TITUS
Rg-Veda: Rg-Veda-Samhita
Part No. 272
Previous part

Hymn: 38_(272) 
Verse: 1 
Halfverse: a    abʰí táṣṭeva dīdʰayā manīṣā́m átyo ná vājī́ sudʰúro jíhānaḥ /
   abʰí táṣṭeva dīdʰayā manīṣā́m
   abʰí táṣṭā iva dīdʰaya+ manīṣā́m
   abʰí táṣṭeva dīdʰayā manīṣā́m

Halfverse: b    átyo ná vājī́ sudʰúro jíhānaḥ /
   átyaḥ ná vājī́ sudʰúraḥ jíhānaḥ /
   átyo ná vājī́ sudʰúro jíhānaḥ /

Halfverse: c    abʰí priyā́ṇi mármr̥śat párāṇi kavī́m̐r icʰāmi saṃdŕ̥śe sumedʰā́ḥ //
   abʰí priyā́ṇi mármr̥śat párāṇi
   abʰí priyā́ṇi mármr̥śat párāṇi
   abʰí priyā́ṇi mármr̥śat párāṇi

Halfverse: d    kavī́m̐r icʰāmi saṃdŕ̥śe sumedʰā́ḥ //
   kavī́n icʰāmi saṃdŕ̥śe sumedʰā́ḥ //
   kavī́m̐r icʰāmi saṃdŕ̥śe sumedʰā́ḥ //


Verse: 2 
Halfverse: a    inótá pr̥cʰa jánimā kavīnā́m manodʰŕ̥taḥ sukŕ̥tas takṣata dyā́m /
   inótá pr̥cʰa jánimā kavīnā́m
   inā́ utá pr̥cʰa jánima+ kavīnā́m
   inótá pr̥cʰa jánimā kavīnā́m

Halfverse: b    manodʰŕ̥taḥ sukŕ̥tas takṣata dyā́m /
   manodʰŕ̥taḥ sukŕ̥taḥ takṣata dyā́m /
   manodʰŕ̥taḥ sukŕ̥tas takṣata dyā́m /

Halfverse: c    imā́ u te praṇyò várdʰamānā mánovātā ádʰa nú dʰármaṇi gman //
   imā́ u te praṇyò várdʰamānā
   imā́ḥ u te praṇyàḥ várdʰamānāḥ
   imā́ u te praṇíyo várdʰamānā

Halfverse: d    mánovātā ádʰa nú dʰármaṇi gman //
   mánovātāḥ ádʰa nú dʰármaṇi gman //
   mánovātā ádʰa nú dʰármaṇi gman //


Verse: 3 
Halfverse: a    ní ṣīm íd átra gúhyā dádʰānā utá kṣatrā́ya ródasī sám añjan /
   ní ṣīm íd átra gúhyā dádʰānā
   ní sīm ít átra gúhyā dádʰānāḥ
   ní ṣīm íd átra gúhiyā dádʰānā

Halfverse: b    utá kṣatrā́ya ródasī sám añjan /
   utá kṣatrā́ya ródasī sám añjan /
   utá kṣatrā́ya ródasī sám añjan /

Halfverse: c    sám mā́trābʰir mamiré yemúr urvī́ antár mahī́ sámr̥te dʰā́yase dʰuḥ //
   sám mā́trābʰir mamiré yemúr urvī́
   sám mā́trābʰiḥ mamiré yemúḥ urvī́
   sám mā́trābʰir mamiré yemúr urvī́

Halfverse: d    antár mahī́ sámr̥te dʰā́yase dʰuḥ //
   antár mahī́ sámr̥te dʰā́yase dʰuḥ //
   antár mahī́ sámr̥te dʰā́yase dʰuḥ //


Verse: 4 
Halfverse: a    ātíṣṭʰantam pári víśve abʰūṣañ cʰríyo vásānaś carati svárociḥ /
   ātíṣṭʰantam pári víśve abʰūṣañ
   ātíṣṭʰantam pári víśve abʰūṣan
   ātíṣṭʰantam pári víśve abʰūṣañ

Halfverse: b    cʰríyo vásānaś carati svárociḥ /
   śríyaḥ vásānaḥ carati svárociḥ /
   cʰríyo vásānaś carati svárociḥ /

Halfverse: c    mahát tád vŕ̥ṣṇo ásurasya nā́mā́ viśvárūpo amŕ̥tāni tastʰau //
   mahát tád vŕ̥ṣṇo ásurasya nā́ma_
   mahát tát vŕ̥ṣṇaḥ ásurasya nā́ma
   mahát tád vŕ̥ṣṇo ásurasya nā́ma

Halfverse: d    _ā́ viśvárūpo amŕ̥tāni tastʰau //
   ā́ viśvárūpaḥ amŕ̥tāni tastʰau //
   ā́ viśvárūpo amŕ̥tāni tastʰau //


Verse: 5 
Halfverse: a    ásūta pū́rvo vr̥ṣabʰó jyā́yān imā́ asya śurúdʰaḥ santi pūrvī́ḥ /
   ásūta pū́rvo vr̥ṣabʰó jyā́yān
   ásūta pū́rvaḥ vr̥ṣabʰáḥ jyā́yān
   ásūta pū́rvo vr̥ṣabʰó jiyā́yān

Halfverse: b    imā́ asya śurúdʰaḥ santi pūrvī́ḥ /
   imā́ḥ asya śurúdʰaḥ santi pūrvī́ḥ /
   imā́ asya śurúdʰaḥ santi pūrvī́ḥ /

Halfverse: c    dívo napātā vidátʰasya dʰībʰíḥ kṣatráṃ rājānā pradívo dadʰātʰe //
   dívo napātā vidátʰasya dʰībʰíḥ
   dívaḥ napātā vidátʰasya dʰībʰíḥ
   dívo napātā vidátʰasya dʰībʰíḥ

Halfverse: d    kṣatráṃ rājānā pradívo dadʰātʰe //
   kṣatrám rājānā pradívaḥ dadʰātʰe //
   kṣatráṃ rājānā pradívo dadʰātʰe //


Verse: 6 
Halfverse: a    trī́ṇi rājānā vidátʰe purū́ṇi pári víśvāni bʰūṣatʰaḥ sádāṃsi /
   trī́ṇi rājānā vidátʰe purū́ṇi
   trī́ṇi rājānā vidátʰe purū́ṇi
   trī́ṇi rājānā vidátʰe purū́ṇi

Halfverse: b    pári víśvāni bʰūṣatʰaḥ sádāṃsi /
   pári víśvāni bʰūṣatʰaḥ sádāṃsi /
   pári víśvāni bʰūṣatʰaḥ sádāṃsi /

Halfverse: c    ápaśyam átra mánasā jaganvā́n vraté gandʰarvā́m̐ ápi vāyúkeśān //
   ápaśyam átra mánasā jaganvā́n
   ápaśyam átra mánasā jaganvā́n
   ápaśyam átra mánasā jaganvā́n

Halfverse: d    vraté gandʰarvā́m̐ ápi vāyúkeśān //
   vraté gandʰarvā́n ápi vāyúkeśān //
   vraté gandʰarvā́m̐ ápi vāyúkeśān //


Verse: 7 
Halfverse: a    tád ín nv àsya vr̥ṣabʰásya dʰenór ā́ nā́mabʰir mamire sákmyaṃ góḥ /
   tád ín nv àsya vr̥ṣabʰásya dʰenór
   tát ít nú asya vr̥ṣabʰásya dʰenóḥ
   tád ín nú asya vr̥ṣabʰásya dʰenór

Halfverse: b    ā́ nā́mabʰir mamire sákmyaṃ góḥ /
   ā́ nā́mabʰiḥ mamire sákmyam góḥ /
   ā́ nā́mabʰir mamire sákmiyaṃ góḥ /

Halfverse: c    anyád-anyad asuryàṃ vásānā ní māyíno mamire rūpám asmin //
   anyád-anyad asuryàṃ vásānā
   anyád-anyat asuryàm vásānāḥ
   anyád-anyad asuríyaṃ vásānā

Halfverse: d    ní māyíno mamire rūpám asmin //
   ní māyínaḥ mamire rūpám asmin //
   ní māyíno mamire rūpám asmin //


Verse: 8 
Halfverse: a    tád ín nv àsya savitúr nákir me hiraṇyáyīm amátiṃ yā́m áśiśret /
   tád ín nv àsya savitúr nákir me
   tát ít nú asya savitúḥ nákiḥ me
   tád ín nú asya savitúr nákir me

Halfverse: b    hiraṇyáyīm amátiṃ yā́m áśiśret /
   hiraṇyáyīm amátim yā́m áśiśret /
   hiraṇyáyīm amátiṃ yā́m áśiśret /

Halfverse: c    ā́ suṣṭutī́ ródasī viśvaminvé ápīva yóṣā jánimāni vavre //
   ā́ suṣṭutī́ ródasī viśvaminvé
   ā́ suṣṭutī́ ródasī viśvaminvé
   ā́ suṣṭutī́ ródasī viśvaminvé

Halfverse: d    ápīva yóṣā jánimāni vavre //
   ápi iva yóṣā jánimāni vavre //
   ápīva yóṣā jánimāni vavre //


Verse: 9 
Halfverse: a    yuvám pratnásya sādʰatʰo mahó yád daívī svastíḥ pári ṇaḥ syātam /
   yuvám pratnásya sādʰatʰo mahó yád
   yuvám pratnásya sādʰatʰaḥ maháḥ yát
   yuvám pratnásya sādʰatʰo mahó yád

Halfverse: b    daívī svastíḥ pári ṇaḥ syātam /
   daívī svastíḥ pári naḥ syātam /
   daívī suastíḥ pári ṇaḥ siyātam /

Halfverse: c    gopā́jihvasya tastʰúṣo vírūpā víśve paśyanti māyínaḥ kr̥tā́ni //
   gopā́jihvasya tastʰúṣo vírūpā
   gopā́jihvasya tastʰúṣaḥ vírūpā
   gopā́jihvasya tastʰúṣo vírūpā

Halfverse: d    víśve paśyanti māyínaḥ kr̥tā́ni //
   víśve paśyanti māyínaḥ kr̥tā́ni //
   víśve paśyanti māyínaḥ kr̥tā́ni //


Verse: 10 
Halfverse: a    śunáṃ huvema magʰávānam índram asmín bʰáre nŕ̥tamaṃ vā́jasātau /
   śunáṃ huvema magʰávānam índram
   śunám huvema magʰávānam índram
   śunáṃ huvema magʰávānam índram

Halfverse: b    asmín bʰáre nŕ̥tamaṃ vā́jasātau /
   asmín bʰáre nŕ̥tamam vā́jasātau /
   asmín bʰáre nŕ̥tamaṃ vā́jasātau /

Halfverse: c    śr̥ṇvántam ugrám ūtáye samátsu gʰnántaṃ vr̥trā́ṇi saṃjítaṃ dʰánānām //
   śr̥ṇvántam ugrám ūtáye samátsu
   śr̥ṇvántam ugrám ūtáye samátsu
   śr̥ṇvántam ugrám ūtáye samátsu

Halfverse: d    gʰnántaṃ vr̥trā́ṇi saṃjítaṃ dʰánānām //
   gʰnántam vr̥trā́ṇi saṃjítam dʰánānām //
   gʰnántaṃ vr̥trā́ṇi saṃjítaṃ dʰánānām //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.