TITUS
Vetus Testamentum graece iuxta LXX interpretes
Part No. 559
Previous part

Chapter: 8 
Verse: 1    Διὰ τοῦτό γέ τοι καὶ μειρακίσκοι τῷ τῆς εὐσεβείας λογισμῷ ϕιλοσοϕοῦντες χαλεπωτέρων βασανιστηρίων ἐπεκράτησαν.
Verse: 2    ἐπειδὴ γὰρ κατὰ τὴν πρώτην πεῖραν ἐνικήϑη περιϕανῶς ὁ τύραννος μὴ δυνηϑεὶς ἀναγκάσαι γέροντα μιαροϕαγῆσαι, τότε δὴ σϕόδρα περιπαϑῶς ἐκέλευσεν ἄλλους ἐκ τῆς λείας τῶν Εβραίων ἀγαγεῖν, καὶ εἰ μὲν μιαροϕαγήσαιεν, ἀπολύειν ϕαγόντας, εἰ δ' ἀντιλέγοιεν, πικρότερον βασανίζειν.
Verse: 3    ταῦτα διαταξαμένου τοῦ τυράννου, παρῆσαν ἀγόμενοι μετὰ γεραιᾶς μητρὸς ἑπτὰ ἀδελϕοὶ καλοί τε καὶ αἰδήμονες καὶ γενναῖοι καὶ ἐν παντὶ χαρίεντες.
Verse: 4    οὓς ἰδὼν ὁ τύραννος καϑάπερ ἐν χορῷ μέσην τὴν μητέρα περιέχοντας ἥσϑετο ἐπ' αὐτοῖς καὶ τῆς εὐπρεπείας ἐκπλαγεὶς καὶ τῆς εὐγενείας προσεμειδίασεν αὐτοῖς καὶ πλησίον καλέσας ἔϕη
Verse: 5    ῏Ω νεανίαι, ϕιλοϕρόνως ἐγὼ καϑ' ἑνὸς ἑκάστου ὑμῶν ϑαυμάζω, τὸ κάλλος καὶ τὸ πλῆϑος τοσούτων ἀδελϕῶν ὑπερτιμῶν οὐ μόνον συμβουλεύω μὴ μανῆναι τὴν αὐτὴν τῷ προβασανισϑέντι γέροντι μανίαν, ἀλλὰ καὶ παρακαλῶ συνείξαντάς μοι τῆς ἐμῆς ἀπολαύειν ϕιλίας·
Verse: 6    δυναίμην δ' ἂν ὥσπερ κολάζειν τοὺς ἀπειϑοῦντάς μου τοῖς ἐπιτάγμασιν, οὕτω καὶ εὐεργετεῖν τοὺς εὐπειϑοῦντάς μοι.
Verse: 7    πιστεύσατε οὖν καὶ ἀρχὰς ἐπὶ τῶν ἐμῶν πραγμάτων ἡγεμονικὰς λήμψεσϑε ἀρνησάμενοι τὸν πάτριον ὑμῶν τῆς πολιτείας ϑεσμόν·
Verse: 8    καὶ μεταλαβόντες ῾Ελληνικοῦ βίου καὶ μεταδιαιτηϑέντες ἐντρυϕήσατε ταῖς νεότησιν ὑμῶν·
Verse: 9    ἐπεί, ἐὰν ὀργίλως με διάϑησϑε διὰ τῆς ἀπειϑείας, ἀναγκάσετέ με ἐπὶ δειναῖς κολάσεσιν ἕνα ἕκαστον ὑμῶν διὰ τῶν βασάνων ἀπολέσαι.
Verse: 10    κατελεήσατε οὖν ἑαυτούς, οὓς καὶ ὁ πολέμιος ἔγωγε καὶ τῆς ἡλικίας καὶ τῆς εὐμορϕίας οἰκτίρομαι.
Verse: 11    οὐ διαλογιεῖσϑε τοῦτο, ὅτι οὐδὲν ὑμῖν ἀπειϑήσασιν πλὴν τοῦ μετὰ στρεβλῶν ἀποϑανεῖν ἀπόκειται;
Verse: 12    Ταῦτα δὲ λέγων ἐκέλευσεν εἰς τὸ ἔμπροσϑεν τιϑέναι τὰ βασανιστήρια, ὅπως καὶ διὰ τοῦ ϕόβου πείσειεν αὐτοὺς μιαροϕαγῆσαι.
Verse: 13    ὡς δὲ τροχούς τε καὶ ἀρϑρέμβολα, στρεβλωτήριά τε καὶ τροχαντῆρας καὶ καταπέλτας καὶ λέβητας, τήγανά τε καὶ δακτυλήϑρας καὶ χεῖρας σιδηρᾶς καὶ σϕῆνας καὶ τὰ ζώπυρα τοῦ πυρὸς οἱ δορυϕόροι προέϑεσαν, ὑπολαβὼν ὁ τύραννος ἔϕη
Verse: 14    Μειράκια, ϕοβήϑητε, καὶ ἣν σέβεσϑε δίκην, ἵλεως ὑμῖν ἔσται δι' ἀνάγκην παρανομήσασιν.
Verse: 15    Οἱ δὲ ἀκούσαντες ἐπαγωγὰ καὶ ὁρῶντες δεινὰ οὐ μόνον οὐκ ἐϕοβήϑησαν, ἀλλὰ καὶ ἀντεϕιλοσόϕησαν τῷ τυράννῳ καὶ διὰ τῆς εὐλογιστίας τὴν τυραννίδα αὐτοῦ κατέλυσαν.
Verse: 16    καίτοι λογισώμεϑα, εἰ δειλόψυχοί τινες ἦσαν ἐν αὐτοῖς καὶ ἄνανδροι, ποίοις ἂν ἐχρήσαντο λόγοις; οὐχὶ τούτοις;
Verse: 17    ῏Ω τάλανες ἡμεῖς καὶ λίαν ἀνόητοι· βασιλέως ἡμᾶς καλοῦντος καὶ ἐπὶ εὐεργεσίᾳ παρακαλοῦντος, εἰ πεισϑείημεν αὐτῷ,
Verse: 18    τί βουλήμασιν κενοῖς ἑαυτοὺς εὐϕραίνομεν καὶ ϑανατηϕόρον ἀπείϑειαν τολμῶμεν;
Verse: 19    οὐ ϕοβηϑησόμεϑα, ἄνδρες ἀδελϕοί, τὰ βασανιστήρια καὶ λογιούμεϑα τὰς τῶν βασάνων ἀπειλὰς καὶ ϕευξόμεϑα τὴν κενοδοξίαν ταύτην καὶ ὀλεϑροϕόρον ἀλαζονείαν;
Verse: 20    ἐλεήσωμεν τὰς ἑαυτῶν ἡλικίας καὶ κατοικτίρωμεν τὸ τῆς μητρὸς γῆρας
Verse: 21    καὶ ἐνϑυμηϑῶμεν ὅτι ἀπειϑοῦντες τεϑνηξόμεϑα.
Verse: 22    συγγνώσεται δὲ ἡμῖν καὶ ἡ ϑεία δίκη δι' ἀνάγκην τὸν βασιλέα ϕοβηϑεῖσιν.
Verse: 23    τί ἐξάγομεν ἑαυτοὺς τοῦ ἡδίστου βίου καὶ ἀποστεροῦμεν ἑαυτοὺς τοῦ γλυκέος κόσμου;
Verse: 24    μὴ βιαζώμεϑα τὴν ἀνάγκην μηδὲ κενοδοξήσωμεν ἐπὶ τῇ ἑαυτῶν στρέβλῃ.
Verse: 25    οὐδ' αὐτὸς ὁ νόμος ἑκουσίως ἡμᾶς ϑανατοῖ ϕοβηϑέντας τὰ βασανιστήρια.
Verse: 26    πόϑεν ἡμῖν ἡ τοσαύτη ἐντέτηκε ϕιλονεικία καὶ ἡ ϑανατηϕόρος ἀρέσκει καρτερία, παρὸν μετὰ ἀταραξίας ζῆν τῷ βασιλεῖ πεισϑέντας;
Verse: 27    ἀλλὰ τούτων οὐδὲν εἶπον οἱ νεανίαι βασανίζεσϑαι μέλλοντες οὐδὲ ἐνεϑυμήϑησαν.
Verse: 28    ἦσαν γὰρ περίϕρονες τῶν παϑῶν καὶ αὐτοκράτορες τῶν ἀλγηδόνων,
Verse: 29    ὥστε ἅμα τῷ παύσασϑαι τὸν τύραννον συμβουλεύοντα αὐτοῖς μιαροϕαγῆσαι, πάντες διὰ μιᾶς ϕωνῆς ὁμοῦ ὥσπερ ἀπὸ τῆς αὐτῆς ψυχῆς εἶπον

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.