TITUS
Lancelot und Ginover I: Prosalancelot
Part No. 33
Previous part

Page: (74) 
Sentence: 420    »Herre«, sprach er, »seht hien myn wette das ich nye verrettery zu uch gethet!« »Jhehet ir dann«, sprach Claudas, »das ir des koniges Bohorts kinde nit habent in uwer hutniß?« »Herre«, sprach Phariens nefe, »all hat er die kint, er thut uch da mit gnug das er es einen yglichen man wil thun lúckenen der yn zyhett das er dheyne verretery hab gethan gegen uch; und mere, wes er hie besprochen ist vor uch, des wil er sich entschuldigen fur uch, als ein gut man von recht sol.« »Er ist besprochen von des koniges Bohortes kinden das er sie me dann dru jar behalten hatt.
Sentence: 421    Wil er darwiedder icht sprechen, so stett alhie ein ritter und wils bezugen off yn das es war sy, mit synem lib off den syn.« »Herre«, sprach Phariens nefe, »hatt er sie behalten, da mit hat er keyn verretery gethan.
Sentence: 422    Es enwere auch in dißer burg keyn ritter so stolcz der sprech das er da mit verretniß hett gethan, ich wolt es yn thun lúgenen, wann er synes herren des konig Bohortes nye verleuckente noch syn manschafft ny offgab.
Sentence: 423    Al vertreib yn der konig syn herre; und me, wann er synes herren man was und die manschafft nye verwarft, so was er schuldig synem herren zu helffen, ob er lebte, und synen kinden, ob er sie hett.« Da sprach er zu synem oheim Phariens:
Sentence: 424    »Fart hinweg und weret uch der verretery der uch dißer ritter zyhett, wann ich wil uch des wern das das keyn verretery ist, ob ir uwers herren kint behalten hant vor ungemach.« Da er also sprach, da enwas nymant da der ichts darzu spreche, noch der ritter selbe der yn ane hett gesprochen umb verretery, dem was nicht als gach darzu als es im zum ersten was.
Sentence: 425    »Wie«, sprach Claudas, »wolt ir nicht me darzu thun?« »Ja ich, herre«, sprach er und gab dem konig syn wette das er sym herren hett gethan verrettery.
Sentence: 426    Und Phariens gab des dem konig auch das syn, das er des unschuldig were, und wolt yn zuhant lúgenhafftig machen off der stat.
Sentence: 427    Da sprach Claudas das sie sich beyde furen wapenen.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.