TITUS
Rg-Veda: Rg-Veda-Samhita
Part No. 263
Previous part

Hymn: 29_(263) 
Verse: 1 
Halfverse: a    ástīdám adʰimántʰanam ásti prajánanaṃ kr̥tám /
   ástīdám adʰimántʰanam
   ásti idám adʰimántʰanam
   ástīdám adʰimántʰanam

Halfverse: b    ásti prajánanaṃ kr̥tám /
   ásti prajánanam kr̥tám /
   ásti prajánanaṃ kr̥tám /

Halfverse: c    etā́ṃ viśpátnīm ā́ bʰarāgním mantʰāma pūrvátʰā //
   etā́ṃ viśpátnīm ā́ bʰara_
   etā́m viśpátnīm ā́ bʰara
   etā́ṃ viśpátnīm ā́ bʰara

Halfverse: d    _agním mantʰāma pūrvátʰā //
   agním mantʰāma pūrvátʰā //
   agním mantʰāma pūrvátʰā //


Verse: 2 
Halfverse: a    aráṇyor níhito jātávedā gárbʰa iva súdʰito garbʰíṇīṣu /
   aráṇyor níhito jātávedā
   aráṇyoḥ níhitaḥ jātávedāḥ
   aráṇiyor níhito jātávedā

Halfverse: b    gárbʰa iva súdʰito garbʰíṇīṣu /
   gárbʰaḥ iva súdʰitaḥ garbʰíṇīṣu /
   gárbʰa iva súdʰito garbʰíṇīṣu /

Halfverse: c    divé-diva ī́ḍyo jāgr̥vádbʰir havíṣmadbʰir manuṣyèbʰir agníḥ //
   divé-diva ī́ḍyo jāgr̥vádbʰir
   divé-dive ī́ḍyaḥ jāgr̥vádbʰiḥ
   divé-diva ī́ḍiyo jāgr̥vádbʰir

Halfverse: d    havíṣmadbʰir manuṣyèbʰir agníḥ //
   havíṣmadbʰiḥ manuṣyèbʰiḥ agníḥ //
   havíṣmadbʰir manuṣíyebʰir agníḥ //


Verse: 3 
Halfverse: a    uttānā́yām áva bʰarā cikitvā́n sadyáḥ právītā vŕ̥ṣaṇaṃ jajāna /
   uttānā́yām áva bʰarā cikitvā́n
   uttānā́yām áva bʰara+ cikitvā́n
   uttānā́yām áva bʰarā cikitvā́n

Halfverse: b    sadyáḥ právītā vŕ̥ṣaṇaṃ jajāna /
   sadyáḥ právītā vŕ̥ṣaṇam jajāna /
   sadyáḥ právītā vŕ̥ṣaṇaṃ jajāna /

Halfverse: c    aruṣástūpo rúśad asya pā́ja íḷāyās putró vayúne 'janiṣṭa //
   aruṣástūpo rúśad asya pā́ja
   aruṣástūpaḥ rúśat asya pā́jaḥ
   aruṣástūpo rúśad asya pā́ja

Halfverse: d    íḷāyās putró vayúne 'janiṣṭa //
   íḷāyāḥ putráḥ vayúne ajaniṣṭa //
   íḷāyās putró vayúne 'janiṣṭa //


Verse: 4 
Halfverse: a    íḷāyās tvā padé vayáṃ nā́bʰā pr̥tʰivyā́ ádʰi /
   íḷāyās tvā padé vayáṃ
   íḷāyāḥ tvā padé vayám
   íḷāyās tvā padé vayáṃ

Halfverse: b    nā́bʰā pr̥tʰivyā́ ádʰi /
   nā́bʰā pr̥tʰivyā́ḥ ádʰi /
   nā́bʰā pr̥tʰiviyā́ ádʰi /

Halfverse: c    jā́tavedo ní dʰīmahy ágne havyā́ya vóḷʰave //
   jā́tavedo ní dʰīmahy
   jā́tavedaḥ ní dʰīmahi
   jā́tavedo ní dʰīmahi

Halfverse: d    ágne havyā́ya vóḷʰave //
   ágne havyā́ya vóḷʰave //
   ágne havyā́ya vóḷʰave //


Verse: 5 
Halfverse: a    mántʰatā naraḥ kavím ádvayantam prácetasam amŕ̥taṃ suprátīkam /
   mántʰatā naraḥ kavím ádvayantam
   mántʰata+ naraḥ kavím ádvayantam
   mántʰatā naraḥ kavím ádvayantam

Halfverse: b    prácetasam amŕ̥taṃ suprátīkam /
   prácetasam amŕ̥tam suprátīkam /
   prácetasam amŕ̥taṃ suprátīkam /

Halfverse: c    yajñásya ketúm pratʰamám purástād agníṃ naro janayatā suśévam //
   yajñásya ketúm pratʰamám purástād
   yajñásya ketúm pratʰamám purástāt
   yajñásya ketúm pratʰamám purástād

Halfverse: d    agníṃ naro janayatā suśévam //
   agním naraḥ janayata+ suśévam //
   agníṃ naro janayatā suśévam //


Verse: 6 
Halfverse: a    yádī mántʰanti bāhúbʰir ví rocaté 'śvo ná vājy àruṣó váneṣv ā́ /
   yádī mántʰanti bāhúbʰir ví rocaté
   yádi+ mántʰanti bāhúbʰiḥ ví rocate
   yádī mántʰanti bāhúbʰir ví rocate

Halfverse: b    'śvo ná vājy àruṣó váneṣv ā́ /
   áśvaḥ ná vājī́ aruṣáḥ váneṣu ā́ /
   áśvo ná vājī́ aruṣó váneṣu ā́ /

Halfverse: c    citró ná yā́mann aśvínor ánivr̥taḥ pári vr̥ṇakty áśmanas tŕ̥ṇā dáhan //
   citró ná yā́mann aśvínor ánivr̥taḥ
   citráḥ ná yā́man aśvínoḥ ánivr̥taḥ
   citró ná yā́man aśvínor ánivr̥taḥ

Halfverse: d    pári vr̥ṇakty áśmanas tŕ̥ṇā dáhan //
   pári vr̥ṇakti áśmanaḥ tŕ̥ṇā dáhan //
   pári vr̥ṇakti áśmanas tŕ̥ṇā dáhan //


Verse: 7 
Halfverse: a    jātó agnī́ rocate cékitāno vājī́ vípraḥ kaviśastáḥ sudā́nuḥ /
   jātó agnī́ rocate cékitāno
   jātáḥ agníḥ rocate cékitānaḥ
   jātó agnī́ rocate cékitāno

Halfverse: b    vājī́ vípraḥ kaviśastáḥ sudā́nuḥ /
   vājī́ vípraḥ kaviśastáḥ sudā́nuḥ /
   vājī́ vípraḥ kaviśastáḥ sudā́nuḥ /

Halfverse: c    yáṃ devā́sa ī́ḍyaṃ viśvavídaṃ havyavā́ham ádadʰur adʰvaréṣu //
   yáṃ devā́sa ī́ḍyaṃ viśvavídaṃ
   yám devā́saḥ ī́ḍyam viśvavídam
   yáṃ devā́sa ī́ḍiyaṃ viśvavídaṃ

Halfverse: d    havyavā́ham ádadʰur adʰvaréṣu //
   havyavā́ham ádadʰuḥ adʰvaréṣu //
   havyavā́ham ádadʰur adʰvaréṣu //


Verse: 8 
Halfverse: a    sī́da hotaḥ svá u loké cikitvā́n sādáyā yajñáṃ sukr̥tásya yónau /
   sī́da hotaḥ svá u loké cikitvā́n
   sī́da hotar své uloké ! cikitvā́n
   sī́da hotaḥ svá uloké cikitvā́n

Halfverse: b    sādáyā yajñáṃ sukr̥tásya yónau /
   sādáya+ yajñám sukr̥tásya yónau /
   sādáyā yajñáṃ sukr̥tásya yónau /

Halfverse: c    devāvī́r devā́n havíṣā yajāsy ágne br̥hád yájamāne váyo dʰāḥ //
   devāvī́r devā́n havíṣā yajāsy
   devāvī́ḥ devā́n havíṣā yajāsi
   devāvī́r devā́n havíṣā yajāsi

Halfverse: d    ágne br̥hád yájamāne váyo dʰāḥ //
   ágne br̥hát yájamāne váyaḥ dʰāḥ //
   ágne br̥hád yájamāne váyo dʰāḥ //


Verse: 9 
Halfverse: a    kr̥ṇóta dʰūmáṃ vŕ̥ṣaṇaṃ sakʰāyó 'sredʰanta itana vā́jam ácʰa /
   kr̥ṇóta dʰūmáṃ vŕ̥ṣaṇaṃ sakʰāyó
   kr̥ṇóta dʰūmám vŕ̥ṣaṇam sakʰāyaḥ
   kr̥ṇóta dʰūmáṃ vŕ̥ṣaṇaṃ sakʰāyo

Halfverse: b    'sredʰanta itana vā́jam ácʰa /
   ásredʰantaḥ itana vā́jam ácʰa /
   ásredʰanta itana vā́jam ácʰa /

Halfverse: c    ayám agníḥ pr̥tanāṣā́ṭ suvī́ro yéna devā́so ásahanta dásyūn //
   ayám agníḥ pr̥tanāṣā́ṭ suvī́ro
   ayám agníḥ pr̥tanāṣā́ṭ suvī́raḥ
   ayám agníḥ pr̥tanāṣā́ṭ suvī́ro

Halfverse: d    yéna devā́so ásahanta dásyūn //
   yéna devā́saḥ ásahanta dásyūn //
   yéna devā́so ásahanta dásyūn //


Verse: 10 
Halfverse: a    ayáṃ te yónir r̥tvíyo yáto jātó árocatʰāḥ /
   ayáṃ te yónir r̥tvíyo
   ayám te yóniḥ r̥tvíyaḥ
   ayáṃ te yónir r̥tvíyo

Halfverse: b    yáto jātó árocatʰāḥ /
   yátaḥ jātáḥ árocatʰāḥ /
   yáto jātó árocatʰāḥ /

Halfverse: c    táṃ jānánn agna ā́ sīdā́tʰā no vardʰayā gíraḥ //
   táṃ jānánn agna ā́ sīda_
   tám jānán agne ā́ sīda
   táṃ jānánn agna ā́ sīda

Halfverse: d    _átʰā no vardʰayā gíraḥ //
   átʰa+ naḥ vardʰaya+ gíraḥ //
   átʰā no vardʰayā gíraḥ //


Verse: 11 
Halfverse: a    tánūnápād ucyate gárbʰa āsuró nárāśáṃso bʰavati yád vijā́yate /
   tánūnápād ucyate gárbʰa āsuró
   tánūnápāt ucyate gárbʰaḥ āsuráḥ
   tánūnápād ucyate gárbʰa āsuró

Halfverse: b    nárāśáṃso bʰavati yád vijā́yate /
   nárāśáṃsaḥ bʰavati yát vijā́yate /
   nárāśáṃso bʰavati yád vijā́yate /

Halfverse: c    mātaríśvā yád ámimīta mātári vā́tasya sárgo abʰavat sárīmaṇi //
   mātaríśvā yád ámimīta mātári
   mātaríśvā yát ámimīta mātári
   mātaríśvā yád ámimīta mātári

Halfverse: d    vā́tasya sárgo abʰavat sárīmaṇi //
   vā́tasya sárgaḥ abʰavat sárīmaṇi //
   vā́tasya sárgo abʰavat sárīmaṇi //


Verse: 12 
Halfverse: a    sunirmátʰā nírmatʰitaḥ sunidʰā́ níhitaḥ kavíḥ /
   sunirmátʰā nírmatʰitaḥ
   sunirmátʰā nírmatʰitaḥ
   sunirmátʰā nírmatʰitaḥ

Halfverse: b    sunidʰā́ níhitaḥ kavíḥ /
   sunidʰā́ níhitaḥ kavíḥ /
   sunidʰā́ níhitaḥ kavíḥ /

Halfverse: c    ágne svadʰvarā́ kr̥ṇu devā́n devayaté yaja //
   ágne svadʰvarā́ kr̥ṇu
   ágne svadʰvarā́ kr̥ṇu
   ágne suadʰvarā́ kr̥ṇu

Halfverse: d    devā́n devayaté yaja //
   devā́n devayaté yaja //
   devā́n devayaté yaja //


Verse: 13 
Halfverse: a    ájījanann amŕ̥tam mártyāso 'sremā́ṇaṃ taráṇiṃ vīḷújambʰam /
   ájījanann amŕ̥tam mártyāso
   ájījanan amŕ̥tam mártyāsaḥ
   ájījanann amŕ̥tam mártiyāso

Halfverse: b    'sremā́ṇaṃ taráṇiṃ vīḷújambʰam /
   asremā́ṇam taráṇim vīḷújambʰam /
   asremā́ṇaṃ taráṇiṃ vīḷújambʰam /

Halfverse: c    dáśa svásāro agrúvaḥ samīcī́ḥ púmāṃsaṃ jātám abʰí sáṃ rabʰante //
   dáśa svásāro agrúvaḥ samīcī́ḥ
   dáśa svásāraḥ agrúvaḥ samīcī́ḥ
   dáśa svásāro agrúvaḥ samīcī́ḥ

Halfverse: d    púmāṃsaṃ jātám abʰí sáṃ rabʰante //
   púmāṃsam jātám abʰí sám rabʰante //
   púmāṃsaṃ jātám abʰí sáṃ rabʰante //


Verse: 14 
Halfverse: a    prá saptáhotā sanakā́d arocata mātúr upástʰe yád áśocad ū́dʰani /
   prá saptáhotā sanakā́d arocata
   prá saptáhotā sanakā́t arocata
   prá saptáhotā sanakā́d arocata

Halfverse: b    mātúr upástʰe yád áśocad ū́dʰani /
   mātúḥ upástʰe yát áśocat ū́dʰani /
   mātúr upástʰe yád áśocad ū́dʰani /

Halfverse: c    ná ní miṣati suráṇo divé-dive yád ásurasya jaṭʰárād ájāyata //
   ná ní miṣati suráṇo divé-dive
   ná ní miṣati suráṇaḥ divé-dive
   ná ní miṣati suráṇo divé-dive

Halfverse: d    yád ásurasya jaṭʰárād ájāyata //
   yát ásurasya jaṭʰárāt ájāyata //
   yád ásurasya jaṭʰárād ájāyata //


Verse: 15 
Halfverse: a    amitrāyúdʰo marútām iva prayā́ḥ pratʰamajā́ bráhmaṇo víśvam íd viduḥ /
   amitrāyúdʰo marútām iva prayā́ḥ
   amitrāyúdʰaḥ marútām iva prayā́ḥ
   amitrāyúdʰo marútām iva prayā́ḥ

Halfverse: b    pratʰamajā́ bráhmaṇo víśvam íd viduḥ /
   pratʰamajā́ḥ bráhmaṇaḥ víśvam ít viduḥ /
   pratʰamajā́ bráhmaṇo víśvam íd viduḥ /

Halfverse: c    dyumnávad bráhma kuśikā́sa érira éka-eko dáme agníṃ sám īdʰire //
   dyumnávad bráhma kuśikā́sa érira
   dyumnávat bráhma kuśikā́saḥ ā́ īrire
   dyumnávad bráhma kuśikā́sa érira

Halfverse: d    éka-eko dáme agníṃ sám īdʰire //
   éka-ekaḥ dáme agním sám īdʰire //
   éka-eko dáme agníṃ sám īdʰire //


Verse: 16 
Halfverse: a    yád adyá tvā prayatí yajñé asmín hótaś cikitvó 'vr̥ṇīmahīhá /
   yád adyá tvā prayatí yajñé asmín
   yát adyá tvā prayatí yajñé asmín
   yád adyá tvā prayatí yajñé asmín

Halfverse: b    hótaś cikitvó 'vr̥ṇīmahīhá /
   hótar cikitvaḥ ávr̥ṇīmahi ihá /
   hótaś cikitvo ávr̥ṇīmahīhá /

Halfverse: c    dʰruvám ayā dʰruvám utā́śamiṣṭʰāḥ prajānán vidvā́m̐ úpa yāhi sómam //
   dʰruvám ayā dʰruvám utā́śamiṣṭʰāḥ
   dʰruvám ayāḥ dʰruvám utá aśamiṣṭʰāḥ
   dʰruvám ayā dʰruvám utā́śamiṣṭʰāḥ

Halfverse: d    prajānán vidvā́m̐ úpa yāhi sómam //
   prajānán vidvā́n úpa yāhi sómam //
   prajānán vidvā́m̐ úpa yāhi sómam //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.