TITUS
Alexanderroman (Wernigeroder Handschrift)
Part No. 13
Previous part

Chapter: 20  
Alexander besiegt König Nycolaus


Verse: 393    Nu wüchs der jungelinch
Verse: 394    An allen tugenden frümmink,

Verse: 395    Daz er nü ubet ritterschaft,
Verse: 396    Und het uber treffig kraft

Verse: 397    An manlicher künst
Verse: 398    Gelert, daz er sünst

Verse: 399    Waz ain maister worden.
Verse: 400    Ritterlichen orden

Verse: 401    Wolt er treiben nach der ärt
Verse: 402    Und als er geborn ward,

Verse: 403    Und sprach: 'vater, ich wil
Verse: 404    Mich richten zu dem zil

Verse: 405    Daz ir und ich erkand
Verse: 406    Werdent in allew land.

Verse: 407    Wir wollent fürpaz raytten
Verse: 408    Und unser namen braiten:

Verse: 409    Daz zymt wol unserm reich
Verse: 410    Von Macedon sicherleich.

Verse: 411    Haißent mir beraiten --
Verse: 412    Ich wil nicht lenger payten --

Verse: 413    Volk daz zu streit tüg
Verse: 414    Und arbait vil erleiden müg:

Verse: 415    Mit dem so wil ich
Verse: 416    Ziehen, als ich mich

Verse: 417    Hann bedacht, in Palipon
Verse: 418    Daz künigreich, daz da riht schön

Verse: 419    Der künig Nycolaus.
Verse: 420    Er muß von mir süß

Verse: 421    Enpfahen krön und zepter:
Verse: 422    Er müß wißen wer

Verse: 423    Wir sind.' daz beschach,
Verse: 424    Daz man den jungelinch ziehen sach

Verse: 425    Auf den selben herren:
Verse: 426    Sein gewalt wolt er meren.

Verse: 427    Im enbot süzz
Verse: 428    Der kunig Nycolaus,

Verse: 429    Waz er maint da mit
Verse: 430    Daz er so mit unsytt

Verse: 431    Köm in sein land,
Verse: 432    Oder wie er wer genant.

Verse: 433    Er sprach: 'ich pin Philippen kind,
Verse: 434    Dez künigs von Macedon: dem sind

Verse: 435    Von reht und pilleich undertann
Verse: 436    Ewr reich, daz ir sie von im hänn

Verse: 437    Sult zu lehen:
Verse: 438    Dez haist er euch flehen

Verse: 439    Daz ir ez von im enpfaht.'
Verse: 440    Dem künig die red versmaht

Verse: 441    Und hiez sagen Allexandro
Verse: 442    Daz er in liez der weil do

Verse: 443    Und nit so höch gedecht:
Verse: 444    Er moht vil leiht gesmeht

Verse: 445    Werden in der jugent sein,
Verse: 446    Da von er in dem alter pein

Verse: 447    Leyden müst und nider seigen:
Verse: 448    'Du solt nicht als hoch steigen,

Verse: 449    E dir gewachs daz gefider,
Verse: 450    Oder du vellest der nider.'

Verse: 451    Dez antbürt de zu hant
Verse: 452    Allexander der weigant:

Verse: 453    'Wie clain ich nü dunk dich,
Verse: 454    Vil leiht went die götter mich

Verse: 455    Erhöchen, daz ich straff die
Verse: 456    Die zu hoch sind komen ye.

Verse: 457    Dar umb solt du dir für nemen
Verse: 458    Der zwaier ains, daz dir gezemen

Verse: 459    Müg: piz mir undertann,
Verse: 460    Oder du müst mich bestann

Verse: 461    Mit streit.' da ward beschaiden
Verse: 462    Ain tag under in payden.

Verse: 463    Auf den tag sie koment dar.
Verse: 464    Künig Nycolaus dez lebens war

Verse: 465    Ward von dem jungen herren.
Verse: 466    Dar umb müst sich meren

Verse: 467    Sein lob und ere brait.
Verse: 468    Zu hand ward im auf gelait

Verse: 469    Die kron in dem selben land,
Verse: 470    Mit der er on schand

Verse: 471    Für zu dem vater sein.



Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.