TITUS
Rg-Veda: Rg-Veda-Samhita
Part No. 312
Previous part

Hymn: 16_(312) 
Verse: 1 
Halfverse: a    ā́ satyó yātu magʰávām̐ r̥jīṣī́ drávantv asya háraya úpa naḥ /
   ā́ satyó yātu magʰávām̐ r̥jīṣī́
   ā́ satyáḥ yātu magʰávān r̥jīṣī́
   ā́ satyó yātu magʰávām̐ r̥jīṣī́

Halfverse: b    drávantv asya háraya úpa naḥ /
   drávantu asya hárayaḥ úpa naḥ /
   drávantu asya háraya úpa naḥ /

Halfverse: c    tásmā íd ándʰaḥ suṣumā sudákṣam ihā́bʰipitváṃ karate gr̥ṇānáḥ //
   tásmā íd ándʰaḥ suṣumā sudákṣam
   tásmai ít ándʰaḥ suṣuma+ sudákṣam
   tásmā íd ándʰaḥ suṣumā sudákṣam

Halfverse: d    ihā́bʰipitváṃ karate gr̥ṇānáḥ //
   ihá abʰipitvám karate gr̥ṇānáḥ //
   ihā́bʰipitváṃ karate gr̥ṇānáḥ //


Verse: 2 
Halfverse: a    áva sya śūrā́dʰvano nā́nte 'smín no adyá sávane mandádʰyai /
   áva sya śūrā́dʰvano nā́nte
   áva sya śūra ádʰvanaḥ ná ánte
   áva sya śūra ádʰvano ná ánte

Halfverse: b    'smín no adyá sávane mandádʰyai /
   asmín naḥ adyá sávane mandádʰyai /
   asmín no adyá sávane mandádʰyai /

Halfverse: c    śám̐sāty uktʰám uśáneva vedʰā́ś cikitúṣe asuryā̀ya mánma //
   śám̐sāty uktʰám uśáneva vedʰā́ś
   śáṃsāti uktʰám uśánā iva vedʰā́ḥ
   śáṃsāti uktʰám uśáneva vedʰā́ś

Halfverse: d    cikitúṣe asuryā̀ya mánma //
   cikitúṣe asuryā̀ya mánma //
   cikitúṣe asuríyāya mánma //


Verse: 3 
Halfverse: a    kavír ná niṇyáṃ vidátʰāni sā́dʰan vŕ̥ṣā yát sékaṃ vipipānó árcāt /
   kavír ná niṇyáṃ vidátʰāni sā́dʰan
   kavíḥ ná niṇyám vidátʰāni sā́dʰan
   kavír ná niṇyáṃ vidátʰāni sā́dʰan

Halfverse: b    vŕ̥ṣā yát sékaṃ vipipānó \!\ árcāt /
   vŕ̥ṣā yát sékam vipipānáḥ árcāt /
   vŕ̥ṣā yát sékaṃ vipipānó árcāt /

Halfverse: c    divá ittʰā́ jījanat saptá kārū́n áhnā cic cakrur vayúnā gr̥ṇántaḥ //
   divá ittʰā́ jījanat saptá kārū́n
   diváḥ ittʰā́ jījanat saptá kārū́n
   divá ittʰā́ jījanat saptá kārū́n

Halfverse: d    áhnā cic cakrur vayúnā gr̥ṇántaḥ //
   áhnā cit cakruḥ vayúnā gr̥ṇántaḥ //
   áhnā cic cakrur vayúnā gr̥ṇántaḥ //


Verse: 4 
Halfverse: a    svàr yád védi sudŕ̥śīkam arkaír máhi jyótī rurucur yád dʰa vástoḥ /
   svàr yád védi sudŕ̥śīkam arkaír
   svàr yát védi sudŕ̥śīkam arkaíḥ
   súvar yád védi sudŕ̥śīkam arkaír

Halfverse: b    máhi jyótī rurucur yád dʰa vástoḥ /
   máhi jyótiḥ rurucuḥ yát ha vástoḥ /
   máhi jyótī rurucur yád dʰa vástoḥ /

Halfverse: c    andʰā́ támām̐si dúdʰitā vicákṣe nŕ̥bʰyaś cakāra nŕ̥tamo abʰíṣṭau //
   andʰā́ támām̐si dúdʰitā vicákṣe
   andʰā́ támāṃsi dúdʰitā vicákṣe
   andʰā́ támāṃsi dúdʰitā vicákṣe

Halfverse: d    nŕ̥bʰyaś cakāra nŕ̥tamo abʰíṣṭau //
   nŕ̥bʰyaḥ cakāra nŕ̥tamaḥ abʰíṣṭau //
   nŕ̥bʰyaś cakāra nŕ̥tamo abʰíṣṭau //


Verse: 5 
Halfverse: a    vavakṣá índro ámitam r̥jīṣy ùbʰé ā́ paprau ródasī mahitvā́ /
   vavakṣá índro ámitam r̥jīṣy
   vavakṣé índraḥ ámitam r̥jīṣī́
   vavakṣá índro ámitam r̥jīṣī́

Halfverse: b    ùbʰé ā́ paprau ródasī mahitvā́ /
   ubʰé ā́ paprau ródasī mahitvā́ /
   ubʰé ā́ paprau ródasī mahitvā́ /

Halfverse: c    átaś cid asya mahimā́ ví recy abʰí yó víśvā bʰúvanā babʰū́va //
   átaś cid asya mahimā́ ví recy
   átaḥ cit asya mahimā́ ví reci
   átaś cid asya mahimā́ ví reci

Halfverse: d    abʰí yó víśvā bʰúvanā babʰū́va //
   abʰí yáḥ víśvā bʰúvanā babʰū́va //
   abʰí yó víśvā bʰúvanā babʰū́va //


Verse: 6 
Halfverse: a    víśvāni śakró náryāṇi vidvā́n apó rireca sákʰibʰir níkāmaiḥ /
   víśvāni śakró náryāṇi vidvā́n
   víśvāni śakráḥ náryāṇi vidvā́n
   víśvāni śakró náriyāṇi vidvā́n

Halfverse: b    apó rireca sákʰibʰir níkāmaiḥ /
   apáḥ rireca sákʰibʰiḥ níkāmaiḥ /
   apó rireca sákʰibʰir níkāmaiḥ /

Halfverse: c    áśmānaṃ cid yé bibʰidúr vácobʰir vrajáṃ gómantam uśíjo ví vavruḥ //
   áśmānaṃ cid yé bibʰidúr vácobʰir
   áśmānam cit yé bibʰidúḥ vácobʰiḥ
   áśmānaṃ cid yé bibʰidúr vácobʰir

Halfverse: d    vrajáṃ gómantam uśíjo ví vavruḥ //
   vrajám gómantam uśíjaḥ ví vavruḥ //
   vrajáṃ gómantam uśíjo ví vavruḥ //


Verse: 7 
Halfverse: a    apó vr̥tráṃ vavrivā́m̐sam párāhan prā́vat te vájram pr̥tʰivī́ sácetāḥ /
   apó vr̥tráṃ vavrivā́m̐sam párāhan
   apáḥ vr̥trám vavrivā́ṃsam párā ahan
   apó vr̥tráṃ vavrivā́ṃsam párāhan

Halfverse: b    prā́vat te vájram pr̥tʰivī́ sácetāḥ /
   prá āvat te vájram pr̥tʰivī́ sácetāḥ /
   prā́vat te vájram pr̥tʰivī́ sácetāḥ /

Halfverse: c    prā́rṇām̐si samudríyāṇy ainoḥ pátir bʰávañ cʰávasā śūra dʰr̥ṣṇo //
   prā́rṇām̐si samudríyāṇy ainoḥ
   prá árṇāṃsi samudríyāṇi ainoḥ
   prá ārṇāṃsi samudríyāṇi ainoḥ

Halfverse: d    pátir bʰávañ cʰávasā śūra dʰr̥ṣṇo //
   pátiḥ bʰávan śávasā śūra dʰr̥ṣṇo //
   pátir bʰávañ cʰávasā śūra dʰr̥ṣṇo //


Verse: 8 
Halfverse: a    apó yád ádrim puruhūta dárdar āvír bʰuvat sarámā pūrvyáṃ te /
   apó yád ádrim puruhūta dárdar
   apáḥ yát ádrim puruhūta dárdar
   apó yád ádrim puruhūta dárdar

Halfverse: b    āvír bʰuvat sarámā pūrvyáṃ te /
   āvíḥ bʰuvat sarámā pūrvyám te /
   āvír bʰuvat sarámā pūrviyáṃ te /

Halfverse: c    sá no netā́ vā́jam ā́ darṣi bʰū́riṃ gotrā́ rujánn áṅgirobʰir gr̥ṇānáḥ //
   sá no netā́ vā́jam ā́ darṣi bʰū́riṃ
   sá naḥ netā́ vā́jam ā́ darṣi bʰū́rim
   sá no netā́ vā́jam ā́ darṣi bʰū́riṃ

Halfverse: d    gotrā́ rujánn áṅgirobʰir gr̥ṇānáḥ //
   gotrā́ ruján áṅgirobʰiḥ gr̥ṇānáḥ //
   gotrā́ rujánn áṅgirobʰir gr̥ṇānáḥ //


Verse: 9 
Halfverse: a    ácʰā kavíṃ nr̥maṇo gā abʰíṣṭau svàrṣātā magʰavan nā́dʰamānam /
   ácʰā kavíṃ nr̥maṇo gā abʰíṣṭau
   ácʰa+ kavím nr̥maṇaḥ gāḥ abʰíṣṭau
   ácʰā kavíṃ nr̥maṇo gā abʰíṣṭau

Halfverse: b    svàrṣātā magʰavan nā́dʰamānam /
   svàrṣātā magʰavan nā́dʰamānam /
   súvarṣātā magʰavan nā́dʰamānam /

Halfverse: c    ūtíbʰis tám iṣaṇo dyumnáhūtau ní māyā́vān ábrahmā dásyur arta //
   ūtíbʰis tám iṣaṇo dyumnáhūtau
   ūtíbʰiḥ tám iṣaṇaḥ dyumnáhūtau
   ūtíbʰis tám iṣaṇo dyumnáhūtau

Halfverse: d    ní māyā́vān ábrahmā dásyur arta //
   ní māyā́vān ábrahmā dásyuḥ arta //
   ní māyā́vān ábrahmā dásyur arta //


Verse: 10 
Halfverse: a    ā́ dasyugʰnā́ mánasā yāhy ástam bʰúvat te kútsaḥ sakʰyé níkāmaḥ /
   ā́ dasyugʰnā́ mánasā yāhy ástam
   ā́ dasyugʰnā́ mánasā yāhi ástam
   ā́ dasyugʰnā́ mánasā yāhi ástam

Halfverse: b    bʰúvat te kútsaḥ sakʰyé níkāmaḥ /
   bʰúvat te kútsaḥ sakʰyé níkāmaḥ /
   bʰúvat te kútsaḥ sakʰiyé níkāmaḥ /

Halfverse: c    své yónau ní ṣadataṃ sárūpā ví vāṃ cikitsad r̥tacíd dʰa nā́rī //
   své yónau ní ṣadataṃ sárūpā
   své yónau ní sadatam sárūpā
   suvé yónau ní ṣadataṃ sárūpā

Halfverse: d    ví vāṃ cikitsad r̥tacíd dʰa nā́rī //
   ví vām cikitsat r̥tacít ha nā́rī //
   ví vāṃ cikitsad r̥tacíd dʰa nā́rī //


Verse: 11 
Halfverse: a    yā́si kútsena sarátʰam avasyús todó vā́tasya háryor ī́śānaḥ /
   yā́si kútsena sarátʰam avasyús
   yā́si kútsena sarátʰam avasyúḥ
   yā́si kútsena sarátʰam avasyús

Halfverse: b    todó vā́tasya háryor ī́śānaḥ /
   todáḥ vā́tasya háryoḥ ī́śānaḥ /
   todó vā́tasya háriyor ī́śānaḥ /

Halfverse: c    r̥jrā́ vā́jaṃ ná gádʰyaṃ yúyūṣan kavír yád áhan pā́ryāya bʰū́ṣāt //
   r̥jrā́ vā́jaṃ ná gádʰyaṃ yúyūṣan
   r̥jrā́ vā́jam ná gádʰyam yúyūṣan
   r̥jrā́ vā́jaṃ ná gádʰiyaṃ yúyūṣan

Halfverse: d    kavír yád áhan pā́ryāya bʰū́ṣāt //
   kavíḥ yát áhan pā́ryāya bʰū́ṣāt //
   kavír yád áhan pā́riyāya bʰū́ṣāt //


Verse: 12 
Halfverse: a    kútsāya śúṣṇam aśúṣaṃ ní barhīḥ prapitvé áhnaḥ kúyavaṃ sahásrā /
   kútsāya śúṣṇam aśúṣaṃ ní barhīḥ
   kútsāya śúṣṇam aśúṣam ní barhīḥ
   kútsāya śúṣṇam aśúṣaṃ ní barhīḥ

Halfverse: b    prapitvé áhnaḥ kúyavaṃ sahásrā /
   prapitvé áhnaḥ kúyavam sahásrā /
   prapitvé áhnaḥ kúyavaṃ sahásrā /

Halfverse: c    sadyó dásyūn prá mr̥ṇa kutsyéna prá sū́raś cakráṃ vr̥hatād abʰī́ke //
   sadyó dásyūn prá mr̥ṇa kutsyéna
   sadyáḥ dásyūn prá mr̥ṇa kutsyéna
   sadyó dásyūn prá mr̥ṇa kutsiyéna

Halfverse: d    prá sū́raś cakráṃ vr̥hatād abʰī́ke //
   prá sū́raḥ cakrám vr̥hatāt abʰī́ke //
   prá sū́raś cakráṃ vr̥hatād abʰī́ke //


Verse: 13 
Halfverse: a    tvám píprum mŕ̥gayaṃ śūśuvā́m̐sam r̥jíśvane vaidatʰinā́ya randʰīḥ /
   tvám píprum mŕ̥gayaṃ śūśuvā́m̐sam
   tvám píprum mŕ̥gayam śūśuvā́ṃsam
   tuvám píprum mŕ̥gayaṃ śūśuvā́ṃsam

Halfverse: b    r̥jíśvane vaidatʰinā́ya randʰīḥ /
   r̥jíśvane vaidatʰinā́ya randʰīḥ /
   r̥jíśvane vaidatʰinā́ya randʰīḥ /

Halfverse: c    pañcāśát kr̥ṣṇā́ ní vapaḥ sahásrā́tkaṃ ná púro jarimā́ ví dardaḥ //
   pañcāśát kr̥ṣṇā́ ní vapaḥ sahásrā_
   pañcāśát kr̥ṣṇā́ ní vapaḥ sahásrā
   pañcāśát kr̥ṣṇā́ ní vapaḥ sahásrā

Halfverse: d    _átkaṃ ná púro jarimā́ ví dardaḥ //
   átkam ná púraḥ jarimā́ ví dardar //
   átkaṃ ná púro jarimā́ ví dardaḥ //


Verse: 14 
Halfverse: a    sū́ra upāké tanvàṃ dádʰāno ví yát te céty amŕ̥tasya várpaḥ /
   sū́ra upāké tanvàṃ dádʰāno
   sū́raḥ upāké tanvàm dádʰānaḥ
   sū́ra upāké tanúvaṃ dádʰāno

Halfverse: b    ví yát te céty amŕ̥tasya várpaḥ /
   ví yát te céti amŕ̥tasya várpaḥ /
   ví yát te céti amŕ̥tasya várpaḥ /

Halfverse: c    mr̥gó ná hastī́ táviṣīm uṣāṇáḥ sim̐hó ná bʰīmá ā́yudʰāni bíbʰrat //
   mr̥gó ná hastī́ táviṣīm uṣāṇáḥ
   mr̥gáḥ ná hastī́ táviṣīm uṣāṇáḥ
   mr̥gó ná hastī́ táviṣīm uṣāṇáḥ

Halfverse: d    sim̐hó ná bʰīmá ā́yudʰāni bíbʰrat //
   siṃháḥ ná bʰīmáḥ ā́yudʰāni bíbʰrat //
   siṃhó ná bʰīmá ā́yudʰāni bíbʰrat //


Verse: 15 
Halfverse: a    índraṃ kā́mā vasūyánto agman svàrmīḷʰe ná sávane cakānā́ḥ /
   índraṃ kā́mā vasūyánto agman
   índram kā́māḥ vasūyántaḥ agman
   índraṃ kā́mā ? vasūyánto agman

Halfverse: b    svàrmīḷʰe ná sávane cakānā́ḥ /
   svàrmīḷʰe ná sávane cakānā́ḥ /
   súvarmīḷʰe ná sávane cakānā́ḥ /

Halfverse: c    śravasyávaḥ śaśamānā́sa uktʰaír óko ná raṇvā́ sudŕ̥śīva puṣṭíḥ //
   śravasyávaḥ śaśamānā́sa uktʰaír
   śravasyávaḥ śaśamānā́saḥ uktʰaíḥ
   śravasyávaḥ śaśamānā́sa uktʰaír

Halfverse: d    óko ná raṇvā́ sudŕ̥śīva puṣṭíḥ //
   ókaḥ ná raṇvā́ sudŕ̥śī iva puṣṭíḥ //
   óko ná raṇvā́ sudŕ̥śīva puṣṭíḥ //


Verse: 16 
Halfverse: a    tám íd va índraṃ suhávaṃ huvema yás tā́ cakā́ra náryā purū́ṇi /
   tám íd va índraṃ suhávaṃ huvema
   tám ít vaḥ índram suhávam huvema
   tám íd va índraṃ suhávaṃ huvema

Halfverse: b    yás tā́ cakā́ra náryā purū́ṇi /
   yáḥ tā́ cakā́ra náryā purū́ṇi /
   yás tā́ cakā́ra náriyā purū́ṇi /

Halfverse: c    yó mā́vate jaritré gádʰyaṃ cin makṣū́ vā́jam bʰárati spārhárādʰāḥ //
   yó mā́vate jaritré gádʰyaṃ cin
   yáḥ mā́vate jaritré gádʰyam cit
   yó mā́vate jaritré gádʰiyaṃ cin

Halfverse: d    makṣū́ vā́jam bʰárati spārhárādʰāḥ //
   makṣú+ vā́jam bʰárati spārhárādʰāḥ //
   makṣū́ vā́jam bʰárati spārhárādʰāḥ //


Verse: 17 
Halfverse: a    tigmā́ yád antár aśániḥ pátāti kásmiñ cic cʰūra muhuké jánānām /
   tigmā́ yád antár aśániḥ pátāti
   tigmā́ yát antár aśániḥ pátāti
   tigmā́ yád antár aśániḥ pátāti

Halfverse: b    kásmiñ cic cʰūra muhuké jánānām /
   kásmin cit śūra muhuké jánānām /
   kásmiñ cic cʰūra muhuké jánānām /

Halfverse: c    gʰorā́ yád arya sámr̥tir bʰávāty ádʰa smā nas tanvò bodʰi gopā́ḥ //
   gʰorā́ yád arya sámr̥tir bʰávāty
   gʰorā́ yát arya sámr̥tiḥ bʰávāti
   gʰorā́ yád arya sámr̥tir bʰávāti

Halfverse: d    ádʰa smā nas tanvò bodʰi gopā́ḥ //
   ádʰa sma+ naḥ tanvàḥ bodʰi gopā́ḥ //
   ádʰa smā nas tanúvo bodʰi gopā́ḥ //


Verse: 18 
Halfverse: a    bʰúvo 'vitā́ vāmádevasya dʰīnā́m bʰúvaḥ sákʰāvr̥kó vā́jasātau /
   bʰúvo 'vitā́ vāmádevasya dʰīnā́m
   bʰúvaḥ avitā́ vāmádevasya dʰīnā́m
   bʰúvo 'vitā́ vāmádevasya dʰīnā́m

Halfverse: b    bʰúvaḥ sákʰāvr̥kó vā́jasātau /
   bʰúvaḥ sákʰā avr̥káḥ vā́jasātau /
   bʰúvaḥ sákʰā avr̥kó vā́jasātau /

Halfverse: c    tvā́m ánu prámatim ā́ jaganmoruśáṃso jaritré viśvádʰa syāḥ //
   tvā́m ánu prámatim ā́ jaganma_
   tvā́m ánu prámatim ā́ jaganma
   tuvā́m ánu prámatim ā́ jaganma

Halfverse: d    _uruśáṃso jaritré viśvádʰa syāḥ //
   uruśáṃsaḥ jaritré viśvádʰa syāḥ //
   uruśáṃso jaritré viśvádʰa syāḥ //


Verse: 19 
Halfverse: a    ebʰír nŕ̥bʰir indra tvāyúbʰiṣ ṭvā magʰávadbʰir magʰavan víśva ājaú /
   ebʰír nŕ̥bʰir indra tvāyúbʰiṣ ṭvā
   ebʰíḥ nŕ̥bʰiḥ indra tvāyúbʰiḥ tvā
   ebʰír nŕ̥bʰir indara tvāyúbʰiṣ ṭvā

Halfverse: b    magʰávadbʰir magʰavan víśva ājaú /
   magʰávadbʰiḥ magʰavan víśve ājaú /
   magʰávadbʰir magʰavan víśva ājaú /

Halfverse: c    dyā́vo ná dyumnaír abʰí sánto aryáḥ kṣapó madema śarádaś ca pūrvī́ḥ //
   dyā́vo ná dyumnaír abʰí sánto aryáḥ
   dyā́vaḥ ná dyumnaíḥ abʰí sántaḥ aryáḥ
   dyā́vo ná dyumnaír abʰí sánto aryáḥ

Halfverse: d    kṣapó madema śarádaś ca pūrvī́ḥ //
   kṣapáḥ madema śarádaḥ ca pūrvī́ḥ //
   kṣapó madema śarádaś ca pūrvī́ḥ //


Verse: 20 
Halfverse: a    evéd índrāya vr̥ṣabʰā́ya vŕ̥ṣṇe bráhmākarma bʰŕ̥gavo ná rátʰam /
   evéd índrāya vr̥ṣabʰā́ya vŕ̥ṣṇe
   evá ít índrāya vr̥ṣabʰā́ya vŕ̥ṣṇe
   evéd índrāya vr̥ṣabʰā́ya vŕ̥ṣṇe

Halfverse: b    bráhmākarma bʰŕ̥gavo ná rátʰam /
   bráhma akarma bʰŕ̥gavaḥ ná rátʰam /
   bráhma akarma bʰŕ̥gavo ná rátʰam /

Halfverse: c    nū́ cid yátʰā naḥ sakʰyā́ viyóṣad ásan na ugrò 'vitā́ tanūpā́ḥ //
   nū́ cid yátʰā naḥ sakʰyā́ viyóṣad
   nú+ cit yátʰā naḥ sakʰyā́ viyóṣat
   nū́ cid yátʰā naḥ sakʰiyā́ viyóṣad

Halfverse: d    ásan na ugrò 'vitā́ tanūpā́ḥ //
   ásat naḥ ugráḥ avitā́ tanūpā́ḥ //
   ásan na ugró avitā́ tanūpā́ḥ //


Verse: 21 
Halfverse: a    nū́ ṣṭutá indra nū́ gr̥ṇāná íṣaṃ jaritré nadyò ná pīpeḥ /
   nū́ ṣṭutá indra nū́ gr̥ṇāná
   nú+ stutáḥ indra nú+ gr̥ṇānáḥ
   nûú ṣṭutá indara nū́ gr̥ṇāná

Halfverse: b    íṣaṃ jaritré nadyò ná pīpeḥ /
   íṣam jaritré nadyàḥ ná pīpeḥ /
   íṣaṃ jaritré nadíyo ná pīpeḥ /

Halfverse: c    ákāri te harivo bráhma návyaṃ dʰiyā́ syāma ratʰyàḥ sadāsā́ḥ //
   ákāri te harivo bráhma návyaṃ
   ákāri te harivaḥ bráhma návyam
   ákāri te harivo bráhma návyaṃ

Halfverse: d    dʰiyā́ syāma ratʰyàḥ sadāsā́ḥ //
   dʰiyā́ syāma ratʰyàḥ sadāsā́ḥ //
   dʰiyā́ siyāma ratʰíyaḥ sadāsā́ḥ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.