TITUS
Rg-Veda: Rg-Veda-Samhita
Part No. 273
Previous part

Hymn: 39_(273) 
Verse: 1 
Halfverse: a    índram matír hr̥dá ā́ vacyámānā́cʰā pátiṃ stómataṣṭā jigāti /
   índram matír hr̥dá ā́ vacyámānā_
   índram matíḥ hr̥dáḥ ā́ vacyámānā
   índram matír hr̥dá ā́ vacyámānā

Halfverse: b    _ácʰā pátiṃ stómataṣṭā jigāti /
   ácʰa+ pátim stómataṣṭā jigāti /
   ácʰā pátiṃ stómataṣṭā jigāti /

Halfverse: c    yā́ jā́gr̥vir vidátʰe śasyámānéndra yát te jā́yate viddʰí tásya //
   yā́ jā́gr̥vir vidátʰe śasyámānā_
   yā́ jā́gr̥viḥ vidátʰe śasyámānā
   yā́ jā́gr̥vir vidátʰe śasyámānā

Halfverse: d    _índra yát te jā́yate viddʰí tásya //
   índra yát te jā́yate viddʰí tásya //
   índra yát te jā́yate viddʰí tásya //


Verse: 2 
Halfverse: a    diváś cid ā́ pūrvyā́ jā́yamānā ví jā́gr̥vir vidátʰe śasyámānā /
   diváś cid ā́ pūrvyā́ jā́yamānā
   diváḥ cit ā́ pūrvyā́ jā́yamānā
   diváś cid ā́ pūrviyā́ jā́yamānā

Halfverse: b    ví jā́gr̥vir vidátʰe śasyámānā /
   ví jā́gr̥viḥ vidátʰe śasyámānā /
   ví jā́gr̥vir vidátʰe śasyámānā /

Halfverse: c    bʰadrā́ vástrāṇy árjunā vásānā séyám asmé sanajā́ pítryā dʰī́ḥ //
   bʰadrā́ vástrāṇy árjunā vásānā
   bʰadrā́ vástrāṇi árjunā vásānā
   bʰadrā́ vástrāṇi árjunā vásānā

Halfverse: d    séyám asmé sanajā́ pítryā dʰī́ḥ //
   sā́ iyám asmé sanajā́ pítryā dʰī́ḥ //
   séyám asmé sanajā́ pítriyā dʰī́ḥ //


Verse: 3 
Halfverse: a    yamā́ cid átra yamasū́r asūta jihvā́yā ágram pátad ā́ hy ástʰāt /
   yamā́ cid átra yamasū́r asūta
   yamā́ cit átra yamasū́ḥ asūta
   yamā́ cid átra yamasū́r asūta

Halfverse: b    jihvā́yā ágram pátad ā́ hy ástʰāt /
   jihvā́yāḥ ágram pátat ā́ hí ástʰāt /
   jihvā́yā ágram pátad ā́ hí ástʰāt /

Halfverse: c    vápūṃṣi jātā́ mitʰunā́ sacete tamohánā tápuṣo budʰná étā //
   vápūṃṣi jātā́ mitʰunā́ sacete
   vápūṃṣi jātā́ mitʰunā́ sacete
   vápūṃṣi jātā́ mitʰunā́ sacete

Halfverse: d    tamohánā tápuṣo budʰná étā //
   tamohánā tápuṣaḥ budʰné étā //
   tamohánā tápuṣo budʰná étā //


Verse: 4 
Halfverse: a    nákir eṣāṃ ninditā́ mártyeṣu yé asmā́kam pitáro góṣu yodʰā́ḥ /
   nákir eṣāṃ ninditā́ mártyeṣu
   nákiḥ eṣām ninditā́ mártyeṣu
   nákir eṣāṃ ninditā́ mártiyeṣu

Halfverse: b    yé asmā́kam pitáro góṣu yodʰā́ḥ /
   yé asmā́kam pitáraḥ góṣu yodʰā́ḥ /
   yé asmā́kam pitáro góṣu yodʰā́ḥ /

Halfverse: c    índra eṣāṃ dr̥ṃhitā́ mā́hināvān úd gotrā́ṇi sasr̥je daṃsánāvān //
   índra eṣāṃ dr̥ṃhitā́ mā́hināvān
   índraḥ eṣām dr̥ṃhitā́ mā́hināvān
   índra eṣāṃ dr̥ṃhitā́ mā́hināvān

Halfverse: d    úd gotrā́ṇi sasr̥je daṃsánāvān //
   út gotrā́ṇi sasr̥je daṃsánāvān //
   úd gotrā́ṇi sasr̥je daṃsánāvān //


Verse: 5 
Halfverse: a    sákʰā ha yátra sákʰibʰir návagvair abʰijñv ā́ sátvabʰir gā́ anugmán /
   sákʰā ha yátra sákʰibʰir návagvair
   sákʰā ha yátra sákʰibʰiḥ návagvaiḥ
   sákʰā ha yátra sákʰibʰir návagvair

Halfverse: b    abʰijñv ā́ sátvabʰir gā́ anugmán /
   abʰijñú ā́ sátvabʰiḥ gā́ḥ anugmán /
   abʰijñú ā́ sátvabʰir gā́ anugmán /

Halfverse: c    satyáṃ tád índro daśábʰir dáśagvaiḥ sū́ryaṃ viveda támasi kṣiyántam //
   satyáṃ tád índro daśábʰir dáśagvaiḥ
   satyám tát índraḥ daśábʰiḥ dáśagvaiḥ
   satyáṃ tád índro daśábʰir dáśagvaiḥ

Halfverse: d    sū́ryaṃ viveda támasi kṣiyántam //
   sū́ryam viveda támasi kṣiyántam //
   sū́ryaṃ viveda támasi kṣiyántam //


Verse: 6 
Halfverse: a    índro mádʰu sámbʰr̥tam usríyāyām padvád viveda śapʰávan náme góḥ /
   índro mádʰu sámbʰr̥tam usríyāyām
   índraḥ mádʰu sámbʰr̥tam usríyāyām
   índro mádʰu sámbʰr̥tam usríyāyām

Halfverse: b    padvád viveda śapʰávan náme góḥ /
   padvát viveda śapʰávat náme góḥ /
   padvád viveda śapʰávan náme góḥ /

Halfverse: c    gúhā hitáṃ gúhyaṃ gūḷʰám apsú háste dadʰe dákṣiṇe dákṣiṇāvān //
   gúhā hitáṃ gúhyaṃ gūḷʰám apsú
   gúhā hitám gúhyam gūḷʰám apsú
   gúhā hitáṃ gúhiyaṃ gūḷʰám apsú

Halfverse: d    háste dadʰe dákṣiṇe dákṣiṇāvān //
   háste dadʰe dákṣiṇe dákṣiṇāvān //
   háste dadʰe dákṣiṇe dákṣiṇāvān //


Verse: 7 
Halfverse: a    jyótir vr̥ṇīta támaso vijānánn āré syāma duritā́d abʰī́ke /
   jyótir vr̥ṇīta támaso vijānánn
   jyótiḥ vr̥ṇīta támasaḥ vijānán
   jyótir vr̥ṇīta támaso vijānánn

Halfverse: b    āré syāma duritā́d abʰī́ke /
   āré syāma duritā́t abʰī́ke /
   āré siyāma duritā́d abʰī́ke /

Halfverse: c    imā́ gíraḥ somapāḥ somavr̥ddʰa juṣásvendra purutámasya kāróḥ //
   imā́ gíraḥ somapāḥ somavr̥ddʰa
   imā́ḥ gíraḥ somapāḥ somavr̥ddʰa
   imā́ gíraḥ somapāḥ somavr̥ddʰa

Halfverse: d    juṣásvendra purutámasya kāróḥ //
   juṣásva indra purutámasya kāróḥ //
   juṣásvendra purutámasya kāróḥ //


Verse: 8 
Halfverse: a    jyótir yajñā́ya ródasī ánu ṣyād āré syāma duritásya bʰū́reḥ /
   jyótir yajñā́ya ródasī ánu ṣyād
   jyótiḥ yajñā́ya ródasī ánu syāt
   jyótir yajñā́ya ródasī ánu ṣyād

Halfverse: b    āré syāma duritásya bʰū́reḥ /
   āré syāma duritásya bʰū́reḥ /
   āré siyāma duritásya bʰū́reḥ /

Halfverse: c    bʰū́ri cid dʰí tujató mártyasya supārā́so vasavo barháṇāvat //
   bʰū́ri cid dʰí tujató mártyasya
   bʰū́ri cit hí tujatáḥ mártyasya
   bʰū́ri cid dʰí tujató mártiyasya

Halfverse: d    supārā́so vasavo barháṇāvat //
   supārā́saḥ vasavaḥ barháṇāvat //
   supārā́so vasavo barháṇāvat //


Verse: 9 
Halfverse: a    śunáṃ huvema magʰávānam índram asmín bʰáre nŕ̥tamaṃ vā́jasātau /
   śunáṃ huvema magʰávānam índram
   śunám huvema magʰávānam índram
   śunáṃ huvema magʰávānam índram

Halfverse: b    asmín bʰáre nŕ̥tamaṃ vā́jasātau /
   asmín bʰáre nŕ̥tamam vā́jasātau /
   asmín bʰáre nŕ̥tamaṃ vā́jasātau /

Halfverse: c    śr̥ṇvántam ugrám ūtáye samátsu gʰnántaṃ vr̥trā́ṇi saṃjítaṃ dʰánānām //
   śr̥ṇvántam ugrám ūtáye samátsu
   śr̥ṇvántam ugrám ūtáye samátsu
   śr̥ṇvántam ugrám ūtáye samátsu

Halfverse: d    gʰnántaṃ vr̥trā́ṇi saṃjítaṃ dʰánānām //
   gʰnántam vr̥trā́ṇi saṃjítam dʰánānām //
   gʰnántaṃ vr̥trā́ṇi saṃjítaṃ dʰánānām //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.