TITUS
Ulrich von Eschenbach, Alexander
Part No. 218
Previous part

Chapter: 281  
Alexander kauft Nahrungsmittel


Verse: 25834       dar nâch der fürste kam in ein lant,

Verse: 25835    Dô er von dem walde reit,
Verse: 25836    daʒ was eben unde breit.

Verse: 25837    manic waʒʒer vant er dâ vlieʒen,
Verse: 25838    gar lustlich erdieʒen.

Verse: 25839    dâ hieʒ der fürste sîn gezelt
Verse: 25840    aldâ berihten ûf daʒ velt.

Verse: 25841    sie dûhte sie heten gewunnen,
Verse: 25842    daʒ sie dem walde entrunnen

Verse: 25843    wârn und ûʒ der herte komen.
Verse: 25844    Alexander schaden het genomen

Verse: 25845    an liuten, die er clagte.
Verse: 25846    dô hieʒ der unverzagte

Verse: 25847    boten senden ûf daʒ lant,
Verse: 25848    daʒ im die tæten bekant,

Verse: 25849    ob sie erwerben möhten
Verse: 25850    inder kost, der sie töhten

Verse: 25851    gezemen ze spîse:
Verse: 25852    doch het sich der wîse

Verse: 25853    mit kost ûf die strâʒe
Verse: 25854    beriht in der mâʒe,

Verse: 25855    daʒ der niht gâhes im gebrach.
Verse: 25856    ûf dem waʒʒer er sach

Verse: 25857    ein schif ungefuoge grôʒ,
Verse: 25858    daʒ vast gegen im ze tal vlôʒ,

Verse: 25859    daʒ aller hande spîse genuoc
Verse: 25860    und vil guotes trankes truoc.

Verse: 25861    daʒ schif dâ ankert gegen dem hêr,
Verse: 25862    dar ûʒ trat ein heiden hêr,

Verse: 25863    der rief her über an daʒ lant,
Verse: 25864    ob im dâ vride wær benant,

Verse: 25865    sô wolt er verkoufen dâ;
Verse: 25866    wær des niht, er vüere anderswâ.

Verse: 25867    dâ gebôt im der künic vride
Verse: 25868    bî dem swert und bî der wide;

Verse: 25869    wer im iht arges tæte
Verse: 25870    daʒ der niht ze bîten hæte,

Verse: 25871    niwan daʒ er sîn leben
Verse: 25872    dâ vür ze gelde müeste geben.

Verse: 25873    Alexander einen siten hêt,
Verse: 25874    der allen künegen noch wol anstêt:

Verse: 25875    wem er sînen vride sprach,
Verse: 25876    wer den mit einem wort brach,

Verse: 25877    der muoste lîden den tôt,
Verse: 25878    nieman moht in von der nôt

Verse: 25879    noch der vreise erwern,
Verse: 25880    kein guot moht in niht ernern;

Verse: 25881    ob er des hæte vil ze geben,
Verse: 25882    er muosteʒ gelten mit dem leben.

Verse: 25883    daʒ reht Alexander hât.
Verse: 25884    daʒ schif brâht in allen rât.

Verse: 25885    der wart mit volleclîcher habe
Verse: 25886    dem koufman vergolten abe.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.