TITUS
Vetus Testamentum graece iuxta LXX interpretes
Part No. 558
Previous part

Chapter: 7 
Verse: 1    ῞Ωσπερ γὰρ ἄριστος κυβερνήτης ὁ τοῦ πατρὸς ἡμῶν Ελεαζαρου λογισμὸς πηδαλιουχῶν τὴν τῆς εὐσεβείας ναῦν ἐν τῷ τῶν παϑῶν πελάγει
Verse: 2    καὶ καταικιζόμενος ταῖς τοῦ τυράννου ἀπειλαῖς καὶ καταντλούμενος ταῖς τῶν βασάνων τρικυμίαις
Verse: 3    κατ' οὐδένα τρόπον ἔτρεψε τοὺς τῆς εὐσεβείας οἴακας, ἕως οὗ ἔπλευσεν ἐπὶ τὸν τῆς ἀϑανάτου νίκης λιμένα.
Verse: 4    οὐχ οὕτως πόλις πολλοῖς καὶ ποικίλοις μηχανήμασιν ἀντέσχε ποτὲ πολιορκουμένη, ὡς ὁ πανάγιος ἐκεῖνος. τὴν ἱερὰν ψυχὴν αἰκισμοῖς τε καὶ στρέβλαις πυρπολούμενος ἐνίκησεν τοὺς πολιορκοῦντας διὰ τὸν ὑπερασπίζοντα τῆς εὐσεβείας λογισμόν.
Verse: 5    ὥσπερ γὰρ πρόκρημνον ἄκραν τὴν ἑαυτοῦ διάνοιαν ὁ πατὴρ Ελεαζαρ ἐκτείνας περιέκλασεν τοὺς ἐπιμαινομένους τῶν παϑῶν κλύδωνας.
Verse: 6    ὦ ἄξιε τῆς ἱερωσύνης ἱερεῦ, οὐκ ἐμίανας τοὺς ἱεροὺς ὀδόντας οὐδὲ τὴν ϑεοσέβειαν καὶ καϑαρισμὸν χωρήσασαν γαστέρα ἐκοίνωσας μιαροϕαγίᾳ.
Verse: 7    ὦ σύμϕωνε νόμου καὶ ϕιλόσοϕε ϑείου βίου.
Verse: 8    τοιούτους δεῖ εἶναι τοὺς δημιουργοῦντας τὸν νόμον ἰδίῳ αἵματι καὶ γενναίῳ ἱδρῶτι τοῖς μέχρι ϑανάτου πάϑεσιν ὑπερασπίζοντας.
Verse: 9    σύ, πάτερ, τὴν εὐνομίαν ἡμῶν διὰ τῶν ὑπομονῶν εἰς δόξαν ἐκύρωσας καὶ τὴν ἁγιαστίαν σεμνολογήσας οὐ κατέλυσας καὶ διὰ τῶν ἔργων ἐπιστοποίησας τοὺς τῆς ϑείας ϕιλοσοϕίας σου λόγους,
Verse: 10    ὦ βασάνων βιαιότερε γέρων καὶ πυρὸς εὐτονώτερε πρεσβῦτα καὶ παϑῶν μέγιστε βασιλεῦ Ελεαζαρ.
Verse: 11    ὥσπερ γὰρ ὁ πατὴρ Ααρων τῷ ϑυμιατηρίῳ καϑωπλισμένος διὰ τοῦ ἐϑνοπλήϑους ἐπιτρέχων τὸν ἐμπυριστὴν ἐνίκησεν ἄγγελον,
Verse: 12    οὕτως ὁ Ααρωνίδης Ελεαζαρ διὰ τοῦ πυρὸς ὑπερτηκόμενος οὐ μετετράπη τὸν λογισμόν.
Verse: 13    καίτοι τὸ ϑαυμασιώτατον, γέρων ὢν λελυμένων μὲν ἤδη τῶν τοῦ σώματος τόνων, περικεχαλασμένων δὲ τῶν σαρκῶν, κεκμηκότων δὲ καὶ τῶν νεύρων ἀνενέασεν
Verse: 14    τῷ πνεύματι διὰ τοῦ λογισμοῦ καὶ τῷ Ισακίῳ λογισμῷ τὴν πολυκέϕαλον στρέβλαν ἠκύρωσεν.
Verse: 15    ὦ μακαρίου γήρως καὶ σεμνῆς πολιᾶς καὶ βίου νομίμου, ὃν πιστὴ ϑανάτου σϕραγὶς ἐτελείωσεν.
Verse: 16    Εἰ δὴ τοίνυν γέρων ἀνὴρ τῶν μέχρι ϑανάτου βασάνων περιεϕρόνει δι' εὐσέβειαν, ὁμολογουμένως ἡγεμών ἐστιν τῶν παϑῶν ὁ εὐσεβὴς λογισμός.
Verse: 17    ἴσως δ' ἂν εἴποιέν τινες Τῶν παϑῶν οὐ πάντες περικρατοῦσιν, ὅτι οὐδὲ πάντες ϕρόνιμον ἔχουσιν τὸν λογισμόν.
Verse: 18    ἀλλ' ὅσοι τῆς εὐσεβείας προνοοῦσιν ἐξ ὅλης καρδίας, οὗτοι μόνοι δύνανται κρατεῖν τῶν τῆς σαρκὸς παϑῶν
Verse: 19    πιστεύοντες ὅτι ϑεῷ οὐκ ἀποϑνῄσκουσιν, ὥσπερ οὐδὲ οἱ πατριάρχαι ἡμῶν Αβρααμ καὶ Ισαακ καὶ Ιακωβ, ἀλλὰ ζῶσιν τῷ ϑεῷ.
Verse: 20    οὐδὲν οὖν ἐναντιοῦται τὸ ϕαίνεσϑαί τινας παϑοκρατεῖσϑαι διὰ τὸν ἀσϑενῆ λογισμόν·
Verse: 21    ἐπεὶ τίς πρὸς ὅλον τὸν τῆς ϕιλοσοϕίας κανόνα ϕιλοσοϕῶν καὶ πεπιστευκὼς ϑεῷ
Verse: 22    καὶ εἰδὼς ὅτι διὰ τὴν ἀρετὴν πάντα πόνον ὑπομένειν μακάριόν ἐστιν, οὐκ ἂν περικρατήσειεν τῶν παϑῶν διὰ τὴν ϑεοσέβειαν;
Verse: 23    μόνος γὰρ ὁ σοϕὸς καὶ ἀνδρεῖός ἐστιν τῶν παϑῶν κύριος.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.