TITUS
Vetus Testamentum graece iuxta LXX interpretes
Part No. 894
Previous part

Chapter: 43 
Verse: 1    Γαυρίαμα ὕψους στερέωμα καϑαριότητος,
   εἶδος οὐρανοῦ ἐν ὁράματι δόξης.
Verse: 2    ἥλιος ἐν ὀπτασίᾳ διαγγέλλων ἐν ἐξόδῳ
   σκεῦος ϑαυμαστόν, ἔργον ὑψίστου·
Verse: 3    ἐν μεσημβρίᾳ αὐτοῦ ἀναξηραίνει χώραν,
   καὶ ἐναντίον καύματος αὐτοῦ τίς ὑποστήσεται;
Verse: 4    κάμινον ϕυσῶν ἐν ἔργοις καύματος,
   τριπλασίως ἥλιος ἐκκαίων ὄρη·
   ἀτμίδας πυρώδεις ἐκϕυσῶν
   καὶ ἐκλάμπων ἀκτῖνας ἀμαυροῖ ὀϕϑαλμούς.
Verse: 5    μέγας κύριος ὁ ποιήσας αὐτόν,
   καὶ ἐν λόγοις αὐτοῦ κατέσπευσεν πορείαν.
Verse: 6    Καὶ ἡ σελήνη ἐν πᾶσιν εἰς καιρὸν αὐτῆς,
   ἀνάδειξιν χρόνων καὶ σημεῖον αἰῶνος·
Verse: 7    ἀπὸ σελήνης σημεῖον ἑορτῆς,
   ϕωστὴρ μειούμενος ἐπὶ συντελείας.
Verse: 8    μὴν κατὰ τὸ ὄνομα αὐτῆς ἐστιν
   αὐξανόμενος ϑαυμαστῶς ἐν ἀλλοιώσει,
   σκεῦος παρεμβολῶν ἐν ὕψει,
   ἐν στερεώματι οὐρανοῦ ἐκλάμπων.
Verse: 9    κάλλος οὐρανοῦ δόξα ἄστρων,
   κόσμος ϕωτίζων ἐν ὑψίστοις κυρίου·
Verse: 10    ἐν λόγοις ἁγίου στήσονται κατὰ κρίμα
   καὶ οὐ μὴ ἐκλυϑῶσιν ἐν ϕυλακαῖς αὐτῶν.
Verse: 11    ἰδὲ τόξον καὶ εὐλόγησον τὸν ποιήσαντα αὐτὸ
   σϕόδρα ὡραῖον ἐν τῷ αὐγάσματι αὐτοῦ·
Verse: 12    ἐγύρωσεν οὐρανὸν ἐν κυκλώσει δόξης,
   χεῖρες ὑψίστου ἐτάνυσαν αὐτό.
Verse: 13    Προστάγματι αὐτοῦ κατέσπευσεν χιόνα
   καὶ ταχύνει ἀστραπὰς κρίματος αὐτοῦ·
Verse: 14    διὰ τοῦτο ἠνεῴχϑησαν ϑησαυροί,
   καὶ ἐξέπτησαν νεϕέλαι ὡς πετεινά·
Verse: 15    ἐν μεγαλείῳ αὐτοῦ ἴσχυσεν νεϕέλας,
   καὶ διεϑρύβησαν λίϑοι χαλάζης·
Verse: 16    καὶ ἐν ὀπτασίᾳ αὐτοῦ σαλευϑήσεται ὄρη,
   ἐν ϑελήματι αὐτοῦ πνεύσεται νότος.
Verse: 17    ϕωνὴ βροντῆς αὐτοῦ ὠνείδισεν γῆν
   καὶ καταιγὶς βορέου καὶ συστροϕὴ πνεύματος.
Verse: 18    ὡς πετεινὰ καϑιπτάμενα πάσσει χιόνα,
   καὶ ὡς ἀκρὶς καταλύουσα ἡ κατάβασις αὐτῆς·
   κάλλος λευκότητος αὐτῆς ἐκϑαυμάσει ὀϕϑαλμός,
   καὶ ἐπὶ τοῦ ὑετοῦ αὐτῆς ἐκστήσεται καρδία.
Verse: 19    καὶ πάχνην ὡς ἅλα ἐπὶ γῆς χέει,
   καὶ παγεῖσα γίνεται σκολόπων ἄκρα.
Verse: 20    ψυχρὸς ἄνεμος βορέης πνεύσει,
   καὶ παγήσεται κρύσταλλος ἐϕ' ὕδατος·
   ἐπὶ πᾶσαν συναγωγὴν ὕδατος καταλύσει,
   καὶ ὡς ϑώρακα ἐνδύσεται τὸ ὕδωρ.
Verse: 21    καταϕάγεται ὄρη καὶ ἔρημον ἐκκαύσει
   καὶ ἀποσβέσει χλόην ὡς πῦρ.
Verse: 22    ἴασις πάντων κατὰ σπουδὴν ὁμίχλη,
   δρόσος ἀπαντῶσα ἀπὸ καύσωνος ἱλαρώσει.
Verse: 23    Λογισμῷ αὐτοῦ ἐκόπασεν ἄβυσσον
   καὶ ἐϕύτευσεν ἐν αὐτῇ νήσους.
Verse: 24    οἱ πλέοντες τὴν ϑάλασσαν διηγοῦνται τὸν κίνδυνον αὐτῆς,
   καὶ ἀκοαῖς ὠτίων ἡμῶν ϑαυμάζομεν·
Verse: 25    καὶ ἐκεῖ τὰ παράδοξα καὶ ϑαυμάσια ἔργα,
   ποικιλία παντὸς ζῴου, κτίσις κητῶν.
Verse: 26    δι' αὐτὸν εὐοδοῖ ἄγγελος αὐτοῦ,
   καὶ ἐν λόγῳ αὐτοῦ σύγκειται τὰ πάντα.
Verse: 27    Πολλὰ ἐροῦμεν καὶ οὐ μὴ ἀϕικώμεϑα,
   καὶ συντέλεια λόγων Τὸ πᾶν ἐστιν αὐτός.
Verse: 28    δοξάζοντες ποῦ ἰσχύσομεν;
   αὐτὸς γὰρ ὁ μέγας παρὰ πάντα τὰ ἔργα αὐτοῦ.
Verse: 29    ϕοβερὸς κύριος καὶ σϕόδρα μέγας,
   καὶ ϑαυμαστὴ ἡ δυναστεία αὐτοῦ.
Verse: 30    δοξάζοντες κύριον ὑψώσατε
   καϑ' ὅσον ἂν δύνησϑε, ὑπερέξει γὰρ καὶ ἔτι·
   καὶ ὑψοῦντες αὐτὸν πληϑύνατε ἐν ἰσχύι,
   μὴ κοπιᾶτε, οὐ γὰρ μὴ ἀϕίκησϑε.
Verse: 31    τίς ἑόρακεν αὐτὸν καὶ ἐκδιηγήσεται;
   καὶ τίς μεγαλυνεῖ αὐτὸν καϑώς ἐστιν;
Verse: 32    πολλὰ ἀπόκρυϕά ἐστιν μείζονα τούτων,
   ὀλίγα γὰρ ἑωράκαμεν τῶν ἔργων αὐτοῦ·
Verse: 33    πάντα γὰρ ἐποίησεν ὁ κύριος
   καὶ τοῖς εὐσεβέσιν ἔδωκεν σοϕίαν

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.