TITUS
Vetus Testamentum graece iuxta LXX interpretes
Part No. 906
Previous part

Chapter: 4 
Verse: 0  Διαλογὴ τοῦ Σαλωμων· τοῖς ἀνϑρωπαρέσκοις.
Verse: 1  ῞Ινα τί σύ, βέβηλε, κάϑησαι ἐν συνεδρίῳ ὁσίων
καὶ ἡ καρδία σου μακρὰν ἀϕέστηκεν ἀπὸ τοῦ κυρίου
ἐν παρανομίαις παροργίζων τὸν ϑεὸν Ισραηλ;
Verse: 2  περισσὸς ἐν λόγοις, περισσὸς ἐν σημειώσει ὑπὲρ πάντας,
ὁ σκληρὸς ἐν λόγοις κατακρῖναι ἁμαρτωλοὺς ἐν κρίσει·
Verse: 3  καὶ ἡ χεὶρ αὐτοῦ ἐν πρώτοις ἐπ' αὐτὸν ὡς ἐν ζήλει,
καὶ αὐτὸς ἔνοχος ἐν ποικιλίᾳ ἁμαρτιῶν καὶ ἐν ἀκρασίαις.
Verse: 4  οἱ ὀϕϑαλμοὶ αὐτοῦ ἐπὶ πᾶσαν γυναῖκα ἄνευ διαστολῆς,
ἡ γλῶσσα αὐτοῦ ψευδὴς ἐν συναλλάγματι μεϑ' ὅρκου.
Verse: 5  ἐν νυκτὶ καὶ ἐν ἀποκρύϕοις ἁμαρτάνει ὡς οὐχ ὁρώμενος,
ἐν ὀϕϑαλμοῖς αὐτοῦ λαλεῖ πάσῃ γυναικὶ ἐν συνταγῇ κακίας·
ταχὺς εἰσόδῳ εἰς πᾶσαν οἰκίαν ἐν ἱλαρότητι ὡς ἄκακος.
Verse: 6  ᾽Εξάραι ὁ ϑεὸς τοὺς ἐν ὑποκρίσει ζῶντας μετὰ ὁσίων,
ἐν ϕϑορᾷ σαρκὸς αὐτοῦ καὶ πενίᾳ τὴν ζωὴν αὐτοῦ·
Verse: 7  ἀνακαλύψαι ὁ ϑεὸς τὰ ἔργα ἀνϑρώπων ἀνϑρωπαρέσκων,
ἐν καταγέλωτι καὶ μυκτηρισμῷ τὰ ἔργα αὐτοῦ.
Verse: 8  καὶ δικαιώσαισαν ὅσιοι τὸ κρίμα τοῦ ϑεοῦ αὐτῶν
ἐν τῷ ἐξαίρεσϑαι ἁμαρτωλοὺς ἀπὸ προσώπου δικαίου,
ἀνϑρωπάρεσκον λαλοῦντα νόμον μετὰ δόλου.
Verse: 9  καὶ οἱ ὀϕϑαλμοὶ αὐτῶν ἐπ' οἶκον ἀνδρὸς ἐν εὐσταϑείᾳ
ὡς ὄϕις διαλῦσαι σοϕίαν ἀλλήλων ἐν λόγοις παρανόμων.
Verse: 10  οἱ λόγοι αὐτοῦ παραλογισμοὶ εἰς πρᾶξιν ἐπιϑυμίας ἀδίκου,
οὐκ ἀπέστη, ἕως ἐνίκησεν σκορπίσαι ὡς ἐν ὀρϕανίᾳ·
Verse: 11  καὶ ἠρήμωσεν οἶκον ἕνεκεν ἐπιϑυμίας παρανόμου,
παρελογίσατο ἐν λόγοις, ὅτι οὐκ ἔστιν ὁρῶν καὶ κρίνων·
Verse: 12  ἐπλήσϑη ἐν παρανομίᾳ ἐν ταύτῃ,
καὶ οἱ ὀϕϑαλμοὶ αὐτοῦ ἐπ' οἶκον ἕτερον
ὀλεϑρεῦσαι ἐν λόγοις ἀναπτερώσεως.
Verse: 13  οὐκ ἐμπίπλαται ἡ ψυχὴ αὐτοῦ ὡς ᾅδης ἐν πᾶσι τούτοις.
Verse: 14  Γένοιτο, κύριε, ἡ μερὶς αὐτοῦ ἐν ἀτιμίᾳ ἐνώπιόν σου,
ἡ ἔξοδος αὐτοῦ ἐν στεναγμοῖς καὶ ἡ εἴσοδος αὐτοῦ ἐν ἀρᾷ·
Verse: 15  ἐν ὀδύναις καὶ πενίᾳ καὶ ἀπορίᾳ ἡ ζωὴ αὐτοῦ, κύριε,
ὁ ὕπνος αὐτοῦ ἐν λύπαις καὶ ἡ ἐξέγερσις αὐτοῦ ἐν ἀπορίαις.
Verse: 16  ἀϕαιρεϑείη ὕπνος ἀπὸ κροτάϕων αὐτοῦ ἐν νυκτί,
ἀποπέσοι ἀπὸ παντὸς ἔργου χειρῶν αὐτοῦ ἐν ἀτιμίᾳ.
Verse: 17  κενὸς χερσὶν αὐτοῦ εἰσέλϑοι εἰς τὸν οἶκον αὐτοῦ,
καὶ ἐλλιπὴς ὁ οἶκος αὐτοῦ ἀπὸ παντός, οὗ ἐμπλήσει ψυχὴν // αὐτοῦ·
Verse: 18  ἐν μονώσει ἀτεκνίας τὸ γῆρας αὐτοῦ εἰς ἀνάλημψιν.
Verse: 19  Σκορπισϑείησαν σάρκες ἀνϑρωπαρέσκων ὑπὸ ϑηρίων,
καὶ ὀστᾶ παρανόμων κατέναντι τοῦ ἡλίου ἐν ἀτιμίᾳ.
Verse: 20  ὀϕϑαλμοὺς ἐκκόψαισαν κόρακες ὑποκρινομένων,
ὅτι ἠρήμωσαν οἴκους πολλοὺς ἀνϑρώπων ἐν ἀτιμίᾳ
καὶ ἐσκόρπισαν ἐν ἐπιϑυμίᾳ
Verse: 21  καὶ οὐκ ἐμνήσϑησαν ϑεοῦ
καὶ οὐκ ἐϕοβήϑησαν τὸν ϑεὸν ἐν ἅπασι τούτοις
καὶ παρώργισαν τὸν ϑεὸν καὶ παρώξυναν.
Verse: 22  ἐξάραι αὐτοὺς ἀπὸ τῆς γῆς,
ὅτι ψυχὰς ἀκάκων παραλογισμῷ ὑπεκρίνοντο.
Verse: 23  Μακάριοι οἱ ϕοβούμενοι τὸν κύριον ἐν ἀκακίᾳ αὐτῶν·
ὁ κύριος ῥύσεται αὐτοὺς ἀπὸ ἀνϑρώπων δολίων καὶ ἁμαρτωλῶν
καὶ ῥύσεται ἡμᾶς ἀπὸ παντὸς σκανδάλου παρανόμου.
Verse: 24  ἐξάραι ὁ ϑεὸς τοὺς ποιοῦντας ἐν ὑπερηϕανίᾳ πᾶσαν ἀδικίαν,
ὅτι κριτὴς μέγας καὶ κραταιὸς κύριος ὁ ϑεὸς ἡμῶν ἐν δικαιοσύνῃ.
Verse: 25  γένοιτο, κύριε, τὸ ἔλεός σου ἐπὶ πάντας τοὺς ἀγαπῶντάς σε. //

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.