ syāma ratʰyàḥ sadāsā́ḥ //
   dʰiyā́ syāma ratʰyàḥ sadāsā́ḥ //
   dʰiyā́ siyāma ratʰíyaḥ sadāsā́ḥ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.