TITUS
Rg-Veda: Rg-Veda-Samhita
Part No. 315
Previous part

Hymn: 19_(315) 
Verse: 1 
Halfverse: a    evā́ tvā́m indra vajrinn átra víśve devā́saḥ suhávāsa ū́māḥ /
   evā́ tvā́m indra vajrinn átra
   evá+ tvā́m indra vajrin átra
   evā́ tuvā́m indara vajrin átra

Halfverse: b    víśve devā́saḥ suhávāsa ū́māḥ /
   víśve devā́saḥ suhávāsaḥ ū́māḥ /
   víśve devā́saḥ suhávāsa ū́māḥ /

Halfverse: c    mahā́m ubʰé ródasī vr̥ddʰám r̥ṣváṃ nír ékam íd vr̥ṇate vr̥trahátye //
   mahā́m ubʰé ródasī vr̥ddʰám r̥ṣváṃ
   mahā́m ubʰé ródasī vr̥ddʰám r̥ṣvám
   mahā́m ubʰé ródasī vr̥ddʰám r̥ṣváṃ

Halfverse: d    nír ékam íd vr̥ṇate vr̥trahátye //
   níḥ ékam ít vr̥ṇate vr̥trahátye //
   nír ékam íd vr̥ṇate vr̥trahátye //


Verse: 2 
Halfverse: a    ávāsr̥janta jívrayo ná devā́ bʰúvaḥ samrā́ḷ indra satyáyoniḥ /
   ávāsr̥janta jívrayo ná devā́
   áva asr̥janta jívrayaḥ ná devā́ḥ
   ávāsr̥janta jívrayo ná devā́

Halfverse: b    bʰúvaḥ samrā́ḷ indra satyáyoniḥ /
   bʰúvaḥ samrā́ṭ indra satyáyoniḥ /
   bʰúvaḥ samrā́ḷ indara satyáyoniḥ /

Halfverse: c    áhann áhim pariśáyānam árṇaḥ prá vartanī́r arado viśvádʰenāḥ //
   áhann áhim pariśáyānam árṇaḥ
   áhan áhim pariśáyānam árṇaḥ
   áhann áhim pariśáyānam árṇaḥ

Halfverse: d    prá vartanī́r arado viśvádʰenāḥ //
   prá vartanī́ḥ aradaḥ viśvádʰenāḥ //
   prá vartanī́r arado viśvádʰenāḥ //


Verse: 3 
Halfverse: a    átr̥pṇuvantaṃ víyatam abudʰyám ábudʰyamānaṃ suṣupāṇám indra /
   átr̥pṇuvantaṃ víyatam abudʰyám
   átr̥pṇuvantam víyatam abudʰyám
   átr̥pṇuvantaṃ víyatam abudʰyám

Halfverse: b    ábudʰyamānaṃ suṣupāṇám indra /
   ábudʰyamānam suṣupāṇám indra /
   ábudʰyamānaṃ suṣupāṇám indra /

Halfverse: c    saptá práti praváta āśáyānam áhiṃ vájreṇa ví riṇā aparván //
   saptá práti praváta āśáyānam
   saptá práti pravátaḥ āśáyānam
   saptá práti praváta āśáyānam

Halfverse: d    áhiṃ vájreṇa ví riṇā aparván //
   áhim vájreṇa ví riṇāḥ aparván //
   áhiṃ vájreṇa ví riṇā aparván //


Verse: 4 
Halfverse: a    ákṣodayac cʰávasā kṣā́ma budʰnáṃ vā́r ṇá vā́tas táviṣībʰir índraḥ /
   ákṣodayac cʰávasā kṣā́ma budʰnáṃ
   ákṣodayat śávasā kṣā́ma budʰnám
   ákṣodayac cʰávasā kṣā́ma budʰnáṃ

Halfverse: b    vā́r ṇá vā́tas táviṣībʰir índraḥ /
   vā́r ná vā́taḥ táviṣībʰiḥ índraḥ /
   vâár ṇá vā́tas táviṣībʰir índraḥ /

Halfverse: c    dr̥ḷʰā́ny aubʰnād uśámāna ójó 'vābʰinat kakúbʰaḥ párvatānām //
   dr̥ḷʰā́ny aubʰnād uśámāna ójó
   dr̥ḷʰā́ni aubʰnāt uśámānaḥ ójaḥ
   dr̥ḷʰā́ni aubʰnād uśámāna ójo

Halfverse: d    'vābʰinat kakúbʰaḥ párvatānām //
   áva abʰinat kakúbʰaḥ párvatānām //
   ávābʰinat kakúbʰaḥ párvatānām //


Verse: 5 
Halfverse: a    abʰí prá dadrur jánayo ná gárbʰaṃ rátʰā iva prá yayuḥ sākám ádrayaḥ /
   abʰí prá dadrur jánayo ná gárbʰaṃ
   abʰí prá dadruḥ jánayaḥ ná gárbʰam
   abʰí prá dadrur jánayo ná gárbʰaṃ

Halfverse: b    rátʰā iva prá yayuḥ sākám ádrayaḥ /
   rátʰāḥ iva prá yayuḥ sākám ádrayaḥ /
   rátʰā iva prá yayuḥ sākám ádrayaḥ /

Halfverse: c    átarpayo visŕ̥ta ubjá ūrmī́n tváṃ vr̥tā́m̐ ariṇā indra síndʰūn //
   átarpayo visŕ̥ta ubjá ūrmī́n
   átarpayaḥ visŕ̥taḥ ubjáḥ ūrmī́n
   átarpayo visŕ̥ta ubjá ūrmī́n

Halfverse: d    tváṃ vr̥tā́m̐ ariṇā indra síndʰūn //
   tvám vr̥tā́n ariṇāḥ indra síndʰūn //
   tuváṃ vr̥tā́m̐ ariṇā indra síndʰūn //


Verse: 6 
Halfverse: a    tvám mahī́m avániṃ viśvádʰenāṃ turvī́taye vayyā̀ya kṣárantīm /
   tvám mahī́m avániṃ viśvádʰenāṃ
   tvám mahī́m avánim viśvádʰenām
   tuvám mahī́m avániṃ viśvádʰenāṃ

Halfverse: b    turvī́taye vayyā̀ya kṣárantīm /
   turvī́taye vayyā̀ya kṣárantīm /
   turvī́taye vayíyāya kṣárantīm /

Halfverse: c    áramayo námasaíjad árṇaḥ sutaraṇā́m̐ akr̥ṇor indra síndʰūn //
   áramayo námasaíjad árṇaḥ
   áramayaḥ námasā éjat árṇaḥ
   áramayo námasā éjad árṇaḥ

Halfverse: d    sutaraṇā́m̐ akr̥ṇor indra síndʰūn //
   sutaraṇā́n akr̥ṇoḥ indra síndʰūn //
   sutaraṇā́m̐ akr̥ṇor indra síndʰūn //


Verse: 7 
Halfverse: a    prā́grúvo nabʰanvò ná vákvā dʰvasrā́ apinvad yuvatī́r r̥tajñā́ḥ /
   prā́grúvo nabʰanvò ná vákvā
   prá agrúvaḥ nabʰanvàḥ ná vákvāḥ
   prá agrúvo nabʰanúvo ná vákvā

Halfverse: b    dʰvasrā́ apinvad yuvatī́r r̥tajñā́ḥ /
   dʰvasrā́ḥ apinvat yuvatī́ḥ r̥tajñā́ḥ /
   dʰvasrā́ apinvad yuvatī́r r̥tajñā́ḥ /

Halfverse: c    dʰánvāny ájrām̐ apr̥ṇak tr̥ṣāṇā́m̐ ádʰog índra staryò dáṃsupatnīḥ //
   dʰánvāny ájrām̐ apr̥ṇak tr̥ṣāṇā́m̐
   dʰánvāni ájrān apr̥ṇak tr̥ṣāṇā́n
   dʰánvāni ájrām̐ apr̥ṇak tr̥ṣāṇā́m̐

Halfverse: d    ádʰog índra staryò dáṃsupatnīḥ //
   ádʰok índraḥ staryàḥ dáṃsupatnīḥ //
   ádʰog índra staríyo dáṃsupatnīḥ //


Verse: 8 
Halfverse: a    pūrvī́r uṣásaḥ śarádaś ca gūrtā́ vr̥tráṃ jagʰanvā́m̐ asr̥jad ví síndʰūn /
   pūrvī́r uṣásaḥ śarádaś ca gūrtā́
   pūrvī́ḥ uṣásaḥ śarádaḥ ca gūrtā́ḥ
   pūrvī́r uṣásaḥ śarádaś ca gūrtā́

Halfverse: b    vr̥tráṃ jagʰanvā́m̐ asr̥jad ví síndʰūn /
   vr̥trám jagʰanvā́n asr̥jat ví síndʰūn /
   vr̥tráṃ jagʰanvā́m̐ asr̥jad ví síndʰūn /

Halfverse: c    páriṣṭʰitā atr̥ṇad badbadʰānā́ḥ sīrā́ índraḥ srávitave pr̥tʰivyā́ //
   páriṣṭʰitā atr̥ṇad badbadʰānā́ḥ
   páriṣṭʰitāḥ atr̥ṇat badbadʰānā́ḥ
   páriṣṭʰitā atr̥ṇad badbadʰānā́ḥ

Halfverse: d    sīrā́ índraḥ srávitave pr̥tʰivyā́ //
   sīrā́ḥ índraḥ srávitave pr̥tʰivyā́ //
   sīrā́ índraḥ srávitave pr̥tʰivyā́ //


Verse: 9 
Halfverse: a    vamrī́bʰiḥ putrám agrúvo adānáṃ nivéśanād dʰariva ā́ jabʰartʰa /
   vamrī́bʰiḥ putrám agrúvo adānáṃ
   vamrī́bʰiḥ putrám agrúvaḥ adānám
   vamrī́bʰiḥ putrám agrúvo adānáṃ

Halfverse: b    nivéśanād dʰariva ā́ jabʰartʰa /
   nivéśanāt harivaḥ ā́ jabʰartʰa /
   nivéśanād dʰariva ā́ jabʰartʰa /

Halfverse: c    vy àndʰó akʰyad áhim ādadānó nír bʰūd ukʰacʰít sám aranta párva //
   vy àndʰó akʰyad áhim ādadānó
   ví andʰáḥ akʰyat áhim ādadānáḥ
   ví andʰó akʰyad áhim ādadānó

Halfverse: d    nír bʰūd ukʰacʰít sám aranta párva //
   níḥ bʰūt ukʰacʰít sám aranta párva //
   nír bʰūd ukʰacʰít sám aranta párva //


Verse: 10 
Halfverse: a    prá te pū́rvāṇi káraṇāni viprāvidvā́m̐ āha vidúṣe kárāṃsi /
   prá te pū́rvāṇi káraṇāni vipra_
   prá te pū́rvāṇi káraṇāni vipra
   prá te pū́rvāṇi káraṇāni vipra

Halfverse: b    _āvidvā́m̐ āha vidúṣe kárāṃsi /
   āvidvā́n āha vidúṣe kárāṃsi /
   ā́vidvā́m̐ āha vidúṣe kárāṃsi /

Halfverse: c    yátʰā-yatʰā vŕ̥ṣṇyāni svágūrtā́pām̐si rājan náryā́viveṣīḥ //
   yátʰā-yatʰā vŕ̥ṣṇyāni svágūrtā_
   yátʰā-yatʰā vŕ̥ṣṇyāni svágūrtā
   yátʰā-yatʰā vŕ̥ṣṇiyāni svágūrtā

Halfverse: d    _ápām̐si rājan náryā́viveṣīḥ //
   ápāṃsi rājan náryā áviveṣīḥ //
   ápāṃsi rājan náriyā́viveṣīḥ //


Verse: 11 
Halfverse: a    nū́ ṣṭutá indra nū́ gr̥ṇāná íṣaṃ jaritré nadyò ná pīpeḥ /
   nū́ ṣṭutá indra nū́ gr̥ṇāná
   nú+ stutáḥ indra nú+ gr̥ṇānáḥ
   nûú ṣṭutá indara nū́ gr̥ṇāná

Halfverse: b    íṣaṃ jaritré nadyò ná pīpeḥ /
   íṣam jaritré nadyàḥ ná pīpeḥ /
   íṣaṃ jaritré nadíyo ná pīpeḥ /

Halfverse: c    ákāri te harivo bráhma návyaṃ dʰiyā́ syāma ratʰyàḥ sadāsā́ḥ //
   ákāri te harivo bráhma návyaṃ
   ákāri te harivaḥ bráhma návyam
   ákāri te harivo bráhma návyaṃ

Halfverse: d    dʰiyā́ syāma ratʰyàḥ sadāsā́ḥ //
   dʰiyā́ syāma ratʰyàḥ sadāsā́ḥ //
   dʰiyā́ siyāma ratʰíyaḥ sadāsā́ḥ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.