TITUS
Vetus Testamentum graece iuxta LXX interpretes
Part No. 895
Previous part

Chapter: 44 
Verse: 1    Αἰνέσωμεν δὴ ἄνδρας ἐνδόξους
   καὶ τοὺς πατέρας ἡμῶν τῇ γενέσει·
Verse: 2    πολλὴν δόξαν ἔκτισεν ὁ κύριος,
   τὴν μεγαλωσύνην αὐτοῦ ἀπ' αἰῶνος.
Verse: 3    κυριεύοντες ἐν ταῖς βασιλείαις αὐτῶν
   καὶ ἄνδρες ὀνομαστοὶ ἐν δυνάμει·
   βουλεύοντες ἐν συνέσει αὐτῶν,
   ἀπηγγελκότες ἐν προϕητείαις·
Verse: 4    ἡγούμενοι λαοῦ ἐν διαβουλίοις
   καὶ συνέσει γραμματείας λαοῦ,
   σοϕοὶ λόγοι ἐν παιδείᾳ αὐτῶν·
Verse: 5    ἐκζητοῦντες μέλη μουσικῶν
   καὶ διηγούμενοι ἔπη ἐν γραϕῇ·
Verse: 6    ἄνδρες πλούσιοι κεχορηγημένοι ἰσχύι,
   εἰρηνεύοντες ἐν κατοικίαις αὐτῶν·
Verse: 7    πάντες οὗτοι ἐν γενεαῖς ἐδοξάσϑησαν,
   καὶ ἐν ταῖς ἡμέραις αὐτῶν καύχημα.
Verse: 8    εἰσὶν αὐτῶν οἳ κατέλιπον ὄνομα
   τοῦ ἐκδιηγήσασϑαι ἐπαίνους·
Verse: 9    καὶ εἰσὶν ὧν οὐκ ἔστιν μνημόσυνον
   καὶ ἀπώλοντο ὡς οὐχ ὑπάρξαντες
   καὶ ἐγένοντο ὡς οὐ γεγονότες
   καὶ τὰ τέκνα αὐτῶν μετ' αὐτούς.
Verse: 10    ἀλλ' ἢ οὗτοι ἄνδρες ἐλέους,
   ὧν αἱ δικαιοσύναι οὐκ ἐπελήσϑησαν·
Verse: 11    μετὰ τοῦ σπέρματος αὐτῶν διαμενεῖ,
   ἀγαϑὴ κληρονομία ἔκγονα αὐτῶν·
Verse: 12    ἐν ταῖς διαϑήκαις ἔστη τὸ σπέρμα αὐτῶν
   καὶ τὰ τέκνα αὐτῶν δι' αὐτούς·
Verse: 13    ἕως αἰῶνος μενεῖ σπέρμα αὐτῶν,
   καὶ ἡ δόξα αὐτῶν οὐκ ἐξαλειϕϑήσεται·
Verse: 14    τὰ σώματα αὐτῶν ἐν εἰρήνῃ ἐτάϕη,
   καὶ τὸ ὄνομα αὐτῶν ζῇ εἰς γενεάς·
Verse: 15    σοϕίαν αὐτῶν διηγήσονται λαοί,
   καὶ τὸν ἔπαινον ἐξαγγέλλει ἐκκλησία.
Verse: 16    Ενωχ εὐηρέστησεν κυρίῳ καὶ μετετέϑη
   ὑπόδειγμα μετανοίας ταῖς γενεαῖς.
Verse: 17    Νωε εὑρέϑη τέλειος δίκαιος,
   ἐν καιρῷ ὀργῆς ἐγένετο ἀντάλλαγμα·
   διὰ τοῦτον ἐγενήϑη κατάλειμμα τῇ γῇ,
   ὅτε ἐγένετο κατακλυσμός·
Verse: 18    διαϑῆκαι αἰῶνος ἐτέϑησαν πρὸς αὐτόν,
   ἵνα μὴ ἐξαλειϕϑῇ κατακλυσμῷ πᾶσα σάρξ.
Verse: 19    Αβρααμ μέγας πατὴρ πλήϑους ἐϑνῶν,
   καὶ οὐχ εὑρέϑη ὅμοιος ἐν τῇ δόξῃ·
Verse: 20    ὃς συνετήρησεν νόμον ὑψίστου
   καὶ ἐγένετο ἐν διαϑήκῃ μετ' αὐτοῦ·
   ἐν σαρκὶ αὐτοῦ ἔστησεν διαϑήκην
   καὶ ἐν πειρασμῷ εὑρέϑη πιστός·
Verse: 21    διὰ τοῦτο ἐν ὅρκῳ ἔστησεν αὐτῷ
   ἐνευλογηϑῆναι ἔϑνη ἐν σπέρματι αὐτοῦ,
   πληϑῦναι αὐτὸν ὡς χοῦν τῆς γῆς
   καὶ ὡς ἄστρα ἀνυψῶσαι τὸ σπέρμα αὐτοῦ
   καὶ κατακληρονομῆσαι αὐτοὺς
   ἀπὸ ϑαλάσσης ἕως ϑαλάσσης
   καὶ ἀπὸ ποταμοῦ ἕως ἄκρου τῆς γῆς.
Verse: 22    καὶ ἐν τῷ Ισαακ ἔστησεν οὕτως
   δι' Αβρααμ τὸν πατέρα αὐτοῦ.
Verse: 23    εὐλογίαν πάντων ἀνϑρώπων καὶ διαϑήκην
   κατέπαυσεν ἐπὶ κεϕαλὴν Ιακωβ·
   ἐπέγνω αὐτὸν ἐν εὐλογίαις αὐτοῦ
   καὶ ἔδωκεν αὐτῷ ἐν κληρονομίᾳ·
   καὶ διέστειλεν μερίδας αὐτοῦ,
   ἐν ϕυλαῖς ἐμέρισεν δέκα δύο.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.