TITUS
Lancelot und Ginover I: Prosalancelot
Part No. 58
Previous part

Page: (124) 
Sentence: 766    Und wes sun ir sint, so ist das werlich das ir eins koniges sons hercz hant.
Sentence: 767    Ir hattet auch ein vatter der wol getorst bestan den hohesten man von der welt im sim rechte, so frum was er des libes und des herczen.« Also trost die frauw Lanceloten und wiset yn selb zu thun hübscheit und zucht und alles, das gúte kint zu recht thun sollent, als uns die history hernach wol gesaget die abenture von den spruchelinen die er gesprochen hatt.
Sentence: 768    - Nu sollen wir die rede alhie laßen von Lancelot und sollen sagen von syner mutter und von syner mumen, den zweyn koniginnen, die beid unfro sint zu Mönster Roal und unberaten, die ettwann rich waren und wol beraten.
Sentence: 769    Die history sagt uns das die koniginn Alene von Bonewig und ir schwester die koniginne Evaine von Gaune samet sin zu Munster Roal.
Sentence: 770    Die koniginn von Bonewig hett ein heiliges leben, allsolch hett ir schwester die koniginne von Gaune heilig leben und gutes.
Sentence: 771    Und das closter nam sere zu und beßert sich von zytt zu zytte und all tag teglich so sere das in den ersten sieben jaren wol drißig edelfrauwen darinn sich hetten begeben.
Sentence: 772    Und die koniginn Alene von Bonewig macht dasselb closter, und wart ein heubtcloster, und ir sitte was also, das sie alle tag teglich nach hochmeß ging siezen off denselben statt da ir herre was tot bliben, und off den lack da sie ir liebes kint verlorn hett, und laß weynende alles das gut gebet das sie kunde, irs mannes sele zu gnaden und irs kindes.
Sentence: 773    Es geschach an eim montag fru das die koniginn det singen ein meß von unsers herren geburt, irs mannes sele zu gnaden und irs kindes.
Sentence: 774    Da fronmesse gesungen was, da ging sie hinweg zu derselben stat da ir herre dot bliben was, und begund herticlich zu weynen und clagt yren herren ein lange wil.
Sentence: 775    Darnach ging sie off den lac und clagt ir kint, das sie verlorn hett sie enwust selb wie.
Sentence: 776    Das clagt sie gott von hymmel so lang das ein geistlich man kam rytende mit eim knappen.
Sentence: 777    Syn cleyder waren schwarcz und sin kapp was schwarcz.
Sentence: 778    Da er die frauwen so großen jamer sah machen, da wundert yn sere were die schön frauw were und warumb sie so großen jamer mechte.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.