TITUS
Rg-Veda: Rg-Veda-Samhita
Part No. 295
Previous part

Hymn: 61_(295) 
Verse: 1 
Halfverse: a    úṣo vā́jena vājini prácetā stómaṃ juṣasva gr̥ṇató magʰoni /
   úṣo vā́jena vājini prácetā
   úṣaḥ vā́jena vājini prácetāḥ
   úṣo vā́jena vājini prácetā

Halfverse: b    stómaṃ juṣasva gr̥ṇató magʰoni /
   stómam juṣasva gr̥ṇatáḥ magʰoni /
   stómaṃ juṣasva gr̥ṇató magʰoni /

Halfverse: c    purāṇī́ devi yuvatíḥ púraṃdʰir ánu vratáṃ carasi viśvavāre //
   purāṇī́ devi yuvatíḥ púraṃdʰir
   purāṇī́ devi yuvatíḥ púraṃdʰiḥ
   purāṇī́ devi yuvatíḥ púraṃdʰir

Halfverse: d    ánu vratáṃ carasi viśvavāre //
   ánu vratám carasi viśvavāre //
   ánu vratáṃ carasi viśvavāre //


Verse: 2 
Halfverse: a    úṣo devy ámartyā ví bʰāhi candráratʰā sūnŕ̥tā īráyantī /
   úṣo devy ámartyā ví bʰāhi
   úṣaḥ devi ámartyā ví bʰāhi
   úṣo devi ámartiyā ví bʰāhi

Halfverse: b    candráratʰā sūnŕ̥tā īráyantī /
   candráratʰā sūnŕ̥tāḥ īráyantī /
   candráratʰā sūnŕ̥tā īráyantī /

Halfverse: c    ā́ tvā vahantu suyámāso áśvā híraṇyavarṇām pr̥tʰupā́jaso yé //
   ā́ tvā vahantu suyámāso áśvā
   ā́ tvā vahantu suyámāsaḥ áśvāḥ
   ā́ tvā vahantu suyámāso áśvā

Halfverse: d    híraṇyavarṇām pr̥tʰupā́jaso yé //
   híraṇyavarṇām pr̥tʰupā́jasaḥ yé //
   híraṇyavarṇām pr̥tʰupā́jaso yé //


Verse: 3 
Halfverse: a    úṣaḥ pratīcī́ bʰúvanāni víśvordʰvā́ tiṣṭʰasy amŕ̥tasya ketúḥ /
   úṣaḥ pratīcī́ bʰúvanāni víśvā_
   úṣaḥ pratīcī́ bʰúvanāni víśvā
   úṣaḥ pratīcī́ bʰúvanāni víśvā

Halfverse: b    _ūrdʰvā́ tiṣṭʰasy amŕ̥tasya ketúḥ /
   ūrdʰvā́ tiṣṭʰasi amŕ̥tasya ketúḥ /
   ūrdʰvā́ tiṣṭʰasi amŕ̥tasya ketúḥ /

Halfverse: c    samānám ártʰaṃ caraṇīyámānā cakrám iva navyasy ā́ vavr̥tsva //
   samānám ártʰaṃ caraṇīyámānā
   samānám ártʰam caraṇīyámānā
   samānám ártʰaṃ caraṇīyámānā

Halfverse: d    cakrám iva navyasy ā́ vavr̥tsva //
   cakrám iva navyasi ā́ vavr̥tsva //
   cakrám iva navyasi ā́ vavr̥tsva //


Verse: 4 
Halfverse: a    áva syū́meva cinvatī́ magʰóny uṣā́ yāti svásarasya pátnī /
   áva syū́meva cinvatī́ magʰóny
   áva syū́ma iva cinvatī́ magʰónī
   áva syū́meva cinvatī́ magʰónī

Halfverse: b    uṣā́ yāti svásarasya pátnī /
   uṣā́ḥ yāti svásarasya pátnī /
   uṣā́ yāti ? svásarasya pátnī /

Halfverse: c    svàr jánantī subʰágā sudáṃsā ā́ntād diváḥ papratʰa ā́ pr̥tʰivyā́ḥ //
   svàr jánantī subʰágā sudáṃsā
   svàr jánantī subʰágā sudáṃsāḥ
   súvar jánantī subʰágā sudáṃsā

Halfverse: d    ā́ntād diváḥ papratʰa ā́ pr̥tʰivyā́ḥ //
   ā́ ántāt diváḥ papratʰe ā́ pr̥tʰivyā́ḥ //
   ā́ntād diváḥ papratʰa ā́ pr̥tʰivyā́ḥ //


Verse: 5 
Halfverse: a    ácʰā vo devī́m uṣásaṃ vibʰātī́m prá vo bʰaradʰvaṃ námasā suvr̥ktím /
   ácʰā vo devī́m uṣásaṃ vibʰātī́m
   ácʰa+ vaḥ devī́m uṣásam vibʰātī́m
   ácʰā vo devī́m uṣásaṃ vibʰātī́m

Halfverse: b    prá vo bʰaradʰvaṃ námasā suvr̥ktím /
   prá vaḥ bʰaradʰvam námasā suvr̥ktím /
   prá vo bʰaradʰvaṃ námasā suvr̥ktím /

Halfverse: c    ūrdʰvám madʰudʰā́ diví pā́jo aśret prá rocanā́ ruruce raṇvásaṃdr̥k //
   ūrdʰvám madʰudʰā́ diví pā́jo aśret
   ūrdʰvám madʰudʰā́ diví pā́jaḥ aśret
   ūrdʰvám madʰudʰā́ diví pā́jo aśret

Halfverse: d    prá rocanā́ ruruce raṇvásaṃdr̥k //
   prá rocanā́ ruruce raṇvásaṃdr̥k //
   prá rocanā́ ruruce raṇvásaṃdr̥k //


Verse: 6 
Halfverse: a    r̥tā́varī divó arkaír abodʰy ā́ revátī ródasī citrám astʰāt /
   r̥tā́varī divó arkaír abodʰy
   r̥tā́varī diváḥ arkaíḥ abodʰi
   r̥tā́varī divó arkaír abodʰi

Halfverse: b    ā́ revátī ródasī citrám astʰāt /
   ā́ revátī ródasī citrám astʰāt /
   ā́ revátī ródasī citrám astʰāt /

Halfverse: c    āyatī́m agna uṣásaṃ vibʰātī́ṃ vāmám eṣi dráviṇam bʰíkṣamāṇaḥ //
   āyatī́m agna uṣásaṃ vibʰātī́ṃ
   āyatī́m agne uṣásam vibʰātī́m
   āyatī́m agna uṣásaṃ vibʰātī́ṃ

Halfverse: d    vāmám eṣi dráviṇam bʰíkṣamāṇaḥ //
   vāmám eṣi dráviṇam bʰíkṣamāṇaḥ //
   vāmám eṣi dráviṇam bʰíkṣamāṇaḥ //


Verse: 7 
Halfverse: a    r̥tásya budʰná uṣásām iṣaṇyán vŕ̥ṣā mahī́ ródasī ā́ viveśa /
   r̥tásya budʰná uṣásām iṣaṇyán
   r̥tásya budʰné uṣásām iṣaṇyán
   r̥tásya budʰná uṣásām iṣaṇyán

Halfverse: b    vŕ̥ṣā mahī́ ródasī ā́ viveśa /
   vŕ̥ṣā mahī́ ródasī ā́ viveśa /
   vŕ̥ṣā mahī́ ródasī ā́ viveśa /

Halfverse: c    mahī́ mitrásya váruṇasya māyā́ candréva bʰānúṃ ví dadʰe purutrā́ //
   mahī́ mitrásya váruṇasya māyā́
   mahī́ mitrásya váruṇasya māyā́
   mahī́ mitrásya váruṇasya māyā́

Halfverse: d    candréva bʰānúṃ ví dadʰe purutrā́ //
   candrā́ iva bʰānúm ví dadʰe purutrā́ //
   candréva bʰānúṃ ví dadʰe purutrā́ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.