TITUS
Vetus Testamentum graece iuxta LXX interpretes
Part No. 561
Previous part

Chapter: 10 
Verse: 1    Καὶ τούτου τὸν ἀοίδιμον ϑάνατον καρτερήσαντος ὁ τρίτος ἤγετο παρακαλούμενος πολλὰ ὑπὸ πολλῶν ὅπως ἀπογευσάμενος σῴζοιτο.
Verse: 2    ὁ δὲ ἀναβοήσας ἔϕη ᾽Αγνοεῖτε ὅτι αὑτός με τοῖς ἀποϑανοῦσιν ἔσπειρεν πατήρ, καὶ ἡ αὐτὴ μήτηρ ἐγέννησεν, καὶ ἐπὶ τοῖς αὐτοῖς ἀνετράϕην δόγμασιν;
Verse: 3    οὐκ ἐξόμνυμαι τὴν εὐγενῆ τῆς ἀδελϕότητος συγγένειαν.
Verse: 5    οἱ δὲ πικρῶς ἐνέγκαντες τὴν παρρησίαν τοῦ ἀνδρὸς ἀρϑρεμβόλοις ὀργάνοις τὰς χεῖρας αὐτοῦ καὶ τοὺς πόδας ἐξήρϑρουν καὶ ἐξ ἁρμῶν ἀναμοχλεύοντες ἐξεμέλιζον,
Verse: 6    τοὺς δακτύλους καὶ τοὺς βραχίονας καὶ τὰ σκέλη καὶ τοὺς ἀγκῶνας περιέκλων.
Verse: 7    καὶ κατὰ μηδένα τρόπον ἰσχύοντες αὐτὸν ἄγξαι περιλύσαντες τὰ ὄργανα σὺν ἄκραις ταῖς τῶν δακτύλων κορυϕαῖς ἀπεσκύϑιζον.
Verse: 8    καὶ εὐϑέως ἦγον ἐπὶ τὸν τροχόν, περὶ ὃν ἐκ σπονδύλων ἐκμελιζόμενος ἑώρα τὰς ἑαυτοῦ σάρκας περιλακιζομένας καὶ κατὰ σπλάγχνων σταγόνας αἵματος ἀπορρεούσας.
Verse: 9    μέλλων δὲ ἀποϑνῄσκειν ἔϕη
Verse: 10    ῾Ημεῖς μέν, ὦ μιαρώτατε τύραννε, διὰ παιδείαν καὶ ἀρετὴν ϑεοῦ ταῦτα πάσχομεν·
Verse: 11    σὺ δὲ διὰ τὴν ἀσέβειαν καὶ μιαιϕονίαν ἀκαταλύτους καρτερήσεις βασάνους.
Verse: 12    Καὶ τούτου ϑανόντος ἀδελϕοπρεπῶς τὸν τέταρτον ἐπεσπῶντο λέγοντες
Verse: 13    Μὴ μανῇς καὶ σὺ τοῖς ἀδελϕοῖς σου τὴν αὐτὴν μανίαν, ἀλλὰ πεισϑεὶς τῷ βασιλεῖ σῷζε σεαυτόν.
Verse: 14    ὁ δὲ αὐτοῖς ἔϕη Οὐχ οὕτως καυστικώτερον ἔχετε κατ' ἐμοῦ τὸ πῦρ ὥστε με δειλανδρῆσαι.
Verse: 15    μὰ τὸν μακάριον τῶν ἀδελϕῶν μου ϑάνατον καὶ τὸν αἰώνιον τοῦ τυράννου ὄλεϑρον καὶ τὸν ἀίδιον τῶν εὐσεβῶν βίον, οὐκ ἀρνήσομαι τὴν εὐγενῆ ἀδελϕότητα.
Verse: 16    ἐπινόει, τύραννε, βασάνους, ἵνα καὶ δι' αὐτῶν μάϑῃς ὅτι ἀδελϕός εἰμι τῶν προβασανισϑέντων.
Verse: 17    ταῦτα ἀκούσας ὁ αἱμοβόρος καὶ ϕονώδης καὶ παμμιαρώτατος ᾽Αντίοχος ἐκέλευσεν τὴν γλῶτταν αὐτοῦ ἐκτεμεῖν.
Verse: 18    ὁ δὲ ἔϕη Κἂν ἀϕέλῃς τὸ τῆς ϕωνῆς ὄργανον, καὶ σιωπώντων ἀκούει ὁ ϑεός·
Verse: 19    ἰδοὺ προκεχάλασται ἡ γλῶσσα, τέμνε, οὐ γὰρ παρὰ τοῦτο τὸν λογισμὸν ἡμῶν γλωττοτομήσεις.
Verse: 20    ἡδέως ὑπὲρ τοῦ ϑεοῦ τὰ τοῦ σώματος μέλη ἀκρωτηριαζόμεϑα.
Verse: 21    σὲ δὲ ταχέως μετελεύσεται ὁ ϑεός, τὴν γὰρ τῶν ϑείων ὕμνων μελῳδὸν γλῶτταν ἐκτέμνεις.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.