TITUS
Vetus Testamentum graece iuxta LXX interpretes
Part No. 1139
Previous part

Chapter: 23 
Verse: 1    Καὶ ἐγένετο λόγος κυρίου πρός με λέγων
Verse: 2    Υἱὲ ἀνϑρώπου, δύο γυναῖκες ἦσαν ϑυγατέρες μητρὸς μιᾶς
Verse: 3    καὶ ἐξεπόρνευσαν ἐν Αἰγύπτῳ ἐν τῇ νεότητι αὐτῶν· ἐκεῖ ἔπεσον οἱ μαστοὶ αὐτῶν, ἐκεῖ διεπαρϑενεύϑησαν.
Verse: 4    καὶ τὰ ὀνόματα αὐτῶν ἦν Οολα ἡ πρεσβυτέρα καὶ Οολιβα ἡ ἀδελϕὴ αὐτῆς. καὶ ἐγένοντό μοι καὶ ἔτεκον υἱοὺς καὶ ϑυγατέρας. καὶ τὰ ὀνόματα αὐτῶν· Σαμάρεια ἡ Οολα, καὶ Ιερουσαλημ ἡ Οολιβα.
Verse: 5    καὶ ἐξεπόρνευσεν ἡ Οολα ἀπ' ἐμοῦ καὶ ἐπέϑετο ἐπὶ τοὺς ἐραστὰς αὐτῆς, ἐπὶ τοὺς ᾽Ασσυρίους τοὺς ἐγγίζοντας αὐτῇ
Verse: 6    ἐνδεδυκότας ὑακίνϑινα, ἡγουμένους καὶ στρατηγούς· νεανίσκοι ἐπίλεκτοι πάντες, ἱππεῖς ἱππαζόμενοι ἐϕ' ἵππων.
Verse: 7    καὶ ἔδωκεν τὴν πορνείαν αὐτῆς ἐπ' αὐτούς· ἐπίλεκτοι υἱοὶ ᾽Ασσυρίων πάντες, καὶ ἐπὶ πάντας, οὓς ἐπέϑετο, ἐν πᾶσι τοῖς ἐνϑυμήμασιν αὐτῆς ἐμιαίνετο.
Verse: 8    καὶ τὴν πορνείαν αὐτῆς ἐξ Αἰγύπτου οὐκ ἐγκατέλιπεν, ὅτι μετ' αὐτῆς ἐκοιμῶντο ἐν νεότητι αὐτῆς, καὶ αὐτοὶ διεπαρϑένευσαν αὐτὴν καὶ ἐξέχεαν τὴν πορνείαν αὐτῶν ἐπ' αὐτήν.
Verse: 9    διὰ τοῦτο παρέδωκα αὐτὴν εἰς χεῖρας τῶν ἐραστῶν αὐτῆς, εἰς χεῖρας υἱῶν ᾽Ασσυρίων, ἐϕ' οὓς ἐπετίϑετο.
Verse: 10    αὐτοὶ ἀπεκάλυψαν τὴν αἰσχύνην αὐτῆς, υἱοὺς καὶ ϑυγατέρας αὐτῆς ἔλαβον καὶ αὐτὴν ἐν ῥομϕαίᾳ ἀπέκτειναν· καὶ ἐγένετο λάλημα εἰς γυναῖκας, καὶ ἐποίησαν ἐκδικήσεις ἐν αὐτῇ εἰς τὰς ϑυγατέρας.
Verse: 11    καὶ εἶδεν ἡ ἀδελϕὴ αὐτῆς Οολιβα καὶ διέϕϑειρε τὴν ἐπίϑεσιν αὐτῆς ὑπὲρ αὐτὴν καὶ τὴν πορνείαν αὐτῆς ὑπὲρ τὴν πορνείαν τῆς ἀδελϕῆς αὐτῆς.
Verse: 12    ἐπὶ τοὺς υἱοὺς τῶν ᾽Ασσυρίων ἐπέϑετο, ἡγουμένους καὶ στρατηγοὺς τοὺς ἐγγὺς αὐτῆς ἐνδεδυκότας εὐπάρυϕα, ἱππεῖς ἱππαζομένους ἐϕ' ἵππων· νεανίσκοι ἐπίλεκτοι πάντες.
Verse: 13    καὶ εἶδον ὅτι μεμίανται· ὁδὸς μία τῶν δύο.
Verse: 14    καὶ προσέϑετο πρὸς τὴν πορνείαν αὐτῆς καὶ εἶδεν ἄνδρας ἐζωγραϕημένους ἐπὶ τοῦ τοίχου, εἰκόνας Χαλδαίων, ἐζωγραϕημένους ἐν γραϕίδι
Verse: 15    ἐζωσμένους ποικίλματα ἐπὶ τὰς ὀσϕύας αὐτῶν, καὶ τιάραι βαπταὶ ἐπὶ τῶν κεϕαλῶν αὐτῶν, ὄψις τρισσὴ πάντων, ὁμοίωμα υἱῶν Χαλδαίων γῆς πατρίδος αὐτῶν,
Verse: 16    καὶ ἐπέϑετο ἐπ' αὐτοὺς τῇ ὁράσει ὀϕϑαλμῶν αὐτῆς καὶ ἐξαπέστειλεν ἀγγέλους πρὸς αὐτοὺς εἰς γῆν Χαλδαίων.
Verse: 17    καὶ ἤλϑοσαν πρὸς αὐτὴν υἱοὶ Βαβυλῶνος εἰς κοίτην καταλυόντων καὶ ἐμίαινον αὐτὴν ἐν τῇ πορνείᾳ αὐτῆς, καὶ ἐμιάνϑη ἐν αὐτοῖς· καὶ ἀπέστη ἡ ψυχὴ αὐτῆς ἀπ' αὐτῶν.
Verse: 18    καὶ ἀπεκάλυψεν τὴν πορνείαν αὐτῆς καὶ ἀπεκάλυψεν τὴν αἰσχύνην αὐτῆς, καὶ ἀπέστη ἡ ψυχή μου ἀπ' αὐτῆς, ὃν τρόπον ἀπέστη ἡ ψυχή μου ἀπὸ τῆς ἀδελϕῆς αὐτῆς.
Verse: 19    καὶ ἐπλήϑυνας τὴν πορνείαν σου τοῦ ἀναμνῆσαι ἡμέρας νεότητός σου, ἐν αἷς ἐπόρνευσας ἐν Αἰγύπτῳ,
Verse: 20    καὶ ἐπέϑου ἐπὶ τοὺς Χαλδαίους, ὧν ἦσαν ὡς ὄνων αἱ σάρκες αὐτῶν καὶ αἰδοῖα ἵππων τὰ αἰδοῖα αὐτῶν.
Verse: 21    καὶ ἐπεσκέψω τὴν ἀνομίαν νεότητός σου, ἃ ἐποίεις ἐν Αἰγύπτῳ ἐν τῷ καταλύματί σου, οὗ οἱ μαστοὶ νεότητός σου.
Verse: 22    διὰ τοῦτο, Οολιβα, τάδε λέγει κύριος ᾽Ιδοὺ ἐγὼ ἐξεγείρω τοὺς ἐραστάς σου ἐπὶ σέ, ἀϕ' ὧν ἀπέστη ἡ ψυχή σου ἀπ' αὐτῶν, καὶ ἐπάξω αὐτοὺς ἐπὶ σὲ κυκλόϑεν,
Verse: 23    υἱοὺς Βαβυλῶνος καὶ πάντας τοὺς Χαλδαίους, Φακουδ καὶ Σουε καὶ Κουε καὶ πάντας υἱοὺς ᾽Ασσυρίων μετ' αὐτῶν, νεανίσκους ἐπιλέκτους, ἡγεμόνας καὶ στρατηγοὺς πάντας, τρισσοὺς καὶ ὀνομαστοὺς ἱππεύοντας ἐϕ' ἵππων·
Verse: 24    καὶ πάντες ἥξουσιν ἐπὶ σὲ ἀπὸ βορρᾶ, ἅρματα καὶ τροχοὶ μετ' ὄχλου λαῶν, ϑυρεοὶ καὶ πέλται, καὶ βαλοῦσιν ϕυλακὴν ἐπὶ σὲ κύκλῳ· καὶ δώσω πρὸ προσώπου αὐτῶν κρίμα, καὶ ἐκδικήσουσίν σε ἐν τοῖς κρίμασιν αὐτῶν.
Verse: 25    καὶ δώσω τὸν ζῆλόν μου ἐν σοί, καὶ ποιήσουσιν μετὰ σοῦ ἐν ὀργῇ ϑυμοῦ· μυκτῆρά σου καὶ ὦτά σου ἀϕελοῦσιν καὶ τοὺς καταλοίπους σου ἐν ῥομϕαίᾳ καταβαλοῦσιν. αὐτοὶ υἱούς σου καὶ ϑυγατέρας σου λήμψονται, καὶ τοὺς καταλοίπους σου πῦρ καταϕάγεται.
Verse: 26    καὶ ἐκδύσουσίν σε τὸν ἱματισμόν σου καὶ λήμψονται τὰ σκεύη τῆς καυχήσεώς σου.
Verse: 27    καὶ ἀποστρέψω τὰς ἀσεβείας σου ἐκ σοῦ καὶ τὴν πορνείαν σου ἐκ γῆς Αἰγύπτου, καὶ οὐ μὴ ἄρῃς τοὺς ὀϕϑαλμούς σου ἐπ' αὐτοὺς καὶ Αἰγύπτου οὐ μὴ μνησϑῇς οὐκέτι.
Verse: 28    διότι τάδε λέγει κύριος κύριος ᾽Ιδοὺ ἐγὼ παραδίδωμί σε εἰς χεῖρας ὧν μισεῖς, ἀϕ' ὧν ἀπέστη ἡ ψυχή σου ἀπ' αὐτῶν·
Verse: 29    καὶ ποιήσουσιν ἐν σοὶ ἐν μίσει καὶ λήμψονται πάντας τοὺς πόνους σου καὶ τοὺς μόχϑους σου, καὶ ἔσῃ γυμνὴ καὶ ἀσχημονοῦσα, καὶ ἀποκαλυϕϑήσεται αἰσχύνη πορνείας σου καὶ ἀσέβειά σου. καὶ ἡ πορνεία σου
Verse: 30    ἐποίησεν ταῦτά σοι ἐν τῷ ἐκπορνεῦσαί σε ὀπίσω ἐϑνῶν καὶ ἐμιαίνου ἐν τοῖς ἐνϑυμήμασιν αὐτῶν.
Verse: 31    ἐν τῇ ὁδῷ τῆς ἀδελϕῆς σου ἐπορεύϑης, καὶ δώσω τὸ ποτήριον αὐτῆς εἰς χεῖράς σου.
Verse: 32    τάδε λέγει κύριος Τὸ ποτήριον τῆς ἀδελϕῆς σου πίεσαι τὸ βαϑὺ καὶ τὸ πλατὺ τὸ πλεονάζον τοῦ συντελέσαι
Verse: 33    μέϑην καὶ ἐκλύσεως πλησϑήσῃ· καὶ τὸ ποτήριον ἀϕανισμοῦ, ποτήριον ἀδελϕῆς σου Σαμαρείας,
Verse: 34    καὶ πίεσαι αὐτό· καὶ τὰς ἑορτὰς καὶ τὰς νεομηνίας αὐτῆς ἀποστρέψω· διότι ἐγὼ λελάληκα, λέγει κύριος.
Verse: 35    διὰ τοῦτο τάδε λέγει κύριος ᾽Ανϑ' ὧν ἐπελάϑου μου καὶ ἀπέρριψάς με ὀπίσω τοῦ σώματός σου, καὶ σὺ λαβὲ τὴν ἀσέβειάν σου καὶ τὴν πορνείαν σου.
Verse: 36    καὶ εἶπεν κύριος πρός με Υἱὲ ἀνϑρώπου, οὐ κρινεῖς τὴν Οολαν καὶ τὴν Οολιβαν; καὶ ἀπαγγελεῖς αὐταῖς τὰς ἀνομίας αὐτῶν,
Verse: 37    ὅτι ἐμοιχῶντο, καὶ αἷμα ἐν χερσὶν αὐτῶν· τὰ ἐνϑυμήματα αὐτῶν ἐμοιχῶντο καὶ τὰ τέκνα αὐτῶν, ἃ ἐγέννησάν μοι, διήγαγον αὐτοῖς δι' ἐμπύρων.
Verse: 38    ἕως καὶ ταῦτα ἐποίησάν μοι· τὰ ἅγιά μου ἐμίαινον καὶ τὰ σάββατά μου ἐβεβήλουν.
Verse: 39    καὶ ἐν τῷ σϕάζειν αὐτοὺς τὰ τέκνα αὐτῶν τοῖς εἰδώλοις αὐτῶν καὶ εἰσεπορεύοντο εἰς τὰ ἅγιά μου τοῦ βεβηλοῦν αὐτά· καὶ ὅτι οὕτως ἐποίουν ἐν μέσῳ τοῦ οἴκου μου.
Verse: 40    καὶ ὅτι τοῖς ἀνδράσιν τοῖς ἐρχομένοις μακρόϑεν, οἷς ἀγγέλους ἐξαπεστέλλοσαν πρὸς αὐτούς, καὶ ἅμα τῷ ἔρχεσϑαι αὐτοὺς εὐϑὺς ἐλούου καὶ ἐστιβίζου τοὺς ὀϕϑαλμούς σου καὶ ἐκόσμου κόσμῳ
Verse: 41    καὶ ἐκάϑου ἐπὶ κλίνης ἐστρωμένης, καὶ τράπεζα κεκοσμημένη πρὸ προσώπου αὐτῆς. καὶ τὸ ϑυμίαμά μου καὶ τὸ ἔλαιόν μου εὐϕραίνοντο ἐν αὐτοῖς.
Verse: 42    καὶ ϕωνὴν ἁρμονίας ἀνεκρούοντο· καὶ πρὸς ἄνδρας ἐκ πλήϑους ἀνϑρώπων ἥκοντας ἐκ τῆς ἐρήμου καὶ ἐδίδοσαν ψέλια ἐπὶ τὰς χεῖρας αὐτῶν καὶ στέϕανον καυχήσεως ἐπὶ τὰς κεϕαλὰς αὐτῶν.
Verse: 43    καὶ εἶπα Οὐκ ἐν τούτοις μοιχεύουσιν; καὶ ἔργα πόρνης καὶ αὐτὴ ἐξεπόρνευσεν.
Verse: 44    καὶ εἰσεπορεύοντο πρὸς αὐτήν, ὃν τρόπον εἰσπορεύονται πρὸς γυναῖκα πόρνην, οὕτως εἰσεπορεύοντο πρὸς Οολαν καὶ πρὸς Οολιβαν τοῦ ποιῆσαι ἀνομίαν.
Verse: 45    καὶ ἄνδρες δίκαιοι αὐτοὶ ἐκδικήσουσιν αὐτὰς ἐκδικήσει μοιχαλίδος καὶ ἐκδικήσει αἵματος, ὅτι μοιχαλίδες εἰσίν, καὶ αἷμα ἐν χερσὶν αὐτῶν.
Verse: 46    τάδε λέγει κύριος κύριος ᾽Ανάγαγε ἐπ' αὐτὰς ὄχλον καὶ δὸς ἐν αὐταῖς ταραχὴν καὶ διαρπαγὴν
Verse: 47    καὶ λιϑοβόλησον ἐπ' αὐτὰς λίϑοις ὄχλων καὶ κατακέντει αὐτὰς ἐν τοῖς ξίϕεσιν αὐτῶν· υἱοὺς αὐτῶν καὶ ϑυγατέρας αὐτῶν ἀποκτενοῦσι καὶ τοὺς οἴκους αὐτῶν ἐμπρήσουσιν.
Verse: 48    καὶ ἀποστρέψω ἀσέβειαν ἐκ τῆς γῆς, καὶ παιδευϑήσονται πᾶσαι αἱ γυναῖκες καὶ οὐ μὴ ποιήσουσιν κατὰ τὰς ἀσεβείας αὐτῶν.
Verse: 49    καὶ δοϑήσεται ἡ ἀσέβεια ὑμῶν ἐϕ' ὑμᾶς, καὶ τὰς ἁμαρτίας τῶν ἐνϑυμημάτων ὑμῶν λήμψεσϑε· καὶ γνώσεσϑε διότι ἐγὼ κύριος.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.