TITUS
Vetus Testamentum graece iuxta LXX interpretes
Part No. 1124
Previous part

Chapter: 8 
Verse: 1    Καὶ ἐγένετο ἐν τῷ ἕκτῳ ἔτει ἐν τῷ πέμπτῳ μηνὶ πέμπτῃ τοῦ μηνὸς ἐγὼ ἐκαϑήμην ἐν τῷ οἴκῳ, καὶ οἱ πρεσβύτεροι Ιουδα ἐκάϑηντο ἐνώπιόν μου, καὶ ἐγένετο ἐπ' ἐμὲ χεὶρ κυρίου,
Verse: 2    καὶ εἶδον καὶ ἰδοὺ ὁμοίωμα ἀνδρός, ἀπὸ τῆς ὀσϕύος αὐτοῦ καὶ ἕως κάτω πῦρ, καὶ ἀπὸ τῆς ὀσϕύος αὐτοῦ ὑπεράνω ὡς ὅρασις ἠλέκτρου.
Verse: 3    καὶ ἐξέτεινεν ὁμοίωμα χειρὸς καὶ ἀνέλαβέν με τῆς κορυϕῆς μου, καὶ ἀνέλαβέν με πνεῦμα ἀνὰ μέσον τῆς γῆς καὶ ἀνὰ μέσον τοῦ οὐρανοῦ καὶ ἤγαγέν με εἰς Ιερουσαλημ ἐν ὁράσει ϑεοῦ ἐπὶ τὰ πρόϑυρα τῆς πύλης τῆς ἐσωτέρας τῆς βλεπούσης πρὸς βορρᾶν, οὗ ἦν ἡ στήλη τοῦ κτωμένου.
Verse: 4    καὶ ἰδοὺ ἐκεῖ ἦν δόξα κυρίου ϑεοῦ Ισραηλ κατὰ τὴν ὅρασιν, ἣν εἶδον ἐν τῷ πεδίῳ.
Verse: 5    καὶ εἶπεν πρός με Υἱὲ ἀνϑρώπου, ἀνάβλεψον τοῖς ὀϕϑαλμοῖς σου πρὸς βορρᾶν· καὶ ἀνέβλεψα τοῖς ὀϕϑαλμοῖς μου πρὸς βορρᾶν, καὶ ἰδοὺ ἀπὸ βορρᾶ ἐπὶ τὴν πύλην τὴν πρὸς ἀνατολάς.
Verse: 6    καὶ εἶπεν πρός με Υἱὲ ἀνϑρώπου, ἑώρακας τί οὗτοι ποιοῦσιν; ἀνομίας μεγάλας ποιοῦσιν ὧδε τοῦ ἀπέχεσϑαι ἀπὸ τῶν ἁγίων μου· καὶ ἔτι ὄψει ἀνομίας μείζονας.
Verse: 7    καὶ εἰσήγαγέν με ἐπὶ τὰ πρόϑυρα τῆς αὐλῆς
Verse: 8    καὶ εἶπεν πρός με Υἱὲ ἀνϑρώπου, ὄρυξον· καὶ ὤρυξα, καὶ ἰδοὺ ϑύρα μία.
Verse: 9    καὶ εἶπεν πρός με Εἴσελϑε καὶ ἰδὲ τὰς ἀνομίας, ἃς οὗτοι ποιοῦσιν ὧδε·
Verse: 10    καὶ εἰσῆλϑον καὶ εἶδον καὶ ἰδοὺ μάταια βδελύγματα καὶ πάντα τὰ εἴδωλα οἴκου Ισραηλ διαγεγραμμένα ἐπ' αὐτοῦ κύκλῳ,
Verse: 11    καὶ ἑβδομήκοντα ἄνδρες ἐκ τῶν πρεσβυτέρων οἴκου Ισραηλ, καὶ Ιεζονιας ὁ τοῦ Σαϕαν ἐν μέσῳ αὐτῶν εἱστήκει πρὸ προσώπου αὐτῶν, καὶ ἕκαστος ϑυμιατήριον αὐτοῦ εἶχεν ἐν τῇ χειρί, καὶ ἡ ἀτμὶς τοῦ ϑυμιάματος ἀνέβαινεν.
Verse: 12    καὶ εἶπεν πρός με Υἱὲ ἀνϑρώπου, ἑώρακας ἃ οἱ πρεσβύτεροι τοῦ οἴκου Ισραηλ ποιοῦσιν, ἕκαστος αὐτῶν ἐν τῷ κοιτῶνι τῷ κρυπτῷ αὐτῶν; διότι εἶπαν Οὐχ ὁρᾷ ὁ κύριος, ἐγκαταλέλοιπεν κύριος τὴν γῆν.
Verse: 13    καὶ εἶπεν πρός με ῎Ετι ὄψει ἀνομίας μείζονας, ἃς οὗτοι ποιοῦσιν.
Verse: 14    καὶ εἰσήγαγέν με ἐπὶ τὰ πρόϑυρα τῆς πύλης οἴκου κυρίου τῆς βλεπούσης πρὸς βορρᾶν, καὶ ἰδοὺ ἐκεῖ γυναῖκες καϑήμεναι ϑρηνοῦσαι τὸν Θαμμουζ,
Verse: 15    καὶ εἶπεν πρός με Υἱὲ ἀνϑρώπου, ἑώρακας; καὶ ἔτι ὄψει ἐπιτηδεύματα μείζονα τούτων.
Verse: 16    καὶ εἰσήγαγέν με εἰς τὴν αὐλὴν οἴκου κυρίου τὴν ἐσωτέραν, καὶ ἰδοὺ ἐπὶ τῶν προϑύρων τοῦ ναοῦ κυρίου ἀνὰ μέσον τῶν αιλαμ καὶ ἀνὰ μέσον τοῦ ϑυσιαστηρίου ὡς εἴκοσι ἄνδρες, τὰ ὀπίσϑια αὐτῶν πρὸς τὸν ναὸν τοῦ κυρίου καὶ τὰ πρόσωπα αὐτῶν ἀπέναντι, καὶ οὗτοι προσκυνοῦσιν τῷ ἡλίῳ·
Verse: 17    καὶ εἶπεν πρός με ῾Εώρακας, υἱὲ ἀνϑρώπου; μὴ μικρὰ τῷ οἴκῳ Ιουδα τοῦ ποιεῖν τὰς ἀνομίας, ἃς πεποιήκασιν ὧδε; διότι ἔπλησαν τὴν γῆν ἀνομίας, καὶ ἰδοὺ αὐτοὶ ὡς μυκτηρίζοντες.
Verse: 18    καὶ ἐγὼ ποιήσω αὐτοῖς μετὰ ϑυμοῦ· οὐ ϕείσεται ὁ ὀϕϑαλμός μου, οὐδὲ μὴ ἐλεήσω.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.