TITUS
Rg-Veda: Rg-Veda-Samhita
Part No. 294
Previous part

Hymn: 60_(294) 
Verse: 1 
Halfverse: a    ihéha vo mánasā bandʰútā nara uśíjo jagmur abʰí tā́ni védasā /
   ihéha vo mánasā bandʰútā nara
   ihéha vaḥ mánasā bandʰútā naraḥ
   ihéha vo mánasā bandʰútā nara

Halfverse: b    uśíjo jagmur abʰí tā́ni védasā /
   uśíjaḥ jagmuḥ abʰí tā́ni védasā /
   uśíjo jagmur abʰí tā́ni védasā /

Halfverse: c    yā́bʰir māyā́bʰiḥ prátijūtivarpasaḥ saúdʰanvanā yajñíyam bʰāgám ānaśá //
   yā́bʰir māyā́bʰiḥ prátijūtivarpasaḥ
   yā́bʰiḥ māyā́bʰiḥ prátijūtivarpasaḥ
   yā́bʰir māyā́bʰiḥ prátijūtivarpasaḥ

Halfverse: d    saúdʰanvanā yajñíyam bʰāgám ānaśá //
   saúdʰanvanāḥ yajñíyam bʰāgám ānaśá //
   saúdʰanvanā yajñíyam bʰāgám ānaśá //


Verse: 2 
Halfverse: a    yā́bʰiḥ śácībʰiś camasā́m̐ ápiṃśata yáyā dʰiyā́ gā́m áriṇīta cármaṇaḥ /
   yā́bʰiḥ śácībʰiś camasā́m̐ ápiṃśata
   yā́bʰiḥ śácībʰiḥ camasā́n ápiṃśata
   yā́bʰiḥ śácībʰiś camasā́m̐ ápiṃśata

Halfverse: b    yáyā dʰiyā́ gā́m áriṇīta cármaṇaḥ /
   yáyā dʰiyā́ gā́m áriṇīta cármaṇaḥ /
   yáyā dʰiyā́ gā́m áriṇīta cármaṇaḥ /

Halfverse: c    yéna hárī mánasā nirátakṣata téna devatvám r̥bʰavaḥ sám ānaśa //
   yéna hárī mánasā nirátakṣata
   yéna hárī mánasā nirátakṣata
   yéna hárī mánasā nirátakṣata

Halfverse: d    téna devatvám r̥bʰavaḥ sám ānaśa //
   téna devatvám r̥bʰavaḥ sám ānaśa //
   téna devatvám r̥bʰavaḥ sám ānaśa //


Verse: 3 
Halfverse: a    índrasya sakʰyám r̥bʰávaḥ sám ānaśur mánor nápāto apáso dadʰanvire /
   índrasya sakʰyám r̥bʰávaḥ sám ānaśur
   índrasya sakʰyám r̥bʰávaḥ sám ānaśuḥ
   índrasya sakʰyám r̥bʰávaḥ sám ānaśur

Halfverse: b    mánor nápāto apáso dadʰanvire /
   mánoḥ nápātaḥ apásaḥ dadʰanvire /
   mánor nápāto apáso dadʰanvire /

Halfverse: c    saudʰanvanā́so amr̥tatvám érire viṣṭvī́ śámībʰiḥ sukŕ̥taḥ sukr̥tyáyā //
   saudʰanvanā́so amr̥tatvám érire
   saudʰanvanā́saḥ amr̥tatvám ā́ īrire
   saudʰanvanā́so amr̥tatvám érire

Halfverse: d    viṣṭvī́ śámībʰiḥ sukŕ̥taḥ sukr̥tyáyā //
   viṣṭvī́ śámībʰiḥ sukŕ̥taḥ sukr̥tyáyā //
   viṣṭvī́ śámībʰiḥ sukŕ̥taḥ sukr̥tyáyā //


Verse: 4 
Halfverse: a    índreṇa yātʰa sarátʰaṃ suté sácām̐ átʰo váśānām bʰavatʰā sahá śriyā́ /
   índreṇa yātʰa sarátʰaṃ suté sácām̐
   índreṇa yātʰa sarátʰam suté sácā
   índreṇa yātʰa sarátʰaṃ suté sácām̐

Halfverse: b    átʰo váśānām bʰavatʰā sahá śriyā́ /
   átʰa u váśānām bʰavatʰa+ sahá śriyā́ /
   átʰo váśānām bʰavatʰā sahá śriyā́ /

Halfverse: c    ná vaḥ pratimaí sukr̥tā́ni vāgʰataḥ saúdʰanvanā r̥bʰavo vīryā̀ṇi ca //
   ná vaḥ pratimaí sukr̥tā́ni vāgʰataḥ
   ná vaḥ pratimaí sukr̥tā́ni vāgʰataḥ
   ná vaḥ pratimaí sukr̥tā́ni vāgʰataḥ

Halfverse: d    saúdʰanvanā r̥bʰavo vīryā̀ṇi ca //
   saúdʰanvanāḥ r̥bʰavaḥ vīryā̀ṇi ca //
   saúdʰanvanā r̥bʰavo vīríyāṇi ca //


Verse: 5 
Halfverse: a    índra r̥bʰúbʰir vā́javadbʰiḥ sámukṣitaṃ sutáṃ sómam ā́ vr̥ṣasvā gábʰastyoḥ /
   índra r̥bʰúbʰir vā́javadbʰiḥ sámukṣitaṃ
   índra r̥bʰúbʰiḥ vā́javadbʰiḥ sámukṣitam
   índra rbʰúbʰir vā́javadbʰiḥ sámukṣitaṃ

Halfverse: b    sutáṃ sómam ā́ vr̥ṣasvā gábʰastyoḥ /
   sutám sómam ā́ vr̥ṣasva+ gábʰastyoḥ /
   sutáṃ sómam ā́ vr̥ṣasvā gábʰastiyoḥ /

Halfverse: c    dʰiyéṣitó magʰavan dāśúṣo gr̥hé saudʰanvanébʰiḥ sahá matsvā nŕ̥bʰiḥ //
   dʰiyéṣitó magʰavan dāśúṣo gr̥hé
   dʰiyā́ iṣitáḥ magʰavan dāśúṣaḥ gr̥hé
   dʰiyéṣitó magʰavan dāśúṣo gr̥hé

Halfverse: d    saudʰanvanébʰiḥ sahá matsvā //
   saudʰanvanébʰiḥ sahá matsva+ nŕ̥bʰiḥ //
   saudʰanvanébʰiḥ sahá matsuvā nŕ̥bʰiḥ //


Verse: 6 
Halfverse: a    índra r̥bʰumā́n vā́javān matsvehá no 'smín sávane śácyā puruṣṭuta /
   índra r̥bʰumā́n vā́javān matsvehá no
   índra r̥bʰumā́n vā́javān matsva ihá naḥ
   índra rbʰumā́n vā́javān matsuvehá no

Halfverse: b    'smín sávane śácyā puruṣṭuta /
   asmín sávane śácyā puruṣṭuta /
   asmín sávane śáciyā puruṣṭuta /

Halfverse: c    imā́ni túbʰyaṃ svásarāṇi yemire vratā́ devā́nām mánuṣaś ca dʰármabʰiḥ //
   imā́ni túbʰyaṃ svásarāṇi yemire
   imā́ni túbʰyam svásarāṇi yemire
   imā́ni túbʰyaṃ svásarāṇi yemire

Halfverse: d    vratā́ devā́nām mánuṣaś ca dʰármabʰiḥ //
   vratā́ devā́nām mánuṣaḥ ca dʰármabʰiḥ //
   vratā́ devā́nām mánuṣaś ca dʰármabʰiḥ //


Verse: 7 
Halfverse: a    índra r̥bʰúbʰir vājíbʰir vājáyann ihá stómaṃ jaritúr úpa yāhi yajñíyam /
   índra r̥bʰúbʰir vājíbʰir vājáyann ihá
   índra r̥bʰúbʰiḥ vājíbʰiḥ vājáyan ihá
   índra rbʰúbʰir vājíbʰir vājáyann ihá

Halfverse: b    stómaṃ jaritúr úpa yāhi yajñíyam /
   stómam jaritúḥ úpa yāhi yajñíyam /
   stómaṃ jaritúr úpa yāhi yajñíyam /

Halfverse: c    śatáṃ kétebʰir iṣirébʰir āyáve sahásraṇītʰo adʰvarásya hómani //
   śatáṃ kétebʰir iṣirébʰir āyáve
   śatám kétebʰiḥ iṣirébʰiḥ āyáve
   śatáṃ kétebʰir iṣirébʰir āyáve

Halfverse: d    sahásraṇītʰo adʰvarásya hómani //
   sahásraṇītʰaḥ adʰvarásya hómani //
   sahásraṇītʰo adʰvarásya hómani //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.