TITUS
Rg-Veda: Rg-Veda-Samhita
Part No. 277
Previous part

Hymn: 43_(277) 
Verse: 1 
Halfverse: a    ā́ yāhy arvā́ṅ úpa vandʰureṣṭʰā́s távéd ánu pradívaḥ somapéyam /
   ā́ yāhy arvā́ṅ úpa vandʰureṣṭʰā́s
   ā́ yāhi arvā́ṅ úpa vandʰureṣṭʰā́ḥ
   ā́ yāhi arvā́ṅ úpa vandʰureṣṭʰā́s

Halfverse: b    távéd ánu pradívaḥ somapéyam /
   táva ít ánu pradívaḥ somapéyam /
   távéd ánu pradívaḥ somapéyam /

Halfverse: c    priyā́ sákʰāyā ví mucópa barhís tvā́m imé havyavā́ho havante //
   priyā́ sákʰāyā ví mucópa barhís
   priyā́ sákʰāyā ví muca úpa barhíḥ
   priyā́ sákʰāyā ví mucópa barhís

Halfverse: d    tvā́m imé havyavā́ho havante //
   tvā́m imé havyavā́haḥ havante //
   tuvā́m imé havyavā́ho havante //


Verse: 2 
Halfverse: a    ā́ yāhi pūrvī́r áti carṣaṇī́r ā́m̐ aryá āśíṣa úpa no háribʰyām /
   ā́ yāhi pūrvī́r áti carṣaṇī́r ā́m̐
   ā́ yāhi pūrvī́ḥ áti carṣaṇī́ḥ ā́
   ā́ yāhi pūrvī́r áti carṣaṇī́r ā́m̐

Halfverse: b    aryá āśíṣa úpa no háribʰyām /
   aryáḥ āśíṣaḥ úpa naḥ háribʰyām /
   aryá āśíṣa úpa no háribʰyām /

Halfverse: c    imā́ hí tvā matáya stómataṣṭā índra hávante sakʰyáṃ juṣāṇā́ḥ //
   imā́ hí tvā matáya stómataṣṭā
   imā́ḥ hí tvā matáyaḥ stómataṣṭāḥ
   imā́ hí tvā matáya stómataṣṭā

Halfverse: d    índra hávante sakʰyáṃ juṣāṇā́ḥ //
   índra hávante sakʰyám juṣāṇā́ḥ //
   índra hávante sakʰiyáṃ juṣāṇā́ḥ //


Verse: 3 
Halfverse: a    ā́ no yajñáṃ namovŕ̥dʰaṃ sajóṣā índra deva háribʰir yāhi tū́yam /
   ā́ no yajñáṃ namovŕ̥dʰaṃ sajóṣā
   ā́ naḥ yajñám namovŕ̥dʰam sajóṣāḥ
   ā́ no yajñáṃ namovŕ̥dʰaṃ sajóṣā

Halfverse: b    índra deva háribʰir yāhi tū́yam /
   índra deva háribʰiḥ yāhi tū́yam /
   índra deva háribʰir yāhi tū́yam /

Halfverse: c    aháṃ hí tvā matíbʰir jóhavīmi gʰr̥táprayāḥ sadʰamā́de mádʰūnām //
   aháṃ hí tvā matíbʰir jóhavīmi
   ahám hí tvā matíbʰiḥ jóhavīmi
   aháṃ hí tvā matíbʰir jóhavīmi

Halfverse: d    gʰr̥táprayāḥ sadʰamā́de mádʰūnām //
   gʰr̥táprayāḥ sadʰamā́de mádʰūnām //
   gʰr̥táprayāḥ sadʰamā́de mádʰūnām //


Verse: 4 
Halfverse: a    ā́ ca tvā́m etā́ vŕ̥ṣaṇā váhāto hárī sákʰāyā sudʰúrā sváṅgā /
   ā́ ca tvā́m etā́ vŕ̥ṣaṇā váhāto
   ā́ ca tvā́m etā́ vŕ̥ṣaṇā váhātaḥ
   ā́ ca tvā́m etā́ vŕ̥ṣaṇā váhāto

Halfverse: b    hárī sákʰāyā sudʰúrā sváṅgā /
   hárī sákʰāyā sudʰúrā sváṅgā /
   hárī sákʰāyā sudʰúrā suáṅgā /

Halfverse: c    dʰānā́vad índraḥ sávanaṃ juṣāṇáḥ sákʰā sákʰyuḥ śr̥ṇavad vándanāni //
   dʰānā́vad índraḥ sávanaṃ juṣāṇáḥ
   dʰānā́vat índraḥ sávanam juṣāṇáḥ
   dʰānā́vad índraḥ sávanaṃ juṣāṇáḥ

Halfverse: d    sákʰā sákʰyuḥ śr̥ṇavad vándanāni //
   sákʰā sákʰyuḥ śr̥ṇavat vándanāni //
   sákʰā sakʰyuḥ śr̥ṇavad vándanāni //


Verse: 5 
Halfverse: a    kuvín mā gopā́ṃ kárase jánasya kuvíd rā́jānam magʰavann r̥jīṣin /
   kuvín mā gopā́ṃ kárase jánasya
   kuvít mā gopā́m kárase jánasya
   kuvín mā gopā́ṃ kárase jánasya

Halfverse: b    kuvíd rā́jānam magʰavann r̥jīṣin /
   kuvít rā́jānam magʰavan r̥jīṣin /
   kuvíd rā́jānam magʰavann r̥jīṣin /

Halfverse: c    kuvín ma ŕ̥ṣim papivā́ṃsaṃ sutásya kuvín me vásvo amŕ̥tasya śíkṣāḥ //
   kuvín ma ŕ̥ṣim papivā́ṃsaṃ sutásya
   kuvít mā ŕ̥ṣim papivā́ṃsam sutásya
   kuvín ma ŕ̥ṣim papivā́ṃsaṃ sutásya

Halfverse: d    kuvín me vásvo amŕ̥tasya śíkṣāḥ //
   kuvít me vásvaḥ amŕ̥tasya śíkṣāḥ //
   kuvín me vásvo amŕ̥tasya śíkṣāḥ //


Verse: 6 
Halfverse: a    ā́ tvā br̥hánto hárayo yujānā́ arvā́g indra sadʰamā́do vahantu /
   ā́ tvā br̥hánto hárayo yujānā́
   ā́ tvā br̥hántaḥ hárayaḥ yujānā́ḥ
   ā́ tvā br̥hánto hárayo yujānā́

Halfverse: b    arvā́g indra sadʰamā́do vahantu /
   arvā́k indra sadʰamā́daḥ vahantu /
   arvā́g indra sadʰamā́do vahantu /

Halfverse: c    prá yé dvitā́ divá r̥ñjánty ā́tāḥ súsammr̥ṣṭāso vr̥ṣabʰásya mūrā́ḥ //
   prá yé dvitā́ divá r̥ñjánty ā́tāḥ
   prá yé dvitā́ diváḥ r̥ñjánti ā́tāḥ
   prá yé dvitā́ divá r̥ñjánti ā́tāḥ

Halfverse: d    súsammr̥ṣṭāso vr̥ṣabʰásya mūrā́ḥ //
   súsammr̥ṣṭāsaḥ vr̥ṣabʰásya mūrā́ḥ //
   súsammr̥ṣṭāso vr̥ṣabʰásya mūrā́ḥ //


Verse: 7 
Halfverse: a    índra píba vŕ̥ṣadʰūtasya vŕ̥ṣṇa ā́ yáṃ te śyená uśaté jabʰā́ra /
   índra píba vŕ̥ṣadʰūtasya vŕ̥ṣṇa
   índra píba vŕ̥ṣadʰūtasya vŕ̥ṣṇaḥ
   índra píba vŕ̥ṣadʰūtasya vŕ̥ṣṇa

Halfverse: b    ā́ yáṃ te śyená uśaté jabʰā́ra /
   ā́ yám te śyenáḥ uśaté jabʰā́ra /
   ā́ yáṃ te śyená uśaté jabʰā́ra /

Halfverse: c    yásya máde cyāváyasi prá kr̥ṣṭī́r yásya máde ápa gotrā́ vavártʰa //
   yásya máde cyāváyasi prá kr̥ṣṭī́r
   yásya máde cyāváyasi prá kr̥ṣṭī́ḥ
   yásya máde cyāváyasi prá kr̥ṣṭī́r

Halfverse: d    yásya máde ápa gotrā́ vavártʰa //
   yásya máde ápa gotrā́ vavártʰa //
   yásya máde ápa gotrā́ vavártʰa //


Verse: 8 
Halfverse: a    śunáṃ huvema magʰávānam índram asmín bʰáre nŕ̥tamaṃ vā́jasātau /
   śunáṃ huvema magʰávānam índram
   śunám huvema magʰávānam índram
   śunáṃ huvema magʰávānam índram

Halfverse: b    asmín bʰáre nŕ̥tamaṃ vā́jasātau /
   asmín bʰáre nŕ̥tamam vā́jasātau /
   asmín bʰáre nŕ̥tamaṃ vā́jasātau /

Halfverse: c    śr̥ṇvántam ugrám ūtáye samátsu gʰnántaṃ vr̥trā́ṇi saṃjítaṃ dʰánānām //
   śr̥ṇvántam ugrám ūtáye samátsu
   śr̥ṇvántam ugrám ūtáye samátsu
   śr̥ṇvántam ugrám ūtáye samátsu

Halfverse: d    gʰnántaṃ vr̥trā́ṇi saṃjítaṃ dʰánānām //
   gʰnántam vr̥trā́ṇi saṃjítam dʰánānām //
   gʰnántaṃ vr̥trā́ṇi saṃjítaṃ dʰánānām //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.