TITUS
Rg-Veda: Rg-Veda-Samhita
Part No. 288
Previous part

Hymn: 54_(288) 
Verse: 1 
Halfverse: a    imám mahé vidatʰyā̀ya śūṣáṃ śáśvat kŕ̥tva ī́ḍyāya prá jabʰruḥ /
   imám mahé vidatʰyā̀ya śūṣáṃ
   imám mahé vidatʰyā̀ya śūṣám
   imám mahé vidatʰíyāya śūṣáṃ

Halfverse: b    śáśvat kŕ̥tva ī́ḍyāya prá jabʰruḥ /
   śáśvat kŕ̥tvaḥ ī́ḍyāya prá jabʰruḥ /
   śáśvat kŕ̥tva ī́ḍiyāya prá jabʰruḥ /

Halfverse: c    śr̥ṇótu no dámyebʰir ánīkaiḥ śr̥ṇótv agnír divyaír ájasraḥ //
   śr̥ṇótu no dámyebʰir ánīkaiḥ
   śr̥ṇótu naḥ dámyebʰiḥ ánīkaiḥ
   śr̥ṇótu no dámiyebʰir ánīkaiḥ

Halfverse: d    śr̥ṇótv agnír divyaír ájasraḥ //
   śr̥ṇótu agníḥ divyaíḥ ájasraḥ //
   śr̥ṇótu agnír diviyaír ájasraḥ //


Verse: 2 
Halfverse: a    máhi mahé divé arcā pr̥tʰivyaí kā́mo ma icʰáñ carati prajānán /
   máhi mahé divé arcā pr̥tʰivyaí
   máhi mahé divé arca+ pr̥tʰivyaí
   máhi mahé divé arcā pr̥tʰivyaí

Halfverse: b    kā́mo ma icʰáñ carati prajānán /
   kā́maḥ me icʰán carati prajānán /
   kā́mo ma icʰáñ carati prajānán /

Halfverse: c    yáyor ha stóme vidátʰeṣu devā́ḥ saparyávo mādáyante sácāyóḥ //
   yáyor ha stóme vidátʰeṣu devā́ḥ
   yáyoḥ ha stóme vidátʰeṣu devā́ḥ
   yáyor ha stóme vidátʰeṣu devā́ḥ

Halfverse: d    saparyávo mādáyante sácāyóḥ //
   saparyávaḥ mādáyante sácā ayóḥ ! //
   saparyávo mādáyante sácāyóḥ //


Verse: 3 
Halfverse: a    yuvór r̥táṃ rodasī satyám astu mahé ṣú ṇaḥ suvitā́ya prá bʰūtam /
   yuvór r̥táṃ rodasī satyám astu
   yuvóḥ r̥tám rodasī satyám astu
   yuvór r̥táṃ rodasī satyám astu

Halfverse: b    mahé ṣú ṇaḥ suvitā́ya prá bʰūtam /
   mahé sú naḥ suvitā́ya prá bʰūtam /
   mahé ṣú ṇaḥ suvitā́ya prá bʰūtam /

Halfverse: c    idáṃ divé námo agne pr̥tʰivyaí saparyā́mi práyasā yā́mi rátnam //
   idáṃ divé námo agne pr̥tʰivyaí
   idám divé námaḥ agne pr̥tʰivyaí
   idáṃ divé námo agne pr̥tʰivyaí

Halfverse: d    saparyā́mi práyasā yā́mi rátnam //
   saparyā́mi práyasā yā́mi rátnam //
   saparyā́mi práyasā yā́mi rátnam //


Verse: 4 
Halfverse: a    utó hí vām pūrvyā́ āvividrá ŕ̥tāvarī rodasī satyavā́caḥ /
   utó hí vām pūrvyā́ āvividrá
   utá u hí vām pūrvyā́ḥ āvividré
   utó hí vām pūrviyā́ āvividrá

Halfverse: b    ŕ̥tāvarī rodasī satyavā́caḥ /
   ŕ̥tāvarī rodasī satyavā́caḥ /
   ŕ̥tāvarī rodasī satyavā́caḥ /

Halfverse: c    náraś cid vāṃ samitʰé śū́rasātau vavandiré pr̥tʰivi vévidānāḥ //
   náraś cid vāṃ samitʰé śū́rasātau
   náraḥ cit vām samitʰé śū́rasātau
   náraś cid vāṃ samitʰé śū́rasātau

Halfverse: d    vavandiré pr̥tʰivi vévidānāḥ //
   vavandiré pr̥tʰivi vévidānāḥ //
   vavandiré pr̥tʰivi vévidānāḥ //


Verse: 5 
Halfverse: a    kó addʰā́ veda ká ihá prá vocad devā́m̐ ácʰā patʰyā̀ kā́ sám eti /
   kó addʰā́ veda ká ihá prá vocad
   káḥ addʰā́ veda káḥ ihá prá vocat
   kó addʰā́ veda ká ihá prá vocad

Halfverse: b    devā́m̐ ácʰā patʰyā̀ kā́ sám eti /
   devā́n ácʰa+ patʰyā̀ kā́ sám eti /
   devā́m̐ ácʰā patʰíyā kā́ sám eti /

Halfverse: c    dádr̥śra eṣām avamā́ sádāṃsi páreṣu yā́ gúhyeṣu vratéṣu //
   dádr̥śra eṣām avamā́ sádāṃsi
   dádr̥śre eṣām avamā́ sádāṃsi
   dádr̥śra eṣām avamā́ sádāṃsi

Halfverse: d    páreṣu yā́ gúhyeṣu vratéṣu //
   páreṣu yā́ gúhyeṣu vratéṣu //
   páreṣu yā́ gúhiyeṣu vratéṣu //


Verse: 6 
Halfverse: a    kavír nr̥cákṣā abʰí ṣīm acaṣṭa r̥tásya yónā vígʰr̥te mádantī /
   kavír nr̥cákṣā abʰí ṣīm acaṣṭa
   kavíḥ nr̥cákṣāḥ abʰí sīm acaṣṭa
   kavír nr̥cákṣā abʰí ṣīm acaṣṭa

Halfverse: b    r̥tásya yónā vígʰr̥te mádantī /
   r̥tásya yónā vígʰr̥te mádantī /
   r̥tásya yónā vígʰr̥te mádantī /

Halfverse: c    nā́nā cakrāte sádanaṃ yátʰā véḥ samānéna krátunā saṃvidāné //
   nā́nā cakrāte sádanaṃ yátʰā véḥ
   nā́nā cakrāte sádanam yátʰā véḥ
   nā́nā cakrāte sádanaṃ yátʰā véḥ

Halfverse: d    samānéna krátunā saṃvidāné //
   samānéna krátunā saṃvidāné //
   samānéna krátunā saṃvidāné //


Verse: 7 
Halfverse: a    samānyā́ víyute dūréante dʰruvé padé tastʰatur jāgarū́ke /
   samānyā́ víyute dūréante
   samānyā́ víyute dūréante
   samāniyā́ víyute dūréante

Halfverse: b    dʰruvé padé tastʰatur jāgarū́ke /
   dʰruvé padé tastʰatuḥ jāgarū́ke /
   dʰruvé padé tastʰatur jāgarū́ke /

Halfverse: c    utá svásārā yuvatī́ bʰávantī ā́d u bruvāte mitʰunā́ni nā́ma //
   utá svásārā yuvatī́ bʰávantī
   utá svásārā yuvatī́ bʰávantī
   utá svásārā yuvatī́ bʰávantī

Halfverse: d    ā́d u bruvāte mitʰunā́ni nā́ma //
   ā́t u bruvāte mitʰunā́ni nā́ma //
   ā́d u bruvāte mitʰunā́ni nā́ma //


Verse: 8 
Halfverse: a    víśvéd eté jánimā sáṃ vivikto mahó devā́n bíbʰratī ná vyatʰete /
   víśvéd eté jánimā sáṃ vivikto
   víśvā ít eté jánima+ sám viviktaḥ
   víśvéd eté jánimā sáṃ vivikto

Halfverse: b    mahó devā́n bíbʰratī ná vyatʰete /
   maháḥ devā́n bíbʰratī ná vyatʰete /
   mahó devā́n bíbʰratī ná vyatʰete /

Halfverse: c    éjad dʰruvám patyate víśvam ékaṃ cárat patatrí víṣuṇaṃ ví jātám //
   éjad dʰruvám patyate víśvam ékaṃ
   éjat dʰruvám patyate víśvam ékam
   éjad dʰruvám patyate víśvam ékaṃ

Halfverse: d    cárat patatrí víṣuṇaṃ ví jātám //
   cárat patatrí víṣuṇam ví jātám //
   cárat patatrí víṣuṇaṃ ví jātám //


Verse: 9 
Halfverse: a    sánā purāṇám ádʰy emy ārā́n maháḥ pitúr janitúr jāmí tán naḥ /
   sánā purāṇám ádʰy emy ārā́n
   sánā purāṇám ádʰi emi ārā́t
   sánā purāṇám ádʰi emi ārā́n

Halfverse: b    maháḥ pitúr janitúr jāmí tán naḥ /
   maháḥ pitúḥ janitúḥ jāmí tát naḥ /
   maháḥ pitúr janitúr jāmí tán naḥ /

Halfverse: c    devā́so yátra panitā́ra évair uraú patʰí vyùte tastʰúr antáḥ //
   devā́so yátra panitā́ra évair
   devā́saḥ yátra panitā́raḥ évaiḥ
   devā́so yátra panitā́ra évair

Halfverse: d    uraú patʰí vyùte tastʰúr antáḥ //
   uraú patʰí vyùte tastʰúḥ antár //
   uraú patʰí víute tastʰúr antáḥ //


Verse: 10 
Halfverse: a    imáṃ stómaṃ rodasī prá bravīmy r̥dūdárāḥ śr̥ṇavann agnijihvā́ḥ /
   imáṃ stómaṃ rodasī prá bravīmy
   imám stómam rodasī prá bravīmi
   imáṃ stómaṃ rodasī prá bravīmi

Halfverse: b    r̥dūdárāḥ śr̥ṇavann agnijihvā́ḥ /
   r̥dūdárāḥ śr̥ṇavan agnijihvā́ḥ /
   r̥dūdárāḥ śr̥ṇavann agnijihvā́ḥ /

Halfverse: c    mitráḥ samrā́jo váruṇo yúvāna ādityā́saḥ kaváyaḥ papratʰānā́ḥ //
   mitráḥ samrā́jo váruṇo yúvāna
   mitráḥ samrā́jaḥ váruṇaḥ yúvānaḥ
   mitráḥ samrā́jo váruṇo yúvāna

Halfverse: d    ādityā́saḥ kaváyaḥ papratʰānā́ḥ //
   ādityā́saḥ kaváyaḥ papratʰānā́ḥ //
   ādityā́saḥ kaváyaḥ papratʰānā́ḥ //


Verse: 11 
Halfverse: a    híraṇyapāṇiḥ savitā́ sujihvás trír ā́ divó vidátʰe pátyamānaḥ /
   híraṇyapāṇiḥ savitā́ sujihvás
   híraṇyapāṇiḥ savitā́ sujihváḥ
   híraṇyapāṇiḥ savitā́ sujihvás

Halfverse: b    trír ā́ divó vidátʰe pátyamānaḥ /
   tríḥ ā́ diváḥ vidátʰe pátyamānaḥ /
   trír ā́ divó vidátʰe pátyamānaḥ /

Halfverse: c    devéṣu ca savitaḥ ślókam áśrer ā́d asmábʰyam ā́ suva sarvátātim //
   devéṣu ca savitaḥ ślókam áśrer
   devéṣu ca savitar ślókam áśreḥ
   devéṣu ca savitaḥ ślókam áśrer

Halfverse: d    ā́d asmábʰyam ā́ suva sarvátātim //
   ā́t asmábʰyam ā́ suva sarvátātim //
   ā́d asmábʰyam ā́ suva sarvátātim //


Verse: 12 
Halfverse: a    sukŕ̥t supāṇíḥ svávām̐ r̥tā́vā devás tváṣṭā́vase tā́ni no dʰāt /
   sukŕ̥t supāṇíḥ svávām̐ r̥tā́vā
   sukŕ̥t supāṇíḥ svávān r̥tā́vā
   sukŕ̥t supāṇíḥ suávām̐ r̥tā́vā

Halfverse: b    devás tváṣṭā́vase tā́ni no dʰāt /
   deváḥ tváṣṭā ávase tā́ni naḥ dʰāt /
   devás tváṣṭā ávase tā́ni no dʰāt /

Halfverse: c    pūṣaṇvánta r̥bʰavo mādayadʰvam ūrdʰvágrāvāṇo adʰvarám ataṣṭa //
   pūṣaṇvánta r̥bʰavo mādayadʰvam
   pūṣaṇvántaḥ r̥bʰavaḥ mādayadʰvam
   pūṣaṇvánta r̥bʰavo mādayadʰvam

Halfverse: d    ūrdʰvágrāvāṇo adʰvarám ataṣṭa //
   ūrdʰvágrāvāṇaḥ adʰvarám ataṣṭa //
   ūrdʰvágrāvāṇo adʰvarám ataṣṭa //


Verse: 13 
Halfverse: a    vidyúdratʰā marúta r̥ṣṭimánto divó máryā r̥tájātā ayā́saḥ /
   vidyúdratʰā marúta r̥ṣṭimánto
   vidyúdratʰāḥ marútaḥ r̥ṣṭimántaḥ
   vidyúdratʰā marúta r̥ṣṭimánto

Halfverse: b    divó máryā r̥tájātā ayā́saḥ /
   diváḥ máryāḥ r̥tájātāḥ ayā́saḥ /
   divó máryā r̥tájātā ayā́saḥ /

Halfverse: c    sárasvatī śr̥ṇavan yajñíyāso dʰā́tā rayíṃ sahávīraṃ turāsaḥ //
   sárasvatī śr̥ṇavan yajñíyāso
   sárasvatī śr̥ṇavan yajñíyāsaḥ
   sárasvatī śr̥ṇavan yajñíyāso

Halfverse: d    dʰā́tā rayíṃ sahávīraṃ turāsaḥ //
   dʰā́ta+ rayím sahávīram turāsaḥ //
   dʰā́tā rayíṃ sahávīraṃ turāsaḥ //


Verse: 14 
Halfverse: a    víṣṇuṃ stómāsaḥ purudasmám arkā́ bʰágasyeva kāríṇo yā́mani gman /
   víṣṇuṃ stómāsaḥ purudasmám arkā́
   víṣṇum stómāsaḥ purudasmám arkā́ḥ
   víṣṇuṃ stómāsaḥ purudasmám arkā́

Halfverse: b    bʰágasyeva kāríṇo yā́mani gman /
   bʰágasya iva kāríṇaḥ yā́mani gman /
   bʰágasyeva kāríṇo yā́mani gman /

Halfverse: c    urukramáḥ kakuhó yásya pūrvī́r ná mardʰanti yuvatáyo jánitrīḥ //
   urukramáḥ kakuhó yásya pūrvī́r
   urukramáḥ kakuháḥ yásya pūrvī́ḥ
   urukramáḥ kakuhó yásya pūrvī́r

Halfverse: d    ná mardʰanti yuvatáyo jánitrīḥ //
   ná mardʰanti yuvatáyaḥ jánitrīḥ //
   ná mardʰanti yuvatáyo jánitrīḥ //


Verse: 15 
Halfverse: a    índro víśvair vīryaìḥ pátyamāna ubʰé ā́ paprau ródasī mahitvā́ /
   índro víśvair vīryaìḥ pátyamāna
   índraḥ víśvaiḥ vīryaìḥ pátyamānaḥ
   índro víśvair vīríyaiḥ pátyamāna

Halfverse: b    ubʰé ā́ paprau ródasī mahitvā́ /
   ubʰé ā́ paprau ródasī mahitvā́ /
   ubʰé ā́ paprau ródasī mahitvā́ /

Halfverse: c    puraṃdaró vr̥trahā́ dʰr̥ṣṇúṣeṇaḥ saṃgŕ̥bʰyā na ā́ bʰarā bʰū́ri paśváḥ //
   puraṃdaró vr̥trahā́ dʰr̥ṣṇúṣeṇaḥ
   puraṃdaráḥ vr̥trahā́ dʰr̥ṣṇúṣeṇaḥ
   puraṃdaró vr̥trahā́ dʰr̥ṣṇúṣeṇaḥ

Halfverse: d    saṃgŕ̥bʰyā na ā́ bʰarā bʰū́ri paśváḥ //
   saṃgŕ̥bʰya+ naḥ ā́ bʰara+ bʰū́ri paśváḥ //
   saṃgŕ̥bʰyā na ā́ bʰarā bʰū́ri paśváḥ //


Verse: 16 
Halfverse: a    nā́satyā me pitárā bandʰupŕ̥cʰā sajātyàm aśvínoś cā́ru nā́ma /
   nā́satyā me pitárā bandʰupŕ̥cʰā
   nā́satyā me pitárā bandʰupŕ̥cʰā
   nā́satyā me pitárā bandʰupŕ̥cʰā

Halfverse: b    sajātyàm aśvínoś cā́ru nā́ma /
   sajātyàm aśvínoḥ cā́ru nā́ma /
   sajātíyam aśvínoś cā́ru nā́ma /

Halfverse: c    yuváṃ hí stʰó rayidaú no rayīṇā́ṃ dātráṃ rakṣetʰe ákavair ádabdʰā //
   yuváṃ hí stʰó rayidaú no rayīṇā́ṃ
   yuvám hí stʰáḥ rayidaú naḥ rayīṇā́m
   yuváṃ hí stʰó rayidaú no rayīṇā́ṃ

Halfverse: d    dātráṃ rakṣetʰe ákavair ádabdʰā //
   dātrám rakṣetʰe ákavaiḥ ádabdʰā //
   dātráṃ rakṣetʰe ákavair ádabdʰā //


Verse: 17 
Halfverse: a    mahát tád vaḥ kavayaś cā́ru nā́ma yád dʰa devā bʰávatʰa víśva índre /
   mahát tád vaḥ kavayaś cā́ru nā́ma
   mahát tát vaḥ kavayaḥ cā́ru nā́ma
   mahát tád vaḥ kavayaś cā́ru nā́ma

Halfverse: b    yád dʰa devā bʰávatʰa víśva índre /
   yát ha devāḥ bʰávatʰa víśve índre /
   yád dʰa devā bʰávatʰa víśva índre /

Halfverse: c    sákʰa r̥bʰúbʰiḥ puruhūta priyébʰir imā́ṃ dʰíyaṃ sātáye takṣatā naḥ //
   sákʰa r̥bʰúbʰiḥ puruhūta priyébʰir
   sákʰā r̥bʰúbʰiḥ puruhūta priyébʰiḥ
   sákʰa rbʰúbʰiḥ puruhūta priyébʰir

Halfverse: d    imā́ṃ dʰíyaṃ sātáye takṣatā naḥ //
   imā́m dʰíyam sātáye takṣata+ naḥ //
   imā́ṃ dʰíyaṃ sātáye takṣatā naḥ //


Verse: 18 
Halfverse: a    aryamā́ ṇo áditir yajñíyāsó 'dabdʰāni váruṇasya vratā́ni /
   aryamā́ ṇo áditir yajñíyāsó
   aryamā́ naḥ áditiḥ yajñíyāsaḥ
   aryamā́ ṇo áditir yajñíyāso

Halfverse: b    'dabdʰāni váruṇasya vratā́ni /
   ádabdʰāni váruṇasya vratā́ni /
   ádabdʰāni váruṇasya vratā́ni /

Halfverse: c    yuyóta no anapatyā́ni gántoḥ prajā́vān naḥ paśumā́m̐ astu gātúḥ //
   yuyóta no anapatyā́ni gántoḥ
   yuyóta naḥ anapatyā́ni gántoḥ
   yuyóta no anapatyā́ni gántoḥ

Halfverse: d    prajā́vān naḥ paśumā́m̐ astu gātúḥ //
   prajā́vān naḥ paśumā́n astu gātúḥ //
   prajā́vān naḥ paśumā́m̐ astu gātúḥ //


Verse: 19 
Halfverse: a    devā́nāṃ dūtáḥ purudʰá prásūtó 'nāgān no vocatu sarvátātā /
   devā́nāṃ dūtáḥ purudʰá prásūtó
   devā́nām dūtáḥ purudʰá prásūtaḥ
   devā́nāṃ dūtáḥ purudʰá prásūto

Halfverse: b    'nāgān no vocatu sarvátātā /
   ánāgān naḥ vocatu sarvátātā /
   ánāgān no vocatu sarvátātā /

Halfverse: c    śr̥ṇótu naḥ pr̥tʰivī́ dyaúr utā́paḥ sū́ryo nákṣatrair urv àntárikṣam //
   śr̥ṇótu naḥ pr̥tʰivī́ dyaúr utā́paḥ
   śr̥ṇótu naḥ pr̥tʰivī́ dyaúḥ utá ā́paḥ
   śr̥ṇótu naḥ pr̥tʰivī́ dyaúr utā́paḥ

Halfverse: d    sū́ryo nákṣatrair urv àntárikṣam //
   sū́ryaḥ nákṣatraiḥ urú antárikṣam //
   sū́ryo nákṣatrair urú antárikṣam //


Verse: 20 
Halfverse: a    śr̥ṇvántu no vŕ̥ṣaṇaḥ párvatāso dʰruvákṣemāsa íḷayā mádantaḥ /
   śr̥ṇvántu no vŕ̥ṣaṇaḥ párvatāso
   śr̥ṇvántu naḥ vŕ̥ṣaṇaḥ párvatāsaḥ
   śr̥ṇvántu no vŕ̥ṣaṇaḥ párvatāso

Halfverse: b    dʰruvákṣemāsa íḷayā mádantaḥ /
   dʰruvákṣemāsaḥ íḷayā mádantaḥ /
   dʰruvákṣemāsa íḷayā mádantaḥ /

Halfverse: c    ādityaír no áditiḥ śr̥ṇotu yácʰantu no marútaḥ śárma bʰadrám //
   ādityaír no áditiḥ śr̥ṇotu
   ādityaíḥ naḥ áditiḥ śr̥ṇotu
   āditiyaír no áditiḥ śr̥ṇotu

Halfverse: d    yácʰantu no marútaḥ śárma bʰadrám //
   yácʰantu naḥ marútaḥ śárma bʰadrám //
   yácʰantu no marútaḥ śárma bʰadrám //


Verse: 21 
Halfverse: a    sádā sugáḥ pitumā́m̐ astu pántʰā mádʰvā devā óṣadʰīḥ sám pipr̥kta /
   sádā sugáḥ pitumā́m̐ astu pántʰā
   sádā sugáḥ pitumā́n astu pántʰāḥ
   sádā sugáḥ pitumā́m̐ astu pántʰā

Halfverse: b    mádʰvā devā óṣadʰīḥ sám pipr̥kta /
   mádʰvā devāḥ óṣadʰīḥ sám pipr̥kta /
   mádʰvā devā óṣadʰīḥ sám pipr̥kta /

Halfverse: c    bʰágo me agne sakʰyé ná mr̥dʰyā úd rāyó aśyāṃ sádanam purukṣóḥ //
   bʰágo me agne sakʰyé ná mr̥dʰyā
   bʰágaḥ me agne sakʰyé ná mr̥dʰyāḥ
   bʰágo me agne sakʰiyé ná mr̥dʰyā

Halfverse: d    úd rāyó aśyāṃ sádanam purukṣóḥ //
   út rāyáḥ aśyām sádanam purukṣóḥ //
   úd rāyó aśyāṃ sádanam purukṣóḥ //


Verse: 22 
Halfverse: a    svádasva havyā́ sám íṣo didīhy asmadryàk sám mimīhi śrávāṃsi /
   svádasva havyā́ sám íṣo didīhy
   svádasva havyā́ sám íṣaḥ didīhi
   svádasva havyā́ sám íṣo didīhi

Halfverse: b    asmadryàk sám mimīhi śrávāṃsi /
   asmadryàk sám mimīhi śrávāṃsi /
   asmadríak sám mimīhi śrávāṃsi /

Halfverse: c    víśvām̐ agne pr̥tsú tā́ñ jeṣi śátrūn áhā víśvā sumánā dīdihī naḥ //
   víśvām̐ agne pr̥tsú tā́ñ jeṣi śátrūn
   víśvān agne pr̥tsú tā́n jeṣi śátrūn
   víśvām̐ agne pr̥tsú tā́ñ jeṣi śátrūn

Halfverse: d    áhā víśvā sumánā dīdihī naḥ //
   áhā víśvā sumánāḥ dīdihi+ naḥ //
   áhā víśvā sumánā dīdihī naḥ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.