TITUS
Rg-Veda: Rg-Veda-Samhita
Part No. 278
Previous part

Hymn: 44_(278) 
Verse: 1 
Halfverse: a    ayáṃ te astu haryatáḥ sóma ā́ háribʰiḥ sutáḥ /
   ayáṃ te astu haryatáḥ
   ayám te astu haryatáḥ
   ayáṃ te astu haryatáḥ

Halfverse: b    sóma ā́ háribʰiḥ sutáḥ /
   sómaḥ ā́ háribʰiḥ sutáḥ /
   sóma ā́ háribʰiḥ sutáḥ /

Halfverse: c    juṣāṇá indra háribʰir na ā́ gahy ā́ tiṣṭʰa háritaṃ rátʰam //
   juṣāṇá indra háribʰir na ā́ gahy
   juṣāṇáḥ indra háribʰiḥ naḥ ā́ gahi
   juṣāṇá indra háribʰir na ā́ gahi

Halfverse: d    ā́ tiṣṭʰa háritaṃ rátʰam //
   ā́ tiṣṭʰa háritam rátʰam //
   ā́ tiṣṭʰa háritaṃ rátʰam //


Verse: 2 
Halfverse: a    haryánn uṣásam arcayaḥ sū́ryaṃ haryánn arocayaḥ /
   haryánn uṣásam arcayaḥ
   haryán uṣásam arcayaḥ
   haryánn uṣásam arcayaḥ

Halfverse: b    sū́ryaṃ haryánn arocayaḥ /
   sū́ryam haryán arocayaḥ /
   sū́ryaṃ haryánn arocayaḥ /

Halfverse: c    vidvā́m̐ś cikitvā́n haryaśva vardʰasa índra víśvā abʰí śríyaḥ //
   vidvā́m̐ś cikitvā́n haryaśva vardʰasa
   vidvā́n cikitvā́n haryaśva vardʰase
   vidvā́ṃś cikitvā́n háriaśva vardʰasa

Halfverse: d    índra víśvā abʰí śríyaḥ //
   índra víśvāḥ abʰí śríyaḥ //
   índra víśvā abʰí śríyaḥ //


Verse: 3 
Halfverse: a    dyā́m índro háridʰāyasam pr̥tʰivī́ṃ hárivarpasam /
   dyā́m índro háridʰāyasam
   dyā́m índraḥ háridʰāyasam
   dyā́m índro háridʰāyasam

Halfverse: b    pr̥tʰivī́ṃ hárivarpasam /
   pr̥tʰivī́m hárivarpasam /
   pr̥tʰivī́ṃ hárivarpasam /

Halfverse: c    ádʰārayad dʰarítor bʰū́ri bʰójanaṃ yáyor antár háriś cárat //
   ádʰārayad dʰarítor bʰū́ri bʰójanaṃ
   ádʰārayat harítoḥ bʰū́ri bʰójanam
   ádʰārayad dʰarítor bʰū́ri bʰójanaṃ

Halfverse: d    yáyor antár háriś cárat //
   yáyoḥ antár háriḥ cárat //
   yáyor antár háriś cárat //


Verse: 4 
Halfverse: a    jajñānó hárito vŕ̥ṣā víśvam ā́ bʰāti rocanám /
   jajñānó hárito vŕ̥ṣā
   jajñānáḥ háritaḥ vŕ̥ṣā
   jajñānó hárito vŕ̥ṣā

Halfverse: b    víśvam ā́ bʰāti rocanám /
   víśvam ā́ bʰāti rocanám /
   víśvam ā́ bʰāti rocanám /

Halfverse: c    háryaśvo háritaṃ dʰatta ā́yudʰam ā́ vájram bāhvór hárim //
   háryaśvo háritaṃ dʰatta ā́yudʰam
   háryaśvaḥ háritam dʰatte ā́yudʰam
   háriaśvo háritaṃ dʰatta ā́yudʰam

Halfverse: d    ā́ vájram bāhvór hárim //
   ā́ vájram bāhvóḥ hárim //
   ā́ vájram bāhuvór hárim //


Verse: 5 
Halfverse: a    índro haryántam árjunaṃ vájraṃ śukraír abʰī́vr̥tam /
   índro haryántam árjunaṃ
   índraḥ haryántam árjunam
   índro haryántam árjunaṃ

Halfverse: b    vájraṃ śukraír abʰī́vr̥tam /
   vájram śukraíḥ abʰī́vr̥tam /
   vájraṃ śukraír abʰī́vr̥tam /

Halfverse: c    ápāvr̥ṇod dʰáribʰir ádribʰiḥ sutám úd gā́ háribʰir ājata //
   ápāvr̥ṇod dʰáribʰir ádribʰiḥ sutám
   ápa avr̥ṇot háribʰiḥ ádribʰiḥ sutám
   ápāvr̥ṇod dʰáribʰir ádribʰiḥ sutám

Halfverse: d    úd gā́ háribʰir ājata //
   út gā́ḥ háribʰiḥ ājata //
   úd gā́ háribʰir ājata //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.