TITUS
Rg-Veda: Rg-Veda-Samhita
Part No. 264
Previous part

Hymn: 30_(264) 
Verse: 1 
Halfverse: a    icʰánti tvā somyā́saḥ sákʰāyaḥ sunvánti sómaṃ dádʰati práyāṃsi /
   icʰánti tvā somyā́saḥ sákʰāyaḥ
   icʰánti tvā somyā́saḥ sákʰāyaḥ
   icʰánti tvā somiyā́saḥ sákʰāyaḥ

Halfverse: b    sunvánti sómaṃ dádʰati práyāṃsi /
   sunvánti sómam dádʰati práyāṃsi /
   sunvánti sómaṃ dádʰati práyāṃsi /

Halfverse: c    títikṣante abʰíśastiṃ jánānām índra tvád ā́ káś caná hí praketáḥ //
   títikṣante abʰíśastiṃ jánānām
   títikṣante abʰíśastim jánānām
   títikṣante abʰíśastiṃ jánānām

Halfverse: d    índra tvád ā́ káś caná hí praketáḥ //
   índra tvát ā́ káḥ caná hí praketáḥ //
   índra tvád ā́ káś caná hí praketáḥ //


Verse: 2 
Halfverse: a    ná te dūré paramā́ cid rájāṃsy ā́ tú prá yāhi harivo háribʰyām /
   ná te dūré paramā́ cid rájāṃsy
   ná te dūré paramā́ cit rájāṃsi
   ná te dūré paramā́ cid rájāṃsi

Halfverse: b    ā́ tú prá yāhi harivo háribʰyām /
   ā́ tú prá yāhi harivaḥ háribʰyām /
   ā́ tú prá yāhi harivo háribʰyām /

Halfverse: c    stʰirā́ya vŕ̥ṣṇe sávanā kr̥témā́ yuktā́ grā́vāṇaḥ samidʰāné agnaú //
   stʰirā́ya vŕ̥ṣṇe sávanā kr̥témā́
   stʰirā́ya vŕ̥ṣṇe sávanā kr̥tā́ imā́
   stʰirā́ya vŕ̥ṣṇe sávanā kr̥témā́

Halfverse: d    yuktā́ grā́vāṇaḥ samidʰāné agnaú //
   yuktā́ḥ grā́vāṇaḥ samidʰāné agnaú //
   yuktā́ grā́vāṇaḥ samidʰāné agnaú //


Verse: 3 
Halfverse: a    índraḥ suśípro magʰávā tárutro mahā́vrātas tuvikūrmír ŕ̥gʰāvān /
   índraḥ suśípro magʰávā tárutro
   índraḥ suśípraḥ magʰávā tárutraḥ
   índraḥ suśípro magʰávā tárutro

Halfverse: b    mahā́vrātas tuvikūrmír ŕ̥gʰāvān /
   mahā́vrātaḥ tuvikūrmíḥ ŕ̥gʰāvān /
   mahā́vrātas tuvikūrmír ŕ̥gʰāvān /

Halfverse: c    yád ugró dʰā́ bādʰitó mártyeṣu kvà tyā́ te vr̥ṣabʰa vīryā̀ṇi //
   yád ugró dʰā́ bādʰitó mártyeṣu
   yát ugráḥ dʰā́ḥ bādʰitáḥ mártyeṣu
   yád ugró dʰā́ bādʰitó mártiyeṣu

Halfverse: d    kvà tyā́ te vr̥ṣabʰa vīryā̀ṇi //
   kvà tyā́ te vr̥ṣabʰa vīryā̀ṇi //
   kúva tyā́ te vr̥ṣabʰa vīríyāṇi //


Verse: 4 
Halfverse: a    tváṃ hí ṣmā cyāváyann ácyutāny éko vr̥trā́ cárasi jígʰnamānaḥ /
   tváṃ hí ṣmā cyāváyann ácyutāny
   tvám hí sma+ cyāváyan ácyutāni
   tuváṃ hí ṣmā cyāváyann ácyutāni

Halfverse: b    éko vr̥trā́ cárasi jígʰnamānaḥ /
   ékaḥ vr̥trā́ cárasi jígʰnamānaḥ /
   éko vr̥trā́ cárasi jígʰnamānaḥ /

Halfverse: c    táva dyā́vāpr̥tʰivī́ párvatāsó 'nu vratā́ya nímiteva tastʰuḥ //
   táva dyā́vāpr̥tʰivī́ párvatāsó
   táva dyā́vāpr̥tʰivī́ párvatāsaḥ
   táva dyā́vāpr̥tʰivī́ párvatāso

Halfverse: d    'nu vratā́ya nímiteva tastʰuḥ //
   ánu vratā́ya nímitā iva tastʰuḥ //
   ánu vratā́ya nímiteva tastʰuḥ //


Verse: 5 
Halfverse: a    utā́bʰaye puruhūta śrávobʰir éko dr̥ḷʰám avado vr̥trahā́ sán /
   utā́bʰaye puruhūta śrávobʰir
   utá ábʰaye puruhūta śrávobʰiḥ
   utā́bʰaye puruhūta śrávobʰir

Halfverse: b    éko dr̥ḷʰám avado vr̥trahā́ sán /
   ékaḥ dr̥ḷʰám avadaḥ vr̥trahā́ sán /
   éko dr̥ḷʰám avado vr̥trahā́ sán /

Halfverse: c    imé cid indra ródasī apāré yát saṃgr̥bʰṇā́ magʰavan kāśír ít te //
   imé cid indra ródasī apāré
   imé cit indra ródasī apāré
   imé cid indra ródasī apāré

Halfverse: d    yát saṃgr̥bʰṇā́ magʰavan kāśír ít te //
   yát saṃgr̥bʰṇā́ḥ magʰavan kāśíḥ ít te //
   yát saṃgr̥bʰṇā́ magʰavan kāśír ít te //


Verse: 6 
Halfverse: a    prá sū́ ta indra pravátā háribʰyām prá te vájraḥ pramr̥ṇánn etu śátrūn /
   prá sū́ ta indra pravátā háribʰyām
   prá sú+ te indra pravátā háribʰyām
   prá sū́ ta indra pravátā háribʰyām

Halfverse: b    prá te vájraḥ pramr̥ṇánn etu śátrūn /
   prá te vájraḥ pramr̥ṇán etu śátrūn /
   prá te vájraḥ pramr̥ṇánn etu śátrūn /

Halfverse: c    jahí pratīcó anūcáḥ párāco víśvaṃ satyáṃ kr̥ṇuhi viṣṭám astu //
   jahí pratīcó anūcáḥ párāco
   jahí pratīcáḥ anūcáḥ párācaḥ
   jahí pratīcó anūcáḥ párāco

Halfverse: d    víśvaṃ satyáṃ kr̥ṇuhi viṣṭám astu //
   víśvam satyám kr̥ṇuhi viṣṭám astu //
   víśvaṃ satyáṃ kr̥ṇuhi viṣṭám astu //


Verse: 7 
Halfverse: a    yásmai dʰā́yur ádadʰā mártyāyā́bʰaktaṃ cid bʰajate gehyàṃ sáḥ /
   yásmai dʰā́yur ádadʰā mártyāya_
   yásmai dʰā́yuḥ ádadʰāḥ mártyāya
   yásmai dʰā́yur ádadʰā mártiyāya

Halfverse: b    _ábʰaktaṃ cid bʰajate gehyàṃ sáḥ /
   ábʰaktam cit bʰajate gehyàm sáḥ /
   ábʰaktaṃ cid bʰajate gehíyaṃ sáḥ /

Halfverse: c    bʰadrā́ ta indra sumatír gʰr̥tā́cī sahásradānā puruhūta rātíḥ //
   bʰadrā́ ta indra sumatír gʰr̥tā́cī
   bʰadrā́ te indra sumatíḥ gʰr̥tā́cī
   bʰadrā́ ta indra sumatír gʰr̥tā́cī

Halfverse: d    sahásradānā puruhūta rātíḥ //
   sahásradānā puruhūta rātíḥ //
   sahásradānā puruhūta rātíḥ //


Verse: 8 
Halfverse: a    sahádānum puruhūta kṣiyántam ahastám indra sám piṇak kúṇārum /
   sahádānum puruhūta kṣiyántam
   sahádānum puruhūta kṣiyántam
   sahádānum puruhūta kṣiyántam

Halfverse: b    ahastám indra sám piṇak kúṇārum /
   ahastám indra sám piṇak kúṇārum /
   ahastám indra sám piṇak kúṇārum /

Halfverse: c    abʰí vr̥tráṃ várdʰamānam píyārum apā́dam indra tavásā jagʰantʰa //
   abʰí vr̥tráṃ várdʰamānam píyārum
   abʰí vr̥trám várdʰamānam píyārum
   abʰí vr̥tráṃ várdʰamānam píyārum

Halfverse: d    apā́dam indra tavásā jagʰantʰa //
   apā́dam indra tavásā jagʰantʰa //
   apā́dam indra tavásā jagʰantʰa //


Verse: 9 
Halfverse: a    ní sāmanā́m iṣirā́m indra bʰū́mim mahī́m apārā́ṃ sádane sasattʰa /
   ní sāmanā́m iṣirā́m indra bʰū́mim
   ní sāmanā́m iṣirā́m indra bʰū́mim
   ní sāmanā́m iṣirā́m indra bʰū́mim

Halfverse: b    mahī́m apārā́ṃ sádane sasattʰa /
   mahī́m apārā́m sádane sasattʰa /
   mahī́m apārā́ṃ sádane sasattʰa /

Halfverse: c    ástabʰnād dyā́ṃ vr̥ṣabʰó antárikṣam árṣantv ā́pas tváyehá prásūtāḥ //
   ástabʰnād dyā́ṃ vr̥ṣabʰó antárikṣam
   ástabʰnāt dyā́m vr̥ṣabʰáḥ antárikṣam
   ástabʰnād dyā́ṃ vr̥ṣabʰó antárikṣam

Halfverse: d    árṣantv ā́pas tváyehá prásūtāḥ //
   árṣantu ā́paḥ tváyā ihá prásūtāḥ //
   árṣantu ā́pas tváyehá prásūtāḥ //


Verse: 10 
Halfverse: a    alātr̥ṇó valá indra vrajó góḥ purā́ hántor bʰáyamāno vy ā̀ra /
   alātr̥ṇó valá indra vrajó góḥ
   alātr̥ṇáḥ valáḥ indra vrajáḥ góḥ
   alātr̥ṇó valá indra vrajó góḥ

Halfverse: b    purā́ hántor bʰáyamāno vy ā̀ra /
   purā́ hántoḥ bʰáyamānaḥ ví āra /
   purā́ hántor bʰáyamāno ví āra /

Halfverse: c    sugā́n patʰó akr̥ṇon niráje gā́ḥ prā́van vā́ṇīḥ puruhūtáṃ dʰámantīḥ //
   sugā́n patʰó akr̥ṇon niráje gā́ḥ
   sugā́n patʰáḥ akr̥ṇot niráje gā́ḥ
   sugā́n patʰó akr̥ṇon niráje gā́ḥ

Halfverse: d    prā́van vā́ṇīḥ puruhūtáṃ dʰámantīḥ //
   prá āvan vā́ṇīḥ puruhūtám dʰámantīḥ //
   prā́van vā́ṇīḥ puruhūtáṃ dʰámantīḥ //


Verse: 11 
Halfverse: a    éko dvé vásumatī samīcī́ índra ā́ paprau pr̥tʰivī́m utá dyā́m /
   éko dvé vásumatī samīcī́
   ékaḥ dvé vásumatī samīcī́
   éko duvé vásumatī samīcī́

Halfverse: b    índra ā́ paprau pr̥tʰivī́m utá dyā́m /
   índraḥ ā́ paprau pr̥tʰivī́m utá dyā́m /
   índra ā́ paprau pr̥tʰivī́m utá dyā́m /

Halfverse: c    utā́ntárikṣād abʰí naḥ samīká iṣó ratʰī́ḥ sayújaḥ śūra vā́jān //
   utā́ntárikṣād abʰí naḥ samīká
   utá antárikṣāt abʰí naḥ samīké
   utā́ntárikṣād abʰí naḥ samīká

Halfverse: d    iṣó ratʰī́ḥ sayújaḥ śūra vā́jān //
   iṣáḥ ratʰī́ḥ sayújaḥ śūra vā́jān //
   iṣó ratʰī́ḥ sayújaḥ śūra vā́jān //


Verse: 12 
Halfverse: a    díśaḥ sū́ryo ná mināti prádiṣṭā divé-dive háryaśvaprasūtāḥ /
   díśaḥ sū́ryo ná mināti prádiṣṭā
   díśaḥ sū́ryaḥ ná mināti prádiṣṭāḥ
   díśaḥ sū́ryo ná mināti prádiṣṭā

Halfverse: b    divé-dive háryaśvaprasūtāḥ /
   divé-dive háryaśvaprasūtāḥ /
   divé-dive háriaśvaprasūtāḥ /

Halfverse: c    sáṃ yád ā́naḷ ádʰvana ā́d íd áśvair vimócanaṃ kr̥ṇute tát tv àsya //
   sáṃ yád ā́naḷ ádʰvana ā́d íd áśvair
   sám yát ā́naṭ ádʰvanaḥ ā́t ít áśvaiḥ
   sáṃ yád ā́naḷ ádʰvana ā́d íd áśvair

Halfverse: d    vimócanaṃ kr̥ṇute tát tv àsya //
   vimócanam kr̥ṇute tát tú asya //
   vimócanaṃ kr̥ṇute tát tú asya //


Verse: 13 
Halfverse: a    dídr̥kṣanta uṣáso yā́mann aktór vivásvatyā máhi citrám ánīkam /
   dídr̥kṣanta uṣáso yā́mann aktór
   dídr̥kṣante uṣásaḥ yā́man aktóḥ
   dídr̥kṣanta uṣáso yā́man aktór

Halfverse: b    vivásvatyā máhi citrám ánīkam /
   vivásvatyāḥ máhi citrám ánīkam /
   vivásvatyā máhi citrám ánīkam /

Halfverse: c    víśve jānanti mahinā́ yád ā́gād índrasya kárma súkr̥tā purū́ṇi //
   víśve jānanti mahinā́ yád ā́gād
   víśve jānanti mahinā́ yát ā́ agāt
   víśve jānanti mahinā́ yád ā́gād

Halfverse: d    índrasya kárma súkr̥tā purū́ṇi //
   índrasya kárma súkr̥tā purū́ṇi //
   índrasya kárma súkr̥tā purū́ṇi //


Verse: 14 
Halfverse: a    máhi jyótir níhitaṃ vakṣáṇāsv āmā́ pakváṃ carati bíbʰratī gaúḥ /
   máhi jyótir níhitaṃ vakṣáṇāsv
   máhi jyótiḥ níhitam vakṣáṇāsu
   máhi jyótir níhitaṃ vakṣáṇāsu

Halfverse: b    āmā́ pakváṃ carati bíbʰratī gaúḥ /
   āmā́ pakvám carati bíbʰratī gaúḥ /
   āmā́ pakváṃ carati bíbʰratī gaúḥ /

Halfverse: c    víśvaṃ svā́dma sámbʰr̥tam usríyāyāṃ yát sīm índro ádadʰād bʰójanāya //
   víśvaṃ svā́dma sámbʰr̥tam usríyāyāṃ
   víśvam svā́dma sámbʰr̥tam usríyāyām
   víśvaṃ svā́dma sámbʰr̥tam usríyāyāṃ

Halfverse: d    yát sīm índro ádadʰād bʰójanāya //
   yát sīm índraḥ ádadʰāt bʰójanāya //
   yát sīm índro ádadʰād bʰójanāya //


Verse: 15 
Halfverse: a    índra dŕ̥hya yāmakośā́ abʰūvan yajñā́ya śikṣa gr̥ṇaté sákʰibʰyaḥ /
   índra dŕ̥hya yāmakośā́ abʰūvan
   índra dŕ̥hya yāmakośā́ḥ abʰūvan
   índra dŕ̥hya yāmakośā́ abʰūvan

Halfverse: b    yajñā́ya śikṣa gr̥ṇaté sákʰibʰyaḥ /
   yajñā́ya śikṣa gr̥ṇaté sákʰibʰyaḥ /
   yajñā́ya śikṣa gr̥ṇaté sákʰibʰyaḥ /

Halfverse: c    durmāyávo durévā mártyāso niṣaṅgíṇo ripávo hántvāsaḥ //
   durmāyávo durévā mártyāso
   durmāyávaḥ durévāḥ mártyāsaḥ
   durmāyávo durévā mártiyāso

Halfverse: d    niṣaṅgíṇo ripávo hántvāsaḥ //
   niṣaṅgíṇaḥ ripávaḥ hántvāsaḥ //
   niṣaṅgíṇo ripávo hántuvāsaḥ //


Verse: 16 
Halfverse: a    sáṃ gʰóṣaḥ śr̥ṇve 'vamaír amítrair jahī́ ny èṣv aśániṃ tápiṣṭʰām /
   sáṃ gʰóṣaḥ śr̥ṇve 'vamaír amítrair
   sám gʰóṣaḥ śr̥ṇve avamaíḥ amítraiḥ
   sáṃ gʰóṣaḥ śr̥ṇve avamaír amítrair

Halfverse: b    jahī́ ny èṣv aśániṃ tápiṣṭʰām /
   jahí+ ní eṣu aśánim tápiṣṭʰām /
   jahī́ ní eṣu aśániṃ tápiṣṭʰām /

Halfverse: c    vr̥ścém adʰástād ví rujā sáhasva jahí rákṣo magʰavan randʰáyasva //
   vr̥ścém adʰástād ví rujā sáhasva
   vr̥ścá īm adʰástāt ví ruja+ sáhasva
   vr̥ścém adʰástād ví rujā sáhasva

Halfverse: d    jahí rákṣo magʰavan randʰáyasva //
   jahí rákṣaḥ magʰavan randʰáyasva //
   jahí rákṣo magʰavan randʰáyasva //


Verse: 17 
Halfverse: a    úd vr̥ha rákṣaḥ sahámūlam indra vr̥ścā́ mádʰyam práty ágraṃ śr̥ṇīhi /
   úd vr̥ha rákṣaḥ sahámūlam indra
   út vr̥ha rákṣaḥ sahámūlam indra
   úd vr̥ha rákṣaḥ sahámūlam indra

Halfverse: b    vr̥ścā́ mádʰyam práty ágraṃ śr̥ṇīhi /
   vr̥ścá+ mádʰyam práti ágram śr̥ṇīhi /
   vr̥ścā́ mádʰyam práti ágraṃ śr̥ṇīhi /

Halfverse: c    ā́ kī́vataḥ salalū́kaṃ cakartʰa brahmadvíṣe tápuṣiṃ hetím asya //
   ā́ kī́vataḥ salalū́kaṃ cakartʰa
   ā́ kī́vataḥ salalū́kam cakartʰa
   ā́ kī́vataḥ salalū́kaṃ cakartʰa

Halfverse: d    brahmadvíṣe tápuṣiṃ hetím asya //
   brahmadvíṣe tápuṣim hetím asya //
   brahmadvíṣe tápuṣiṃ hetím asya //


Verse: 18 
Halfverse: a    svastáye vājíbʰiś ca praṇetaḥ sáṃ yán mahī́r íṣa āsátsi pūrvī́ḥ /
   svastáye vājíbʰiś ca praṇetaḥ
   svastáye vājíbʰiḥ ca praṇetar
   suastáye vājíbʰiś ca praṇetaḥ

Halfverse: b    sáṃ yán mahī́r íṣa āsátsi pūrvī́ḥ /
   sám yát mahī́ḥ íṣaḥ āsátsi pūrvī́ḥ /
   sáṃ yán mahī́r íṣa āsátsi pūrvī́ḥ /

Halfverse: c    rāyó vantā́ro br̥hatáḥ syāmāsmé astu bʰága indra prajā́vān //
   rāyó vantā́ro br̥hatáḥ syāma_
   rāyáḥ vantā́raḥ br̥hatáḥ syāma
   rāyó vantā́ro br̥hatáḥ siyāma

Halfverse: d    _asmé astu bʰága indra prajā́vān //
   asmé astu bʰágaḥ indra prajā́vān //
   asmé astu bʰága indra prajā́vān //


Verse: 19 
Halfverse: a    ā́ no bʰara bʰágam indra dyumántaṃ ní te deṣṇásya dʰīmahi prareké /
   ā́ no bʰara bʰágam indra dyumántaṃ
   ā́ naḥ bʰara bʰágam indra dyumántam
   ā́ no bʰara bʰágam indra dyumántaṃ

Halfverse: b    ní te deṣṇásya dʰīmahi prareké /
   ní te deṣṇásya dʰīmahi prareké /
   ní te deṣṇásya dʰīmahi prareké /

Halfverse: c    ūrvá iva papratʰe kā́mo asmé tám ā́ pr̥ṇa vasupate vásūnām //
   ūrvá iva papratʰe kā́mo asmé
   ūrváḥ iva papratʰe kā́maḥ asmé
   ūrvá iva papratʰe kā́mo asmé

Halfverse: d    tám ā́ pr̥ṇa vasupate vásūnām //
   tám ā́ pr̥ṇa vasupate vásūnām //
   tám ā́ pr̥ṇa vasupate vásūnām //


Verse: 20 
Halfverse: a    imáṃ kā́mam mandayā góbʰir áśvaiś candrávatā rā́dʰasā paprátʰaś ca /
   imáṃ kā́mam mandayā góbʰir áśvaiś
   imám kā́mam mandaya+ góbʰiḥ áśvaiḥ
   imáṃ kā́mam mandayā góbʰir áśvaiś

Halfverse: b    candrávatā rā́dʰasā paprátʰaś ca /
   candrávatā rā́dʰasā paprátʰaḥ ca /
   candrávatā rā́dʰasā paprátʰaś ca /

Halfverse: c    svaryávo matíbʰis túbʰyaṃ víprā índrāya vā́haḥ kuśikā́so akran //
   svaryávo matíbʰis túbʰyaṃ víprā
   svaryávaḥ matíbʰiḥ túbʰyam víprāḥ
   suvaryávo matíbʰis túbʰya ՙ víprā

Halfverse: d    índrāya vā́haḥ kuśikā́so akran //
   índrāya vā́haḥ kuśikā́saḥ akran //
   índrāya vā́haḥ kuśikā́so akran //


Verse: 21 
Halfverse: a    ā́ no gotrā́ dardr̥hi gopate gā́ḥ sám asmábʰyaṃ sanáyo yantu vā́jāḥ /
   ā́ no gotrā́ dardr̥hi gopate gā́ḥ
   ā́ naḥ gotrā́ dardr̥hi gopate gā́ḥ
   ā́ no gotrā́ dardr̥hi gopate gā́ḥ

Halfverse: b    sám asmábʰyaṃ sanáyo yantu vā́jāḥ /
   sám asmábʰyam sanáyaḥ yantu vā́jāḥ /
   sám asmábʰyaṃ sanáyo yantu vā́jāḥ /

Halfverse: c    divákṣā asi vr̥ṣabʰa satyáśuṣmo 'smábʰyaṃ sú magʰavan bodʰi godā́ḥ //
   divákṣā asi vr̥ṣabʰa satyáśuṣmo
   divákṣāḥ asi vr̥ṣabʰa satyáśuṣmaḥ
   divákṣā 'si ՙ vr̥ṣabʰa satyáśuṣmo

Halfverse: d    'smábʰyaṃ sú magʰavan bodʰi godā́ḥ //
   asmábʰyam sú magʰavan bodʰi godā́ḥ //
   asmábʰyaṃ sú magʰavan bodʰi godā́ḥ //


Verse: 22 
Halfverse: a    śunáṃ huvema magʰávānam índram asmín bʰáre nŕ̥tamaṃ vā́jasātau /
   śunáṃ huvema magʰávānam índram
   śunám huvema magʰávānam índram
   śunáṃ huvema magʰávānam índram

Halfverse: b    asmín bʰáre nŕ̥tamaṃ vā́jasātau /
   asmín bʰáre nŕ̥tamam vā́jasātau /
   asmín bʰáre nŕ̥tamaṃ vā́jasātau /

Halfverse: c    śr̥ṇvántam ugrám ūtáye samátsu gʰnántaṃ vr̥trā́ṇi saṃjítaṃ dʰánānām //
   śr̥ṇvántam ugrám ūtáye samátsu
   śr̥ṇvántam ugrám ūtáye samátsu
   śr̥ṇvántam ugrám ūtáye samátsu

Halfverse: d    gʰnántaṃ vr̥trā́ṇi saṃjítaṃ dʰánānām //
   gʰnántam vr̥trā́ṇi saṃjítam dʰánānām //
   gʰnántaṃ vr̥trā́ṇi saṃjítaṃ dʰánānām //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.