TITUS
Rg-Veda: Rg-Veda-Samhita
Part No. 269
Previous part

Hymn: 35_(269) 
Verse: 1 
Halfverse: a    tíṣṭʰā hárī rátʰa ā́ yujyámānā yāhí vāyúr ná niyúto no ácʰa /
   tíṣṭʰā hárī rátʰa ā́ yujyámānā
   tíṣṭʰa+ hárī rátʰe ā́ yujyámānā
   tíṣṭʰā hárī rátʰa ā́ yujyámānā

Halfverse: b    yāhí vāyúr ná niyúto no ácʰa /
   yāhí vāyúḥ ná niyútaḥ naḥ ácʰa /
   yāhí vāyúr ná niyúto no ácʰa /

Halfverse: c    píbāsy ándʰo abʰísr̥ṣṭo asmé índra svā́hā rarimā́ te mádāya //
   píbāsy ándʰo abʰísr̥ṣṭo asmé
   píbāsi ándʰaḥ abʰísr̥ṣṭaḥ asmé
   píbāsi ándʰo abʰísr̥ṣṭo asmé

Halfverse: d    índra svā́hā rarimā́ te mádāya //
   índra svā́hā rarimá+ te mádāya //
   índra svā́hā rarimā́ te mádāya //


Verse: 2 
Halfverse: a    úpājirā́ puruhūtā́ya sáptī hárī rátʰasya dʰūrṣv ā́ yunajmi /
   úpājirā́ puruhūtā́ya sáptī
   úpa ajirā́ puruhūtā́ya sáptī
   úpājirā́ puruhūtā́ya sáptī

Halfverse: b    hárī rátʰasya dʰūrṣv ā́ yunajmi /
   hárī rátʰasya dʰūrṣú ā́ yunajmi /
   hárī rátʰasya dʰūrṣú ā́ yunajmi /

Halfverse: c    dravád yátʰā sámbʰr̥taṃ viśvátaś cid úpemáṃ yajñám ā́ vahāta índram //
   dravád yátʰā sámbʰr̥taṃ viśvátaś cid
   dravát yátʰā sámbʰr̥tam viśvátaḥ cit
   dravád yátʰā sámbʰr̥taṃ viśvátaś cid

Halfverse: d    úpemáṃ yajñám ā́ vahāta índram //
   úpa imám yajñám ā́ vahātaḥ índram //
   úpemáṃ yajñám ā́ vahāta índram //


Verse: 3 
Halfverse: a    úpo nayasva vŕ̥ṣaṇā tapuṣpótém ava tváṃ vr̥ṣabʰa svadʰāvaḥ /
   úpo nayasva vŕ̥ṣaṇā tapuṣpā́_
   úpa u nayasva vŕ̥ṣaṇā tapuṣpā́
   úpo nayasva vŕ̥ṣaṇā tapuṣpā́

Halfverse: b    _utém ava tváṃ vr̥ṣabʰa svadʰāvaḥ /
   utá īm ava tvám vr̥ṣabʰa svadʰāvaḥ /
   utém ava tváṃ vr̥ṣabʰa svadʰāvaḥ /

Halfverse: c    grásetām áśvā ví mucehá śóṇā divé-dive sadŕ̥śīr addʰi dʰānā́ḥ //
   grásetām áśvā ví mucehá śóṇā
   grásetām áśvā ví muca ihá śóṇā
   grásetām áśvā ví mucehá śóṇā

Halfverse: d    divé-dive sadŕ̥śīr addʰi dʰānā́ḥ //
   divé-dive sadŕ̥śīḥ addʰi dʰānā́ḥ //
   divé-dive sadŕ̥śīr addʰi dʰānā́ḥ //


Verse: 4 
Halfverse: a    bráhmaṇā te brahmayújā yunajmi hárī sákʰāyā sadʰamā́da āśū́ /
   bráhmaṇā te brahmayújā yunajmi
   bráhmaṇā te brahmayújā yunajmi
   bráhmaṇā te brahmayújā yunajmi

Halfverse: b    hárī sákʰāyā sadʰamā́da āśū́ /
   hárī sákʰāyā sadʰamā́de āśū́ /
   hárī sákʰāyā sadʰamā́da āśū́ /

Halfverse: c    stʰiráṃ rátʰaṃ sukʰám indrādʰitíṣṭʰan prajānán vidvā́m̐ úpa yāhi sómam //
   stʰiráṃ rátʰaṃ sukʰám indrādʰitíṣṭʰan
   stʰirám rátʰam sukʰám indra adʰitíṣṭʰan
   stʰiráṃ rátʰaṃ sukʰám indrādʰitíṣṭʰan

Halfverse: d    prajānán vidvā́m̐ úpa yāhi sómam //
   prajānán vidvā́n úpa yāhi sómam //
   prajānán vidvā́m̐ úpa yāhi sómam //


Verse: 5 
Halfverse: a    mā́ te hárī vŕ̥ṣaṇā vītápr̥ṣṭʰā ní rīraman yájamānāso anyé /
   mā́ te hárī vŕ̥ṣaṇā vītápr̥ṣṭʰā
   mā́ te hárī vŕ̥ṣaṇā vītápr̥ṣṭʰā
   mā́ te hárī vŕ̥ṣaṇā vītápr̥ṣṭʰā

Halfverse: b    ní rīraman yájamānāso anyé /
   ní rīraman yájamānāsaḥ anyé /
   ní rīraman yájamānāso anyé /

Halfverse: c    atyā́yāhi śáśvato vayáṃ té 'raṃ sutébʰiḥ kr̥ṇavāma sómaiḥ //
   atyā́yāhi śáśvato vayáṃ té
   atyā́yāhi śáśvataḥ vayám te
   atiā́yāhi śáśvato vayáṃ te

Halfverse: d    'raṃ sutébʰiḥ kr̥ṇavāma sómaiḥ //
   áram sutébʰiḥ kr̥ṇavāma sómaiḥ //
   áraṃ sutébʰiḥ kr̥ṇavāma sómaiḥ //


Verse: 6 
Halfverse: a    távāyáṃ sómas tvám éhy arvā́ṅ cʰaśvattamáṃ sumánā asyá pāhi /
   távāyáṃ sómas tvám éhy arvā́ṅ
   táva ayám sómaḥ tvám ā́ ihi arvā́ṅ
   távāyáṃ sómas tuvám éhi arvā́ṅ

Halfverse: b    cʰaśvattamáṃ sumánā asyá pāhi /
   śaśvattamám sumánāḥ asyá pāhi /
   cʰaśvattamáṃ sumánā asyá pāhi /

Halfverse: c    asmín yajñé barhíṣy ā́ niṣádyā dadʰiṣvémáṃ jaṭʰára índum indra //
   asmín yajñé barhíṣy ā́ niṣádyā
   asmín yajñé barhíṣi ā́ niṣádya+
   asmín yajñé barhíṣi ā́ niṣádyā

Halfverse: d    dadʰiṣvémáṃ jaṭʰára índum indra //
   dadʰiṣvá imám jaṭʰáre índum indra //
   dadʰiṣvémáṃ jaṭʰára índum indra //


Verse: 7 
Halfverse: a    stīrṇáṃ te barhíḥ sutá indra sómaḥ kr̥tā́ dʰānā́ áttave te háribʰyām /
   stīrṇáṃ te barhíḥ sutá indra sómaḥ
   stīrṇám te barhíḥ sutáḥ indra sómaḥ
   stīrṇáṃ te barhíḥ sutá indra sómaḥ

Halfverse: b    kr̥tā́ dʰānā́ áttave te háribʰyām /
   kr̥tā́ḥ dʰānā́ḥ áttave te háribʰyām /
   kr̥tā́ dʰānā́ áttave te háribʰyām /

Halfverse: c    tádokase puruśā́kāya vŕ̥ṣṇe marútvate túbʰyaṃ rātā́ havī́ṃṣi //
   tádokase puruśā́kāya vŕ̥ṣṇe
   tádokase puruśā́kāya vŕ̥ṣṇe
   tádokase puruśā́kāya vŕ̥ṣṇe

Halfverse: d    marútvate túbʰyaṃ rātā́ havī́ṃṣi //
   marútvate túbʰyam rātā́ havī́ṃṣi //
   marútvate túbʰyaṃ rātā́ havī́ṃṣi //


Verse: 8 
Halfverse: a    imáṃ náraḥ párvatās túbʰyam ā́paḥ sám indra góbʰir mádʰumantam akran /
   imáṃ náraḥ párvatās túbʰyam ā́paḥ
   imám náraḥ párvatāḥ túbʰyam ā́paḥ
   imáṃ náraḥ párvatās túbʰyam ā́paḥ

Halfverse: b    sám indra góbʰir mádʰumantam akran /
   sám indra góbʰiḥ mádʰumantam akran /
   sám indra góbʰir mádʰumantam akran /

Halfverse: c    tásyāgátyā sumánā r̥ṣva pāhi prajānán vidvā́n patʰyā̀ ánu svā́ḥ //
   tásyāgátyā sumánā r̥ṣva pāhi
   tásya āgátya+ sumánāḥ r̥ṣva pāhi
   tásyāgátyā sumánā r̥ṣva pāhi

Halfverse: d    prajānán vidvā́n patʰyā̀ ánu svā́ḥ //
   prajānán vidvā́n patʰyā̀ḥ ánu svā́ḥ //
   prajānán vidvā́n patʰíyā ánu svā́ḥ //


Verse: 9 
Halfverse: a    yā́m̐ ā́bʰajo marúta indra sóme yé tvā́m ávardʰann ábʰavan gaṇás te /
   yā́m̐ ā́bʰajo marúta indra sóme
   yā́n ā́ ábʰajaḥ marútaḥ indra sóme
   yā́m̐ ā́bʰajo marúta indra sóme

Halfverse: b    yé tvā́m ávardʰann ábʰavan gaṇás te /
   yé tvā́m ávardʰan ábʰavan gaṇáḥ te /
   yé tvā́m ávardʰann ábʰavan gaṇás te /

Halfverse: c    tébʰir etáṃ sajóṣā vāvaśānò 'gnéḥ piba jihváyā sómam indra //
   tébʰir etáṃ sajóṣā vāvaśānò
   tébʰiḥ etám sajóṣāḥ vāvaśānáḥ
   tébʰir etáṃ sajóṣā vāvaśānó

Halfverse: d    'gnéḥ piba jihváyā sómam indra //
   agnéḥ piba jihváyā sómam indra //
   agnéḥ piba jihváyā sómam indra //


Verse: 10 
Halfverse: a    índra píba svadʰáyā cit sutásyāgnér vā pāhi jihváyā yajatra /
   índra píba svadʰáyā cit sutásya_
   índra píba svadʰáyā cit sutásya
   índra píba svadʰáyā cit sutásya

Halfverse: b    _agnér vā pāhi jihváyā yajatra /
   agnéḥ vā pāhi jihváyā yajatra /
   agnér vā pāhi jihváyā yajatra /

Halfverse: c    adʰvaryór vā práyataṃ śakra hástād dʰótur vā yajñáṃ havíṣo juṣasva //
   adʰvaryór vā práyataṃ śakra hástād
   adʰvaryóḥ vā práyatam śakra hástāt
   adʰvaryór vā práyataṃ śakra hástād

Halfverse: d    dʰótur vā yajñáṃ havíṣo juṣasva //
   hótuḥ vā yajñám havíṣaḥ juṣasva //
   dʰótur vā yajñáṃ havíṣo juṣasva //


Verse: 11 
Halfverse: a    śunáṃ huvema magʰávānam índram asmín bʰáre nŕ̥tamaṃ vā́jasātau /
   śunáṃ huvema magʰávānam índram
   śunám huvema magʰávānam índram
   śunáṃ huvema magʰávānam índram

Halfverse: b    asmín bʰáre nŕ̥tamaṃ vā́jasātau /
   asmín bʰáre nŕ̥tamam vā́jasātau /
   asmín bʰáre nŕ̥tamaṃ vā́jasātau /

Halfverse: c    śr̥ṇvántam ugrám ūtáye samátsu gʰnántaṃ vr̥trā́ṇi saṃjítaṃ dʰánānām //
   śr̥ṇvántam ugrám ūtáye samátsu
   śr̥ṇvántam ugrám ūtáye samátsu
   śr̥ṇvántam ugrám ūtáye samátsu

Halfverse: d    gʰnántaṃ vr̥trā́ṇi saṃjítaṃ dʰánānām //
   gʰnántam vr̥trā́ṇi saṃjítam dʰánānām //
   gʰnántaṃ vr̥trā́ṇi saṃjítaṃ dʰánānām //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.