TITUS
Lancelot und Ginover I: Prosalancelot
Part No. 41
Previous part

Page: (90) 
Sentence: 525    Wir wißen beyde wol das er hatt die blumen von aller ritterschafft alle tag teglich mit im war er fert.
Sentence: 526    Er ist so schön ein ritter und so wol gethan das yn alle die welt zu wunder besicht.
Sentence: 527    Auch ist er so starck, das ir keynen ritter findet der im glichen möge allerhande krafft zu thund.
Sentence: 528    Er ist auch so milte das kein man mag erdencken noch geachten das groß gut das er hinwegk gyt.
Sentence: 529    Allen sym gesind macht er spiel und freude, der gütste geselle von aller der welt ist er, armen lúten thut er groß gut, von allerhand gúte kan im nymant glichen.
Sentence: 530    Alle die fremden vavasore die im zukoment und des guts nit vil enhant und gut ritter sint, mit den ist alle sin gesellschafft, und dut yn groß gut und groß ere.
Sentence: 531    Das thut er alles umb synen briß zu meren zu gott und zu der welt.
Sentence: 532    Ich weiß wol das er den briß von der welt hatt, auch wene ich wol das er gottes mynne hatt und sin gracie, anders enmöcht er nit volbringen alles das er thut.
Sentence: 533    Mich duncket in mym sinne, und were er der unseligst von der welt, so enweiß ich keynen man der wiedder yn möcht geurlagen, so groß und so gut ist syn hilff, und so fest ist syn lant, und sin bürg sint so starck.
Sentence: 534    Welcher man den konig Artus urlagen sol, der muß me ritterschafft in sim lande han; er muß richer wesen, sin lant und sin burg mußen vester wesen, er muß beßer ritter sin.
Sentence: 535    Wo wolt ir den finden under dem hymmel?
Sentence: 536    Darumb wene ich wol das yn keyn man möcht geurlogen.
Sentence: 537    Ich weiß wol furware, da got so schön einen ritter macht, so guten und so rychen, den alle die welt forcht und minnet und sagt von syner gút, das er yn nymer leßt lestern noch vertriben von eren noch von gut noch von lib.
Sentence: 538    Und hett ich auch in der welt dheyn mag oder frunt der yn lestern oder im schaden wolt thun, ich wolt yn davor warnen, und mocht ich, und solt mirs auch schaden an dem lib oder an dem gut.« »Wie«, sprach Claudas, »woltestu im helffen wiedder mich der din recht herre bin?
Sentence: 539    Ich han dich rich gemacht!« »Herre«, sprach der knapp, »und wolt er uch zu unrecht urlagen, ich hulff uch biß an mynen dot.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.