TITUS
Vetus Testamentum graece iuxta LXX interpretes
Part No. 884
Previous part

Chapter: 33 
Verse: 1    Τῷ ϕοβουμένῳ κύριον οὐκ ἀπαντήσει κακόν,
   ἀλλ' ἐν πειρασμῷ καὶ πάλιν ἐξελεῖται.
Verse: 2    ἀνὴρ σοϕὸς οὐ μισήσει νόμον,
   ὁ δὲ ὑποκρινόμενος ἐν αὐτῷ ὡς ἐν καταιγίδι πλοῖον.
Verse: 3    ἄνϑρωπος συνετὸς ἐμπιστεύσει νόμῳ,
   καὶ ὁ νόμος αὐτῷ πιστὸς ὡς ἐρώτημα δήλων.
Verse: 4    ἑτοίμασον λόγον καὶ οὕτως ἀκουσϑήσῃ,
   σύνδησον παιδείαν καὶ ἀποκρίϑητι.
Verse: 5    τροχὸς ἁμάξης σπλάγχνα μωροῦ,
   καὶ ὡς ἄξων στρεϕόμενος ὁ διαλογισμὸς αὐτοῦ.
Verse: 6    ἵππος εἰς ὀχείαν ὡς ϕίλος μωκός,
   ὑποκάτω παντὸς ἐπικαϑημένου χρεμετίζει.
Verse: 7    Διὰ τί ἡμέρα ἡμέρας ὑπερέχει,
   καὶ πᾶν ϕῶς ἡμέρας ἐνιαυτοῦ ἀϕ' ἡλίου;
Verse: 8    ἐν γνώσει κυρίου διεχωρίσϑησαν,
   καὶ ἠλλοίωσεν καιροὺς καὶ ἑορτάς·
Verse: 9    ἀπ' αὐτῶν ἀνύψωσεν καὶ ἡγίασεν
   καὶ ἐξ αὐτῶν ἔϑηκεν εἰς ἀριϑμὸν ἡμερῶν.
Verse: 10    καὶ ἄνϑρωποι πάντες ἀπὸ ἐδάϕους,
   καὶ ἐκ γῆς ἐκτίσϑη Αδαμ·
Verse: 11    ἐν πλήϑει ἐπιστήμης κύριος διεχώρισεν αὐτοὺς
   καὶ ἠλλοίωσεν τὰς ὁδοὺς αὐτῶν·
Verse: 12    ἐξ αὐτῶν εὐλόγησεν καὶ ἀνύψωσεν
   καὶ ἐξ αὐτῶν ἡγίασεν καὶ πρὸς αὐτὸν ἤγγισεν·
   ἀπ' αὐτῶν κατηράσατο καὶ ἐταπείνωσεν
   καὶ ἀνέστρεψεν αὐτοὺς ἀπὸ στάσεως αὐτῶν.
Verse: 13    ὡς πηλὸς κεραμέως ἐν χειρὶ αὐτοῦ
   πᾶσαι αἱ ὁδοὶ αὐτοῦ κατὰ τὴν εὐδοκίαν αὐτοῦ ,
   οὕτως ἄνϑρωποι ἐν χειρὶ τοῦ ποιήσαντος αὐτοὺς
   ἀποδοῦναι αὐτοῖς κατὰ τὴν κρίσιν αὐτοῦ.
Verse: 14    ἀπέναντι τοῦ κακοῦ τὸ ἀγαϑόν,
   καὶ ἀπέναντι τοῦ ϑανάτου ἡ ζωή,
   οὕτως ἀπέναντι εὐσεβοῦς ἁμαρτωλός·
Verse: 15    καὶ οὕτως ἔμβλεψον εἰς πάντα τὰ ἔργα τοῦ ὑψίστου,
   δύο δύο, ἓν κατέναντι τοῦ ἑνός.
Verse: 16    Κἀγὼ ἔσχατος ἠγρύπνησα
   ὡς καλαμώμενος ὀπίσω τρυγητῶν·
Verse: 17    ἐν εὐλογίᾳ κυρίου ἔϕϑασα
   καὶ ὡς τρυγῶν ἐπλήρωσα ληνόν.
Verse: 18    κατανοήσατε ὅτι οὐκ ἐμοὶ μόνῳ ἐκοπίασα,
   ἀλλὰ πᾶσιν τοῖς ζητοῦσιν παιδείαν.
Verse: 19    ἀκούσατέ μου, μεγιστᾶνες λαοῦ,
   καὶ οἱ ἡγούμενοι ἐκκλησίας, ἐνωτίσασϑε.
Verse: 20    Υἱῷ καὶ γυναικί, ἀδελϕῷ καὶ ϕίλῳ
   μὴ δῷς ἐξουσίαν ἐπὶ σὲ ἐν ζωῇ σου·
   καὶ μὴ δῷς ἑτέρῳ τὰ χρήματά σου,
   ἵνα μὴ μεταμεληϑεὶς δέῃ περὶ αὐτῶν.
Verse: 21    ἕως ἔτι ζῇς καὶ πνοὴ ἐν σοί,
   μὴ ἀλλάξῃς σεαυτὸν ἐν πάσῃ σαρκί·
Verse: 22    κρεῖσσον γάρ ἐστιν τὰ τέκνα δεηϑῆναί σου
   ἢ σὲ ἐμβλέπειν εἰς χεῖρας υἱῶν σου.
Verse: 23    ἐν πᾶσι τοῖς ἔργοις σου γίνου ὑπεράγων,
   μὴ δῷς μῶμον ἐν τῇ δόξῃ σου.
Verse: 24    ἐν ἡμέρᾳ συντελείας ἡμερῶν ζωῆς σου
   καὶ ἐν καιρῷ τελευτῆς διάδος κληρονομίαν.
Verse: 25    Χορτάσματα καὶ ῥάβδος καὶ ϕορτία ὄνῳ,
   ἄρτος καὶ παιδεία καὶ ἔργον οἰκέτῃ.
Verse: 26    ἔργασαι ἐν παιδί, καὶ εὑρήσεις ἀνάπαυσιν·
   ἄνες χεῖρας αὐτῷ, καὶ ζητήσει ἐλευϑερίαν.
Verse: 27    ζυγὸς καὶ ἱμὰς τράχηλον κάμψουσιν,
   καὶ οἰκέτῃ κακούργῳ στρέβλαι καὶ βάσανοι·
Verse: 28    ἔμβαλε αὐτὸν εἰς ἐργασίαν, ἵνα μὴ ἀργῇ,
   πολλὴν γὰρ κακίαν ἐδίδαξεν ἡ ἀργία·
Verse: 29    εἰς ἔργα κατάστησον, καϑὼς πρέπει αὐτῷ,
   κἂν μὴ πειϑαρχῇ, βάρυνον τὰς πέδας αὐτοῦ.
Verse: 30    καὶ μὴ περισσεύσῃς ἐπὶ πάσῃ σαρκὶ
   καὶ ἄνευ κρίσεως μὴ ποιήσῃς μηδέν.
Verse: 31    Εἰ ἔστιν σοι οἰκέτης, ἔστω ὡς σύ,
   ὅτι ἐν αἵματι ἐκτήσω αὐτόν·
Verse: 32    εἰ ἔστιν σοι οἰκέτης, ἄγε αὐτὸν ὡς ἀδελϕόν,
   ὅτι ὡς ἡ ψυχή σου ἐπιδεήσεις αὐτῷ·
Verse: 33    ἐὰν κακώσῃς αὐτὸν καὶ ἀπάρας ἀποδρᾷ,
   ἐν ποίᾳ ὁδῷ ζητήσεις αὐτόν;

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.