TITUS
Vetus Testamentum graece iuxta LXX interpretes
Part No. 1123
Previous part

Chapter: 7 
Verse: 1    Καὶ ἐγένετο λόγος κυρίου πρός με λέγων
Verse: 2    Καὶ σύ, υἱὲ ἀνϑρώπου, εἰπόν Τάδε λέγει κύριος τῇ γῇ τοῦ Ισραηλ Πέρας ἥκει, τὸ πέρας ἥκει ἐπὶ τὰς τέσσαρας πτέρυγας τῆς γῆς·
Verse: 3    ἥκει τὸ πέρας
Verse: 4    ἐπὶ σὲ τὸν κατοικοῦντα τὴν γῆν, ἥκει ὁ καιρός, ἤγγικεν ἡ ἡμέρα, οὐ μετὰ ϑορύβων οὐδὲ μετὰ ὠδίνων.
Verse: 5    νῦν ἐγγύϑεν ἐκχεῶ τὴν ὀργήν μου ἐπὶ σὲ καὶ συντελέσω τὸν ϑυμόν μου ἐν σοὶ καὶ κρινῶ σε ἐν ταῖς ὁδοῖς σου καὶ δώσω ἐπὶ σὲ πάντα τὰ βδελύγματά σου·
Verse: 6    οὐ ϕείσεται ὁ ὀϕϑαλμός μου, οὐδὲ μὴ ἐλεήσω, διότι τὰς ὁδούς σου ἐπὶ σὲ δώσω, καὶ τὰ βδελύγματά σου ἐν μέσῳ σου ἔσονται, καὶ ἐπιγνώσῃ διότι ἐγώ εἰμι κύριος ὁ τύπτων.
Verse: 7    νῦν τὸ πέρας πρὸς σέ, καὶ ἀποστελῶ ἐγὼ ἐπὶ σὲ καὶ ἐκδικήσω σε ἐν ταῖς ὁδοῖς σου καὶ δώσω ἐπὶ σὲ πάντα τὰ βδελύγματά σου·
Verse: 8    οὐ ϕείσεται ὁ ὀϕϑαλμός μου ἐπὶ σέ, οὐδὲ μὴ ἐλεήσω, διότι τὴν ὁδόν σου ἐπὶ σὲ δώσω, καὶ τὰ βδελύγματά σου ἐν μέσῳ σου ἔσται· καὶ ἐπιγνώσῃ διότι ἐγὼ κύριος.
Verse: 9    διότι τάδε λέγει κύριος
Verse: 10    ᾽Ιδοὺ τὸ πέρας ἥκει, ἰδοὺ ἡμέρα κυρίου· εἰ καὶ ἡ ῥάβδος ἤνϑηκεν, ἡ ὕβρις ἐξανέστηκεν.
Verse: 11    καὶ συντρίψει στήριγμα ἀνόμου καὶ οὐ μετὰ ϑορύβου οὐδὲ μετὰ σπουδῆς.
Verse: 12    ἥκει ὁ καιρός, ἰδοὺ ἡ ἡμέρα· ὁ κτώμενος μὴ χαιρέτω, καὶ ὁ πωλῶν μὴ ϑρηνείτω·
Verse: 13    διότι ὁ κτώμενος πρὸς τὸν πωλοῦντα οὐκέτι μὴ ἐπιστρέψῃ, καὶ ἄνϑρωπος ἐν ὀϕϑαλμῷ ζωῆς αὐτοῦ οὐ κρατήσει.
Verse: 14    σαλπίσατε ἐν σάλπιγγι καὶ κρίνατε τὰ σύμπαντα.
Verse: 15    ὁ πόλεμος ἐν ῥομϕαίᾳ ἔξωϑεν, καὶ ὁ λιμὸς καὶ ὁ ϑάνατος ἔσωϑεν· ὁ ἐν τῷ πεδίῳ ἐν ῥομϕαίᾳ τελευτήσει, τοὺς δὲ ἐν τῇ πόλει λιμὸς καὶ ϑάνατος συντελέσει.
Verse: 16    καὶ ἀνασωϑήσονται οἱ ἀνασῳζόμενοι ἐξ αὐτῶν καὶ ἔσονται ἐπὶ τῶν ὀρέων· πάντας ἀποκτενῶ, ἕκαστον ἐν ταῖς ἀδικίαις αὐτοῦ.
Verse: 17    πᾶσαι χεῖρες ἐκλυϑήσονται, καὶ πάντες μηροὶ μολυνϑήσονται ὑγρασίᾳ,
Verse: 18    καὶ περιζώσονται σάκκους, καὶ καλύψει αὐτοὺς ϑάμβος, καὶ ἐπὶ πᾶν πρόσωπον αἰσχύνη ἐπ' αὐτούς, καὶ ἐπὶ πᾶσαν κεϕαλὴν ϕαλάκρωμα.
Verse: 19    τὸ ἀργύριον αὐτῶν ῥιϕήσεται ἐν ταῖς πλατείαις, καὶ τὸ χρυσίον αὐτῶν ὑπεροϕϑήσεται· αἱ ψυχαὶ αὐτῶν οὐ μὴ ἐμπλησϑῶσιν, καὶ αἱ κοιλίαι αὐτῶν οὐ μὴ πληρωϑῶσιν· διότι βάσανος τῶν ἀδικιῶν αὐτῶν ἐγένετο.
Verse: 20    ἐκλεκτὰ κόσμου εἰς ὑπερηϕανίαν ἔϑεντο αὐτὰ καὶ εἰκόνας τῶν βδελυγμάτων αὐτῶν ἐποίησαν ἐξ αὐτῶν· ἕνεκεν τούτου δέδωκα αὐτὰ αὐτοῖς εἰς ἀκαϑαρσίαν.
Verse: 21    καὶ παραδώσω αὐτὰ εἰς χεῖρας ἀλλοτρίων τοῦ διαρπάσαι αὐτὰ καὶ τοῖς λοιμοῖς τῆς γῆς εἰς σκῦλα, καὶ βεβηλώσουσιν αὐτά.
Verse: 22    καὶ ἀποστρέψω τὸ πρόσωπόν μου ἀπ' αὐτῶν, καὶ μιανοῦσιν τὴν ἐπισκοπήν μου καὶ εἰσελεύσονται εἰς αὐτὰ ἀϕυλάκτως καὶ βεβηλώσουσιν αὐτά·
Verse: 23    καὶ ποιήσουσι ϕυρμόν, διότι ἡ γῆ πλήρης λαῶν, καὶ ἡ πόλις πλήρης ἀνομίας.
Verse: 24    καὶ ἀποστρέψω τὸ ϕρύαγμα τῆς ἰσχύος αὐτῶν, καὶ μιανϑήσεται τὰ ἅγια αὐτῶν.
Verse: 25    ἐξιλασμὸς ἥξει καὶ ζητήσει εἰρήνην, καὶ οὐκ ἔσται.
Verse: 26    οὐαὶ ἐπὶ οὐαὶ ἔσται, καὶ ἀγγελία ἐπ' ἀγγελίαν ἔσται, καὶ ζητηϑήσεται ὅρασις ἐκ προϕήτου, καὶ νόμος ἀπολεῖται ἐξ ἱερέως καὶ βουλὴ ἐκ πρεσβυτέρων.
Verse: 27    ἄρχων ἐνδύσεται ἀϕανισμόν, καὶ αἱ χεῖρες τοῦ λαοῦ τῆς γῆς παραλυϑήσονται· κατὰ τὰς ὁδοὺς αὐτῶν ποιήσω αὐτοῖς καὶ ἐν τοῖς κρίμασιν αὐτῶν ἐκδικήσω αὐτούς· καὶ γνώσονται ὅτι ἐγὼ κύριος.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.