TITUS
Vetus Testamentum graece iuxta LXX interpretes
Part No. 885
Previous part

Chapter: 34 
Verse: 1    Κεναὶ ἐλπίδες καὶ ψευδεῖς ἀσυνέτῳ ἀνδρί,
   καὶ ἐνύπνια ἀναπτεροῦσιν ἄϕρονας.
Verse: 2    ὡς δρασσόμενος σκιᾶς καὶ διώκων ἄνεμον
   οὕτως ὁ ἐπέχων ἐνυπνίοις·
Verse: 3    τοῦτο κατὰ τούτου ὅρασις ἐνυπνίων,
   κατέναντι προσώπου ὁμοίωμα προσώπου.
Verse: 4    ἀπὸ ἀκαϑάρτου τί καϑαρισϑήσεται;
   καὶ ἀπὸ ψευδοῦς τί ἀληϑεύσει;
Verse: 5    μαντεῖαι καὶ οἰωνισμοὶ καὶ ἐνύπνια μάταιά ἐστιν,
   καὶ ὡς ὠδινούσης ϕαντάζεται καρδία·
Verse: 6    ἐὰν μὴ παρὰ ὑψίστου ἀποσταλῇ ἐν ἐπισκοπῇ,
   μὴ δῷς εἰς αὐτὰ τὴν καρδίαν σου·
Verse: 7    πολλοὺς γὰρ ἐπλάνησεν τὰ ἐνύπνια,
   καὶ ἐξέπεσον ἐλπίζοντες ἐπ' αὐτοῖς.
Verse: 8    ἄνευ ψεύδους συντελεσϑήσεται νόμος,
   καὶ σοϕία στόματι πιστῷ τελείωσις.
Verse: 9    ᾽Ανὴρ πεπλανημένος ἔγνω πολλά,
   καὶ ὁ πολύπειρος ἐκδιηγήσεται σύνεσιν·
Verse: 10    ὃς οὐκ ἐπειράϑη, ὀλίγα οἶδεν,
   ὁ δὲ πεπλανημένος πληϑυνεῖ πανουργίαν.
Verse: 11    πολλὰ ἑώρακα ἐν τῇ ἀποπλανήσει μου,
   καὶ πλείονα τῶν λόγων μου σύνεσίς μου·
Verse: 12    πλεονάκις ἕως ϑανάτου ἐκινδύνευσα
   καὶ διεσώϑην τούτων χάριν.
Verse: 13    πνεῦμα ϕοβουμένων κύριον ζήσεται·
   ἡ γὰρ ἐλπὶς αὐτῶν ἐπὶ τὸν σῴζοντα αὐτούς.
Verse: 14    ὁ ϕοβούμενος κύριον οὐδὲν εὐλαβηϑήσεται
   καὶ οὐ μὴ δειλιάσῃ, ὅτι αὐτὸς ἐλπὶς αὐτοῦ.
Verse: 15    ϕοβουμένου τὸν κύριον μακαρία ἡ ψυχή·
   τίνι ἐπέχει; καὶ τίς αὐτοῦ στήριγμα;
Verse: 16    οἱ ὀϕϑαλμοὶ κυρίου ἐπὶ τοὺς ἀγαπῶντας αὐτόν,
   ὑπερασπισμὸς δυναστείας καὶ στήριγμα ἰσχύος,
   σκέπη ἀπὸ καύσωνος καὶ σκέπη ἀπὸ μεσημβρίας,
   ϕυλακὴ ἀπὸ προσκόμματος καὶ βοήϑεια ἀπὸ πτώσεως,
Verse: 17    ἀνυψῶν ψυχὴν καὶ ϕωτίζων ὀϕϑαλμούς,
   ἴασιν διδούς, ζωὴν καὶ εὐλογίαν.
Verse: 18    Θυσιάζων ἐξ ἀδίκου προσϕορὰ μεμωμημένη,
   καὶ οὐκ εἰς εὐδοκίαν δωρήματα ἀνόμων.
Verse: 19    οὐκ εὐδοκεῖ ὁ ὕψιστος ἐν προσϕοραῖς ἀσεβῶν
   οὐδὲ ἐν πλήϑει ϑυσιῶν ἐξιλάσκεται ἁμαρτίας.
Verse: 20    ϑύων υἱὸν ἔναντι τοῦ πατρὸς αὐτοῦ
   ὁ προσάγων ϑυσίαν ἐκ χρημάτων πενήτων.
Verse: 21    ἄρτος ἐπιδεομένων ζωὴ πτωχῶν,
   ὁ ἀποστερῶν αὐτὴν ἄνϑρωπος αἱμάτων.
Verse: 22    ϕονεύων τὸν πλησίον ὁ ἀϕαιρούμενος ἐμβίωσιν,
   καὶ ἐκχέων αἷμα ὁ ἀποστερῶν μισϑὸν μισϑίου.
Verse: 23    εἷς οἰκοδομῶν, καὶ εἷς καϑαιρῶν·
   τί ὠϕέλησαν πλεῖον ἢ κόπους;
Verse: 24    εἷς εὐχόμενος, καὶ εἷς καταρώμενος·
   τίνος ϕωνῆς εἰσακούσεται ὁ δεσπότης;
Verse: 25    βαπτιζόμενος ἀπὸ νεκροῦ καὶ πάλιν ἁπτόμενος αὐτοῦ,
   τί ὠϕέλησεν ἐν τῷ λουτρῷ αὐτοῦ;
Verse: 26    οὕτως ἄνϑρωπος νηστεύων ἐπὶ τῶν ἁμαρτιῶν αὐτοῦ
   καὶ πάλιν πορευόμενος καὶ τὰ αὐτὰ ποιῶν·
   τῆς προσευχῆς αὐτοῦ τίς εἰσακούσεται;
   καὶ τί ὠϕέλησεν ἐν τῷ ταπεινωϑῆναι αὐτόν;

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.