TITUS
Vetus Testamentum graece iuxta LXX interpretes
Part No. 901
Previous part

Chapter: 50 
Verse: 1    Σιμων Ονιου υἱὸς ἱερεὺς ὁ μέγας,
   ὃς ἐν ζωῇ αὐτοῦ ὑπέρραψεν οἶκον
   καὶ ἐν ἡμέραις αὐτοῦ ἐστερέωσεν ναόν·
Verse: 2    καὶ ὑπ' αὐτοῦ ἐϑεμελιώϑη ὕψος διπλῆς,
   ἀνάλημμα ὑψηλὸν περιβόλου ἱεροῦ·
Verse: 3    ἐν ἡμέραις αὐτοῦ ἐλατομήϑη ἀποδοχεῖον ὑδάτων,
   λάκκος ὡσεὶ ϑαλάσσης τὸ περίμετρον·
Verse: 4    ὁ ϕροντίζων τοῦ λαοῦ αὐτοῦ ἀπὸ πτώσεως
   καὶ ἐνισχύσας πόλιν ἐν πολιορκήσει.
Verse: 5    ὡς ἐδοξάσϑη ἐν περιστροϕῇ λαοῦ,
   ἐν ἐξόδῳ οἴκου καταπετάσματος·
Verse: 6    ὡς ἀστὴρ ἑωϑινὸς ἐν μέσῳ νεϕελῶν,
   ὡς σελήνη πλήρης ἐν ἡμέραις,
Verse: 7    ὡς ἥλιος ἐκλάμπων ἐπὶ ναὸν ὑψίστου
   καὶ ὡς τόξον ϕωτίζον ἐν νεϕέλαις δόξης,
Verse: 8    ὡς ἄνϑος ῥόδων ἐν ἡμέραις νέων,
   ὡς κρίνα ἐπ' ἐξόδῳ ὕδατος,
   ὡς βλαστὸς Λιβάνου ἐν ἡμέραις ϑέρους,
Verse: 9    ὡς πῦρ καὶ λίβανος ἐπὶ πυρείου,
   ὡς σκεῦος χρυσίου ὁλοσϕύρητον
   κεκοσμημένον παντὶ λίϑῳ πολυτελεῖ,
Verse: 10    ὡς ἐλαία ἀναϑάλλουσα καρποὺς
   καὶ ὡς κυπάρισσος ὑψουμένη ἐν νεϕέλαις.
Verse: 11    ἐν τῷ ἀναλαμβάνειν αὐτὸν στολὴν δόξης
   καὶ ἐνδιδύσκεσϑαι αὐτὸν συντέλειαν καυχήματος,
   ἐν ἀναβάσει ϑυσιαστηρίου ἁγίου
   ἐδόξασεν περιβολὴν ἁγιάσματος·
Verse: 12    ἐν δὲ τῷ δέχεσϑαι μέλη ἐκ χειρῶν ἱερέων,
   καὶ αὐτὸς ἑστὼς παρ' ἐσχάρᾳ βωμοῦ,
   κυκλόϑεν αὐτοῦ στέϕανος ἀδελϕῶν
   ὡς βλάστημα κέδρων ἐν τῷ Λιβάνῳ
   καὶ ἐκύκλωσαν αὐτὸν ὡς στελέχη ϕοινίκων,
Verse: 13    καὶ πάντες οἱ υἱοὶ Ααρων ἐν δόξῃ αὐτῶν
   καὶ προσϕορὰ κυρίου ἐν χερσὶν αὐτῶν
   ἔναντι πάσης ἐκκλησίας Ισραηλ,
Verse: 14    καὶ συντέλειαν λειτουργῶν ἐπὶ βωμῶν
   κοσμῆσαι προσϕορὰν ὑψίστου παντοκράτορος,
Verse: 15    ἐξέτεινεν ἐπὶ σπονδείου χεῖρα αὐτοῦ
   καὶ ἔσπεισεν ἐξ αἵματος σταϕυλῆς,
   ἐξέχεεν εἰς ϑεμέλια ϑυσιαστηρίου
   ὀσμὴν εὐωδίας ὑψίστῳ παμβασιλεῖ.
Verse: 16    τότε ἀνέκραγον οἱ υἱοὶ Ααρων,
   ἐν σάλπιγξιν ἐλαταῖς ἤχησαν,
   ἀκουστὴν ἐποίησαν ϕωνὴν μεγάλην
   εἰς μνημόσυνον ἔναντι ὑψίστου·
Verse: 17    τότε πᾶς ὁ λαὸς κοινῇ κατέσπευσαν
   καὶ ἔπεσαν ἐπὶ πρόσωπον ἐπὶ τὴν γῆν
   προσκυνῆσαι τῷ κυρίῳ αὐτῶν
   παντοκράτορι ϑεῷ ὑψίστῳ·
Verse: 18    καὶ ᾔνεσαν οἱ ψαλτῳδοὶ ἐν ϕωναῖς αὐτῶν,
   ἐν πλείστῳ ἤχῳ ἐγλυκάνϑη μέλος·
Verse: 19    καὶ ἐδεήϑη ὁ λαὸς κυρίου ὑψίστου
   ἐν προσευχῇ κατέναντι ἐλεήμονος,
   ἕως συντελεσϑῇ κόσμος κυρίου
   καὶ τὴν λειτουργίαν αὐτοῦ ἐτελείωσαν.
Verse: 20    τότε καταβὰς ἐπῆρεν χεῖρας αὐτοῦ
   ἐπὶ πᾶσαν ἐκκλησίαν υἱῶν Ισραηλ
   δοῦναι εὐλογίαν κυρίου ἐκ χειλέων αὐτοῦ
   καὶ ἐν ὀνόματι αὐτοῦ καυχήσασϑαι·
Verse: 21    καὶ ἐδευτέρωσαν ἐν προσκυνήσει
   ἐπιδέξασϑαι τὴν εὐλογίαν παρὰ ὑψίστου.
Verse: 22    Καὶ νῦν εὐλογήσατε τὸν ϑεὸν πάντων
   τὸν μεγάλα ποιοῦντα πάντῃ,
   τὸν ὑψοῦντα ἡμέρας ἡμῶν ἐκ μήτρας
   καὶ ποιοῦντα μεϑ' ἡμῶν κατὰ τὸ ἔλεος αὐτοῦ.
Verse: 23    δῴη ἡμῖν εὐϕροσύνην καρδίας
   καὶ γενέσϑαι εἰρήνην ἐν ἡμέραις ἡμῶν
   ἐν Ισραηλ κατὰ τὰς ἡμέρας τοῦ αἰῶνος·
Verse: 24    ἐμπιστεύσαι μεϑ' ἡμῶν τὸ ἔλεος αὐτοῦ
   καὶ ἐν ταῖς ἡμέραις ἡμῶν λυτρωσάσϑω ἡμᾶς.
Verse: 25    ᾽Εν δυσὶν ἔϑνεσιν προσώχϑισεν ἡ ψυχή μου,
   καὶ τὸ τρίτον οὐκ ἔστιν ἔϑνος·
Verse: 26    οἱ καϑήμενοι ἐν ὄρει Σαμαρείας καὶ Φυλιστιιμ
   καὶ ὁ λαὸς ὁ μωρὸς ὁ κατοικῶν ἐν Σικιμοις.
Verse: 27    Παιδείαν συνέσεως καὶ ἐπιστήμης
   ἐχάραξεν ἐν τῷ βιβλίῳ τούτῳ
   ᾽Ιησοῦς υἱὸς Σιραχ Ελεαζαρ ὁ Ιεροσολυμίτης,
   ὃς ἀνώμβρησεν σοϕίαν ἀπὸ καρδίας αὐτοῦ.
Verse: 28    μακάριος ὃς ἐν τούτοις ἀναστραϕήσεται,
   καὶ ϑεὶς αὐτὰ ἐπὶ καρδίαν αὐτοῦ σοϕισϑήσεται·
Verse: 29    ἐὰν γὰρ αὐτὰ ποιήσῃ, πρὸς πάντα ἰσχύσει·
   ὅτι ϕῶς κυρίου τὸ ἴχνος αὐτοῦ.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.